| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൧൦. പുഗ്ഗലപ്പസാദസുത്തം
10. Puggalappasādasuttaṃ
൨൫൦. ‘‘പഞ്ചിമേ , ഭിക്ഖവേ, ആദീനവാ പുഗ്ഗലപ്പസാദേ. കതമേ പഞ്ച? യസ്മിം, ഭിക്ഖവേ, പുഗ്ഗലേ പുഗ്ഗലോ അഭിപ്പസന്നോ ഹോതി, സോ തഥാരൂപം ആപത്തിം ആപന്നോ ഹോതി യഥാരൂപായ ആപത്തിയാ സങ്ഘോ ഉക്ഖിപതി. തസ്സ ഏവം ഹോതി – ‘യോ ഖോ മ്യായം പുഗ്ഗലോ പിയോ മനാപോ സോ സങ്ഘേന ഉക്ഖിത്തോ’തി. ഭിക്ഖൂസു അപ്പസാദബഹുലോ ഹോതി. ഭിക്ഖൂസു അപ്പസാദബഹുലോ സമാനോ അഞ്ഞേ ഭിക്ഖൂ ന ഭജതി. അഞ്ഞേ ഭിക്ഖൂ അഭജന്തോ സദ്ധമ്മം ന സുണാതി. സദ്ധമ്മം അസുണന്തോ സദ്ധമ്മാ പരിഹായതി. അയം, ഭിക്ഖവേ, പഠമോ ആദീനവോ പുഗ്ഗലപ്പസാദേ.
250. ‘‘Pañcime , bhikkhave, ādīnavā puggalappasāde. Katame pañca? Yasmiṃ, bhikkhave, puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ukkhipati. Tassa evaṃ hoti – ‘yo kho myāyaṃ puggalo piyo manāpo so saṅghena ukkhitto’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, paṭhamo ādīnavo puggalappasāde.
‘‘പുന ചപരം, ഭിക്ഖവേ, യസ്മിം പുഗ്ഗലേ പുഗ്ഗലോ അഭിപ്പസന്നോ ഹോതി, സോ തഥാരൂപം ആപത്തിം ആപന്നോ ഹോതി യഥാരൂപായ ആപത്തിയാ സങ്ഘോ അന്തേ നിസീദാപേതി . തസ്സ ഏവം ഹോതി – ‘യോ ഖോ മ്യായം പുഗ്ഗലോ പിയോ മനാപോ സോ സങ്ഘേന അന്തേ നിസീദാപിതോ’തി. ഭിക്ഖൂസു അപ്പസാദബഹുലോ ഹോതി. ഭിക്ഖൂസു അപ്പസാദബഹുലോ സമാനോ അഞ്ഞേ ഭിക്ഖൂ ന ഭജതി. അഞ്ഞേ ഭിക്ഖൂ അഭജന്തോ സദ്ധമ്മം ന സുണാതി. സദ്ധമ്മം അസുണന്തോ സദ്ധമ്മാ പരിഹായതി. അയം, ഭിക്ഖവേ, ദുതിയോ ആദീനവോ പുഗ്ഗലപ്പസാദേ.
‘‘Puna caparaṃ, bhikkhave, yasmiṃ puggale puggalo abhippasanno hoti, so tathārūpaṃ āpattiṃ āpanno hoti yathārūpāya āpattiyā saṅgho ante nisīdāpeti . Tassa evaṃ hoti – ‘yo kho myāyaṃ puggalo piyo manāpo so saṅghena ante nisīdāpito’ti. Bhikkhūsu appasādabahulo hoti. Bhikkhūsu appasādabahulo samāno aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, dutiyo ādīnavo puggalappasāde.
‘‘പുന ചപരം, ഭിക്ഖവേ, യസ്മിം പുഗ്ഗലേ പുഗ്ഗലോ അഭിപ്പസന്നോ ഹോതി, സോ ദിസാപക്കന്തോ ഹോതി…പേ॰… സോ വിബ്ഭന്തോ ഹോതി…പേ॰… സോ കാലങ്കതോ ഹോതി. തസ്സ ഏവം ഹോതി – ‘യോ ഖോ മ്യായം പുഗ്ഗലോ പിയോ മനാപോ സോ കാലങ്കതോ’തി. അഞ്ഞേ ഭിക്ഖൂ ന ഭജതി. അഞ്ഞേ ഭിക്ഖൂ അഭജന്തോ സദ്ധമ്മം ന സുണാതി. സദ്ധമ്മം അസുണന്തോ സദ്ധമ്മാ പരിഹായതി. അയം, ഭിക്ഖവേ, പഞ്ചമോ ആദീനവോ പുഗ്ഗലപ്പസാദേ. ഇമേ ഖോ, ഭിക്ഖവേ, പഞ്ച ആദീനവാ പുഗ്ഗലപ്പസാദേ’’തി. ദസമം.
‘‘Puna caparaṃ, bhikkhave, yasmiṃ puggale puggalo abhippasanno hoti, so disāpakkanto hoti…pe… so vibbhanto hoti…pe… so kālaṅkato hoti. Tassa evaṃ hoti – ‘yo kho myāyaṃ puggalo piyo manāpo so kālaṅkato’ti. Aññe bhikkhū na bhajati. Aññe bhikkhū abhajanto saddhammaṃ na suṇāti. Saddhammaṃ asuṇanto saddhammā parihāyati. Ayaṃ, bhikkhave, pañcamo ādīnavo puggalappasāde. Ime kho, bhikkhave, pañca ādīnavā puggalappasāde’’ti. Dasamaṃ.
ദുച്ചരിതവഗ്ഗോ പഞ്ചമോ.
Duccaritavaggo pañcamo.
തസ്സുദ്ദാനം –
Tassuddānaṃ –
ദുച്ചരിതം കായദുച്ചരിതം, വചീദുച്ചരിതം മനോദുച്ചരിതം;
Duccaritaṃ kāyaduccaritaṃ, vacīduccaritaṃ manoduccaritaṃ;
ചതൂഹി പരേ ദ്വേ സിവഥികാ, പുഗ്ഗലപ്പസാദേന ചാതി.
Catūhi pare dve sivathikā, puggalappasādena cāti.
പഞ്ചമപണ്ണാസകം സമത്തം.
Pañcamapaṇṇāsakaṃ samattaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൧൦. പുഗ്ഗലപ്പസാദസുത്തവണ്ണനാ • 10. Puggalappasādasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧-൧൦. പഠമദീഘചാരികസുത്താദിവണ്ണനാ • 1-10. Paṭhamadīghacārikasuttādivaṇṇanā
