| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. து³தியபண்ணாஸகங்
2. Dutiyapaṇṇāsakaṃ
(6) 1. புக்³க³லவக்³க³வண்ணனா
(6) 1. Puggalavaggavaṇṇanā
53. து³தியபண்ணாஸகஸ்ஸ பட²மே ஹிதக்³க³ஹணேன மெத்தா வுத்தா ஹோதி, ந கருணா, அனுகம்பாக³ஹணேன பன கருணாதி சக்கவத்தினா ஸத்³தி⁴ங் க³ஹிதத்தா ‘‘லோகானுகம்பாயா’’தி ந வுத்தங். நிப்பரியாயதோ லோகானுகம்பா நாம ஸம்மாஸம்பு³த்³தா⁴தீ⁴னாதி. த்³வேதி மனுஸ்ஸதே³வஸம்பத்திவஸேன த்³வே ஸம்பத்தியோ. தா த்³வே, நிப்³பா³னஸம்பத்தி சாதி திஸ்ஸோ.
53. Dutiyapaṇṇāsakassa paṭhame hitaggahaṇena mettā vuttā hoti, na karuṇā, anukampāgahaṇena pana karuṇāti cakkavattinā saddhiṃ gahitattā ‘‘lokānukampāyā’’ti na vuttaṃ. Nippariyāyato lokānukampā nāma sammāsambuddhādhīnāti. Dveti manussadevasampattivasena dve sampattiyo. Tā dve, nibbānasampatti cāti tisso.
54. து³தியே ப³ஹுஸோ லோகே ந சிண்ணா ந பவத்தா மனுஸ்ஸாதி ஆசிண்ணமனுஸ்ஸா. கதா³சிதே³வ ஹி நேஸங் லோகே நிப்³ப³த்தி அபூ⁴தபுப்³பா³ பூ⁴தாதி அப்³பு⁴தமனுஸ்ஸா.
54. Dutiye bahuso loke na ciṇṇā na pavattā manussāti āciṇṇamanussā. Kadācideva hi nesaṃ loke nibbatti abhūtapubbā bhūtāti abbhutamanussā.
55. ததியே த³ஸஸு சக்கவாளஸஹஸ்ஸேஸு அனுதாபங் கரோதி தஸ்ஸ ஏகபு³த்³த⁴கெ²த்தபா⁴வதோ.
55. Tatiye dasasu cakkavāḷasahassesu anutāpaṃ karoti tassa ekabuddhakhettabhāvato.
56. சதுத்தே² தூ²பஸ்ஸ யுத்தாதி தா⁴துயோ பக்கி²பித்வா தூ²பகரணஸ்ஸ யுத்தா.
56. Catutthe thūpassa yuttāti dhātuyo pakkhipitvā thūpakaraṇassa yuttā.
57. பஞ்சமே அத்தனோ ஆனுபா⁴வேனாதி ஸயம்பு⁴ஞாணேன. பு³த்³தா⁴தி பு³த்³த⁴வந்தோ.
57. Pañcame attano ānubhāvenāti sayambhuñāṇena. Buddhāti buddhavanto.
58. ச²ட்டே² பஹீனத்தா ந பா⁴யதீதி அத்தஸினேஹாபா⁴வதோ ந பா⁴யதி. ஸக்காயதி³ட்டி²க்³க³ஹணஞ்செத்த² நித³ஸ்ஸனமத்தங், அத்தஸினேஹஸ்ஸ படிக⁴ஸ்ஸ ததே³கட்ட²ஸம்மோஹஸ்ஸ ச வஸேன பா⁴யனங் ஹோதீதி தேஸம்பி பஹீனத்தா ந பா⁴யதி, அஞ்ஞதா² ஸோதாபன்னாதீ³னங் அப⁴யேன ப⁴விதப்³ப³ங் ஸியா. ஸக்காயதி³ட்டி²யா ப³லவத்தாதி எத்த² அஹங்காரஸம்மோஹனதாதீ³னம்பி ப³லவத்தாதி வத்தப்³ப³ங்.
58. Chaṭṭhe pahīnattā na bhāyatīti attasinehābhāvato na bhāyati. Sakkāyadiṭṭhiggahaṇañcettha nidassanamattaṃ, attasinehassa paṭighassa tadekaṭṭhasammohassa ca vasena bhāyanaṃ hotīti tesampi pahīnattā na bhāyati, aññathā sotāpannādīnaṃ abhayena bhavitabbaṃ siyā. Sakkāyadiṭṭhiyā balavattāti ettha ahaṃkārasammohanatādīnampi balavattāti vattabbaṃ.
59. ஸத்தமே அஸ்ஸாஜானீயோதி லிக²ந்தி, உஸபா⁴ஜானீயோதி பன பாடோ²தி.
59. Sattame assājānīyoti likhanti, usabhājānīyoti pana pāṭhoti.
61. நவமே தத்தா²தி அந்தராபணே. ஏகோதி த்³வீஸு கின்னரேஸு ஏகோ. அம்பி³லிகாப²லஞ்ச அத்³த³ஸாதி ஆனெத்வா ஸம்ப³ந்தோ⁴. அம்பி³லிகாப²லந்தி திந்திணீப²லந்தி வத³ந்தி, சதுரம்பி³லந்தி அபரே. த்³வே அத்தே²தி பாளியங் வுத்தே த்³வே அத்தே².
61. Navame tatthāti antarāpaṇe. Ekoti dvīsu kinnaresu eko. Ambilikāphalañca addasāti ānetvā sambandho. Ambilikāphalanti tintiṇīphalanti vadanti, caturambilanti apare. Dve attheti pāḷiyaṃ vutte dve atthe.
62. த³ஸமே யதா²ஆரத்³தே⁴ கிச்சே வத்தமானே அந்தரா ஏவ படிக³மனங் படிவானங், நத்தி² ஏதஸ்ஸ படிவானந்தி அப்படிவானோ. தத்த² அஸங்கோசப்பத்தோ. தேனாஹ ‘‘அனுக்கண்டி²தோ’’திஆதி³.
62. Dasame yathāāraddhe kicce vattamāne antarā eva paṭigamanaṃ paṭivānaṃ, natthi etassa paṭivānanti appaṭivāno. Tattha asaṃkocappatto. Tenāha ‘‘anukkaṇṭhito’’tiādi.
63. ஏகாத³ஸமே ஸன்னிவாஸந்தி ஸஹவாஸங். யதா² அஸப்புரிஸா ஸஹ வஸந்தா அஞ்ஞமஞ்ஞங் அகா³ரவேன அனாத³ரியங் கரொந்தி, தப்படிக்கே²பேன ஸப்புரிஸானங் ஸகா³ரவப்படிபத்தித³ஸ்ஸனபரமித³ங் ஸுத்தங் த³ட்ட²ப்³ப³ங்.
63. Ekādasame sannivāsanti sahavāsaṃ. Yathā asappurisā saha vasantā aññamaññaṃ agāravena anādariyaṃ karonti, tappaṭikkhepena sappurisānaṃ sagāravappaṭipattidassanaparamidaṃ suttaṃ daṭṭhabbaṃ.
64. த்³வாத³ஸமே த்³வீஸுபி பக்கே²ஸூதி விவாதா³பன்னானங் பி⁴க்கூ²னங் த்³வீஸுபி பக்கே²ஸு. ஸங்ஸரமானாதி பவத்தமானா. தி³ட்டி²பளாஸோதி தி³ட்டி²ஸன்னிஸ்ஸயோ பளாஸோ யுக³க்³கா³ஹோ. ஆகா⁴தெந்தோதி ஆஹனந்தோ பா³தெ⁴ந்தோ. அனபி⁴ராத⁴னவஸேனாதி யஸ்ஸ உப்பஜ்ஜதி, தஸ்ஸ தத³ஞ்ஞேஸஞ்ச அத்த²ஸ்ஸ அனபி⁴ராத⁴னவஸேன. ஸப்³ப³ம்பேதந்தி வசீஸங்ஸாரோதி ஸப்³ப³ம்பேதங். அத்தனோ சித்தே பரிஸாய ச சித்தேதி ஆனெத்வா ஸம்ப³ந்தோ⁴.
64. Dvādasame dvīsupi pakkhesūti vivādāpannānaṃ bhikkhūnaṃ dvīsupi pakkhesu. Saṃsaramānāti pavattamānā. Diṭṭhipaḷāsoti diṭṭhisannissayo paḷāso yugaggāho. Āghātentoti āhananto bādhento. Anabhirādhanavasenāti yassa uppajjati, tassa tadaññesañca atthassa anabhirādhanavasena. Sabbampetanti vacīsaṃsāroti sabbampetaṃ. Attano citte parisāya ca citteti ānetvā sambandho.
புக்³க³லவக்³க³வண்ணனா நிட்டி²தா.
Puggalavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / (6) 1. புக்³க³லவக்³கோ³ • (6) 1. Puggalavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / (6) 1. புக்³க³லவக்³க³வண்ணனா • (6) 1. Puggalavaggavaṇṇanā
