| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
২. দুতিযপণ্ণাসকং
2. Dutiyapaṇṇāsakaṃ
(৬) ১. পুগ্গলৰগ্গৰণ্ণনা
(6) 1. Puggalavaggavaṇṇanā
৫৩. দুতিযপণ্ণাসকস্স পঠমে হিতগ্গহণেন মেত্তা ৰুত্তা হোতি, ন করুণা, অনুকম্পাগহণেন পন করুণাতি চক্কৰত্তিনা সদ্ধিং গহিতত্তা ‘‘লোকানুকম্পাযা’’তি ন ৰুত্তং। নিপ্পরিযাযতো লোকানুকম্পা নাম সম্মাসম্বুদ্ধাধীনাতি। দ্ৰেতি মনুস্সদেৰসম্পত্তিৰসেন দ্ৰে সম্পত্তিযো। তা দ্ৰে, নিব্বানসম্পত্তি চাতি তিস্সো।
53. Dutiyapaṇṇāsakassa paṭhame hitaggahaṇena mettā vuttā hoti, na karuṇā, anukampāgahaṇena pana karuṇāti cakkavattinā saddhiṃ gahitattā ‘‘lokānukampāyā’’ti na vuttaṃ. Nippariyāyato lokānukampā nāma sammāsambuddhādhīnāti. Dveti manussadevasampattivasena dve sampattiyo. Tā dve, nibbānasampatti cāti tisso.
৫৪. দুতিযে বহুসো লোকে ন চিণ্ণা ন পৰত্তা মনুস্সাতি আচিণ্ণমনুস্সা। কদাচিদেৰ হি নেসং লোকে নিব্বত্তি অভূতপুব্বা ভূতাতি অব্ভুতমনুস্সা।
54. Dutiye bahuso loke na ciṇṇā na pavattā manussāti āciṇṇamanussā. Kadācideva hi nesaṃ loke nibbatti abhūtapubbā bhūtāti abbhutamanussā.
৫৫. ততিযে দসসু চক্কৰাল়সহস্সেসু অনুতাপং করোতি তস্স একবুদ্ধখেত্তভাৰতো।
55. Tatiye dasasu cakkavāḷasahassesu anutāpaṃ karoti tassa ekabuddhakhettabhāvato.
৫৬. চতুত্থে থূপস্স যুত্তাতি ধাতুযো পক্খিপিত্ৰা থূপকরণস্স যুত্তা।
56. Catutthe thūpassa yuttāti dhātuyo pakkhipitvā thūpakaraṇassa yuttā.
৫৭. পঞ্চমে অত্তনো আনুভাৰেনাতি সযম্ভুঞাণেন। বুদ্ধাতি বুদ্ধৰন্তো।
57. Pañcame attano ānubhāvenāti sayambhuñāṇena. Buddhāti buddhavanto.
৫৮. ছট্ঠে পহীনত্তা ন ভাযতীতি অত্তসিনেহাভাৰতো ন ভাযতি। সক্কাযদিট্ঠিগ্গহণঞ্চেত্থ নিদস্সনমত্তং, অত্তসিনেহস্স পটিঘস্স তদেকট্ঠসম্মোহস্স চ ৰসেন ভাযনং হোতীতি তেসম্পি পহীনত্তা ন ভাযতি, অঞ্ঞথা সোতাপন্নাদীনং অভযেন ভৰিতব্বং সিযা। সক্কাযদিট্ঠিযা বলৰত্তাতি এত্থ অহংকারসম্মোহনতাদীনম্পি বলৰত্তাতি ৰত্তব্বং।
58. Chaṭṭhe pahīnattā na bhāyatīti attasinehābhāvato na bhāyati. Sakkāyadiṭṭhiggahaṇañcettha nidassanamattaṃ, attasinehassa paṭighassa tadekaṭṭhasammohassa ca vasena bhāyanaṃ hotīti tesampi pahīnattā na bhāyati, aññathā sotāpannādīnaṃ abhayena bhavitabbaṃ siyā. Sakkāyadiṭṭhiyā balavattāti ettha ahaṃkārasammohanatādīnampi balavattāti vattabbaṃ.
৫৯. সত্তমে অস্সাজানীযোতি লিখন্তি, উসভাজানীযোতি পন পাঠোতি।
59. Sattame assājānīyoti likhanti, usabhājānīyoti pana pāṭhoti.
৬১. নৰমে তত্থাতি অন্তরাপণে। একোতি দ্ৰীসু কিন্নরেসু একো। অম্বিলিকাফলঞ্চ অদ্দসাতি আনেত্ৰা সম্বন্ধো। অম্বিলিকাফলন্তি তিন্তিণীফলন্তি ৰদন্তি, চতুরম্বিলন্তি অপরে। দ্ৰে অত্থেতি পাল়িযং ৰুত্তে দ্ৰে অত্থে।
61. Navame tatthāti antarāpaṇe. Ekoti dvīsu kinnaresu eko. Ambilikāphalañca addasāti ānetvā sambandho. Ambilikāphalanti tintiṇīphalanti vadanti, caturambilanti apare. Dve attheti pāḷiyaṃ vutte dve atthe.
৬২. দসমে যথাআরদ্ধে কিচ্চে ৰত্তমানে অন্তরা এৰ পটিগমনং পটিৰানং, নত্থি এতস্স পটিৰানন্তি অপ্পটিৰানো। তত্থ অসংকোচপ্পত্তো। তেনাহ ‘‘অনুক্কণ্ঠিতো’’তিআদি।
62. Dasame yathāāraddhe kicce vattamāne antarā eva paṭigamanaṃ paṭivānaṃ, natthi etassa paṭivānanti appaṭivāno. Tattha asaṃkocappatto. Tenāha ‘‘anukkaṇṭhito’’tiādi.
৬৩. একাদসমে সন্নিৰাসন্তি সহৰাসং। যথা অসপ্পুরিসা সহ ৰসন্তা অঞ্ঞমঞ্ঞং অগারৰেন অনাদরিযং করোন্তি, তপ্পটিক্খেপেন সপ্পুরিসানং সগারৰপ্পটিপত্তিদস্সনপরমিদং সুত্তং দট্ঠব্বং।
63. Ekādasame sannivāsanti sahavāsaṃ. Yathā asappurisā saha vasantā aññamaññaṃ agāravena anādariyaṃ karonti, tappaṭikkhepena sappurisānaṃ sagāravappaṭipattidassanaparamidaṃ suttaṃ daṭṭhabbaṃ.
৬৪. দ্ৰাদসমে দ্ৰীসুপি পক্খেসূতি ৰিৰাদাপন্নানং ভিক্খূনং দ্ৰীসুপি পক্খেসু। সংসরমানাতি পৰত্তমানা। দিট্ঠিপল়াসোতি দিট্ঠিসন্নিস্সযো পল়াসো যুগগ্গাহো। আঘাতেন্তোতি আহনন্তো বাধেন্তো। অনভিরাধনৰসেনাতি যস্স উপ্পজ্জতি, তস্স তদঞ্ঞেসঞ্চ অত্থস্স অনভিরাধনৰসেন। সব্বম্পেতন্তি ৰচীসংসারোতি সব্বম্পেতং। অত্তনো চিত্তে পরিসায চ চিত্তেতি আনেত্ৰা সম্বন্ধো।
64. Dvādasame dvīsupi pakkhesūti vivādāpannānaṃ bhikkhūnaṃ dvīsupi pakkhesu. Saṃsaramānāti pavattamānā. Diṭṭhipaḷāsoti diṭṭhisannissayo paḷāso yugaggāho. Āghātentoti āhananto bādhento. Anabhirādhanavasenāti yassa uppajjati, tassa tadaññesañca atthassa anabhirādhanavasena. Sabbampetanti vacīsaṃsāroti sabbampetaṃ. Attano citte parisāya ca citteti ānetvā sambandho.
পুগ্গলৰগ্গৰণ্ণনা নিট্ঠিতা।
Puggalavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / (৬) ১. পুগ্গলৰগ্গো • (6) 1. Puggalavaggo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / (৬) ১. পুগ্গলৰগ্গৰণ্ণনা • (6) 1. Puggalavaggavaṇṇanā
