| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. পুলিনপূজকত্থেরঅপদানৰণ্ণনা
7. Pulinapūjakattheraapadānavaṇṇanā
ৰিপস্সিস্স ভগৰতোতিআদিকং আযস্মতো পুলিনপূজকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে একস্মিং কুলে নিব্বত্তো সাসনে পসন্নচিত্তো চেতিযঙ্গণবোধিযঙ্গণেসু পুরাণৰালুকং অপনেত্ৰা নৰং মুত্তাদলসদিসপণ্ডরপুলিনং ওকিরিত্ৰা মাল়কং অলঙ্করি। তেন কম্মেন সো দেৰলোকে নিব্বত্তো তত্থ দিব্বেহি রতনেহি ৰিজ্জোতমানে অনেকযোজনে কনকৰিমানে দিব্বসম্পত্তিং অনুভৰিত্ৰা ততো চুতো মনুস্সলোকে সত্তরতনসম্পন্নো চক্কৰত্তী রাজা হুত্ৰা মনুস্সসম্পত্তিং অনুভৰিত্ৰা অপরাপরং সংসরন্তো ইমস্মিং বুদ্ধুপ্পাদে ৰিভৰসম্পন্নে একস্মিং কুলে নিব্বত্তো সাসনে পসন্নো পব্বজিত্ৰা ৰিপস্সনং ৰড্ঢেত্ৰা অরহত্তং পাপুণি। সো অত্তনো কতপুঞ্ঞনামসদিসেন নামেন পুলিনপূজকত্থেরোতি পাকটো।
Vipassissabhagavatotiādikaṃ āyasmato pulinapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kule nibbatto sāsane pasannacitto cetiyaṅgaṇabodhiyaṅgaṇesu purāṇavālukaṃ apanetvā navaṃ muttādalasadisapaṇḍarapulinaṃ okiritvā māḷakaṃ alaṅkari. Tena kammena so devaloke nibbatto tattha dibbehi ratanehi vijjotamāne anekayojane kanakavimāne dibbasampattiṃ anubhavitvā tato cuto manussaloke sattaratanasampanno cakkavattī rājā hutvā manussasampattiṃ anubhavitvā aparāparaṃ saṃsaranto imasmiṃ buddhuppāde vibhavasampanne ekasmiṃ kule nibbatto sāsane pasanno pabbajitvā vipassanaṃ vaḍḍhetvā arahattaṃ pāpuṇi. So attano katapuññanāmasadisena nāmena pulinapūjakattheroti pākaṭo.
১৬৫. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং দস্সেন্তো ৰিপস্সিস্স ভগৰতোতিআদিমাহ। তত্থ ৰিৰিধং পস্সতীতি ৰিপস্সী, ৰিৰিচ্চ পস্সতীতি ৰা ৰিপস্সী, ৰিৰিধে অত্তত্থপরত্থাদিভেদে অত্থে পস্সতীতি ৰা ৰিপস্সী, ৰিৰিধে ৰোহারপরমত্থাদিভেদে পস্সতীতি ৰা ৰিপস্সী, তস্স ৰিপস্সিস্স বোধিযা পাদপুত্তমে উত্তমে বোধিরুক্খমণ্ডলমাল়কে পুরাণপুলিনং ৰালুকং ছড্ডেত্ৰা সুদ্ধং পণ্ডরং পুলিনং আকিরিং সন্থরিং। সেসং সুৰিঞ্ঞেয্যমেৰাতি।
165. So attano pubbakammaṃ saritvā somanassajāto pubbacaritāpadānaṃ dassento vipassissa bhagavatotiādimāha. Tattha vividhaṃ passatīti vipassī, vivicca passatīti vā vipassī, vividhe attatthaparatthādibhede atthe passatīti vā vipassī, vividhe vohāraparamatthādibhede passatīti vā vipassī, tassa vipassissa bodhiyā pādaputtame uttame bodhirukkhamaṇḍalamāḷake purāṇapulinaṃ vālukaṃ chaḍḍetvā suddhaṃ paṇḍaraṃ pulinaṃ ākiriṃ santhariṃ. Sesaṃ suviññeyyamevāti.
পুলিনপূজকত্থেরঅপদানৰণ্ণনা সমত্তা।
Pulinapūjakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. পুলিনপূজকত্থেরঅপদানং • 7. Pulinapūjakattheraapadānaṃ
