| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. ততিযৰগ্গো
3. Tatiyavaggo
১. পুগ্গলসুত্তৰণ্ণনা
1. Puggalasuttavaṇṇanā
১৩২. ততিযৰগ্গস্স পঠমে ‘‘নীচে কুলে পচ্চাজাতো’’তিআদিকেন তমেন যুত্তোতি তমো। কাযদুচ্চরিতাদীহি পুন নিরযতমূপগমনতো তমপরাযণো। ইতি উভযেনপি খন্ধতমোৰ কথিতো হোতি। ‘‘উচ্চে কুলে পচ্চাজাতো’’তিআদিকেন জোতিনা যুত্ততো জোতি, আলোকীভূতোতি ৰুত্তং হোতি। কাযসুচরিতাদীহি পুন সগ্গূপপত্তিজোতিভাৰূপগমনতো জোতিপরাযণো। ইমিনা নযেন ইতরেপি দ্ৰে ৰেদিতব্বা।
132. Tatiyavaggassa paṭhame ‘‘nīce kule paccājāto’’tiādikena tamena yuttoti tamo. Kāyaduccaritādīhi puna nirayatamūpagamanato tamaparāyaṇo. Iti ubhayenapi khandhatamova kathito hoti. ‘‘Ucce kule paccājāto’’tiādikena jotinā yuttato joti, ālokībhūtoti vuttaṃ hoti. Kāyasucaritādīhi puna saggūpapattijotibhāvūpagamanato jotiparāyaṇo. Iminā nayena itarepi dve veditabbā.
ৰেনকুলেতি ৰিলীৰকারকুলে। নেসাদকুলেতি মিগলুদ্দকাদীনং কুলে। রথকারকুলেতি চম্মকারকুলে। পুক্কুসকুলেতি পুপ্ফছড্ডককুলে। কসিরৰুত্তিকেতি দুক্খৰুত্তিকে। দুব্বণ্ণোতি পংসুপিসাচকো ৰিয ঝামখাণুৰণ্ণো। দুদ্দসিকোতি ৰিজাতমাতুযাপি অমনাপদস্সনো । ওকোটিমকোতি লকুণ্ডকো। কাণোতি একক্খিকাণো ৰা উভযক্খিকাণো ৰা। কুণীতি একহত্থকুণী ৰা উভযহত্থকুণী ৰা। খঞ্জোতি একপাদখঞ্জো ৰা উভযপাদখঞ্জো ৰা। পক্খহতোতি হতপক্খো পীঠসপ্পী। পদীপেয্যস্সাতি তেলকপল্লকাদিনো পদীপউপকরণস্স। এৰং খো, মহারাজাতি এত্থ একো পুগ্গলো বহিদ্ধা আলোকং অদিস্ৰা মাতুকুচ্ছিস্মিংযেৰ কালং কত্ৰা অপাযেসু নিব্বত্তন্তো সকলং কপ্পম্পি সংসরতি, সোপি তমোতমপরাযণোৰ। সো পন কুহকপুগ্গলো ভৰেয্য। কুহকস্স হি এৰরূপা নিব্বত্তি হোতীতি ৰুত্তং।
Venakuleti vilīvakārakule. Nesādakuleti migaluddakādīnaṃ kule. Rathakārakuleti cammakārakule. Pukkusakuleti pupphachaḍḍakakule. Kasiravuttiketi dukkhavuttike. Dubbaṇṇoti paṃsupisācako viya jhāmakhāṇuvaṇṇo. Duddasikoti vijātamātuyāpi amanāpadassano . Okoṭimakoti lakuṇḍako. Kāṇoti ekakkhikāṇo vā ubhayakkhikāṇo vā. Kuṇīti ekahatthakuṇī vā ubhayahatthakuṇī vā. Khañjoti ekapādakhañjo vā ubhayapādakhañjo vā. Pakkhahatoti hatapakkho pīṭhasappī. Padīpeyyassāti telakapallakādino padīpaupakaraṇassa. Evaṃ kho, mahārājāti ettha eko puggalo bahiddhā ālokaṃ adisvā mātukucchismiṃyeva kālaṃ katvā apāyesu nibbattanto sakalaṃ kappampi saṃsarati, sopi tamotamaparāyaṇova. So pana kuhakapuggalo bhaveyya. Kuhakassa hi evarūpā nibbatti hotīti vuttaṃ.
এত্থ চ ‘‘নীচে কুলে পচ্চাজাতো হোতি চণ্ডালকুলে ৰা’’তিআদীহি আগমনৰিপত্তি চেৰ পুব্বুপ্পন্নপচ্চযৰিপত্তি চ দস্সিতা। দলিদ্দেতিআদীহি পৰত্তপচ্চযৰিপত্তি। কসিরৰুত্তিকেতিআদীহি আজীৰুপাযৰিপত্তি। দুব্বণ্ণোতিআদীহি অত্তভাৰৰিপত্তি। বৰ্হাবাধোতিআদীহি দুক্খকারণসমাযোগো। ন লাভীতিআদীহি সুখকারণৰিপত্তি চেৰ উপভোগৰিপত্তি চ। কাযেন দুচ্চরিতন্তিআদীহি তমপরাযণভাৰস্স কারণসমাযোগো। কাযস্স ভেদাতিআদীহি সম্পরাযিকতমূপগমো। সুক্কপক্খো ৰুত্তপটিপক্খনযেন ৰেদিতব্বো।
Ettha ca ‘‘nīce kule paccājāto hoti caṇḍālakule vā’’tiādīhi āgamanavipatti ceva pubbuppannapaccayavipatti ca dassitā. Daliddetiādīhi pavattapaccayavipatti. Kasiravuttiketiādīhi ājīvupāyavipatti. Dubbaṇṇotiādīhi attabhāvavipatti. Bavhābādhotiādīhi dukkhakāraṇasamāyogo. Na lābhītiādīhi sukhakāraṇavipatti ceva upabhogavipatti ca. Kāyena duccaritantiādīhi tamaparāyaṇabhāvassa kāraṇasamāyogo. Kāyassa bhedātiādīhi samparāyikatamūpagamo. Sukkapakkho vuttapaṭipakkhanayena veditabbo.
অক্কোসতীতি দসহি অক্কোসৰত্থূহি অক্কোসতি। পরিভাসতীতি, ‘‘কস্মা তিট্ঠথ? কিং তুম্হেহি অম্হাকং কসিকম্মাদীনি কতানী’’তিআদীহি? পরিভৰৰচনেহি পরিভাসতি। রোসকোতি ঘট্টকো। অব্যগ্গমনসোতি একগ্গচিত্তো। পঠমং।
Akkosatīti dasahi akkosavatthūhi akkosati. Paribhāsatīti, ‘‘kasmā tiṭṭhatha? Kiṃ tumhehi amhākaṃ kasikammādīni katānī’’tiādīhi? Paribhavavacanehi paribhāsati. Rosakoti ghaṭṭako. Abyaggamanasoti ekaggacitto. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. পুগ্গলসুত্তং • 1. Puggalasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. পুগ্গলসুত্তৰণ্ণনা • 1. Puggalasuttavaṇṇanā
