| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. පුන්‌නාගපුප්‌ඵියත්‌ථෙරඅපදානවණ්‌ණනා
9. Punnāgapupphiyattheraapadānavaṇṇanā
කානනං වනමොගය්‌හාතිආදිකං ආයස්‌මතො පුන්‌නාගපුප්‌ඵියත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො ඵුස්‌සස්‌ස භගවතො කාලෙ නෙසාදකුලෙ නිබ්‌බත්‌තො මහාවනං පවිට්‌ඨො තත්‌ථ සුපුප්‌ඵිතපුන්‌නාගපුප්‌ඵං දිස්‌වා හෙතුසම්‌පන්‌නත්‌තා බුද්‌ධාරම්‌මණපීතිවසෙන භගවන්‌තං සරිත්‌වා තං පුප්‌ඵං සහ කණ්‌ණිකාහි ඔචිනිත්‌වා වාලුකාහි චෙතියං කත්‌වා පූජෙසි.
Kānanaṃvanamogayhātiādikaṃ āyasmato punnāgapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto phussassa bhagavato kāle nesādakule nibbatto mahāvanaṃ paviṭṭho tattha supupphitapunnāgapupphaṃ disvā hetusampannattā buddhārammaṇapītivasena bhagavantaṃ saritvā taṃ pupphaṃ saha kaṇṇikāhi ocinitvā vālukāhi cetiyaṃ katvā pūjesi.
46. සො තෙන පුඤ්‌ඤෙන ද්‌වෙනවුතිකප්‌පෙ නිරන්‌තරං දෙවමනුස්‌සසම්‌පත්‌තියොයෙව අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං විභවසම්‌පන්‌නෙ කුලෙ නිබ්‌බත්‌තො වුද්‌ධිමන්‌වාය පුබ්‌බවාසනාබලෙන සාසනෙ පසන්‌නො පබ්‌බජිත්‌වා වායමන්‌තො නචිරස්‌සෙව අරහා හුත්‌වා පුබ්‌බෙ කතකුසලං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො කානනං වනමොගය්‌හාතිආදිමාහ. තං සබ්‌බං හෙට්‌ඨා වුත්‌තත්‌තා උත්‌තානත්‌ථමෙවාති.
46. So tena puññena dvenavutikappe nirantaraṃ devamanussasampattiyoyeva anubhavitvā imasmiṃ buddhuppāde sāvatthiyaṃ vibhavasampanne kule nibbatto vuddhimanvāya pubbavāsanābalena sāsane pasanno pabbajitvā vāyamanto nacirasseva arahā hutvā pubbe katakusalaṃ saritvā somanassajāto pubbacaritāpadānaṃ pakāsento kānanaṃ vanamogayhātiādimāha. Taṃ sabbaṃ heṭṭhā vuttattā uttānatthamevāti.
පුන්‌නාගපුප්‌ඵියත්‌ථෙරඅපදානවණ්‌ණනා සමත්‌තා.
Punnāgapupphiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. පුන්‌නාගපුප්‌ඵියත්‌ථෙරඅපදානං • 9. Punnāgapupphiyattheraapadānaṃ
