| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੭. ਪੁਨਬ੍ਬਸੁਸੁਤ੍ਤવਣ੍ਣਨਾ
7. Punabbasusuttavaṇṇanā
੨੪੧. વਸਨਟ੍ਠਾਨਗ੍ਗਹਣੇਨ ਰਤ੍ਤਿਟ੍ਠਾਨਦਿવਾਟ੍ਠਾਨਾਦਯੋ ਸਙ੍ਗਣ੍ਹਾਤਿ। ਦ੍વਾਦਸਹਤ੍ਥਮਤ੍ਤਮੇવ ਗਣ੍ਹਾਤਿ ਪਕਤਿਸਞ੍ਚਰਣੂਪਚਾਰਮਤ੍ਤਬ੍ਯਾਪਨਤੋ। ਯਥਾਪਰਿਸਨ੍ਤਿ ਪਰਿਸਾਨੁਰੂਪਂ, ਯਤ੍ਥ ਯਤ੍ਥ ਪਰਿਸਾ ਤਿਟ੍ਠਤਿ, ਤਂ ਤਂ ਠਾਨਂ ਗਚ੍ਛਤਿ ਪਰਿਸਪਰਿਯਨ੍ਤਿਕਤ੍ਤਾ। ਸਤ੍ਥੁ ਮੁਖવਿਕਾਰਾਭਾવਤੋ ਪવੇਸਾਨੁਞ੍ਞਂ ਸਲ੍ਲਕ੍ਖੇਨ੍ਤੀ ‘‘ਨੂਨ ਅਯਂ ਕਤਾਧਿਕਾਰਾ ਭવਿਸ੍ਸਤੀ’’ਤਿ ਅਨੁਮਾਨਸਿਦ੍ਧਂ ਉਪਨਿਸ੍ਸਯਂ ਦਿਸ੍વਾ। ਏਕੀਭਾવਗਮਨੇਨਾਤਿ ਹਤ੍ਥਪਾਸੂਪਗਮਨੇਨ ਪਰਿਸਾਯ ਮਿਸ੍ਸੀਭਾવਪ੍ਪਤ੍ਤਿਯਾ। ਪੁਤ੍ਤਕਾਤਿ ਪੁਤ੍ਤਪੁਤ੍ਤਿਯੋ। ਅਨੁਕਮ੍ਪਾਯਞ੍ਹਿ ਕ-ਸਦ੍ਦੋ।
241. Vasanaṭṭhānaggahaṇena rattiṭṭhānadivāṭṭhānādayo saṅgaṇhāti. Dvādasahatthamattameva gaṇhāti pakatisañcaraṇūpacāramattabyāpanato. Yathāparisanti parisānurūpaṃ, yattha yattha parisā tiṭṭhati, taṃ taṃ ṭhānaṃ gacchati parisapariyantikattā. Satthu mukhavikārābhāvato pavesānuññaṃ sallakkhentī ‘‘nūna ayaṃ katādhikārā bhavissatī’’ti anumānasiddhaṃ upanissayaṃ disvā. Ekībhāvagamanenāti hatthapāsūpagamanena parisāya missībhāvappattiyā. Puttakāti puttaputtiyo. Anukampāyañhi ka-saddo.
ਨਿਬ੍ਬਾਨਾਰਮ੍ਮਣੇਨ ਅਰਿਯਮਗ੍ਗੇਨ ਮੁਞ੍ਚਿਯਮਾਨਾ ਗਨ੍ਥਾ ‘‘ਨਿਬ੍ਬਾਨਂ ਆਗਮ੍ਮ ਪਮੁਚ੍ਚਨ੍ਤੀ’’ਤਿ વੁਤ੍ਤਾ। વੇਲਾਤਿਕ੍ਕਨ੍ਤਾਤਿ ਪਮਾਣਤੋ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕਾਤਿ ਆਹ ‘‘ਪਮਾਣਾਤਿਕ੍ਕਨ੍ਤਾ’’ਤਿ। ਪਿਯਾਯਨਾਤਿ ਆਸੀਸਨਾ। ਆਸੀਸਨਂ ਪੇਮવਸੇਨ ਪੇਮવਤ੍ਥੁਨੋ ਏਸਨਾ ਪਤ੍ਥਨਾવ ਹੋਤੀਤਿ ਆਹ ‘‘ਮਗ੍ਗਨਾ ਪਤ੍ਥਨਾ’’ਤਿ। ਤਤੋਤਿ ਪਿਯਪੁਤ੍ਤਾਦਿਤੋ। ਪਾਣੀਨਨ੍ਤਿ ਸਾਮਿਅਤ੍ਥੇ ਪੁਥੁવਚਨਂ ਦੁਕ੍ਖਸਦ੍ਦਾਪੇਕ੍ਖਂ। ਕੇ ਮੋਚੇਤੀਤਿ ਮੋਚਨਕਿਰਿਯਾਯ ਕਮ੍ਮਂ ਪੁਚ੍ਛਤਿ? ਇਭਰੋ ਪਨ ਅਤ੍ਥવਸੇਨ વਿਭਤ੍ਤਿવਿਪਰਿਣਾਮੋਤਿ ‘‘ਪਾਣਿਨੇਤਿ ਆਹਰਿਤ੍વਾ વਤ੍ਤਬ੍ਬ’’ਨ੍ਤਿ ਆਹ। ਅਭਿਸਮ੍ਬੁਧਨ੍ਤਿ ਅਭਿਸਮ੍ਬੁਧਨ੍ਤੋ। ਤੇਨਾਹ ‘‘ਅਭਿਸਮ੍ਬੁਦ੍ਧੋ’’ਤਿ। ਸਦ੍ਧਮ੍ਮਸ੍ਸਾਤਿ ਉਪਯੋਗਤ੍ਥੇ ਸਾਮਿવਚਨਨ੍ਤਿ ਆਹ ‘‘ਸਦ੍ਧਮ੍ਮਮੇવ ਅਜਾਨਿਤ੍વਾ’’ਤਿ।
Nibbānārammaṇena ariyamaggena muñciyamānā ganthā ‘‘nibbānaṃ āgamma pamuccantī’’ti vuttā. Velātikkantāti pamāṇato paricchindituṃ na sakkāti āha ‘‘pamāṇātikkantā’’ti. Piyāyanāti āsīsanā. Āsīsanaṃ pemavasena pemavatthuno esanā patthanāva hotīti āha ‘‘magganā patthanā’’ti. Tatoti piyaputtādito. Pāṇīnanti sāmiatthe puthuvacanaṃ dukkhasaddāpekkhaṃ. Ke mocetīti mocanakiriyāya kammaṃ pucchati? Ibharo pana atthavasena vibhattivipariṇāmoti ‘‘pāṇineti āharitvā vattabba’’nti āha. Abhisambudhanti abhisambudhanto. Tenāha ‘‘abhisambuddho’’ti. Saddhammassāti upayogatthe sāmivacananti āha ‘‘saddhammameva ajānitvā’’ti.
ਪੁਤ੍ਤਸ੍ਸ ਅਨੁਮੋਦਨਂ ਕਰੋਨ੍ਤੀਤਿ ਪੁਤ੍ਤਸ੍ਸ ਪਟਿਪਤ੍ਤਿਅਨੁਮੋਦਨਂ ਕਰੋਨ੍ਤੀ। ਉਗ੍ਗਤਾਤਿ ਏਤ੍ਥ ਕਲਲੇ વਟ੍ਟਦੁਕ੍ਖੇ ਨਿਮੁਜ੍ਜਮਾਨਾ ਤਤੋ ਸੀਸਂ ਉਕ੍ਖਿਪਿਤੁਂ ਅਸਕ੍ਕੋਨ੍ਤਿ ਅਜ੍ਜ ਬੁਦ੍ਧਾਨੁਭਾવੇਨ ਪਞ੍ਞਾਸੀਸਂ ਉਕ੍ਖਿਪਿਤਾ ਉਗ੍ਗਤਾ। ਪੁਨ વਿਨਿਪਾਤਾਭਾવਤੋ ਸਮ੍ਮਦੇવ ਉਗ੍ਗਤਤ੍ਤਾ ਸਮੁਗ੍ਗਤਾ। ਤਥਾਭੂਤਾ ਸਾਸਨੇਪਿ ਉਗ੍ਗਤਾ ਸਮੁਗ੍ਗਤਾ ਜਾਤਾ। ਚਤੁਸਚ੍ਚਪਟਿવੇਧਭਾવਨ੍ਤਿ ਚਤੁਸਚ੍ਚਪਟਿવੇਧਸ੍ਸ ਅਤ੍ਥਿਭਾવਂ। ਕਣ੍ਡੁਕਚ੍ਛੁਆਦੀਤਿ ਆਦਿ-ਸਦ੍ਦੇਨ ਜੇਗੁਚ੍ਛਅਸਾਤਾਦਿਂ ਸਙ੍ਗਣ੍ਹਾਤਿ। ਦਿਬ੍ਬਸਮ੍ਪਤ੍ਤਿਂ ਪਟਿਲਭਤਿ ਪવਤ੍ਤਿਯਂ ਸਮ੍ਪਤ੍ਤਿਦਾਯਿਨੋ ਕਮ੍ਮਸ੍ਸ ਕਤੋਕਾਸਤ੍ਤਾ। ਤੁਣ੍ਹੀ ਉਤ੍ਤਰਿਕੇ ਹੋਹੀਤਿ ਮਾਤੁ-વਚਨਂ ਸਮ੍ਪਟਿਚ੍ਛਿਤ੍વਾ ਤਸ੍ਸ વਿਸੇਸਾਧਿਗਮਸ੍ਸ ਅવਿਬਨ੍ਧਕਰਣਸਮ੍ਮਾਪਯੋਗੇਨ ਯਥਾਲਦ੍ਧવਿਸੇਸਾਯ ਮਾਤੁਯਾ વਸੇਨ ਯਸ੍ਮਾ ਧੀਤਾ ਦਿਟ੍ਠਧਮ੍ਮਿਕਸਮ੍ਪਤ੍ਤਿਲਾਭੀ, ਤਸ੍ਮਾ વੁਤ੍ਤਂ ‘‘ਮਾਤੁ ਆਨੁਭਾવੇਨੇવਾ’’ਤਿ।
Puttassa anumodanaṃ karontīti puttassa paṭipattianumodanaṃ karontī. Uggatāti ettha kalale vaṭṭadukkhe nimujjamānā tato sīsaṃ ukkhipituṃ asakkonti ajja buddhānubhāvena paññāsīsaṃ ukkhipitā uggatā. Puna vinipātābhāvato sammadeva uggatattā samuggatā. Tathābhūtā sāsanepi uggatā samuggatā jātā. Catusaccapaṭivedhabhāvanti catusaccapaṭivedhassa atthibhāvaṃ. Kaṇḍukacchuādīti ādi-saddena jegucchaasātādiṃ saṅgaṇhāti. Dibbasampattiṃ paṭilabhati pavattiyaṃ sampattidāyino kammassa katokāsattā. Tuṇhī uttarike hohīti mātu-vacanaṃ sampaṭicchitvā tassa visesādhigamassa avibandhakaraṇasammāpayogena yathāladdhavisesāya mātuyā vasena yasmā dhītā diṭṭhadhammikasampattilābhī, tasmā vuttaṃ ‘‘mātu ānubhāvenevā’’ti.
ਪੁਨਬ੍ਬਸੁਸੁਤ੍ਤવਣ੍ਣਨਾ ਨਿਟ੍ਠਿਤਾ।
Punabbasusuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੭. ਪੁਨਬ੍ਬਸੁਸੁਤ੍ਤਂ • 7. Punabbasusuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੭. ਪੁਨਬ੍ਬਸੁਸੁਤ੍ਤવਣ੍ਣਨਾ • 7. Punabbasusuttavaṇṇanā
