| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੨. ਦੁਤਿਯਪਣ੍ਣਾਸਕਂ
2. Dutiyapaṇṇāsakaṃ
(੬) ੧. ਪੁਗ੍ਗਲવਗ੍ਗવਣ੍ਣਨਾ
(6) 1. Puggalavaggavaṇṇanā
੫੩. ਦੁਤਿਯਪਣ੍ਣਾਸਕਸ੍ਸ ਪਠਮੇ ਹਿਤਗ੍ਗਹਣੇਨ ਮੇਤ੍ਤਾ વੁਤ੍ਤਾ ਹੋਤਿ, ਨ ਕਰੁਣਾ, ਅਨੁਕਮ੍ਪਾਗਹਣੇਨ ਪਨ ਕਰੁਣਾਤਿ ਚਕ੍ਕવਤ੍ਤਿਨਾ ਸਦ੍ਧਿਂ ਗਹਿਤਤ੍ਤਾ ‘‘ਲੋਕਾਨੁਕਮ੍ਪਾਯਾ’’ਤਿ ਨ વੁਤ੍ਤਂ। ਨਿਪ੍ਪਰਿਯਾਯਤੋ ਲੋਕਾਨੁਕਮ੍ਪਾ ਨਾਮ ਸਮ੍ਮਾਸਮ੍ਬੁਦ੍ਧਾਧੀਨਾਤਿ। ਦ੍વੇਤਿ ਮਨੁਸ੍ਸਦੇવਸਮ੍ਪਤ੍ਤਿવਸੇਨ ਦ੍વੇ ਸਮ੍ਪਤ੍ਤਿਯੋ। ਤਾ ਦ੍વੇ, ਨਿਬ੍ਬਾਨਸਮ੍ਪਤ੍ਤਿ ਚਾਤਿ ਤਿਸ੍ਸੋ।
53. Dutiyapaṇṇāsakassa paṭhame hitaggahaṇena mettā vuttā hoti, na karuṇā, anukampāgahaṇena pana karuṇāti cakkavattinā saddhiṃ gahitattā ‘‘lokānukampāyā’’ti na vuttaṃ. Nippariyāyato lokānukampā nāma sammāsambuddhādhīnāti. Dveti manussadevasampattivasena dve sampattiyo. Tā dve, nibbānasampatti cāti tisso.
੫੪. ਦੁਤਿਯੇ ਬਹੁਸੋ ਲੋਕੇ ਨ ਚਿਣ੍ਣਾ ਨ ਪવਤ੍ਤਾ ਮਨੁਸ੍ਸਾਤਿ ਆਚਿਣ੍ਣਮਨੁਸ੍ਸਾ। ਕਦਾਚਿਦੇવ ਹਿ ਨੇਸਂ ਲੋਕੇ ਨਿਬ੍ਬਤ੍ਤਿ ਅਭੂਤਪੁਬ੍ਬਾ ਭੂਤਾਤਿ ਅਬ੍ਭੁਤਮਨੁਸ੍ਸਾ।
54. Dutiye bahuso loke na ciṇṇā na pavattā manussāti āciṇṇamanussā. Kadācideva hi nesaṃ loke nibbatti abhūtapubbā bhūtāti abbhutamanussā.
੫੫. ਤਤਿਯੇ ਦਸਸੁ ਚਕ੍ਕવਾਲ਼ਸਹਸ੍ਸੇਸੁ ਅਨੁਤਾਪਂ ਕਰੋਤਿ ਤਸ੍ਸ ਏਕਬੁਦ੍ਧਖੇਤ੍ਤਭਾવਤੋ।
55. Tatiye dasasu cakkavāḷasahassesu anutāpaṃ karoti tassa ekabuddhakhettabhāvato.
੫੬. ਚਤੁਤ੍ਥੇ ਥੂਪਸ੍ਸ ਯੁਤ੍ਤਾਤਿ ਧਾਤੁਯੋ ਪਕ੍ਖਿਪਿਤ੍વਾ ਥੂਪਕਰਣਸ੍ਸ ਯੁਤ੍ਤਾ।
56. Catutthe thūpassa yuttāti dhātuyo pakkhipitvā thūpakaraṇassa yuttā.
੫੭. ਪਞ੍ਚਮੇ ਅਤ੍ਤਨੋ ਆਨੁਭਾવੇਨਾਤਿ ਸਯਮ੍ਭੁਞਾਣੇਨ। ਬੁਦ੍ਧਾਤਿ ਬੁਦ੍ਧવਨ੍ਤੋ।
57. Pañcame attano ānubhāvenāti sayambhuñāṇena. Buddhāti buddhavanto.
੫੮. ਛਟ੍ਠੇ ਪਹੀਨਤ੍ਤਾ ਨ ਭਾਯਤੀਤਿ ਅਤ੍ਤਸਿਨੇਹਾਭਾવਤੋ ਨ ਭਾਯਤਿ। ਸਕ੍ਕਾਯਦਿਟ੍ਠਿਗ੍ਗਹਣਞ੍ਚੇਤ੍ਥ ਨਿਦਸ੍ਸਨਮਤ੍ਤਂ, ਅਤ੍ਤਸਿਨੇਹਸ੍ਸ ਪਟਿਘਸ੍ਸ ਤਦੇਕਟ੍ਠਸਮ੍ਮੋਹਸ੍ਸ ਚ વਸੇਨ ਭਾਯਨਂ ਹੋਤੀਤਿ ਤੇਸਮ੍ਪਿ ਪਹੀਨਤ੍ਤਾ ਨ ਭਾਯਤਿ, ਅਞ੍ਞਥਾ ਸੋਤਾਪਨ੍ਨਾਦੀਨਂ ਅਭਯੇਨ ਭવਿਤਬ੍ਬਂ ਸਿਯਾ। ਸਕ੍ਕਾਯਦਿਟ੍ਠਿਯਾ ਬਲવਤ੍ਤਾਤਿ ਏਤ੍ਥ ਅਹਂਕਾਰਸਮ੍ਮੋਹਨਤਾਦੀਨਮ੍ਪਿ ਬਲવਤ੍ਤਾਤਿ વਤ੍ਤਬ੍ਬਂ।
58. Chaṭṭhe pahīnattā na bhāyatīti attasinehābhāvato na bhāyati. Sakkāyadiṭṭhiggahaṇañcettha nidassanamattaṃ, attasinehassa paṭighassa tadekaṭṭhasammohassa ca vasena bhāyanaṃ hotīti tesampi pahīnattā na bhāyati, aññathā sotāpannādīnaṃ abhayena bhavitabbaṃ siyā. Sakkāyadiṭṭhiyā balavattāti ettha ahaṃkārasammohanatādīnampi balavattāti vattabbaṃ.
੫੯. ਸਤ੍ਤਮੇ ਅਸ੍ਸਾਜਾਨੀਯੋਤਿ ਲਿਖਨ੍ਤਿ, ਉਸਭਾਜਾਨੀਯੋਤਿ ਪਨ ਪਾਠੋਤਿ।
59. Sattame assājānīyoti likhanti, usabhājānīyoti pana pāṭhoti.
੬੧. ਨવਮੇ ਤਤ੍ਥਾਤਿ ਅਨ੍ਤਰਾਪਣੇ। ਏਕੋਤਿ ਦ੍વੀਸੁ ਕਿਨ੍ਨਰੇਸੁ ਏਕੋ। ਅਮ੍ਬਿਲਿਕਾਫਲਞ੍ਚ ਅਦ੍ਦਸਾਤਿ ਆਨੇਤ੍વਾ ਸਮ੍ਬਨ੍ਧੋ। ਅਮ੍ਬਿਲਿਕਾਫਲਨ੍ਤਿ ਤਿਨ੍ਤਿਣੀਫਲਨ੍ਤਿ વਦਨ੍ਤਿ, ਚਤੁਰਮ੍ਬਿਲਨ੍ਤਿ ਅਪਰੇ। ਦ੍વੇ ਅਤ੍ਥੇਤਿ ਪਾਲ਼ਿਯਂ વੁਤ੍ਤੇ ਦ੍વੇ ਅਤ੍ਥੇ।
61. Navame tatthāti antarāpaṇe. Ekoti dvīsu kinnaresu eko. Ambilikāphalañca addasāti ānetvā sambandho. Ambilikāphalanti tintiṇīphalanti vadanti, caturambilanti apare. Dve attheti pāḷiyaṃ vutte dve atthe.
੬੨. ਦਸਮੇ ਯਥਾਆਰਦ੍ਧੇ ਕਿਚ੍ਚੇ વਤ੍ਤਮਾਨੇ ਅਨ੍ਤਰਾ ਏવ ਪਟਿਗਮਨਂ ਪਟਿવਾਨਂ, ਨਤ੍ਥਿ ਏਤਸ੍ਸ ਪਟਿવਾਨਨ੍ਤਿ ਅਪ੍ਪਟਿવਾਨੋ। ਤਤ੍ਥ ਅਸਂਕੋਚਪ੍ਪਤ੍ਤੋ। ਤੇਨਾਹ ‘‘ਅਨੁਕ੍ਕਣ੍ਠਿਤੋ’’ਤਿਆਦਿ।
62. Dasame yathāāraddhe kicce vattamāne antarā eva paṭigamanaṃ paṭivānaṃ, natthi etassa paṭivānanti appaṭivāno. Tattha asaṃkocappatto. Tenāha ‘‘anukkaṇṭhito’’tiādi.
੬੩. ਏਕਾਦਸਮੇ ਸਨ੍ਨਿવਾਸਨ੍ਤਿ ਸਹવਾਸਂ। ਯਥਾ ਅਸਪ੍ਪੁਰਿਸਾ ਸਹ વਸਨ੍ਤਾ ਅਞ੍ਞਮਞ੍ਞਂ ਅਗਾਰવੇਨ ਅਨਾਦਰਿਯਂ ਕਰੋਨ੍ਤਿ, ਤਪ੍ਪਟਿਕ੍ਖੇਪੇਨ ਸਪ੍ਪੁਰਿਸਾਨਂ ਸਗਾਰવਪ੍ਪਟਿਪਤ੍ਤਿਦਸ੍ਸਨਪਰਮਿਦਂ ਸੁਤ੍ਤਂ ਦਟ੍ਠਬ੍ਬਂ।
63. Ekādasame sannivāsanti sahavāsaṃ. Yathā asappurisā saha vasantā aññamaññaṃ agāravena anādariyaṃ karonti, tappaṭikkhepena sappurisānaṃ sagāravappaṭipattidassanaparamidaṃ suttaṃ daṭṭhabbaṃ.
੬੪. ਦ੍વਾਦਸਮੇ ਦ੍વੀਸੁਪਿ ਪਕ੍ਖੇਸੂਤਿ વਿવਾਦਾਪਨ੍ਨਾਨਂ ਭਿਕ੍ਖੂਨਂ ਦ੍વੀਸੁਪਿ ਪਕ੍ਖੇਸੁ। ਸਂਸਰਮਾਨਾਤਿ ਪવਤ੍ਤਮਾਨਾ। ਦਿਟ੍ਠਿਪਲ਼ਾਸੋਤਿ ਦਿਟ੍ਠਿਸਨ੍ਨਿਸ੍ਸਯੋ ਪਲ਼ਾਸੋ ਯੁਗਗ੍ਗਾਹੋ। ਆਘਾਤੇਨ੍ਤੋਤਿ ਆਹਨਨ੍ਤੋ ਬਾਧੇਨ੍ਤੋ। ਅਨਭਿਰਾਧਨવਸੇਨਾਤਿ ਯਸ੍ਸ ਉਪ੍ਪਜ੍ਜਤਿ, ਤਸ੍ਸ ਤਦਞ੍ਞੇਸਞ੍ਚ ਅਤ੍ਥਸ੍ਸ ਅਨਭਿਰਾਧਨવਸੇਨ। ਸਬ੍ਬਮ੍ਪੇਤਨ੍ਤਿ વਚੀਸਂਸਾਰੋਤਿ ਸਬ੍ਬਮ੍ਪੇਤਂ। ਅਤ੍ਤਨੋ ਚਿਤ੍ਤੇ ਪਰਿਸਾਯ ਚ ਚਿਤ੍ਤੇਤਿ ਆਨੇਤ੍વਾ ਸਮ੍ਬਨ੍ਧੋ।
64. Dvādasame dvīsupi pakkhesūti vivādāpannānaṃ bhikkhūnaṃ dvīsupi pakkhesu. Saṃsaramānāti pavattamānā. Diṭṭhipaḷāsoti diṭṭhisannissayo paḷāso yugaggāho. Āghātentoti āhananto bādhento. Anabhirādhanavasenāti yassa uppajjati, tassa tadaññesañca atthassa anabhirādhanavasena. Sabbampetanti vacīsaṃsāroti sabbampetaṃ. Attano citte parisāya ca citteti ānetvā sambandho.
ਪੁਗ੍ਗਲવਗ੍ਗવਣ੍ਣਨਾ ਨਿਟ੍ਠਿਤਾ।
Puggalavaggavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / (੬) ੧. ਪੁਗ੍ਗਲવਗ੍ਗੋ • (6) 1. Puggalavaggo
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / (੬) ੧. ਪੁਗ੍ਗਲવਗ੍ਗવਣ੍ਣਨਾ • (6) 1. Puggalavaggavaṇṇanā
