| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
2. දුතියපණ්‌ණාසකං
2. Dutiyapaṇṇāsakaṃ
(6) 1. පුග්‌ගලවග්‌ගවණ්‌ණනා
(6) 1. Puggalavaggavaṇṇanā
53. දුතියපණ්‌ණාසකස්‌ස පඨමෙ හිතග්‌ගහණෙන මෙත්‌තා වුත්‌තා හොති, න කරුණා, අනුකම්‌පාගහණෙන පන කරුණාති චක්‌කවත්‌තිනා සද්‌ධිං ගහිතත්‌තා ‘‘ලොකානුකම්‌පායා’’ති න වුත්‌තං. නිප්‌පරියායතො ලොකානුකම්‌පා නාම සම්‌මාසම්‌බුද්‌ධාධීනාති. ද්‌වෙති මනුස්‌සදෙවසම්‌පත්‌තිවසෙන ද්‌වෙ සම්‌පත්‌තියො. තා ද්‌වෙ, නිබ්‌බානසම්‌පත්‌ති චාති තිස්‌සො.
53. Dutiyapaṇṇāsakassa paṭhame hitaggahaṇena mettā vuttā hoti, na karuṇā, anukampāgahaṇena pana karuṇāti cakkavattinā saddhiṃ gahitattā ‘‘lokānukampāyā’’ti na vuttaṃ. Nippariyāyato lokānukampā nāma sammāsambuddhādhīnāti. Dveti manussadevasampattivasena dve sampattiyo. Tā dve, nibbānasampatti cāti tisso.
54. දුතියෙ බහුසො ලොකෙ න චිණ්‌ණා න පවත්‌තා මනුස්‌සාති ආචිණ්‌ණමනුස්‌සා. කදාචිදෙව හි නෙසං ලොකෙ නිබ්‌බත්‌ති අභූතපුබ්‌බා භූතාති අබ්‌භුතමනුස්‌සා.
54. Dutiye bahuso loke na ciṇṇā na pavattā manussāti āciṇṇamanussā. Kadācideva hi nesaṃ loke nibbatti abhūtapubbā bhūtāti abbhutamanussā.
55. තතියෙ දසසු චක්‌කවාළසහස්‌සෙසු අනුතාපං කරොති තස්‌ස එකබුද්‌ධඛෙත්‌තභාවතො.
55. Tatiye dasasu cakkavāḷasahassesu anutāpaṃ karoti tassa ekabuddhakhettabhāvato.
56. චතුත්‌ථෙ ථූපස්‌ස යුත්‌තාති ධාතුයො පක්‌ඛිපිත්‌වා ථූපකරණස්‌ස යුත්‌තා.
56. Catutthe thūpassa yuttāti dhātuyo pakkhipitvā thūpakaraṇassa yuttā.
57. පඤ්‌චමෙ අත්‌තනො ආනුභාවෙනාති සයම්‌භුඤාණෙන. බුද්‌ධාති බුද්‌ධවන්‌තො.
57. Pañcame attano ānubhāvenāti sayambhuñāṇena. Buddhāti buddhavanto.
58. ඡට්‌ඨෙ පහීනත්‌තා න භායතීති අත්‌තසිනෙහාභාවතො න භායති. සක්‌කායදිට්‌ඨිග්‌ගහණඤ්‌චෙත්‌ථ නිදස්‌සනමත්‌තං, අත්‌තසිනෙහස්‌ස පටිඝස්‌ස තදෙකට්‌ඨසම්‌මොහස්‌ස ච වසෙන භායනං හොතීති තෙසම්‌පි පහීනත්‌තා න භායති, අඤ්‌ඤථා සොතාපන්‌නාදීනං අභයෙන භවිතබ්‌බං සියා. සක්‌කායදිට්‌ඨියා බලවත්‌තාති එත්‌ථ අහංකාරසම්‌මොහනතාදීනම්‌පි බලවත්‌තාති වත්‌තබ්‌බං.
58. Chaṭṭhe pahīnattā na bhāyatīti attasinehābhāvato na bhāyati. Sakkāyadiṭṭhiggahaṇañcettha nidassanamattaṃ, attasinehassa paṭighassa tadekaṭṭhasammohassa ca vasena bhāyanaṃ hotīti tesampi pahīnattā na bhāyati, aññathā sotāpannādīnaṃ abhayena bhavitabbaṃ siyā. Sakkāyadiṭṭhiyā balavattāti ettha ahaṃkārasammohanatādīnampi balavattāti vattabbaṃ.
59. සත්‌තමෙ අස්‌සාජානීයොති ලිඛන්‌ති, උසභාජානීයොති පන පාඨොති.
59. Sattame assājānīyoti likhanti, usabhājānīyoti pana pāṭhoti.
61. නවමෙ තත්‌ථාති අන්‌තරාපණෙ. එකොති ද්‌වීසු කින්‌නරෙසු එකො. අම්‌බිලිකාඵලඤ්‌ච අද්‌දසාති ආනෙත්‌වා සම්‌බන්‌ධො. අම්‌බිලිකාඵලන්‌ති තින්‌තිණීඵලන්‌ති වදන්‌ති, චතුරම්‌බිලන්‌ති අපරෙ. ද්‌වෙ අත්‌ථෙති පාළියං වුත්‌තෙ ද්‌වෙ අත්‌ථෙ.
61. Navame tatthāti antarāpaṇe. Ekoti dvīsu kinnaresu eko. Ambilikāphalañca addasāti ānetvā sambandho. Ambilikāphalanti tintiṇīphalanti vadanti, caturambilanti apare. Dve attheti pāḷiyaṃ vutte dve atthe.
62. දසමෙ යථාආරද්‌ධෙ කිච්‌චෙ වත්‌තමානෙ අන්‌තරා එව පටිගමනං පටිවානං, නත්‌ථි එතස්‌ස පටිවානන්‌ති අප්‌පටිවානො. තත්‌ථ අසංකොචප්‌පත්‌තො. තෙනාහ ‘‘අනුක්‌කණ්‌ඨිතො’’තිආදි.
62. Dasame yathāāraddhe kicce vattamāne antarā eva paṭigamanaṃ paṭivānaṃ, natthi etassa paṭivānanti appaṭivāno. Tattha asaṃkocappatto. Tenāha ‘‘anukkaṇṭhito’’tiādi.
63. එකාදසමෙ සන්‌නිවාසන්‌ති සහවාසං. යථා අසප්‌පුරිසා සහ වසන්‌තා අඤ්‌ඤමඤ්‌ඤං අගාරවෙන අනාදරියං කරොන්‌ති, තප්‌පටික්‌ඛෙපෙන සප්‌පුරිසානං සගාරවප්‌පටිපත්‌තිදස්‌සනපරමිදං සුත්‌තං දට්‌ඨබ්‌බං.
63. Ekādasame sannivāsanti sahavāsaṃ. Yathā asappurisā saha vasantā aññamaññaṃ agāravena anādariyaṃ karonti, tappaṭikkhepena sappurisānaṃ sagāravappaṭipattidassanaparamidaṃ suttaṃ daṭṭhabbaṃ.
64. ද්‌වාදසමෙ ද්‌වීසුපි පක්‌ඛෙසූති විවාදාපන්‌නානං භික්‌ඛූනං ද්‌වීසුපි පක්‌ඛෙසු. සංසරමානාති පවත්‌තමානා. දිට්‌ඨිපළාසොති දිට්‌ඨිසන්‌නිස්‌සයො පළාසො යුගග්‌ගාහො. ආඝාතෙන්‌තොති ආහනන්‌තො බාධෙන්‌තො. අනභිරාධනවසෙනාති යස්‌ස උප්‌පජ්‌ජති, තස්‌ස තදඤ්‌ඤෙසඤ්‌ච අත්‌ථස්‌ස අනභිරාධනවසෙන. සබ්‌බම්‌පෙතන්‌ති වචීසංසාරොති සබ්‌බම්‌පෙතං. අත්‌තනො චිත්‌තෙ පරිසාය ච චිත්‌තෙති ආනෙත්‌වා සම්‌බන්‌ධො.
64. Dvādasame dvīsupi pakkhesūti vivādāpannānaṃ bhikkhūnaṃ dvīsupi pakkhesu. Saṃsaramānāti pavattamānā. Diṭṭhipaḷāsoti diṭṭhisannissayo paḷāso yugaggāho. Āghātentoti āhananto bādhento. Anabhirādhanavasenāti yassa uppajjati, tassa tadaññesañca atthassa anabhirādhanavasena. Sabbampetanti vacīsaṃsāroti sabbampetaṃ. Attano citte parisāya ca citteti ānetvā sambandho.
පුග්‌ගලවග්‌ගවණ්‌ණනා නිට්‌ඨිතා.
Puggalavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / (6) 1. පුග්‌ගලවග්‌ගො • (6) 1. Puggalavaggo
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / (6) 1. පුග්‌ගලවග්‌ගවණ්‌ණනා • (6) 1. Puggalavaggavaṇṇanā
