| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. पुग्गलसुत्तं
10. Puggalasuttaṃ
१३३. एकं समयं भगवा राजगहे विहरति गिज्झकूटे पब्बते। तत्र खो भगवा भिक्खू आमन्तेसि – ‘‘भिक्खवो’’ति। ‘‘भदन्ते’’ति ते भिक्खू भगवतो पच्चस्सोसुं। भगवा एतदवोच –
133. Ekaṃ samayaṃ bhagavā rājagahe viharati gijjhakūṭe pabbate. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘अनमतग्गोयं , भिक्खवे, संसारो…पे॰… एकपुग्गलस्स, भिक्खवे, कप्पं सन्धावतो संसरतो सिया एवं महा अट्ठिकङ्कलो अट्ठिपुञ्जो अट्ठिरासि यथायं वेपुल्लो पब्बतो, सचे संहारको अस्स, सम्भतञ्च न विनस्सेय्य। तं किस्स हेतु? अनमतग्गोयं, भिक्खवे, संसारो…पे॰… अलं विमुच्चितु’’न्ति।
‘‘Anamataggoyaṃ , bhikkhave, saṃsāro…pe… ekapuggalassa, bhikkhave, kappaṃ sandhāvato saṃsarato siyā evaṃ mahā aṭṭhikaṅkalo aṭṭhipuñjo aṭṭhirāsi yathāyaṃ vepullo pabbato, sace saṃhārako assa, sambhatañca na vinasseyya. Taṃ kissa hetu? Anamataggoyaṃ, bhikkhave, saṃsāro…pe… alaṃ vimuccitu’’nti.
इदमवोच भगवा। इदं वत्वान सुगतो अथापरं एतदवोच सत्था –
Idamavoca bhagavā. Idaṃ vatvāna sugato athāparaṃ etadavoca satthā –
‘‘एकस्सेकेन कप्पेन, पुग्गलस्सट्ठिसञ्चयो।
‘‘Ekassekena kappena, puggalassaṭṭhisañcayo;
सिया पब्बतसमो रासि, इति वुत्तं महेसिना॥
Siyā pabbatasamo rāsi, iti vuttaṃ mahesinā.
‘‘सो खो पनायं अक्खातो, वेपुल्लो पब्बतो महा।
‘‘So kho panāyaṃ akkhāto, vepullo pabbato mahā;
उत्तरो गिज्झकूटस्स, मगधानं गिरिब्बजे॥
Uttaro gijjhakūṭassa, magadhānaṃ giribbaje.
‘‘यतो च अरियसच्चानि, सम्मप्पञ्ञाय पस्सति।
‘‘Yato ca ariyasaccāni, sammappaññāya passati;
दुक्खं दुक्खसमुप्पादं, दुक्खस्स च अतिक्कमं।
Dukkhaṃ dukkhasamuppādaṃ, dukkhassa ca atikkamaṃ;
अरियं चट्ठङ्गिकं मग्गं, दुक्खूपसमगामिनं॥
Ariyaṃ caṭṭhaṅgikaṃ maggaṃ, dukkhūpasamagāminaṃ.
‘‘स सत्तक्खत्तुंपरमं, सन्धावित्वान पुग्गलो।
‘‘Sa sattakkhattuṃparamaṃ, sandhāvitvāna puggalo;
दुक्खस्सन्तकरो होति, सब्बसंयोजनक्खया’’ति॥ दसमं।
Dukkhassantakaro hoti, sabbasaṃyojanakkhayā’’ti. dasamaṃ;
पठमो वग्गो।
Paṭhamo vaggo.
तस्सुद्दानं –
Tassuddānaṃ –
तिणकट्ठञ्च पथवी, अस्सु खीरञ्च पब्बतं।
Tiṇakaṭṭhañca pathavī, assu khīrañca pabbataṃ;
सासपा सावका गङ्गा, दण्डो च पुग्गलेन चाति॥
Sāsapā sāvakā gaṅgā, daṇḍo ca puggalena cāti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. पुग्गलसुत्तवण्णना • 10. Puggalasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १०. पुग्गलसुत्तवण्णना • 10. Puggalasuttavaṇṇanā
