| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. পুগ্গলস্সেৰকথিনত্থারো
5. Puggalassevakathinatthāro
৪১৪. সঙ্ঘো কথিনং অত্থরতি, গণো কথিনং অত্থরতি, পুগ্গলো কথিনং অত্থরতীতি। ন সঙ্ঘো কথিনং অত্থরতি, ন গণো কথিনং অত্থরতি, পুগ্গলো কথিনং অত্থরতীতি। হঞ্চি ন সঙ্ঘো কথিনং অত্থরতি, ন গণো কথিনং অত্থরতি, পুগ্গলো কথিনং অত্থরতি। সঙ্ঘস্স অনত্থতং হোতি কথিনং, গণস্স অনত্থতং হোতি কথিনং, পুগ্গলস্স অত্থতং হোতি কথিনং। সঙ্ঘো পাতিমোক্খং উদ্দিসতি গণো পাতিমোক্খং উদ্দিসতি পুগ্গলো পাতিমোক্খং উদ্দিসতীতি ন সঙ্ঘো পাতিমোক্খং উদ্দিসতি, ন গণো পাতিমোক্খং উদ্দিসতি, পুগ্গলো পাতিমোক্খং উদ্দিসতীতি। হঞ্চি ন সঙ্ঘো পাতিমোক্খং উদ্দিসতি, ন গণো পাতিমোক্খং উদ্দিসতি, পুগ্গলো পাতিমোক্খং উদ্দিসতি। সঙ্ঘস্স অনুদ্দিট্ঠং হোতি পাতিমোক্খং, গণস্স অনুদ্দিট্ঠং হোতি পাতিমোক্খং, পুগ্গলস্স উদ্দিট্ঠং হোতি পাতিমোক্খং। সঙ্ঘস্স সামগ্গিযা গণস্স সামগ্গিযা পুগ্গলস্স উদ্দেসা সঙ্ঘস্স উদ্দিট্ঠং হোতি পাতিমোক্খং, গণস্স উদ্দিট্ঠং হোতি পাতিমোক্খং, পুগ্গলস্স উদ্দিট্ঠং হোতি পাতিমোক্খং। এৰমেৰ ন সঙ্ঘো কথিনং অত্থরতি, ন গণো কথিনং অত্থরতি, পুগ্গলো কথিনং অত্থরতি। সঙ্ঘস্স অনুমোদনায গণস্স অনুমোদনায পুগ্গলস্স অত্থারা সঙ্ঘস্স অত্থতং হোতি কথিনং, গণস্স অত্থতং হোতি কথিনং, পুগ্গলস্স অত্থতং হোতি কথিনন্তি।
414. Saṅgho kathinaṃ attharati, gaṇo kathinaṃ attharati, puggalo kathinaṃ attharatīti. Na saṅgho kathinaṃ attharati, na gaṇo kathinaṃ attharati, puggalo kathinaṃ attharatīti. Hañci na saṅgho kathinaṃ attharati, na gaṇo kathinaṃ attharati, puggalo kathinaṃ attharati. Saṅghassa anatthataṃ hoti kathinaṃ, gaṇassa anatthataṃ hoti kathinaṃ, puggalassa atthataṃ hoti kathinaṃ. Saṅgho pātimokkhaṃ uddisati gaṇo pātimokkhaṃ uddisati puggalo pātimokkhaṃ uddisatīti na saṅgho pātimokkhaṃ uddisati, na gaṇo pātimokkhaṃ uddisati, puggalo pātimokkhaṃ uddisatīti. Hañci na saṅgho pātimokkhaṃ uddisati, na gaṇo pātimokkhaṃ uddisati, puggalo pātimokkhaṃ uddisati. Saṅghassa anuddiṭṭhaṃ hoti pātimokkhaṃ, gaṇassa anuddiṭṭhaṃ hoti pātimokkhaṃ, puggalassa uddiṭṭhaṃ hoti pātimokkhaṃ. Saṅghassa sāmaggiyā gaṇassa sāmaggiyā puggalassa uddesā saṅghassa uddiṭṭhaṃ hoti pātimokkhaṃ, gaṇassa uddiṭṭhaṃ hoti pātimokkhaṃ, puggalassa uddiṭṭhaṃ hoti pātimokkhaṃ. Evameva na saṅgho kathinaṃ attharati, na gaṇo kathinaṃ attharati, puggalo kathinaṃ attharati. Saṅghassa anumodanāya gaṇassa anumodanāya puggalassa atthārā saṅghassa atthataṃ hoti kathinaṃ, gaṇassa atthataṃ hoti kathinaṃ, puggalassa atthataṃ hoti kathinanti.
