| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. පුග්‌ගලප්‌පසාදසුත්‌තං
10. Puggalappasādasuttaṃ
250. ‘‘පඤ්‌චිමෙ , භික්‌ඛවෙ, ආදීනවා පුග්‌ගලප්‌පසාදෙ. කතමෙ පඤ්‌ච? යස්‌මිං, භික්‌ඛවෙ, පුග්‌ගලෙ පුග්‌ගලො අභිප්‌පසන්‌නො හොති, සො තථාරූපං ආපත්‌තිං ආපන්‌නො හොති යථාරූපාය ආපත්‌තියා සඞ්‌ඝො උක්‌ඛිපති. තස්‌ස එවං හොති – ‘යො ඛො ම්‍යායං පුග්‌ගලො පියො මනාපො සො සඞ්‌ඝෙන උක්‌ඛිත්‌තො’ති. භික්‌ඛූසු අප්‌පසාදබහුලො හොති. භික්‌ඛූසු අප්‌පසාදබහුලො සමානො අඤ්‌ඤෙ භික්‌ඛූ න භජති. අඤ්‌ඤෙ භික්‌ඛූ අභජන්‌තො සද්‌ධම්‌මං න සුණාති. සද්‌ධම්‌මං අසුණන්‌තො සද්‌ධම්‌මා පරිහායති. අයං, භික්‌ඛවෙ, පඨමො ආදීනවො පුග්‌ගලප්‌පසාදෙ.
250. ‘‘Pañcime , bhikkhave, ādīnavā puggalappasāde. Katame pañca? Yasmiṃ, bhikkhave, puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ukkhipati. Tassa evaṃ hoti – ‘yo kho myāyaṃ puggalo piyo manāpo so saṅghena ukkhitto’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, paṭhamo ādīnavo puggalappasāde.
‘‘පුන චපරං, භික්‌ඛවෙ, යස්‌මිං පුග්‌ගලෙ පුග්‌ගලො අභිප්‌පසන්‌නො හොති, සො තථාරූපං ආපත්‌තිං ආපන්‌නො හොති යථාරූපාය ආපත්‌තියා සඞ්‌ඝො අන්‌තෙ නිසීදාපෙති . තස්‌ස එවං හොති – ‘යො ඛො ම්‍යායං පුග්‌ගලො පියො මනාපො සො සඞ්‌ඝෙන අන්‌තෙ නිසීදාපිතො’ති. භික්‌ඛූසු අප්‌පසාදබහුලො හොති. භික්‌ඛූසු අප්‌පසාදබහුලො සමානො අඤ්‌ඤෙ භික්‌ඛූ න භජති. අඤ්‌ඤෙ භික්‌ඛූ අභජන්‌තො සද්‌ධම්‌මං න සුණාති. සද්‌ධම්‌මං අසුණන්‌තො සද්‌ධම්‌මා පරිහායති. අයං, භික්‌ඛවෙ, දුතියො ආදීනවො පුග්‌ගලප්‌පසාදෙ.
‘‘Puna caparaṃ, bhikkhave, yasmiṃ puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ante nisīdāpeti . Tassa evaṃ hoti – ‘yo kho myāyaṃ puggalo piyo manāpo so saṅghena ante nisīdāpito’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, dutiyo ādīnavo puggalappasāde.
‘‘පුන චපරං, භික්‌ඛවෙ, යස්‌මිං පුග්‌ගලෙ පුග්‌ගලො අභිප්‌පසන්‌නො හොති, සො දිසාපක්‌කන්‌තො හොති…පෙ.… සො විබ්‌භන්‌තො හොති…පෙ.… සො කාලඞ්‌කතො හොති. තස්‌ස එවං හොති – ‘යො ඛො ම්‍යායං පුග්‌ගලො පියො මනාපො සො කාලඞ්‌කතො’ති. අඤ්‌ඤෙ භික්‌ඛූ න භජති. අඤ්‌ඤෙ භික්‌ඛූ අභජන්‌තො සද්‌ධම්‌මං න සුණාති. සද්‌ධම්‌මං අසුණන්‌තො සද්‌ධම්‌මා පරිහායති. අයං, භික්‌ඛවෙ, පඤ්‌චමො ආදීනවො පුග්‌ගලප්‌පසාදෙ. ඉමෙ ඛො, භික්‌ඛවෙ, පඤ්‌ච ආදීනවා පුග්‌ගලප්‌පසාදෙ’’ති. දසමං.
‘‘Puna caparaṃ, bhikkhave, yasmiṃ puggale puggalo abhippasanno hoti, so disāpakkanto hoti…pe… so vibbhanto hoti…pe… so kālaṅkato hoti. Tassa evaṃ hoti – ‘yo kho myāyaṃ puggalo piyo manāpo so kālaṅkato’ti. Aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, pañcamo ādīnavo puggalappasāde. Ime kho, bhikkhave, pañca ādīnavā puggalappasāde’’ti. Dasamaṃ.
දුච්‌චරිතවග්‌ගො පඤ්‌චමො.
Duccaritavaggo pañcamo.
තස්‌සුද්‌දානං –
Tassuddānaṃ –
දුච්‌චරිතං කායදුච්‌චරිතං, වචීදුච්‌චරිතං මනොදුච්‌චරිතං;
Duccaritaṃ kāyaduccaritaṃ, vacīduccaritaṃ manoduccaritaṃ;
චතූහි පරෙ ද්‌වෙ සිවථිකා, පුග්‌ගලප්‌පසාදෙන චාති.
Catūhi pare dve sivathikā, puggalappasādena cāti.
පඤ්‌චමපණ්‌ණාසකං සමත්‌තං.
Pañcamapaṇṇāsakaṃ samattaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 10. පුග්‌ගලප්‌පසාදසුත්‌තවණ්‌ණනා • 10. Puggalappasādasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. පඨමදීඝචාරිකසුත්‌තාදිවණ්‌ණනා • 1-10. Paṭhamadīghacārikasuttādivaṇṇanā
