| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. புலினபூஜகத்தே²ரஅபதா³னவண்ணனா
7. Pulinapūjakattheraapadānavaṇṇanā
விபஸ்ஸிஸ்ஸ ப⁴க³வதோதிஆதி³கங் ஆயஸ்மதோ புலினபூஜகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் குலே நிப்³ப³த்தோ ஸாஸனே பஸன்னசித்தோ சேதியங்க³ணபோ³தி⁴யங்க³ணேஸு புராணவாலுகங் அபனெத்வா நவங் முத்தாத³லஸதி³ஸபண்ட³ரபுலினங் ஓகிரித்வா மாளகங் அலங்கரி. தேன கம்மேன ஸோ தே³வலோகே நிப்³ப³த்தோ தத்த² தி³ப்³பே³ஹி ரதனேஹி விஜ்ஜோதமானே அனேகயோஜனே கனகவிமானே தி³ப்³ப³ஸம்பத்திங் அனுப⁴வித்வா ததோ சுதோ மனுஸ்ஸலோகே ஸத்தரதனஸம்பன்னோ சக்கவத்தீ ராஜா ஹுத்வா மனுஸ்ஸஸம்பத்திங் அனுப⁴வித்வா அபராபரங் ஸங்ஸரந்தோ இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலே நிப்³ப³த்தோ ஸாஸனே பஸன்னோ பப்³ப³ஜித்வா விபஸ்ஸனங் வட்³டெ⁴த்வா அரஹத்தங் பாபுணி. ஸோ அத்தனோ கதபுஞ்ஞனாமஸதி³ஸேன நாமேன புலினபூஜகத்தே²ரோதி பாகடோ.
Vipassissabhagavatotiādikaṃ āyasmato pulinapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kule nibbatto sāsane pasannacitto cetiyaṅgaṇabodhiyaṅgaṇesu purāṇavālukaṃ apanetvā navaṃ muttādalasadisapaṇḍarapulinaṃ okiritvā māḷakaṃ alaṅkari. Tena kammena so devaloke nibbatto tattha dibbehi ratanehi vijjotamāne anekayojane kanakavimāne dibbasampattiṃ anubhavitvā tato cuto manussaloke sattaratanasampanno cakkavattī rājā hutvā manussasampattiṃ anubhavitvā aparāparaṃ saṃsaranto imasmiṃ buddhuppāde vibhavasampanne ekasmiṃ kule nibbatto sāsane pasanno pabbajitvā vipassanaṃ vaḍḍhetvā arahattaṃ pāpuṇi. So attano katapuññanāmasadisena nāmena pulinapūjakattheroti pākaṭo.
165. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் த³ஸ்ஸெந்தோ விபஸ்ஸிஸ்ஸ ப⁴க³வதோதிஆதி³மாஹ. தத்த² விவித⁴ங் பஸ்ஸதீதி விபஸ்ஸீ, விவிச்ச பஸ்ஸதீதி வா விபஸ்ஸீ, விவிதே⁴ அத்தத்த²பரத்தா²தி³பே⁴தே³ அத்தே² பஸ்ஸதீதி வா விபஸ்ஸீ, விவிதே⁴ வோஹாரபரமத்தா²தி³பே⁴தே³ பஸ்ஸதீதி வா விபஸ்ஸீ, தஸ்ஸ விபஸ்ஸிஸ்ஸ போ³தி⁴யா பாத³புத்தமே உத்தமே போ³தி⁴ருக்க²மண்ட³லமாளகே புராணபுலினங் வாலுகங் ச²ட்³டெ³த்வா ஸுத்³த⁴ங் பண்ட³ரங் புலினங் ஆகிரிங் ஸந்த²ரிங். ஸேஸங் ஸுவிஞ்ஞெய்யமேவாதி.
165. So attano pubbakammaṃ saritvā somanassajāto pubbacaritāpadānaṃ dassento vipassissa bhagavatotiādimāha. Tattha vividhaṃ passatīti vipassī, vivicca passatīti vā vipassī, vividhe attatthaparatthādibhede atthe passatīti vā vipassī, vividhe vohāraparamatthādibhede passatīti vā vipassī, tassa vipassissa bodhiyā pādaputtame uttame bodhirukkhamaṇḍalamāḷake purāṇapulinaṃ vālukaṃ chaḍḍetvā suddhaṃ paṇḍaraṃ pulinaṃ ākiriṃ santhariṃ. Sesaṃ suviññeyyamevāti.
புலினபூஜகத்தே²ரஅபதா³னவண்ணனா ஸமத்தா.
Pulinapūjakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. புலினபூஜகத்தே²ரஅபதா³னங் • 7. Pulinapūjakattheraapadānaṃ
