| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३. पुन्नागपुप्फियत्थेरअपदानं
3. Punnāgapupphiyattheraapadānaṃ
१४.
14.
‘‘काननं वनमोगय्ह, वसामि लुद्दको अहं।
‘‘Kānanaṃ vanamogayha, vasāmi luddako ahaṃ;
पुन्नागं पुप्फितं दिस्वा, बुद्धसेट्ठं अनुस्सरिं॥
Punnāgaṃ pupphitaṃ disvā, buddhaseṭṭhaṃ anussariṃ.
१५.
15.
‘‘तं पुप्फं ओचिनित्वान, सुगन्धं गन्धितं सुभं।
‘‘Taṃ pupphaṃ ocinitvāna, sugandhaṃ gandhitaṃ subhaṃ;
थूपं कत्वान पुलिने, बुद्धस्स अभिरोपयिं॥
Thūpaṃ katvāna puline, buddhassa abhiropayiṃ.
१६.
16.
‘‘द्वेनवुते इतो कप्पे, यं पुप्फमभिपूजयिं।
‘‘Dvenavute ito kappe, yaṃ pupphamabhipūjayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
१७.
17.
‘‘एकम्हि नवुते कप्पे, एको आसिं तमोनुदो।
‘‘Ekamhi navute kappe, eko āsiṃ tamonudo;
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
१८.
18.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पुन्नागपुप्फियो थेरो इमा गाथायो अभासित्थाति।
Itthaṃ sudaṃ āyasmā punnāgapupphiyo thero imā gāthāyo abhāsitthāti.
पुन्नागपुप्फियत्थेरस्सापदानं ततियं।
Punnāgapupphiyattherassāpadānaṃ tatiyaṃ.
