| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
২. দুতিযপণ্ণাসকং
2. Dutiyapaṇṇāsakaṃ
(৬) ১. পুগ্গলৰগ্গৰণ্ণনা
(6) 1. Puggalavaggavaṇṇanā
৫৩. দুতিযপণ্ণাসকস্স পঠমে চক্কৰত্তিনা সদ্ধিং গহিতত্তা ‘‘লোকানুকম্পাযা’’তি ন ৰুত্তং। এত্থ চ চক্কৰত্তিনো উপ্পত্তিযা দ্ৰে সম্পত্তিযো লভন্তি, বুদ্ধানং উপ্পত্তিযা তিস্সোপি।
53. Dutiyapaṇṇāsakassa paṭhame cakkavattinā saddhiṃ gahitattā ‘‘lokānukampāyā’’ti na vuttaṃ. Ettha ca cakkavattino uppattiyā dve sampattiyo labhanti, buddhānaṃ uppattiyā tissopi.
৫৪. দুতিযে অচ্ছরিযমনুস্সাতি আচিণ্ণমনুস্সা অব্ভুতমনুস্সা।
54. Dutiye acchariyamanussāti āciṇṇamanussā abbhutamanussā.
৫৫. ততিযে বহুনো জনস্স অনুতপ্পা হোতীতি মহাজনস্স অনুতাপকারী হোতি। তত্থ চক্কৰত্তিনো কালকিরিযা একচক্কৰাল়ে দেৰমনুস্সানং অনুতাপং করোতি, তথাগতস্স কালকিরিযা দসসু চক্কৰাল়সহস্সেসু।
55. Tatiye bahuno janassa anutappā hotīti mahājanassa anutāpakārī hoti. Tattha cakkavattino kālakiriyā ekacakkavāḷe devamanussānaṃ anutāpaṃ karoti, tathāgatassa kālakiriyā dasasu cakkavāḷasahassesu.
৫৬. চতুত্থে থূপারহাতি থূপস্স যুত্তা অনুচ্ছৰিকা। চক্কৰত্তিনো হি চেতিযং পটিজগ্গিত্ৰা দ্ৰে সম্পত্তিযো লভন্তি, বুদ্ধানং চেতিযং পটিজগ্গিত্ৰা তিস্সোপি।
56. Catutthe thūpārahāti thūpassa yuttā anucchavikā. Cakkavattino hi cetiyaṃ paṭijaggitvā dve sampattiyo labhanti, buddhānaṃ cetiyaṃ paṭijaggitvā tissopi.
৫৭. পঞ্চমে বুদ্ধাতি অত্তনো আনুভাৰেন চত্তারি সচ্চানি বুদ্ধা।
57. Pañcame buddhāti attano ānubhāvena cattāri saccāni buddhā.
৫৮. ছট্ঠে ফলন্তিযাতি সদ্দং করোন্তিযা। ন সন্তসন্তীতি ন ভাযন্তি। তত্থ খীণাসৰো অত্তনো সক্কাযদিট্ঠিযা পহীনত্তা ন ভাযতি, হত্থাজানীযো সক্কাযদিট্ঠিযা বলৰত্তাতি। সত্তমট্ঠমেসুপি এসেৰ নযো।
58. Chaṭṭhe phalantiyāti saddaṃ karontiyā. Na santasantīti na bhāyanti. Tattha khīṇāsavo attano sakkāyadiṭṭhiyā pahīnattā na bhāyati, hatthājānīyo sakkāyadiṭṭhiyā balavattāti. Sattamaṭṭhamesupi eseva nayo.
৬১. নৰমে কিংপুরিসাতি কিন্নরা। মানুসিং ৰাচং ন ভাসন্তীতি মনুস্সকথং ন কথেন্তি। ধম্মাসোকস্স কির একং কিন্নরং আনেত্ৰা দস্সেসুং। সো ‘‘কথাপেথ ন’’ন্তি আহ। কিন্নরো কথেতুং ন ইচ্ছতি। একো পুরিসো ‘‘অহমেতং কথাপেস্সামী’’তি হেট্ঠাপাসাদং ওতারেত্ৰা দ্ৰে খাণুকে কোট্টেত্ৰা উক্খলিং আরোপেসি। সা উভতোপস্সেহি পততি। তং দিস্ৰা কিন্নরো ‘‘কিং অঞ্ঞং একং খাণুকং কোট্টেতুং ন ৰট্টতী’’তি এত্তকমেৰ আহ। পুন অপরভাগে দ্ৰে কিন্নরে আনেত্ৰা দস্সেসুং। রাজা ‘‘কথাপেথ নে’’তি আহ। তে কথেতুং ন ইচ্ছিংসু। একো পুরিসো ‘‘অহমেতে কথাপেস্সামী’’তি তে গহেত্ৰা অন্তরাপণং অগমাসি। তত্থেকো অম্বপক্কঞ্চ মচ্ছে চ অদ্দস, একো কবিট্ঠফলঞ্চ অম্বিলিকাফলঞ্চ। তত্থ পুরিমো ‘‘মহাৰিসং মনুস্সা খাদন্তি, কথং তে কিলাসিনো ন হোন্তী’’তি আহ। ইতরো ‘‘কথং ইমে এতং নিস্সায কুট্ঠিনো ন হোন্তী’’তি আহ। এৰং মানুসিং ৰাচং কথেতুং সক্কোন্তাপি দ্ৰে অত্থে সম্পস্সমানা ন কথেন্তীতি।
61. Navame kiṃpurisāti kinnarā. Mānusiṃ vācaṃ na bhāsantīti manussakathaṃ na kathenti. Dhammāsokassa kira ekaṃ kinnaraṃ ānetvā dassesuṃ. So ‘‘kathāpetha na’’nti āha. Kinnaro kathetuṃ na icchati. Eko puriso ‘‘ahametaṃ kathāpessāmī’’ti heṭṭhāpāsādaṃ otāretvā dve khāṇuke koṭṭetvā ukkhaliṃ āropesi. Sā ubhatopassehi patati. Taṃ disvā kinnaro ‘‘kiṃ aññaṃ ekaṃ khāṇukaṃ koṭṭetuṃ na vaṭṭatī’’ti ettakameva āha. Puna aparabhāge dve kinnare ānetvā dassesuṃ. Rājā ‘‘kathāpetha ne’’ti āha. Te kathetuṃ na icchiṃsu. Eko puriso ‘‘ahamete kathāpessāmī’’ti te gahetvā antarāpaṇaṃ agamāsi. Tattheko ambapakkañca macche ca addasa, eko kabiṭṭhaphalañca ambilikāphalañca. Tattha purimo ‘‘mahāvisaṃ manussā khādanti, kathaṃ te kilāsino na hontī’’ti āha. Itaro ‘‘kathaṃ ime etaṃ nissāya kuṭṭhino na hontī’’ti āha. Evaṃ mānusiṃ vācaṃ kathetuṃ sakkontāpi dve atthe sampassamānā na kathentīti.
৬২. দসমে অপ্পটিৰানোতি অনুকণ্ঠিতো অপচ্চোসক্কিতো।
62. Dasame appaṭivānoti anukaṇṭhito apaccosakkito.
৬৩. একাদসমে অসন্তসন্নিৰাসন্তি অসপ্পুরিসানং সন্নিৰাসং। ন ৰদেয্যাতি ওৰাদেন ৰা অনুসাসনিযা ৰা ন ৰদেয্য, মা ৰদতূতি অত্থো। থেরম্পাহং ন ৰদেয্যন্তি অহম্পি থেরং ভিক্খুং ওৰাদানুসাসনিৰসেন ন ৰদেয্যং। অহিতানুকম্পীতি অহিতং ইচ্ছমানো। নো হিতানুকম্পীতি হিতং অনিচ্ছমানো। নোতি নং ৰদেয্যন্তি ‘‘অহং তৰ ৰচনং ন করিস্স’’ন্তি নং ৰদেয্যং। ৰিহেঠেয্যন্তি ৰচনস্স অকরণেন ৰিহেঠেয্যং। পস্সম্পিস্স নপ্পটিকরেয্যন্তি পস্সন্তোপি জানন্তোপি অহং তস্স ৰচনং ন করেয্যং। ইমিনা উপাযেন সব্বত্থ অত্থো ৰেদিতব্বো। সুক্কপক্খে পন সাধূতি নং ৰদেয্যন্তি ‘‘সাধু ভদ্দকং সুকথিতং তযা’’তি তস্স কথং অভিনন্দন্তো নং ৰদেয্যন্তি অত্থো।
63. Ekādasame asantasannivāsanti asappurisānaṃ sannivāsaṃ. Na vadeyyāti ovādena vā anusāsaniyā vā na vadeyya, mā vadatūti attho. Therampāhaṃ na vadeyyanti ahampi theraṃ bhikkhuṃ ovādānusāsanivasena na vadeyyaṃ. Ahitānukampīti ahitaṃ icchamāno. No hitānukampīti hitaṃ anicchamāno. Noti naṃ vadeyyanti ‘‘ahaṃ tava vacanaṃ na karissa’’nti naṃ vadeyyaṃ. Viheṭheyyanti vacanassa akaraṇena viheṭheyyaṃ. Passampissanappaṭikareyyanti passantopi jānantopi ahaṃ tassa vacanaṃ na kareyyaṃ. Iminā upāyena sabbattha attho veditabbo. Sukkapakkhe pana sādhūti naṃ vadeyyanti ‘‘sādhu bhaddakaṃ sukathitaṃ tayā’’ti tassa kathaṃ abhinandanto naṃ vadeyyanti attho.
৬৪. দ্ৰাদসমে উভতো ৰচীসংসারোতি দ্ৰীসুপি পক্খেসু অঞ্ঞমঞ্ঞং অক্কোসনপচ্চক্কোসনৰসেন সংসরমানা ৰাচা ৰচীসংসারো। দিট্ঠিপল়াসোতি দিট্ঠিং নিস্সায উপ্পজ্জনকো যুগগ্গাহলক্খণো পল়াসো দিট্ঠিপল়াসো নাম। চেতসো আঘাতোতি কোপো। সো হি চিত্তং আঘাতেন্তো উপ্পজ্জতি। অপ্পচ্চযোতি অতুট্ঠাকারো, দোমনস্সন্তি অত্থো। অনভিরদ্ধীতি কোপোযেৰ। সো হি অনভিরাধনৰসেন অনভিরদ্ধীতি ৰুচ্চতি। অজ্ঝত্তং অৰূপসন্তং হোতীতি সব্বম্পেতং নিযকজ্ঝত্তসঙ্খাতে অত্তনো চিত্তে চ সদ্ধিৰিহারিকঅন্তেৰাসিকসঙ্খাতায অত্তনো পরিসায চ অৰূপসন্তং হোতি। তস্মেতন্তি তস্মিং এতং। সেসং ৰুত্তনযেনেৰ ৰেদিতব্বন্তি।
64. Dvādasame ubhato vacīsaṃsāroti dvīsupi pakkhesu aññamaññaṃ akkosanapaccakkosanavasena saṃsaramānā vācā vacīsaṃsāro. Diṭṭhipaḷāsoti diṭṭhiṃ nissāya uppajjanako yugaggāhalakkhaṇo paḷāso diṭṭhipaḷāso nāma. Cetaso āghātoti kopo. So hi cittaṃ āghātento uppajjati. Appaccayoti atuṭṭhākāro, domanassanti attho. Anabhiraddhīti kopoyeva. So hi anabhirādhanavasena anabhiraddhīti vuccati. Ajjhattaṃ avūpasantaṃ hotīti sabbampetaṃ niyakajjhattasaṅkhāte attano citte ca saddhivihārikaantevāsikasaṅkhātāya attano parisāya ca avūpasantaṃ hoti. Tasmetanti tasmiṃ etaṃ. Sesaṃ vuttanayeneva veditabbanti.
পুগ্গলৰগ্গো পঠমো।
Puggalavaggo paṭhamo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (৬) ১. পুগ্গলৰগ্গো • (6) 1. Puggalavaggo
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / (৬) ১. পুগ্গলৰগ্গৰণ্ণনা • (6) 1. Puggalavaggavaṇṇanā
