Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

    ๗. ปุลินุปฺปาทกเตฺถรอปทานํ

    7. Pulinuppādakattheraapadānaṃ

    ๑๑๑.

    111.

    ‘‘ปพฺพเต หิมวนฺตมฺหิ, เทวโล นาม ตาปโส;

    ‘‘Pabbate himavantamhi, devalo nāma tāpaso;

    ตตฺถ เม จงฺกโม อาสิ, อมนุเสฺสหิ มาปิโตฯ

    Tattha me caṅkamo āsi, amanussehi māpito.

    ๑๑๒.

    112.

    ‘‘ชฎาภาเรน 1 ภริโต, กมณฺฑลุธโร สทา;

    ‘‘Jaṭābhārena 2 bharito, kamaṇḍaludharo sadā;

    อุตฺตมตฺถํ คเวสโนฺต, วิปินา นิกฺขมิํ ตทาฯ

    Uttamatthaṃ gavesanto, vipinā nikkhamiṃ tadā.

    ๑๑๓.

    113.

    ‘‘จุลฺลาสีติสหสฺสานิ, สิสฺสา มยฺหํ อุปฎฺฐหุํ;

    ‘‘Cullāsītisahassāni, sissā mayhaṃ upaṭṭhahuṃ;

    สกกมฺมาภิปสุตา, วสนฺติ วิปิเน ตทาฯ

    Sakakammābhipasutā, vasanti vipine tadā.

    ๑๑๔.

    114.

    ‘‘อสฺสมา อภินิกฺขมฺม, อกํ ปุลินเจติยํ;

    ‘‘Assamā abhinikkhamma, akaṃ pulinacetiyaṃ;

    นานาปุปฺผํ สมาเนตฺวา, ตํ เจติยมปูชยิํฯ

    Nānāpupphaṃ samānetvā, taṃ cetiyamapūjayiṃ.

    ๑๑๕.

    115.

    ‘‘ตตฺถ จิตฺตํ ปสาเทตฺวา, อสฺสมํ ปวิสามหํ;

    ‘‘Tattha cittaṃ pasādetvā, assamaṃ pavisāmahaṃ;

    สเพฺพ สิสฺสา สมาคนฺตฺวา, เอตมตฺถํ ปุจฺฉิํสุ มํ 3ฯ

    Sabbe sissā samāgantvā, etamatthaṃ pucchiṃsu maṃ 4.

    ๑๑๖.

    116.

    ‘‘‘ปุลิเนน กโต ถูโป 5, ยํ ตฺวํ เทว 6 มสฺสติ;

    ‘‘‘Pulinena kato thūpo 7, yaṃ tvaṃ deva 8 massati;

    มยมฺปิ ญาตุมิจฺฉาม, ปุโฎฺฐ อาจิกฺข โน ตุวํ’ฯ

    Mayampi ñātumicchāma, puṭṭho ācikkha no tuvaṃ’.

    ๑๑๗.

    117.

    ‘‘‘นิทฺทิฎฺฐา นุ 9 มนฺตปเท, จกฺขุมโนฺต มหายสา;

    ‘‘‘Niddiṭṭhā nu 10 mantapade, cakkhumanto mahāyasā;

    เต โข อหํ นมสฺสามิ, พุทฺธเสเฎฺฐ มหายเส’ฯ

    Te kho ahaṃ namassāmi, buddhaseṭṭhe mahāyase’.

    ๑๑๘.

    118.

    ‘‘‘กีทิสา เต มหาวีรา, สพฺพญฺญู โลกนายกา;

    ‘‘‘Kīdisā te mahāvīrā, sabbaññū lokanāyakā;

    กถํวณฺณา กถํสีลา, กีทิสา เต มหายสา’ฯ

    Kathaṃvaṇṇā kathaṃsīlā, kīdisā te mahāyasā’.

    ๑๑๙.

    119.

    ‘‘‘พาตฺติํสลกฺขณา พุทฺธา, จตฺตาลีสทิชาปิ จ;

    ‘‘‘Bāttiṃsalakkhaṇā buddhā, cattālīsadijāpi ca;

    เนตฺตา โคปขุมา เตสํ, ชิญฺชุกา ผลสนฺนิภาฯ

    Nettā gopakhumā tesaṃ, jiñjukā phalasannibhā.

    ๑๒๐.

    120.

    ‘‘‘คจฺฉมานา จ เต พุทฺธา, ยุคมตฺตญฺจ เปกฺขเร;

    ‘‘‘Gacchamānā ca te buddhā, yugamattañca pekkhare;

    น เตสํ ชาณุ นทติ, สนฺธิสโทฺท น สุยฺยติฯ

    Na tesaṃ jāṇu nadati, sandhisaddo na suyyati.

    ๑๒๑.

    121.

    ‘‘‘คจฺฉมานา จ สุคตา, อุทฺธรนฺตาว คจฺฉเร;

    ‘‘‘Gacchamānā ca sugatā, uddharantāva gacchare;

    ปฐมํ ทกฺขิณํ ปาทํ, พุทฺธานํ เอส ธมฺมตาฯ

    Paṭhamaṃ dakkhiṇaṃ pādaṃ, buddhānaṃ esa dhammatā.

    ๑๒๒.

    122.

    ‘‘‘อสมฺภีตา จ เต พุทฺธา, มิคราชาว เกสรี;

    ‘‘‘Asambhītā ca te buddhā, migarājāva kesarī;

    เนวุกฺกํเสนฺติ อตฺตานํ, โน จ วเมฺภนฺติ ปาณินํฯ

    Nevukkaṃsenti attānaṃ, no ca vambhenti pāṇinaṃ.

    ๑๒๓.

    123.

    ‘‘‘มานาวมานโต มุตฺตา, สมา สเพฺพสุ ปาณิสุ;

    ‘‘‘Mānāvamānato muttā, samā sabbesu pāṇisu;

    อนตฺตุกฺกํสกา พุทฺธา, พุทฺธานํ เอส ธมฺมตาฯ

    Anattukkaṃsakā buddhā, buddhānaṃ esa dhammatā.

    ๑๒๔.

    124.

    ‘‘‘อุปฺปชฺชนฺตา จ สมฺพุทฺธา, อาโลกํ ทสฺสยนฺติ เต;

    ‘‘‘Uppajjantā ca sambuddhā, ālokaṃ dassayanti te;

    ฉปฺปการํ ปกเมฺปนฺติ, เกวลํ วสุธํ อิมํฯ

    Chappakāraṃ pakampenti, kevalaṃ vasudhaṃ imaṃ.

    ๑๒๕.

    125.

    ‘‘‘ปสฺสนฺติ นิรยเญฺจเต, นิพฺพาติ นิรโย ตทา;

    ‘‘‘Passanti nirayañcete, nibbāti nirayo tadā;

    ปวสฺสติ มหาเมโฆ, พุทฺธานํ เอส ธมฺมตาฯ

    Pavassati mahāmegho, buddhānaṃ esa dhammatā.

    ๑๒๖.

    126.

    ‘‘‘อีทิสา เต มหานาคา, อตุลา จ 11 มหายสา;

    ‘‘‘Īdisā te mahānāgā, atulā ca 12 mahāyasā;

    วณฺณโต อนติกฺกนฺตา, อปฺปเมยฺยา ตถาคตา’ฯ

    Vaṇṇato anatikkantā, appameyyā tathāgatā’.

    ๑๒๗.

    127.

    ‘‘‘อนุโมทิํสุ เม วากฺยํ, สเพฺพ สิสฺสา สคารวา;

    ‘‘‘Anumodiṃsu me vākyaṃ, sabbe sissā sagāravā;

    ตถา จ ปฎิปชฺชิํสุ, ยถาสตฺติ ยถาพลํ’ฯ

    Tathā ca paṭipajjiṃsu, yathāsatti yathābalaṃ’.

    ๑๒๘.

    128.

    ‘‘ปฎิปูเชนฺติ ปุลินํ, สกกมฺมาภิลาสิโน;

    ‘‘Paṭipūjenti pulinaṃ, sakakammābhilāsino;

    สทฺทหนฺตา มม วากฺยํ, พุทฺธสกฺกตมานสา 13ฯ

    Saddahantā mama vākyaṃ, buddhasakkatamānasā 14.

    ๑๒๙.

    129.

    ‘‘ตทา จวิตฺวา ตุสิตา, เทวปุโตฺต มหายโส;

    ‘‘Tadā cavitvā tusitā, devaputto mahāyaso;

    อุปฺปชฺชิ มาตุกุจฺฉิมฺหิ, ทสสหสฺสิ กมฺปถฯ

    Uppajji mātukucchimhi, dasasahassi kampatha.

    ๑๓๐.

    130.

    ‘‘อสฺสมสฺสาวิทูรมฺหิ, จงฺกมมฺหิ ฐิโต อหํ;

    ‘‘Assamassāvidūramhi, caṅkamamhi ṭhito ahaṃ;

    สเพฺพ สิสฺสา สมาคนฺตฺวา, อาคจฺฉุํ มม สนฺติเกฯ

    Sabbe sissā samāgantvā, āgacchuṃ mama santike.

    ๑๓๑.

    131.

    ‘‘อุสโภว มหี นทติ, มิคราชาว กูชติ;

    ‘‘Usabhova mahī nadati, migarājāva kūjati;

    สุสุมาโรว 15 สฬติ, กิํ วิปาโก ภวิสฺสติฯ

    Susumārova 16 saḷati, kiṃ vipāko bhavissati.

    ๑๓๒.

    132.

    ‘‘ยํ ปกิเตฺตมิ สมฺพุทฺธํ, สิกตาถูปสนฺติเก;

    ‘‘Yaṃ pakittemi sambuddhaṃ, sikatāthūpasantike;

    โส ทานิ ภควา สตฺถา, มาตุกุจฺฉิมุปาคมิฯ

    So dāni bhagavā satthā, mātukucchimupāgami.

    ๑๓๓.

    133.

    ‘‘เตสํ ธมฺมกถํ วตฺวา, กิตฺตยิตฺวา มหามุนิํ;

    ‘‘Tesaṃ dhammakathaṃ vatvā, kittayitvā mahāmuniṃ;

    อุโยฺยเชตฺวา สเก สิเสฺส, ปลฺลงฺกมาภุชิํ อหํฯ

    Uyyojetvā sake sisse, pallaṅkamābhujiṃ ahaṃ.

    ๑๓๔.

    134.

    ‘‘พลญฺจ วต เม ขีณํ, พฺยาธินา 17 ปรเมน ตํ;

    ‘‘Balañca vata me khīṇaṃ, byādhinā 18 paramena taṃ;

    พุทฺธเสฎฺฐํ สริตฺวาน, ตตฺถ กาลงฺกโต 19 อหํฯ

    Buddhaseṭṭhaṃ saritvāna, tattha kālaṅkato 20 ahaṃ.

    ๑๓๕.

    135.

    ‘‘สเพฺพ สิสฺสา สมาคนฺตฺวา, อกํสุ จิตกํ ตทา;

    ‘‘Sabbe sissā samāgantvā, akaṃsu citakaṃ tadā;

    กเฬวรญฺจ เม คยฺห, จิตกํ อภิโรปยุํฯ

    Kaḷevarañca me gayha, citakaṃ abhiropayuṃ.

    ๑๓๖.

    136.

    ‘‘จิตกํ ปริวาเรตฺวา, สีเส กตฺวาน อญฺชลิํ;

    ‘‘Citakaṃ parivāretvā, sīse katvāna añjaliṃ;

    โสกสลฺลปเรตา เต, วิกฺกนฺทิํสุ สมาคตาฯ

    Sokasallaparetā te, vikkandiṃsu samāgatā.

    ๑๓๗.

    137.

    ‘‘เตสํ ลาลปฺปมานานํ, อคมํ จิตกํ ตทา;

    ‘‘Tesaṃ lālappamānānaṃ, agamaṃ citakaṃ tadā;

    ‘อหํ อาจริโย ตุมฺหํ, มา โสจิตฺถ สุเมธสาฯ

    ‘Ahaṃ ācariyo tumhaṃ, mā socittha sumedhasā.

    ๑๓๘.

    138.

    ‘‘‘สทเตฺถ วายเมยฺยาถ, รตฺตินฺทิวมตนฺทิตา;

    ‘‘‘Sadatthe vāyameyyātha, rattindivamatanditā;

    มา โว ปมตฺตา อหุตฺถ 21, ขโณ โว ปฎิปาทิโต’ฯ

    Mā vo pamattā ahuttha 22, khaṇo vo paṭipādito’.

    ๑๓๙.

    139.

    ‘‘สเก สิเสฺสนุสาสิตฺวา, เทวโลกํ ปุนาคมิํ;

    ‘‘Sake sissenusāsitvā, devalokaṃ punāgamiṃ;

    อฎฺฐารส จ กปฺปานิ, เทวโลเก รมามหํฯ

    Aṭṭhārasa ca kappāni, devaloke ramāmahaṃ.

    ๑๔๐.

    140.

    ‘‘สตานํ ปญฺจกฺขตฺตุญฺจ, จกฺกวตฺตี อโหสหํ;

    ‘‘Satānaṃ pañcakkhattuñca, cakkavattī ahosahaṃ;

    อเนกสตกฺขตฺตุญฺจ, เทวรชฺชมการยิํฯ

    Anekasatakkhattuñca, devarajjamakārayiṃ.

    ๑๔๑.

    141.

    ‘‘อวเสเสสุ กเปฺปสุ, โวกิโณฺณ 23 สํสริํ อหํ;

    ‘‘Avasesesu kappesu, vokiṇṇo 24 saṃsariṃ ahaṃ;

    ทุคฺคติํ นาภิชานามิ, อุปฺปาทสฺส อิทํ ผลํ 25ฯ

    Duggatiṃ nābhijānāmi, uppādassa idaṃ phalaṃ 26.

    ๑๔๒.

    142.

    ‘‘ยถา โกมุทิเก มาเส, พหู ปุปฺผนฺติ ปาทปา;

    ‘‘Yathā komudike māse, bahū pupphanti pādapā;

    ตเถวาหมฺปิ สมเย, ปุปฺผิโตมฺหิ มเหสินาฯ

    Tathevāhampi samaye, pupphitomhi mahesinā.

    ๑๔๓.

    143.

    ‘‘วีริยํ เม ธุรโธรยฺหํ, โยคเกฺขมาธิวาหนํ;

    ‘‘Vīriyaṃ me dhuradhorayhaṃ, yogakkhemādhivāhanaṃ;

    นาโคว พนฺธนํ เฉตฺวา, วิหรามิ อนาสโวฯ

    Nāgova bandhanaṃ chetvā, viharāmi anāsavo.

    ๑๔๔.

    144.

    ‘‘สตสหสฺสิโต กเปฺป, ยํ พุทฺธมภิกิตฺตยิํ;

    ‘‘Satasahassito kappe, yaṃ buddhamabhikittayiṃ;

    ทุคฺคติํ นาภิชานามิ, กิตฺตนาย อิทํ ผลํฯ

    Duggatiṃ nābhijānāmi, kittanāya idaṃ phalaṃ.

    ๑๔๕.

    145.

    ‘‘กิเลสา ฌาปิตา มยฺหํ…เป.… วิหรามิ อนาสโวฯ

    ‘‘Kilesā jhāpitā mayhaṃ…pe… viharāmi anāsavo.

    ๑๔๖.

    146.

    ‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

    ‘‘Svāgataṃ vata me āsi…pe… kataṃ buddhassa sāsanaṃ.

    ๑๔๗.

    147.

    ‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ

    ‘‘Paṭisambhidā catasso…pe… kataṃ buddhassa sāsanaṃ’’.

    อิตฺถํ สุทํ อายสฺมา ปุลินุปฺปาทโก เถโร อิมา คาถาโย

    Itthaṃ sudaṃ āyasmā pulinuppādako thero imā gāthāyo

    อภาสิตฺถาติฯ

    Abhāsitthāti.

    ปุลินุปฺปาทกเตฺถรสฺสาปทานํ สตฺตมํฯ

    Pulinuppādakattherassāpadānaṃ sattamaṃ.




    Next: ๘. ตรณิยเตฺถรอปทานํ • 8. Taraṇiyattheraapadānaṃ




    Footnotes:
    1. ชฎาภารสฺส (สฺยา. ก.)
    2. jaṭābhārassa (syā. ka.)
    3. เอตมตฺถมปุจฺฉุ มํ (สี.), เอตมตฺตํ อปุจฺฉิํสุ (สฺยา. ก.)
    4. etamatthamapucchu maṃ (sī.), etamattaṃ apucchiṃsu (syā. ka.)
    5. กโต ถูเป (สี.)
    6. เทวํ (สี. ปี.)
    7. kato thūpe (sī.)
    8. devaṃ (sī. pī.)
    9. นิทฺทิฎฺฐา โน (สี. ปี.), ทิฎฺฐาโน โว (สฺยา.)
    10. niddiṭṭhā no (sī. pī.), diṭṭhāno vo (syā.)
    11. เต (สฺยา. ก.)
    12. te (syā. ka.)
    13. พุทฺธตฺตคตมานสา (สี. สฺยา. ปี.)
    14. buddhattagatamānasā (sī. syā. pī.)
    15. สุํสุมาโรว (สี. สฺยา. ปี.)
    16. suṃsumārova (sī. syā. pī.)
    17. พฺยาธิโต (สี. สฺยา. ปี. ก.)
    18. byādhito (sī. syā. pī. ka.)
    19. กาลกโต (สี. ปี.)
    20. kālakato (sī. pī.)
    21. อหุวตฺถ (สี.)
    22. ahuvattha (sī.)
    23. โวกิณฺณํ (สี. สฺยา. ก.)
    24. vokiṇṇaṃ (sī. syā. ka.)
    25. ปุลินปูชายิทํ ผลํ (สี.)
    26. pulinapūjāyidaṃ phalaṃ (sī.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๑๐. ปํสุกูลสญฺญกเตฺถรอปทานาทิวณฺณนา • 1-10. Paṃsukūlasaññakattheraapadānādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact