| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๒. ปุคฺคลวิเสสนิเทฺทโส
2. Puggalavisesaniddeso
๘. เทฺว ปุคฺคลา ปฎิสมฺภิทปฺปตฺตา – เอโก ปุพฺพโยคสมฺปโนฺน, เอโก น ปุพฺพโยคสมฺปโนฺนฯ โย ปุพฺพโยคสมฺปโนฺน โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
8. Dve puggalā paṭisambhidappattā – eko pubbayogasampanno, eko na pubbayogasampanno. Yo pubbayogasampanno so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา – เอโก พหุสฺสุโต, เอโก น พหุสฺสุโต ฯ โย พหุสฺสุโต, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā – eko bahussuto, eko na bahussuto . Yo bahussuto, so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา – เอโก เทสนาพหุโล, เอโก น เทสนาพหุโลฯ โย เทสนาพหุโล, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā – eko desanābahulo, eko na desanābahulo. Yo desanābahulo, so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา, เทฺวปิ เทสนาพหุลา – เอโก ครูปนิสฺสิโต, เอโก น ครูปนิสฺสิโต ฯ โย ครูปนิสฺสิโต, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā – eko garūpanissito, eko na garūpanissito . Yo garūpanissito, so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา, เทฺวปิ เทสนาพหุลา, เทฺวปิ ครูปนิสฺสิตา – เอโก วิหารพหุโล, เอโก น วิหารพหุโลฯ โย วิหารพหุโล, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā – eko vihārabahulo, eko na vihārabahulo. Yo vihārabahulo, so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา, เทฺวปิ เทสนาพหุลา, เทฺวปิ ครูปนิสฺสิตา, เทฺวปิ วิหารพหุลา – เอโก ปจฺจเวกฺขณาพหุโล , เอโก น ปจฺจเวกฺขณาพหุโลฯ โย ปจฺจเวกฺขณาพหุโล, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā – eko paccavekkhaṇābahulo , eko na paccavekkhaṇābahulo. Yo paccavekkhaṇābahulo, so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา, เทฺวปิ เทสนาพหุลา, เทฺวปิ ครูปนิสฺสิตา, เทฺวปิ วิหารพหุลา, เทฺวปิ ปจฺจเวกฺขณาพหุลา – เอโก เสขปฎิสมฺภิทปฺปโตฺต, เอโก อเสขปฎิสมฺภิทปฺปโตฺตฯ โย อเสขปฎิสมฺภิทปฺปโตฺต, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā, dvepi paccavekkhaṇābahulā – eko sekhapaṭisambhidappatto, eko asekhapaṭisambhidappatto. Yo asekhapaṭisambhidappatto, so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา, เทฺวปิ เทสนาพหุลา, เทฺวปิ ครูปนิสฺสิตา, เทฺวปิ วิหารพหุลา, เทฺวปิ ปจฺจเวกฺขณาพหุลา, เทฺวปิ อเสขปฎิสมฺภิทปฺปตฺตา – เอโก สาวกปารมิปฺปโตฺต, เอโก น สาวกปารมิปฺปโตฺตฯ โย สาวกปารมิปฺปโตฺต , โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā, dvepi paccavekkhaṇābahulā, dvepi asekhapaṭisambhidappattā – eko sāvakapāramippatto, eko na sāvakapāramippatto. Yo sāvakapāramippatto , so tena atireko hoti, adhiko hoti, viseso hoti. Tassa ñāṇaṃ pabhijjati.
เทฺว ปุคฺคลา ปฎิสมฺภิทปฺปตฺตา, เทฺวปิ ปุพฺพโยคสมฺปนฺนา, เทฺวปิ พหุสฺสุตา, เทฺวปิ เทสนาพหุลา, เทฺวปิ ครูปนิสฺสิตา, เทฺวปิ วิหารพหุลา, เทฺวปิ ปจฺจเวกฺขณาพหุลา, เทฺวปิ อเสขปฎิสมฺภิทปฺปตฺตา – เอโก สาวกปารมิปฺปโตฺต, เอโก ปเจฺจกสมฺพุโทฺธฯ โย ปเจฺจกสมฺพุโทฺธ, โส เตน อติเรโก โหติ, อธิโก โหติ, วิเสโส โหติฯ ตสฺส ญาณํ ปภิชฺชติฯ
Dve puggalā paṭisambhidappattā, dvepi pubbayogasampannā, dvepi bahussutā, dvepi desanābahulā, dvepi garūpanissitā, dvepi vihārabahulā, dvepi paccavekkhaṇābahulā, dvepi asekhapaṭisambhidappattā – eko sāvakapāramippatto, eko paccekasambuddho. Yo paccekasambuddho, so tena atireko hoti, adhiko hoti, viseso hoti. Tassa ñāṇaṃ pabhijjati.
ปเจฺจกพุทฺธญฺจ สเทวกญฺจ โลกํ อุปาทาย ตถาคโต อรหํ สมฺมาสมฺพุโทฺธ อโคฺค ปฎิสมฺภิทปฺปโตฺต ปญฺญาปเภทกุสโล ปภินฺนญาโณ อธิคตปฎิสมฺภิโท จตุเวสารชฺชปฺปโตฺต ทสพลธารี ปุริสาสโภ ปุริสสีโห…เป.… เยปิ เต ขตฺติยปณฺฑิตา พฺราหฺมณปณฺฑิตา คหปติปณฺฑิตา สมณปณฺฑิตา นิปุณา กตปรปฺปวาทา วาลเวธิรูปา โวภินฺทนฺตา มเญฺญ จรนฺติ ปญฺญาคเตน ทิฎฺฐิคตานิ, เต ปญฺหํ อภิสงฺขริตฺวา อภิสงฺขริตฺวา ตถาคตํ อุปสงฺกมิตฺวา ปุจฺฉนฺติ คูฬฺหานิ จ ปฎิจฺฉนฺนานิ จฯ กถิตา วิสชฺชิตา จ เต ปญฺหา ภควตา โหนฺติ นิทฺทิฎฺฐการณา, อุปกฺขิตฺตกา จ เต ภควโต สมฺปชฺชนฺติฯ อถ โข ภควา ตตฺถ อติโรจติ, ยทิทํ ปญฺญายาติ อโคฺค ปฎิสมฺภิทปฺปโตฺตติฯ
Paccekabuddhañca sadevakañca lokaṃ upādāya tathāgato arahaṃ sammāsambuddho aggo paṭisambhidappatto paññāpabhedakusalo pabhinnañāṇo adhigatapaṭisambhido catuvesārajjappatto dasabaladhārī purisāsabho purisasīho…pe… yepi te khattiyapaṇḍitā brāhmaṇapaṇḍitā gahapatipaṇḍitā samaṇapaṇḍitā nipuṇā kataparappavādā vālavedhirūpā vobhindantā maññe caranti paññāgatena diṭṭhigatāni, te pañhaṃ abhisaṅkharitvā abhisaṅkharitvā tathāgataṃ upasaṅkamitvā pucchanti gūḷhāni ca paṭicchannāni ca. Kathitā visajjitā ca te pañhā bhagavatā honti niddiṭṭhakāraṇā, upakkhittakā ca te bhagavato sampajjanti. Atha kho bhagavā tattha atirocati, yadidaṃ paññāyāti aggo paṭisambhidappattoti.
มหาปญฺญากถา นิฎฺฐิตาฯ
Mahāpaññākathā niṭṭhitā.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / ๒. ปุคฺคลวิเสสนิเทฺทสวณฺณนา • 2. Puggalavisesaniddesavaṇṇanā
