| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ததியவக்³கோ³
3. Tatiyavaggo
1. புக்³க³லஸுத்தவண்ணனா
1. Puggalasuttavaṇṇanā
132. ததியவக்³க³ஸ்ஸ பட²மே ‘‘நீசே குலே பச்சாஜாதோ’’திஆதி³கேன தமேன யுத்தோதி தமோ. காயது³ச்சரிதாதீ³ஹி புன நிரயதமூபக³மனதோ தமபராயணோ. இதி உப⁴யேனபி க²ந்த⁴தமோவ கதி²தோ ஹோதி. ‘‘உச்சே குலே பச்சாஜாதோ’’திஆதி³கேன ஜோதினா யுத்ததோ ஜோதி, ஆலோகீபூ⁴தோதி வுத்தங் ஹோதி. காயஸுசரிதாதீ³ஹி புன ஸக்³கூ³பபத்திஜோதிபா⁴வூபக³மனதோ ஜோதிபராயணோ. இமினா நயேன இதரேபி த்³வே வேதி³தப்³பா³.
132. Tatiyavaggassa paṭhame ‘‘nīce kule paccājāto’’tiādikena tamena yuttoti tamo. Kāyaduccaritādīhi puna nirayatamūpagamanato tamaparāyaṇo. Iti ubhayenapi khandhatamova kathito hoti. ‘‘Ucce kule paccājāto’’tiādikena jotinā yuttato joti, ālokībhūtoti vuttaṃ hoti. Kāyasucaritādīhi puna saggūpapattijotibhāvūpagamanato jotiparāyaṇo. Iminā nayena itarepi dve veditabbā.
வேனகுலேதி விலீவகாரகுலே. நேஸாத³குலேதி மிக³லுத்³த³காதீ³னங் குலே. ரத²காரகுலேதி சம்மகாரகுலே. புக்குஸகுலேதி புப்ப²ச²ட்³ட³ககுலே. கஸிரவுத்திகேதி து³க்க²வுத்திகே. து³ப்³ப³ண்ணோதி பங்ஸுபிஸாசகோ விய ஜா²மகா²ணுவண்ணோ. து³த்³த³ஸிகோதி விஜாதமாதுயாபி அமனாபத³ஸ்ஸனோ . ஓகோடிமகோதி லகுண்ட³கோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ. பதீ³பெய்யஸ்ஸாதி தேலகபல்லகாதி³னோ பதீ³பஉபகரணஸ்ஸ. ஏவங் கோ², மஹாராஜாதி எத்த² ஏகோ புக்³க³லோ ப³ஹித்³தா⁴ ஆலோகங் அதி³ஸ்வா மாதுகுச்சி²ஸ்மிங்யேவ காலங் கத்வா அபாயேஸு நிப்³ப³த்தந்தோ ஸகலங் கப்பம்பி ஸங்ஸரதி, ஸோபி தமோதமபராயணோவ. ஸோ பன குஹகபுக்³க³லோ ப⁴வெய்ய. குஹகஸ்ஸ ஹி ஏவரூபா நிப்³ப³த்தி ஹோதீதி வுத்தங்.
Venakuleti vilīvakārakule. Nesādakuleti migaluddakādīnaṃ kule. Rathakārakuleti cammakārakule. Pukkusakuleti pupphachaḍḍakakule. Kasiravuttiketi dukkhavuttike. Dubbaṇṇoti paṃsupisācako viya jhāmakhāṇuvaṇṇo. Duddasikoti vijātamātuyāpi amanāpadassano . Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī. Padīpeyyassāti telakapallakādino padīpaupakaraṇassa. Evaṃ kho, mahārājāti ettha eko puggalo bahiddhā ālokaṃ adisvā mātukucchismiṃyeva kālaṃ katvā apāyesu nibbattanto sakalaṃ kappampi saṃsarati, sopi tamotamaparāyaṇova. So pana kuhakapuggalo bhaveyya. Kuhakassa hi evarūpā nibbatti hotīti vuttaṃ.
எத்த² ச ‘‘நீசே குலே பச்சாஜாதோ ஹோதி சண்டா³லகுலே வா’’திஆதீ³ஹி ஆக³மனவிபத்தி சேவ புப்³பு³ப்பன்னபச்சயவிபத்தி ச த³ஸ்ஸிதா. த³லித்³தே³திஆதீ³ஹி பவத்தபச்சயவிபத்தி. கஸிரவுத்திகேதிஆதீ³ஹி ஆஜீவுபாயவிபத்தி. து³ப்³ப³ண்ணோதிஆதீ³ஹி அத்தபா⁴வவிபத்தி. ப³வ்ஹாபா³தோ⁴திஆதீ³ஹி து³க்க²காரணஸமாயோகோ³. ந லாபீ⁴திஆதீ³ஹி ஸுக²காரணவிபத்தி சேவ உபபோ⁴க³விபத்தி ச. காயேன து³ச்சரிதந்திஆதீ³ஹி தமபராயணபா⁴வஸ்ஸ காரணஸமாயோகோ³. காயஸ்ஸ பே⁴தா³திஆதீ³ஹி ஸம்பராயிகதமூபக³மோ. ஸுக்கபக்கோ² வுத்தபடிபக்க²னயேன வேதி³தப்³போ³.
Ettha ca ‘‘nīce kule paccājāto hoti caṇḍālakule vā’’tiādīhi āgamanavipatti ceva pubbuppannapaccayavipatti ca dassitā. Daliddetiādīhi pavattapaccayavipatti. Kasiravuttiketiādīhi ājīvupāyavipatti. Dubbaṇṇotiādīhi attabhāvavipatti. Bavhābādhotiādīhi dukkhakāraṇasamāyogo. Na lābhītiādīhi sukhakāraṇavipatti ceva upabhogavipatti ca. Kāyena duccaritantiādīhi tamaparāyaṇabhāvassa kāraṇasamāyogo. Kāyassa bhedātiādīhi samparāyikatamūpagamo. Sukkapakkho vuttapaṭipakkhanayena veditabbo.
அக்கோஸதீதி த³ஸஹி அக்கோஸவத்தூ²ஹி அக்கோஸதி. பரிபா⁴ஸதீதி, ‘‘கஸ்மா திட்ட²த²? கிங் தும்ஹேஹி அம்ஹாகங் கஸிகம்மாதீ³னி கதானீ’’திஆதீ³ஹி? பரிப⁴வவசனேஹி பரிபா⁴ஸதி. ரோஸகோதி க⁴ட்டகோ. அப்³யக்³க³மனஸோதி ஏகக்³க³சித்தோ. பட²மங்.
Akkosatīti dasahi akkosavatthūhi akkosati. Paribhāsatīti, ‘‘kasmā tiṭṭhatha? Kiṃ tumhehi amhākaṃ kasikammādīni katānī’’tiādīhi? Paribhavavacanehi paribhāsati. Rosakoti ghaṭṭako. Abyaggamanasoti ekaggacitto. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. புக்³க³லஸுத்தங் • 1. Puggalasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. புக்³க³லஸுத்தவண்ணனா • 1. Puggalasuttavaṇṇanā
