| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. পুনব্বসুসুত্তৰণ্ণনা
7. Punabbasusuttavaṇṇanā
২৪১. ৰসনট্ঠানগ্গহণেন রত্তিট্ঠানদিৰাট্ঠানাদযো সঙ্গণ্হাতি। দ্ৰাদসহত্থমত্তমেৰ গণ্হাতি পকতিসঞ্চরণূপচারমত্তব্যাপনতো। যথাপরিসন্তি পরিসানুরূপং, যত্থ যত্থ পরিসা তিট্ঠতি, তং তং ঠানং গচ্ছতি পরিসপরিযন্তিকত্তা। সত্থু মুখৰিকারাভাৰতো পৰেসানুঞ্ঞং সল্লক্খেন্তী ‘‘নূন অযং কতাধিকারা ভৰিস্সতী’’তি অনুমানসিদ্ধং উপনিস্সযং দিস্ৰা। একীভাৰগমনেনাতি হত্থপাসূপগমনেন পরিসায মিস্সীভাৰপ্পত্তিযা। পুত্তকাতি পুত্তপুত্তিযো। অনুকম্পাযঞ্হি ক-সদ্দো।
241. Vasanaṭṭhānaggahaṇena rattiṭṭhānadivāṭṭhānādayo saṅgaṇhāti. Dvādasahatthamattameva gaṇhāti pakatisañcaraṇūpacāramattabyāpanato. Yathāparisanti parisānurūpaṃ, yattha yattha parisā tiṭṭhati, taṃ taṃ ṭhānaṃ gacchati parisapariyantikattā. Satthu mukhavikārābhāvato pavesānuññaṃ sallakkhentī ‘‘nūna ayaṃ katādhikārā bhavissatī’’ti anumānasiddhaṃ upanissayaṃ disvā. Ekībhāvagamanenāti hatthapāsūpagamanena parisāya missībhāvappattiyā. Puttakāti puttaputtiyo. Anukampāyañhi ka-saddo.
নিব্বানারম্মণেন অরিযমগ্গেন মুঞ্চিযমানা গন্থা ‘‘নিব্বানং আগম্ম পমুচ্চন্তী’’তি ৰুত্তা। ৰেলাতিক্কন্তাতি পমাণতো পরিচ্ছিন্দিতুং ন সক্কাতি আহ ‘‘পমাণাতিক্কন্তা’’তি। পিযাযনাতি আসীসনা। আসীসনং পেমৰসেন পেমৰত্থুনো এসনা পত্থনাৰ হোতীতি আহ ‘‘মগ্গনা পত্থনা’’তি। ততোতি পিযপুত্তাদিতো। পাণীনন্তি সামিঅত্থে পুথুৰচনং দুক্খসদ্দাপেক্খং। কে মোচেতীতি মোচনকিরিযায কম্মং পুচ্ছতি? ইভরো পন অত্থৰসেন ৰিভত্তিৰিপরিণামোতি ‘‘পাণিনেতি আহরিত্ৰা ৰত্তব্ব’’ন্তি আহ। অভিসম্বুধন্তি অভিসম্বুধন্তো। তেনাহ ‘‘অভিসম্বুদ্ধো’’তি। সদ্ধম্মস্সাতি উপযোগত্থে সামিৰচনন্তি আহ ‘‘সদ্ধম্মমেৰ অজানিত্ৰা’’তি।
Nibbānārammaṇena ariyamaggena muñciyamānā ganthā ‘‘nibbānaṃ āgamma pamuccantī’’ti vuttā. Velātikkantāti pamāṇato paricchindituṃ na sakkāti āha ‘‘pamāṇātikkantā’’ti. Piyāyanāti āsīsanā. Āsīsanaṃ pemavasena pemavatthuno esanā patthanāva hotīti āha ‘‘magganā patthanā’’ti. Tatoti piyaputtādito. Pāṇīnanti sāmiatthe puthuvacanaṃ dukkhasaddāpekkhaṃ. Ke mocetīti mocanakiriyāya kammaṃ pucchati? Ibharo pana atthavasena vibhattivipariṇāmoti ‘‘pāṇineti āharitvā vattabba’’nti āha. Abhisambudhanti abhisambudhanto. Tenāha ‘‘abhisambuddho’’ti. Saddhammassāti upayogatthe sāmivacananti āha ‘‘saddhammameva ajānitvā’’ti.
পুত্তস্স অনুমোদনং করোন্তীতি পুত্তস্স পটিপত্তিঅনুমোদনং করোন্তী। উগ্গতাতি এত্থ কললে ৰট্টদুক্খে নিমুজ্জমানা ততো সীসং উক্খিপিতুং অসক্কোন্তি অজ্জ বুদ্ধানুভাৰেন পঞ্ঞাসীসং উক্খিপিতা উগ্গতা। পুন ৰিনিপাতাভাৰতো সম্মদেৰ উগ্গতত্তা সমুগ্গতা। তথাভূতা সাসনেপি উগ্গতা সমুগ্গতা জাতা। চতুসচ্চপটিৰেধভাৰন্তি চতুসচ্চপটিৰেধস্স অত্থিভাৰং। কণ্ডুকচ্ছুআদীতি আদি-সদ্দেন জেগুচ্ছঅসাতাদিং সঙ্গণ্হাতি। দিব্বসম্পত্তিং পটিলভতি পৰত্তিযং সম্পত্তিদাযিনো কম্মস্স কতোকাসত্তা। তুণ্হী উত্তরিকে হোহীতি মাতু-ৰচনং সম্পটিচ্ছিত্ৰা তস্স ৰিসেসাধিগমস্স অৰিবন্ধকরণসম্মাপযোগেন যথালদ্ধৰিসেসায মাতুযা ৰসেন যস্মা ধীতা দিট্ঠধম্মিকসম্পত্তিলাভী, তস্মা ৰুত্তং ‘‘মাতু আনুভাৰেনেৰা’’তি।
Puttassa anumodanaṃ karontīti puttassa paṭipattianumodanaṃ karontī. Uggatāti ettha kalale vaṭṭadukkhe nimujjamānā tato sīsaṃ ukkhipituṃ asakkonti ajja buddhānubhāvena paññāsīsaṃ ukkhipitā uggatā. Puna vinipātābhāvato sammadeva uggatattā samuggatā. Tathābhūtā sāsanepi uggatā samuggatā jātā. Catusaccapaṭivedhabhāvanti catusaccapaṭivedhassa atthibhāvaṃ. Kaṇḍukacchuādīti ādi-saddena jegucchaasātādiṃ saṅgaṇhāti. Dibbasampattiṃ paṭilabhati pavattiyaṃ sampattidāyino kammassa katokāsattā. Tuṇhī uttarike hohīti mātu-vacanaṃ sampaṭicchitvā tassa visesādhigamassa avibandhakaraṇasammāpayogena yathāladdhavisesāya mātuyā vasena yasmā dhītā diṭṭhadhammikasampattilābhī, tasmā vuttaṃ ‘‘mātu ānubhāvenevā’’ti.
পুনব্বসুসুত্তৰণ্ণনা নিট্ঠিতা।
Punabbasusuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. পুনব্বসুসুত্তং • 7. Punabbasusuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. পুনব্বসুসুত্তৰণ্ণনা • 7. Punabbasusuttavaṇṇanā
