| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
២. ទុតិយបណ្ណាសកំ
2. Dutiyapaṇṇāsakaṃ
(៦) ១. បុគ្គលវគ្គវណ្ណនា
(6) 1. Puggalavaggavaṇṇanā
៥៣. ទុតិយបណ្ណាសកស្ស បឋមេ ហិតគ្គហណេន មេត្តា វុត្តា ហោតិ, ន ករុណា, អនុកម្បាគហណេន បន ករុណាតិ ចក្កវត្តិនា សទ្ធិំ គហិតត្តា ‘‘លោកានុកម្បាយា’’តិ ន វុត្តំ។ និប្បរិយាយតោ លោកានុកម្បា នាម សម្មាសម្ពុទ្ធាធីនាតិ។ ទ្វេតិ មនុស្សទេវសម្បត្តិវសេន ទ្វេ សម្បត្តិយោ។ តា ទ្វេ, និព្ពានសម្បត្តិ ចាតិ តិស្សោ។
53. Dutiyapaṇṇāsakassa paṭhame hitaggahaṇena mettā vuttā hoti, na karuṇā, anukampāgahaṇena pana karuṇāti cakkavattinā saddhiṃ gahitattā ‘‘lokānukampāyā’’ti na vuttaṃ. Nippariyāyato lokānukampā nāma sammāsambuddhādhīnāti. Dveti manussadevasampattivasena dve sampattiyo. Tā dve, nibbānasampatti cāti tisso.
៥៤. ទុតិយេ ពហុសោ លោកេ ន ចិណ្ណា ន បវត្តា មនុស្សាតិ អាចិណ្ណមនុស្សា។ កទាចិទេវ ហិ នេសំ លោកេ និព្ពត្តិ អភូតបុព្ពា ភូតាតិ អព្ភុតមនុស្សា។
54. Dutiye bahuso loke na ciṇṇā na pavattā manussāti āciṇṇamanussā. Kadācideva hi nesaṃ loke nibbatti abhūtapubbā bhūtāti abbhutamanussā.
៥៥. តតិយេ ទសសុ ចក្កវាឡសហស្សេសុ អនុតាបំ ករោតិ តស្ស ឯកពុទ្ធខេត្តភាវតោ។
55. Tatiye dasasu cakkavāḷasahassesu anutāpaṃ karoti tassa ekabuddhakhettabhāvato.
៥៦. ចតុត្ថេ ថូបស្ស យុត្តាតិ ធាតុយោ បក្ខិបិត្វា ថូបករណស្ស យុត្តា។
56. Catutthe thūpassa yuttāti dhātuyo pakkhipitvā thūpakaraṇassa yuttā.
៥៧. បញ្ចមេ អត្តនោ អានុភាវេនាតិ សយម្ភុញាណេន។ ពុទ្ធាតិ ពុទ្ធវន្តោ។
57. Pañcame attano ānubhāvenāti sayambhuñāṇena. Buddhāti buddhavanto.
៥៨. ឆដ្ឋេ បហីនត្តា ន ភាយតីតិ អត្តសិនេហាភាវតោ ន ភាយតិ។ សក្កាយទិដ្ឋិគ្គហណញ្ចេត្ថ និទស្សនមត្តំ, អត្តសិនេហស្ស បដិឃស្ស តទេកដ្ឋសម្មោហស្ស ច វសេន ភាយនំ ហោតីតិ តេសម្បិ បហីនត្តា ន ភាយតិ, អញ្ញថា សោតាបន្នាទីនំ អភយេន ភវិតព្ពំ សិយា។ សក្កាយទិដ្ឋិយា ពលវត្តាតិ ឯត្ថ អហំការសម្មោហនតាទីនម្បិ ពលវត្តាតិ វត្តព្ពំ។
58. Chaṭṭhe pahīnattā na bhāyatīti attasinehābhāvato na bhāyati. Sakkāyadiṭṭhiggahaṇañcettha nidassanamattaṃ, attasinehassa paṭighassa tadekaṭṭhasammohassa ca vasena bhāyanaṃ hotīti tesampi pahīnattā na bhāyati, aññathā sotāpannādīnaṃ abhayena bhavitabbaṃ siyā. Sakkāyadiṭṭhiyā balavattāti ettha ahaṃkārasammohanatādīnampi balavattāti vattabbaṃ.
៥៩. សត្តមេ អស្សាជានីយោតិ លិខន្តិ, ឧសភាជានីយោតិ បន បាឋោតិ។
59. Sattame assājānīyoti likhanti, usabhājānīyoti pana pāṭhoti.
៦១. នវមេ តត្ថាតិ អន្តរាបណេ។ ឯកោតិ ទ្វីសុ កិន្នរេសុ ឯកោ។ អម្ពិលិកាផលញ្ច អទ្ទសាតិ អានេត្វា សម្ពន្ធោ។ អម្ពិលិកាផលន្តិ តិន្តិណីផលន្តិ វទន្តិ, ចតុរម្ពិលន្តិ អបរេ។ ទ្វេ អត្ថេតិ បាឡិយំ វុត្តេ ទ្វេ អត្ថេ។
61. Navame tatthāti antarāpaṇe. Ekoti dvīsu kinnaresu eko. Ambilikāphalañca addasāti ānetvā sambandho. Ambilikāphalanti tintiṇīphalanti vadanti, caturambilanti apare. Dve attheti pāḷiyaṃ vutte dve atthe.
៦២. ទសមេ យថាអារទ្ធេ កិច្ចេ វត្តមានេ អន្តរា ឯវ បដិគមនំ បដិវានំ, នត្ថិ ឯតស្ស បដិវានន្តិ អប្បដិវានោ។ តត្ថ អសំកោចប្បត្តោ។ តេនាហ ‘‘អនុក្កណ្ឋិតោ’’តិអាទិ។
62. Dasame yathāāraddhe kicce vattamāne antarā eva paṭigamanaṃ paṭivānaṃ, natthi etassa paṭivānanti appaṭivāno. Tattha asaṃkocappatto. Tenāha ‘‘anukkaṇṭhito’’tiādi.
៦៣. ឯកាទសមេ សន្និវាសន្តិ សហវាសំ។ យថា អសប្បុរិសា សហ វសន្តា អញ្ញមញ្ញំ អគារវេន អនាទរិយំ ករោន្តិ, តប្បដិក្ខេបេន សប្បុរិសានំ សគារវប្បដិបត្តិទស្សនបរមិទំ សុត្តំ ទដ្ឋព្ពំ។
63. Ekādasame sannivāsanti sahavāsaṃ. Yathā asappurisā saha vasantā aññamaññaṃ agāravena anādariyaṃ karonti, tappaṭikkhepena sappurisānaṃ sagāravappaṭipattidassanaparamidaṃ suttaṃ daṭṭhabbaṃ.
៦៤. ទ្វាទសមេ ទ្វីសុបិ បក្ខេសូតិ វិវាទាបន្នានំ ភិក្ខូនំ ទ្វីសុបិ បក្ខេសុ។ សំសរមានាតិ បវត្តមានា។ ទិដ្ឋិបឡាសោតិ ទិដ្ឋិសន្និស្សយោ បឡាសោ យុគគ្គាហោ។ អាឃាតេន្តោតិ អាហនន្តោ ពាធេន្តោ។ អនភិរាធនវសេនាតិ យស្ស ឧប្បជ្ជតិ, តស្ស តទញ្ញេសញ្ច អត្ថស្ស អនភិរាធនវសេន។ សព្ពម្បេតន្តិ វចីសំសារោតិ សព្ពម្បេតំ។ អត្តនោ ចិត្តេ បរិសាយ ច ចិត្តេតិ អានេត្វា សម្ពន្ធោ។
64. Dvādasame dvīsupi pakkhesūti vivādāpannānaṃ bhikkhūnaṃ dvīsupi pakkhesu. Saṃsaramānāti pavattamānā. Diṭṭhipaḷāsoti diṭṭhisannissayo paḷāso yugaggāho. Āghātentoti āhananto bādhento. Anabhirādhanavasenāti yassa uppajjati, tassa tadaññesañca atthassa anabhirādhanavasena. Sabbampetanti vacīsaṃsāroti sabbampetaṃ. Attano citte parisāya ca citteti ānetvā sambandho.
បុគ្គលវគ្គវណ្ណនា និដ្ឋិតា។
Puggalavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (៦) ១. បុគ្គលវគ្គោ • (6) 1. Puggalavaggo
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / (៦) ១. បុគ្គលវគ្គវណ្ណនា • (6) 1. Puggalavaggavaṇṇanā
