| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ಪುಗ್ಗಲಪ್ಪಸಾದಸುತ್ತಂ
10. Puggalappasādasuttaṃ
೨೫೦. ‘‘ಪಞ್ಚಿಮೇ , ಭಿಕ್ಖವೇ, ಆದೀನವಾ ಪುಗ್ಗಲಪ್ಪಸಾದೇ। ಕತಮೇ ಪಞ್ಚ? ಯಸ್ಮಿಂ, ಭಿಕ್ಖವೇ, ಪುಗ್ಗಲೇ ಪುಗ್ಗಲೋ ಅಭಿಪ್ಪಸನ್ನೋ ಹೋತಿ, ಸೋ ತಥಾರೂಪಂ ಆಪತ್ತಿಂ ಆಪನ್ನೋ ಹೋತಿ ಯಥಾರೂಪಾಯ ಆಪತ್ತಿಯಾ ಸಙ್ಘೋ ಉಕ್ಖಿಪತಿ। ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಪಿಯೋ ಮನಾಪೋ ಸೋ ಸಙ್ಘೇನ ಉಕ್ಖಿತ್ತೋ’ತಿ। ಭಿಕ್ಖೂಸು ಅಪ್ಪಸಾದಬಹುಲೋ ಹೋತಿ। ಭಿಕ್ಖೂಸು ಅಪ್ಪಸಾದಬಹುಲೋ ಸಮಾನೋ ಅಞ್ಞೇ ಭಿಕ್ಖೂ ನ ಭಜತಿ। ಅಞ್ಞೇ ಭಿಕ್ಖೂ ಅಭಜನ್ತೋ ಸದ್ಧಮ್ಮಂ ನ ಸುಣಾತಿ। ಸದ್ಧಮ್ಮಂ ಅಸುಣನ್ತೋ ಸದ್ಧಮ್ಮಾ ಪರಿಹಾಯತಿ। ಅಯಂ, ಭಿಕ್ಖವೇ, ಪಠಮೋ ಆದೀನವೋ ಪುಗ್ಗಲಪ್ಪಸಾದೇ।
250. ‘‘Pañcime , bhikkhave, ādīnavā puggalappasāde. Katame pañca? Yasmiṃ, bhikkhave, puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ukkhipati. Tassa evaṃ hoti – ‘yo kho myāyaṃ puggalo piyo manāpo so saṅghena ukkhitto’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, paṭhamo ādīnavo puggalappasāde.
‘‘ಪುನ ಚಪರಂ, ಭಿಕ್ಖವೇ, ಯಸ್ಮಿಂ ಪುಗ್ಗಲೇ ಪುಗ್ಗಲೋ ಅಭಿಪ್ಪಸನ್ನೋ ಹೋತಿ, ಸೋ ತಥಾರೂಪಂ ಆಪತ್ತಿಂ ಆಪನ್ನೋ ಹೋತಿ ಯಥಾರೂಪಾಯ ಆಪತ್ತಿಯಾ ಸಙ್ಘೋ ಅನ್ತೇ ನಿಸೀದಾಪೇತಿ । ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಪಿಯೋ ಮನಾಪೋ ಸೋ ಸಙ್ಘೇನ ಅನ್ತೇ ನಿಸೀದಾಪಿತೋ’ತಿ। ಭಿಕ್ಖೂಸು ಅಪ್ಪಸಾದಬಹುಲೋ ಹೋತಿ। ಭಿಕ್ಖೂಸು ಅಪ್ಪಸಾದಬಹುಲೋ ಸಮಾನೋ ಅಞ್ಞೇ ಭಿಕ್ಖೂ ನ ಭಜತಿ। ಅಞ್ಞೇ ಭಿಕ್ಖೂ ಅಭಜನ್ತೋ ಸದ್ಧಮ್ಮಂ ನ ಸುಣಾತಿ। ಸದ್ಧಮ್ಮಂ ಅಸುಣನ್ತೋ ಸದ್ಧಮ್ಮಾ ಪರಿಹಾಯತಿ। ಅಯಂ, ಭಿಕ್ಖವೇ, ದುತಿಯೋ ಆದೀನವೋ ಪುಗ್ಗಲಪ್ಪಸಾದೇ।
‘‘Puna caparaṃ, bhikkhave, yasmiṃ puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ante nisīdāpeti . Tassa evaṃ hoti – ‘yo kho myāyaṃ puggalo piyo manāpo so saṅghena ante nisīdāpito’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, dutiyo ādīnavo puggalappasāde.
‘‘ಪುನ ಚಪರಂ, ಭಿಕ್ಖವೇ, ಯಸ್ಮಿಂ ಪುಗ್ಗಲೇ ಪುಗ್ಗಲೋ ಅಭಿಪ್ಪಸನ್ನೋ ಹೋತಿ, ಸೋ ದಿಸಾಪಕ್ಕನ್ತೋ ಹೋತಿ…ಪೇ॰… ಸೋ ವಿಬ್ಭನ್ತೋ ಹೋತಿ…ಪೇ॰… ಸೋ ಕಾಲಙ್ಕತೋ ಹೋತಿ। ತಸ್ಸ ಏವಂ ಹೋತಿ – ‘ಯೋ ಖೋ ಮ್ಯಾಯಂ ಪುಗ್ಗಲೋ ಪಿಯೋ ಮನಾಪೋ ಸೋ ಕಾಲಙ್ಕತೋ’ತಿ। ಅಞ್ಞೇ ಭಿಕ್ಖೂ ನ ಭಜತಿ। ಅಞ್ಞೇ ಭಿಕ್ಖೂ ಅಭಜನ್ತೋ ಸದ್ಧಮ್ಮಂ ನ ಸುಣಾತಿ। ಸದ್ಧಮ್ಮಂ ಅಸುಣನ್ತೋ ಸದ್ಧಮ್ಮಾ ಪರಿಹಾಯತಿ। ಅಯಂ, ಭಿಕ್ಖವೇ, ಪಞ್ಚಮೋ ಆದೀನವೋ ಪುಗ್ಗಲಪ್ಪಸಾದೇ। ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ಪುಗ್ಗಲಪ್ಪಸಾದೇ’’ತಿ। ದಸಮಂ।
‘‘Puna caparaṃ, bhikkhave, yasmiṃ puggale puggalo abhippasanno hoti, so disāpakkanto hoti…pe… so vibbhanto hoti…pe… so kālaṅkato hoti. Tassa evaṃ hoti – ‘yo kho myāyaṃ puggalo piyo manāpo so kālaṅkato’ti. Aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, pañcamo ādīnavo puggalappasāde. Ime kho, bhikkhave, pañca ādīnavā puggalappasāde’’ti. Dasamaṃ.
ದುಚ್ಚರಿತವಗ್ಗೋ ಪಞ್ಚಮೋ।
Duccaritavaggo pañcamo.
ತಸ್ಸುದ್ದಾನಂ –
Tassuddānaṃ –
ದುಚ್ಚರಿತಂ ಕಾಯದುಚ್ಚರಿತಂ, ವಚೀದುಚ್ಚರಿತಂ ಮನೋದುಚ್ಚರಿತಂ।
Duccaritaṃ kāyaduccaritaṃ, vacīduccaritaṃ manoduccaritaṃ;
ಚತೂಹಿ ಪರೇ ದ್ವೇ ಸಿವಥಿಕಾ, ಪುಗ್ಗಲಪ್ಪಸಾದೇನ ಚಾತಿ॥
Catūhi pare dve sivathikā, puggalappasādena cāti.
ಪಞ್ಚಮಪಣ್ಣಾಸಕಂ ಸಮತ್ತಂ।
Pañcamapaṇṇāsakaṃ samattaṃ.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ಪುಗ್ಗಲಪ್ಪಸಾದಸುತ್ತವಣ್ಣನಾ • 10. Puggalappasādasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೧೦. ಪಠಮದೀಘಚಾರಿಕಸುತ್ತಾದಿವಣ್ಣನಾ • 1-10. Paṭhamadīghacārikasuttādivaṇṇanā
