| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൭. പുലിനപൂജകത്ഥേരഅപദാനവണ്ണനാ
7. Pulinapūjakattheraapadānavaṇṇanā
വിപസ്സിസ്സ ഭഗവതോതിആദികം ആയസ്മതോ പുലിനപൂജകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ ഏകസ്മിം കുലേ നിബ്ബത്തോ സാസനേ പസന്നചിത്തോ ചേതിയങ്ഗണബോധിയങ്ഗണേസു പുരാണവാലുകം അപനേത്വാ നവം മുത്താദലസദിസപണ്ഡരപുലിനം ഓകിരിത്വാ മാളകം അലങ്കരി. തേന കമ്മേന സോ ദേവലോകേ നിബ്ബത്തോ തത്ഥ ദിബ്ബേഹി രതനേഹി വിജ്ജോതമാനേ അനേകയോജനേ കനകവിമാനേ ദിബ്ബസമ്പത്തിം അനുഭവിത്വാ തതോ ചുതോ മനുസ്സലോകേ സത്തരതനസമ്പന്നോ ചക്കവത്തീ രാജാ ഹുത്വാ മനുസ്സസമ്പത്തിം അനുഭവിത്വാ അപരാപരം സംസരന്തോ ഇമസ്മിം ബുദ്ധുപ്പാദേ വിഭവസമ്പന്നേ ഏകസ്മിം കുലേ നിബ്ബത്തോ സാസനേ പസന്നോ പബ്ബജിത്വാ വിപസ്സനം വഡ്ഢേത്വാ അരഹത്തം പാപുണി. സോ അത്തനോ കതപുഞ്ഞനാമസദിസേന നാമേന പുലിനപൂജകത്ഥേരോതി പാകടോ.
Vipassissabhagavatotiādikaṃ āyasmato pulinapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kule nibbatto sāsane pasannacitto cetiyaṅgaṇabodhiyaṅgaṇesu purāṇavālukaṃ apanetvā navaṃ muttādalasadisapaṇḍarapulinaṃ okiritvā māḷakaṃ alaṅkari. Tena kammena so devaloke nibbatto tattha dibbehi ratanehi vijjotamāne anekayojane kanakavimāne dibbasampattiṃ anubhavitvā tato cuto manussaloke sattaratanasampanno cakkavattī rājā hutvā manussasampattiṃ anubhavitvā aparāparaṃ saṃsaranto imasmiṃ buddhuppāde vibhavasampanne ekasmiṃ kule nibbatto sāsane pasanno pabbajitvā vipassanaṃ vaḍḍhetvā arahattaṃ pāpuṇi. So attano katapuññanāmasadisena nāmena pulinapūjakattheroti pākaṭo.
൧൬൫. സോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം ദസ്സേന്തോ വിപസ്സിസ്സ ഭഗവതോതിആദിമാഹ. തത്ഥ വിവിധം പസ്സതീതി വിപസ്സീ, വിവിച്ച പസ്സതീതി വാ വിപസ്സീ, വിവിധേ അത്തത്ഥപരത്ഥാദിഭേദേ അത്ഥേ പസ്സതീതി വാ വിപസ്സീ, വിവിധേ വോഹാരപരമത്ഥാദിഭേദേ പസ്സതീതി വാ വിപസ്സീ, തസ്സ വിപസ്സിസ്സ ബോധിയാ പാദപുത്തമേ ഉത്തമേ ബോധിരുക്ഖമണ്ഡലമാളകേ പുരാണപുലിനം വാലുകം ഛഡ്ഡേത്വാ സുദ്ധം പണ്ഡരം പുലിനം ആകിരിം സന്ഥരിം. സേസം സുവിഞ്ഞേയ്യമേവാതി.
165. So attano pubbakammaṃ saritvā somanassajāto pubbacaritāpadānaṃ dassento vipassissa bhagavatotiādimāha. Tattha vividhaṃ passatīti vipassī, vivicca passatīti vā vipassī, vividhe attatthaparatthādibhede atthe passatīti vā vipassī, vividhe vohāraparamatthādibhede passatīti vā vipassī, tassa vipassissa bodhiyā pādaputtame uttame bodhirukkhamaṇḍalamāḷake purāṇapulinaṃ vālukaṃ chaḍḍetvā suddhaṃ paṇḍaraṃ pulinaṃ ākiriṃ santhariṃ. Sesaṃ suviññeyyamevāti.
പുലിനപൂജകത്ഥേരഅപദാനവണ്ണനാ സമത്താ.
Pulinapūjakattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൭. പുലിനപൂജകത്ഥേരഅപദാനം • 7. Pulinapūjakattheraapadānaṃ
