| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
3. புண்ணகமாணவஸுத்தனித்³தே³ஸவண்ணனா
3. Puṇṇakamāṇavasuttaniddesavaṇṇanā
12. ததியே புண்ணகஸுத்தனித்³தே³ஸே – அனேஜந்தி இத³ம்பி புரிமனயேனேவ மோக⁴ராஜானங் படிக்கி²பித்வா வுத்தங். தத்த² மூலத³ஸ்ஸாவிந்தி அகுஸலமூலாதி³த³ஸ்ஸாவிங். இஸயோதி இஸினாமகா ஜடிலா. யஞ்ஞந்தி தெ³ய்யத⁴ம்மங். அகப்பயிங்ஸூதி பரியேஸிங்ஸு.
12. Tatiye puṇṇakasuttaniddese – anejanti idampi purimanayeneva mogharājānaṃ paṭikkhipitvā vuttaṃ. Tattha mūladassāvinti akusalamūlādidassāviṃ. Isayoti isināmakā jaṭilā. Yaññanti deyyadhammaṃ. Akappayiṃsūti pariyesiṃsu.
ஹேதுத³ஸ்ஸாவீதிஆதீ³னி ஸப்³பா³னி காரணவேவசனானேவ. காரணஞ்ஹி யஸ்மா அத்தனோ ப²லத்தா²ய ஹினோதி பவத்ததி, தஸ்மா ஹேதூதி வுச்சதி. யஸ்மா தங் ப²லங் நிதே³தி ‘ஹந்த³, க³ண்ஹத² ந’ந்தி அப்பேதி விய, தஸ்மா நிதா³னந்தி வுச்சதி. ஸம்ப⁴வத³ஸ்ஸாவீதிஆதீ³னி பஞ்ச பதா³னி ஹெட்டா² த³ஸ்ஸிதனயானி ஏவ. யஸ்மா தங் படிச்ச ஏதி பவத்ததி, தஞ்ச ப²லங் ததோ ஸமுதே³தி உப்பஜ்ஜதி, தஸ்மா பச்சயோதி ச ஸமுத³யோதி ச வுச்சதி.
Hetudassāvītiādīni sabbāni kāraṇavevacanāneva. Kāraṇañhi yasmā attano phalatthāya hinoti pavattati, tasmā hetūti vuccati. Yasmā taṃ phalaṃ nideti ‘handa, gaṇhatha na’nti appeti viya, tasmā nidānanti vuccati. Sambhavadassāvītiādīni pañca padāni heṭṭhā dassitanayāni eva. Yasmā taṃ paṭicca eti pavattati, tañca phalaṃ tato samudeti uppajjati, tasmā paccayoti ca samudayoti ca vuccati.
யா வா பனஞ்ஞாபி காசி ஸுக³தியோதி சதுஅபாயவினிமுத்தகா உத்தரமாதாத³யோ அப்பேஸக்கா² கபணமனுஸ்ஸா ச து³ல்லப⁴கா⁴ஸச்சா²த³னா து³க்க²பீளிதா வேதி³தப்³பா³. யா வா பனஞ்ஞாபி காசி து³க்³க³தியோதி யமராஜனாக³ஸுபண்ணபேதமஹித்³தி⁴காத³யோ பச்சேதப்³பா³. அத்தபா⁴வாபி⁴னிப்³ப³த்தியாதி தீஸு டா²னேஸு படிஸந்தி⁴வஸேன அத்தபா⁴வபடிலாப⁴த்தா²ய. ஜானாதீதி ஸப்³ப³ஞ்ஞுதஞ்ஞாணேன ஜானாதி. பஸ்ஸதீதி ஸமந்தசக்கு²னா பஸ்ஸதி.
Yā vā panaññāpi kāci sugatiyoti catuapāyavinimuttakā uttaramātādayo appesakkhā kapaṇamanussā ca dullabhaghāsacchādanā dukkhapīḷitā veditabbā. Yā vā panaññāpi kāci duggatiyoti yamarājanāgasupaṇṇapetamahiddhikādayo paccetabbā. Attabhāvābhinibbattiyāti tīsu ṭhānesu paṭisandhivasena attabhāvapaṭilābhatthāya. Jānātīti sabbaññutaññāṇena jānāti. Passatīti samantacakkhunā passati.
அகுஸலாதி அகோஸல்லஸம்பூ⁴தா. அகுஸலங் ப⁴ஜந்தீதி அகுஸலபா⁴கி³யா. அகுஸலபக்கே² ப⁴வாதி அகுஸலபக்கி²கா. ஸப்³பே³ தே அவிஜ்ஜா மூலங் காரணங் ஏதேஸந்தி அவிஜ்ஜாமூலகா. அவிஜ்ஜாய ஸமோஸரந்தி ஸம்மா ஓஸரந்தி க³ச்ச²ந்தீதி அவிஜ்ஜாஸமோஸரணா. அவிஜ்ஜாஸமுக்³கா⁴தாதி அரஹத்தமக்³கே³ன அவிஜ்ஜாய ஹதாய. ஸப்³பே³ தே ஸமுக்³கா⁴தங் க³ச்ச²ந்தீதி வுத்தப்பகாரா அகுஸலத⁴ம்மா, தே ஸப்³பே³ ஹதபா⁴வங் பாபுணந்தி.
Akusalāti akosallasambhūtā. Akusalaṃ bhajantīti akusalabhāgiyā. Akusalapakkhe bhavāti akusalapakkhikā. Sabbe te avijjā mūlaṃ kāraṇaṃ etesanti avijjāmūlakā. Avijjāya samosaranti sammā osaranti gacchantīti avijjāsamosaraṇā. Avijjāsamugghātāti arahattamaggena avijjāya hatāya. Sabbe te samugghātaṃ gacchantīti vuttappakārā akusaladhammā, te sabbe hatabhāvaṃ pāpuṇanti.
அப்பமாத³மூலகாதி ஸதிஅவிப்பவாஸோ அப்பமாதோ³ மூலங் காரணங் ஏதேஸந்தி அப்பமாத³மூலகா. அப்பமாதே³ஸு ஸம்மா ஓஸரந்தி க³ச்ச²ந்தீதி அப்பமாத³ஸமோஸரணா. அப்பமாதோ³ தேஸங் த⁴ம்மானங் அக்³க³மக்கா²யதீதி ஸயங் காமாவசரோபி ஸமானோ சதுபூ⁴மகத⁴ம்மானங் பதிட்டா²பா⁴வேன அக்³கோ³ நாம ஜாதோ.
Appamādamūlakāti satiavippavāso appamādo mūlaṃ kāraṇaṃ etesanti appamādamūlakā. Appamādesu sammā osaranti gacchantīti appamādasamosaraṇā. Appamādo tesaṃ dhammānaṃ aggamakkhāyatīti sayaṃ kāmāvacaropi samāno catubhūmakadhammānaṃ patiṭṭhābhāvena aggo nāma jāto.
அலமத்தோதி ஸமத்த²சித்தோ. மயா புச்சி²தந்தி மயா புட்ட²ங். வஹஸ்ஸேதங் பா⁴ரந்தி ஏதங் ஆப⁴தபா⁴ரங் வஹஸ்ஸு. யே கேசி இஸிபப்³ப³ஜ்ஜங் பப்³ப³ஜிதா. ‘‘இஸிபப்³ப³ஜ்ஜா பப்³ப³ஜிதா’’திபி பாடோ².
Alamattoti samatthacitto. Mayā pucchitanti mayā puṭṭhaṃ. Vahassetaṃ bhāranti etaṃ ābhatabhāraṃ vahassu. Ye keci isipabbajjaṃ pabbajitā. ‘‘Isipabbajjā pabbajitā’’tipi pāṭho.
ஆஜீவகஸாவகானங் ஆஜீவகா தே³வதாதி யே ஆஜீவகவசனங் ஸுணந்தி ஸுஸ்ஸுஸந்தி, தே ஆஜீவகஸாவகா, தேஸங் ஆஜீவகஸாவகானங். ஆஜீவகா ச தேஸங் தெ³ய்யத⁴ம்மங் படிக்³க³ண்ஹந்தி, தே ஏவ ஆஜீவகா தே³வதா. ஏவங் ஸப்³ப³த்த². யே யேஸங் த³க்கி²ணெய்யாதி யே ஆஜீவகாத³யோ தி³ஸாபரியோஸானா யேஸங் க²த்தியாதீ³னங் தெ³ய்யத⁴ம்மானுச்ச²விகா. தே தேஸங் தே³வதாதி தே ஆஜீவகாத³யோ தேஸங் க²த்தியாதீ³னங் தே³வதா.
Ājīvakasāvakānaṃ ājīvakā devatāti ye ājīvakavacanaṃ suṇanti sussusanti, te ājīvakasāvakā, tesaṃ ājīvakasāvakānaṃ. Ājīvakā ca tesaṃ deyyadhammaṃ paṭiggaṇhanti, te eva ājīvakā devatā. Evaṃ sabbattha. Ye yesaṃ dakkhiṇeyyāti ye ājīvakādayo disāpariyosānā yesaṃ khattiyādīnaṃ deyyadhammānucchavikā. Te tesaṃ devatāti te ājīvakādayo tesaṃ khattiyādīnaṃ devatā.
யேபி யஞ்ஞங் ஏஸந்தீதி தெ³ய்யத⁴ம்மங் இச்ச²ந்தி. க³வேஸந்தீதி ஓலோகெந்தி. பரியேஸந்தீதி உப்பாதெ³ந்தி. யஞ்ஞா வா ஏதே புதூ²தி யஞ்ஞா ஏவ வா ஏதே புது²கா. யஞ்ஞயாஜகா வா ஏதே புதூ²தி தெ³ய்யத⁴ம்மஸ்ஸ யாஜனகா ஏவ வா ஏதே புது²கா. த³க்கி²ணெய்யா வா ஏதே புதூ²தி தெ³ய்யத⁴ம்மானுச்ச²விகா ஏவ வா ஏதே புது²கா. தே வித்தா²ரதோ த³ஸ்ஸேதுங் ‘‘கத²ங் யஞ்ஞா வா ஏதே புதூ²’’திஆதி³னா நயேன வித்தா²ரேன த³ஸ்ஸேதி.
Yepi yaññaṃ esantīti deyyadhammaṃ icchanti. Gavesantīti olokenti. Pariyesantīti uppādenti. Yaññā vā ete puthūti yaññā eva vā ete puthukā. Yaññayājakā vā ete puthūti deyyadhammassa yājanakā eva vā ete puthukā. Dakkhiṇeyyā vā ete puthūti deyyadhammānucchavikā eva vā ete puthukā. Te vitthārato dassetuṃ ‘‘kathaṃ yaññā vā ete puthū’’tiādinā nayena vitthārena dasseti.
13. ஆஸீஸமானாதி ரூபாதீ³னி பத்த²யமானா. இத்த²த்தந்தி இத்த²பா⁴வஞ்ச பத்த²யமானா, மனுஸ்ஸாதி³பா⁴வங் இச்ச²ந்தாதி வுத்தங் ஹோதி. ஜரங் ஸிதாதி ஜரங் நிஸ்ஸிதா. ஜராமுகே²ன செத்த² ஸப்³ப³ங் வட்டது³க்க²ங் வுத்தங். தேன வட்டது³க்க²னிஸ்ஸிதா ததோ அபரிமுச்சமானாயேவ கப்பயிங்ஸூதி தீ³பேதி.
13.Āsīsamānāti rūpādīni patthayamānā. Itthattanti itthabhāvañca patthayamānā, manussādibhāvaṃ icchantāti vuttaṃ hoti. Jaraṃ sitāti jaraṃ nissitā. Jarāmukhena cettha sabbaṃ vaṭṭadukkhaṃ vuttaṃ. Tena vaṭṭadukkhanissitā tato aparimuccamānāyeva kappayiṃsūti dīpeti.
ரூபபடிலாப⁴ங் ஆஸீஸமானாதி வண்ணாயதனஸம்பத்திலாப⁴ங் பத்த²யமானா. ஸத்³தா³தீ³ஸுபி ஏஸேவ நயோ. க²த்தியமஹாஸாலகுலே அத்தபா⁴வபடிலாப⁴ந்தி ஸாரப்பத்தே க²த்தியானங் மஹாஸாலகுலே அத்தபா⁴வலாப⁴ங் படிஸந்தி⁴ங் பத்த²யமானா. ப்³ராஹ்மணமஹாஸாலகுலாதீ³ஸுபி ஏஸேவ நயோ. ப்³ரஹ்மகாயிகேஸு தே³வேஸூதி எத்த² புப்³ப³ப⁴வங் ஸந்தா⁴ய வுத்தங். எத்தா²தி க²த்தியகுலாதீ³ஸு.
Rūpapaṭilābhaṃ āsīsamānāti vaṇṇāyatanasampattilābhaṃ patthayamānā. Saddādīsupi eseva nayo. Khattiyamahāsālakule attabhāvapaṭilābhanti sārappatte khattiyānaṃ mahāsālakule attabhāvalābhaṃ paṭisandhiṃ patthayamānā. Brāhmaṇamahāsālakulādīsupi eseva nayo. Brahmakāyikesu devesūti ettha pubbabhavaṃ sandhāya vuttaṃ. Etthāti khattiyakulādīsu.
ஜரானிஸ்ஸிதாதி ஜரங் அஸ்ஸிதா. ப்³யாதி⁴னிஸ்ஸிதாதிஆதீ³ஸுபி ஏஸேவ நயோ. ஏதேஹி ஸப்³ப³ங் வட்டது³க்க²ங் பரியாதி³யித்வா த³ஸ்ஸிதங் ஹோதி.
Jarānissitāti jaraṃ assitā. Byādhinissitātiādīsupi eseva nayo. Etehi sabbaṃ vaṭṭadukkhaṃ pariyādiyitvā dassitaṃ hoti.
14. கச்சிஸு தே ப⁴க³வா யஞ்ஞபதே² அப்பமத்தா, அதாரு ஜாதிஞ்ச ஜரஞ்ச மாரிஸாதி எத்த² யஞ்ஞோ ஏவ யஞ்ஞபதோ². இத³ங் வுத்தங் ஹோதி – கச்சி தே யஞ்ஞே அப்பமத்தா ஹுத்வா யஞ்ஞங் கப்பயந்தா வட்டது³க்க²முத்தரிங்ஸூதி.
14.Kaccisu te bhagavā yaññapathe appamattā, atāru jātiñca jarañca mārisāti ettha yañño eva yaññapatho. Idaṃ vuttaṃ hoti – kacci te yaññe appamattā hutvā yaññaṃ kappayantā vaṭṭadukkhamuttariṃsūti.
யேபி யஞ்ஞங் தெ³ந்தி யஜந்தீதி தெ³ய்யத⁴ம்மதா³னவஸேன யஜந்தி. பரிச்சஜந்தீதி விஸ்ஸஜ்ஜெந்தி.
Yepiyaññaṃ denti yajantīti deyyadhammadānavasena yajanti. Pariccajantīti vissajjenti.
15. ஆஸீஸந்தீதி ரூபபடிலாபா⁴த³யோ பத்தெ²ந்தி. தோ²மயந்தீதி ‘‘ஸுசிங் தி³ன்ன’’ந்திஆதி³னா நயேன யஞ்ஞாதீ³னி பஸங்ஸந்தி. அபி⁴ஜப்பந்தீதி ரூபாதி³படிலாபா⁴ய வாசங் கீ³ரந்தி. ஜுஹந்தீதி தெ³ந்தி. காமாபி⁴ஜப்பந்தி படிச்ச லாப⁴ந்தி ரூபாதி³லாப⁴ங் படிச்ச புனப்புனங் காமே ஏவ அபி⁴ஜப்பந்தி, ‘‘அஹோ வத அம்ஹாகம்பி ஸிய்யு’’ந்தி வத³ந்தி, தண்ஹஞ்ச தத்த² வட்³டெ⁴ந்தீதி வுத்தங் ஹோதி. யாஜயோகா³தி யாகா³தி⁴முத்தா. ப⁴வராக³ரத்தாதி ஏவமிமேஹி ஆஸீஸனாதீ³ஹி ப⁴வராகே³னேவ ரத்தா, ப⁴வராக³ரத்தா வா ஹுத்வா ஏதானி ஆஸீஸனாதீ³னி கரொந்தா நாதரிங்ஸு ஜாதிஆதி³வட்டது³க்க²ங் ந உத்தரிங்ஸு.
15.Āsīsantīti rūpapaṭilābhādayo patthenti. Thomayantīti ‘‘suciṃ dinna’’ntiādinā nayena yaññādīni pasaṃsanti. Abhijappantīti rūpādipaṭilābhāya vācaṃ gīranti. Juhantīti denti. Kāmābhijappanti paṭicca lābhanti rūpādilābhaṃ paṭicca punappunaṃ kāme eva abhijappanti, ‘‘aho vata amhākampi siyyu’’nti vadanti, taṇhañca tattha vaḍḍhentīti vuttaṃ hoti. Yājayogāti yāgādhimuttā. Bhavarāgarattāti evamimehi āsīsanādīhi bhavarāgeneva rattā, bhavarāgarattā vā hutvā etāni āsīsanādīni karontā nātariṃsu jātiādivaṭṭadukkhaṃ na uttariṃsu.
யஞ்ஞங் வா தோ²மெந்தீதி தா³னங் வா வண்ணெந்தி. ப²லங் வாதி ரூபாதி³படிலாப⁴ங். த³க்கி²ணெய்யே வாதி ஜாதிஸம்பன்னாதீ³ஸு. ஸுசிங் தி³ன்னந்தி ஸுசிங் கத்வா தி³ன்னங். மனாபந்தி மனவட்³ட⁴னகங். பணீதந்தி ஓஜவந்தங். காலேனாதி தத்த² தத்த² ஸம்பத்தகாலே . கப்பியந்தி அகப்பியங் வஜ்ஜெத்வா தி³ன்னங். அனவஜ்ஜந்தி நித்³தோ³ஸங். அபி⁴ண்ஹந்தி புனப்புனங். த³த³ங் சித்தங் பஸாதி³தந்தி த³த³தோ முஞ்சனசித்தங் பஸாதி³தந்தி. தோ²மெந்தி கித்தெந்தீதி கு³ணங் பாகடங் கரொந்தி. வண்ணெந்தீதி வண்ணங் ப⁴ணந்தி. பஸங்ஸந்தீதி பஸாத³ங் பாபெந்தி.
Yaññaṃ vā thomentīti dānaṃ vā vaṇṇenti. Phalaṃ vāti rūpādipaṭilābhaṃ. Dakkhiṇeyye vāti jātisampannādīsu. Suciṃ dinnanti suciṃ katvā dinnaṃ. Manāpanti manavaḍḍhanakaṃ. Paṇītanti ojavantaṃ. Kālenāti tattha tattha sampattakāle . Kappiyanti akappiyaṃ vajjetvā dinnaṃ. Anavajjanti niddosaṃ. Abhiṇhanti punappunaṃ. Dadaṃ cittaṃ pasāditanti dadato muñcanacittaṃ pasāditanti. Thomenti kittentīti guṇaṃ pākaṭaṃ karonti. Vaṇṇentīti vaṇṇaṃ bhaṇanti. Pasaṃsantīti pasādaṃ pāpenti.
இதோ நிதா³னந்தி இதோ மனுஸ்ஸலோகதோ தி³ன்னகாரணா. அஜ்ஜா²யகாதி மந்தே பரிவத்தெந்தா. மந்தத⁴ராதி மந்தே தா⁴ரெந்தா. திண்ணங் வேதா³னந்தி இருவேத³யஜுவேத³ஸாமவேதா³னங். ஒட்ட²பஹடகரணவஸேன பாரங் க³தாதி பாரகூ³. ஸஹ நிக⁴ண்டு³னா ச கேடுபே⁴ன ச ஸனிக⁴ண்டு³கேடுபா⁴னங். நிக⁴ண்டூ³தி நிக⁴ண்டு³ருக்கா²தீ³னங் வேவசனப்பகாஸகங் ஸத்த²ங். கேடுப⁴ந்தி கிரியாகப்பவிகப்போ கவீனங் உபகாராவஹங் ஸத்த²ங் . ஸஹ அக்க²ரப்பபே⁴தே³ன ஸாக்க²ரப்பபே⁴தா³னங். அக்க²ரப்பபே⁴தோ³தி ஸிக்கா² ச நிருத்தி ச. இதிஹாஸபஞ்சமானந்தி ஆத²ப்³ப³ணவேத³ங் சதுத்த²ங் கத்வா ‘‘இதிஹ ஆஸ, இதிஹ ஆஸா’’தி ஈதி³ஸவசனபடிஸங்யுத்தபுராணகதா²ஸங்கா²தோ இதிஹாஸோ பஞ்சமோ ஏதேஸந்தி இதிஹாஸபஞ்சமா, தேஸங் இதிஹாஸபஞ்சமானங் வேதா³னங்.
Ito nidānanti ito manussalokato dinnakāraṇā. Ajjhāyakāti mante parivattentā. Mantadharāti mante dhārentā. Tiṇṇaṃ vedānanti iruvedayajuvedasāmavedānaṃ. Oṭṭhapahaṭakaraṇavasena pāraṃ gatāti pāragū. Saha nighaṇḍunā ca keṭubhena ca sanighaṇḍukeṭubhānaṃ. Nighaṇḍūti nighaṇḍurukkhādīnaṃ vevacanappakāsakaṃ satthaṃ. Keṭubhanti kiriyākappavikappo kavīnaṃ upakārāvahaṃ satthaṃ . Saha akkharappabhedena sākkharappabhedānaṃ. Akkharappabhedoti sikkhā ca nirutti ca. Itihāsapañcamānanti āthabbaṇavedaṃ catutthaṃ katvā ‘‘itiha āsa, itiha āsā’’ti īdisavacanapaṭisaṃyuttapurāṇakathāsaṅkhāto itihāso pañcamo etesanti itihāsapañcamā, tesaṃ itihāsapañcamānaṃ vedānaṃ.
பத³ங் தத³வஸேஸஞ்ச ப்³யாகரணங் அதி⁴யந்தி, வேதெ³ந்தி வாதி பத³கா வெய்யாகரணா. லோகாயதங் வுச்சதி விதண்ட³வாத³ஸத்த²ங். மஹாபுரிஸலக்க²ணந்தி மஹாபுரிஸானங் பு³த்³தா⁴தீ³னங் லக்க²ணதீ³பகங் த்³வாத³ஸஸஹஸ்ஸக³ந்த²ப்பமாணங் ஸத்த²ங். யத்த² ஸோளஸஸஹஸ்ஸகா³தா²பத³பரிமாணா பு³த்³த⁴மந்தா நாம அஹேஸுங். யேஸங் வஸேன ‘‘இமினா லக்க²ணேன ஸமன்னாக³தா பு³த்³தா⁴ நாம ஹொந்தி, இமினா பச்சேகபு³த்³தா⁴, அக்³க³ஸாவகா , அஸீதிமஹாஸாவகா (தே²ரகா³॰ அட்ட²॰ 2.1288), பு³த்³த⁴மாதா, பு³த்³த⁴பிதா, அக்³கு³பட்டா²கோ, அக்³கு³பட்டா²யிகா, ராஜா சக்கவத்தீ’’தி அயங் விஸேஸோ ஞாயதி. அனவயாதி இமேஸு லோகாயதமஹாபுரிஸலக்க²ணேஸு அனூனா பரிபூரகாரினோ, அவயா ந ஹொந்தீதி வுத்தங் ஹோதி. அவயா நாம யே தானி அத்த²தோ ச க³ந்த²தோ ச ஸந்தா⁴ரேதுங் ந ஸக்கொந்தி. வீதராகா³தி பஹீனராகா³. ஏதேன அரஹத்தப²லட்டா² வுத்தா. ராக³வினயாய வா படிபன்னாதி ஏதேன அரஹத்தமக்³க³ட்டா². வீததோ³ஸாதி அனாகா³மிப²லட்டா². தோ³ஸவினயாய வா படிபன்னாதி ஏதேன அனாகா³மிமக்³க³ட்டா². வீதமோஹாதி அரஹத்தப²லட்டா². மோஹவினயாய வா படிபன்னாதி அரஹத்தமக்³க³ட்டா². ஸீலஸமாதி⁴பஞ்ஞாவிமுத்திஸம்பன்னாதி ஏதேஹி சதூஹி லோகியலோகுத்தரமிஸ்ஸகேஹி ஸீலாதீ³ஹி ஸம்பன்னா. விமுத்திஞாணத³ஸ்ஸனஸம்பன்னாதி ஏதேன பச்சவெக்க²ணஞாணஸம்பன்னா வுத்தாதி ஞாதப்³ப³ங், தஞ்ச கோ² லோகியமேவ. அபி⁴ஜப்பந்தீதி பத்தெ²ந்தி. ஜப்பந்தீதி பச்சாஸீஸந்தி. பஜப்பந்தீதி அதீவ பச்சாஸீஸந்தி. யாஜயோகே³ஸு யுத்தாதி அனுயோகே³ தெ³ய்யத⁴ம்மே தி³ய்யமானே அபி⁴யோக³வஸேன யுத்தா.
Padaṃ tadavasesañca byākaraṇaṃ adhiyanti, vedenti vāti padakā veyyākaraṇā. Lokāyataṃ vuccati vitaṇḍavādasatthaṃ. Mahāpurisalakkhaṇanti mahāpurisānaṃ buddhādīnaṃ lakkhaṇadīpakaṃ dvādasasahassaganthappamāṇaṃ satthaṃ. Yattha soḷasasahassagāthāpadaparimāṇā buddhamantā nāma ahesuṃ. Yesaṃ vasena ‘‘iminā lakkhaṇena samannāgatā buddhā nāma honti, iminā paccekabuddhā, aggasāvakā , asītimahāsāvakā (theragā. aṭṭha. 2.1288), buddhamātā, buddhapitā, aggupaṭṭhāko, aggupaṭṭhāyikā, rājā cakkavattī’’ti ayaṃ viseso ñāyati. Anavayāti imesu lokāyatamahāpurisalakkhaṇesu anūnā paripūrakārino, avayā na hontīti vuttaṃ hoti. Avayā nāma ye tāni atthato ca ganthato ca sandhāretuṃ na sakkonti. Vītarāgāti pahīnarāgā. Etena arahattaphalaṭṭhā vuttā. Rāgavinayāya vā paṭipannāti etena arahattamaggaṭṭhā. Vītadosāti anāgāmiphalaṭṭhā. Dosavinayāya vā paṭipannāti etena anāgāmimaggaṭṭhā. Vītamohāti arahattaphalaṭṭhā. Mohavinayāya vā paṭipannāti arahattamaggaṭṭhā. Sīlasamādhipaññāvimuttisampannāti etehi catūhi lokiyalokuttaramissakehi sīlādīhi sampannā. Vimuttiñāṇadassanasampannāti etena paccavekkhaṇañāṇasampannā vuttāti ñātabbaṃ, tañca kho lokiyameva. Abhijappantīti patthenti. Jappantīti paccāsīsanti. Pajappantīti atīva paccāsīsanti. Yājayogesu yuttāti anuyoge deyyadhamme diyyamāne abhiyogavasena yuttā.
16. அத² கோ சரஹீதி அத² இதா³னி கோ அஞ்ஞோ அதாரி.
16.Atha ko carahīti atha idāni ko añño atāri.
17. ஸங்கா²யாதி ஞாணேன வீமங்ஸித்வா. பரோபரானீதி பரானி ச ஓபரானி ச, பரத்தபா⁴வஸகத்தபா⁴வாதீ³னி பரானி ச ஓபரானி சாதி வுத்தங் ஹோதி. விதூ⁴மோதி காயது³ச்சரிதாதி³தூ⁴மவிரஹிதோ . அனீகோ⁴தி ராகா³தி³ஈக⁴விரஹிதோ. அதாரி ஸோதி ஸோ ஏவரூபோ அரஹா ஜாதிஜரங் அதாரி.
17.Saṅkhāyāti ñāṇena vīmaṃsitvā. Paroparānīti parāni ca oparāni ca, parattabhāvasakattabhāvādīni parāni ca oparāni cāti vuttaṃ hoti. Vidhūmoti kāyaduccaritādidhūmavirahito . Anīghoti rāgādiīghavirahito. Atāri soti so evarūpo arahā jātijaraṃ atāri.
ஸகரூபாதி அத்தனோ ரூபா. பரரூபாதி பரேஸங் ரூபா. காயது³ச்சரிதங் விதூ⁴மிதந்தி திவித⁴காயது³ச்சரிதங் விதூ⁴மங் கதங். வித⁴மிதந்தி நாஸிதங்.
Sakarūpāti attano rūpā. Pararūpāti paresaṃ rūpā. Kāyaduccaritaṃ vidhūmitanti tividhakāyaduccaritaṃ vidhūmaṃ kataṃ. Vidhamitanti nāsitaṃ.
மானோ ஹி தே, ப்³ராஹ்மண, கா²ரிபா⁴ரோதி யதா² கா²ரிபா⁴ரோ க²ந்தே⁴ன வய்ஹமானோ உபரிட்டி²தோபி அக்கந்தக்கந்தட்டா²னங் பத²வியா ஸத்³தி⁴ங் ப²ஸ்ஸேதி விய, ஏவங் ஜாதிகொ³த்தகுலாதீ³னி மானவத்தூ²னி நிஸ்ஸாய உஸ்ஸாபிதோ மானோ, தத்த² தத்த² இஸ்ஸங் உப்பாதெ³ந்தோ சதூஸு அபாயேஸு ஸங்ஸீதா³பேதி. தேனாஹ – ‘‘மானோ ஹி தே, ப்³ராஹ்மண, கா²ரிபா⁴ரோ’’தி. கோதோ⁴ தூ⁴மோதி தவ ஞாணக்³கி³ஸ்ஸ உபக்கிலேஸட்டே²ன கோதோ⁴ தூ⁴மோ. தேன ஹி தே உபக்கிலிட்டோ² ஞாணக்³கி³ ந விரோசதி. ப⁴ஸ்மனி மோஸவஜ்ஜந்தி நிரோஜட்டே²ன முஸாவாதோ³ சா²ரிகா நாம. யதா² ஹி சா²ரிகாய படிச்ச²ன்னோ அக்³கி³ ந ஜோததி, ஏவங் தே முஸாவாதே³ன படிச்ச²ன்னங் ஞாணந்தி த³ஸ்ஸேதி. ஜிவ்ஹா ஸுஜாதி யதா² துய்ஹங் ஸுவண்ணரஜதலோஹகட்ட²மத்திகாஸு அஞ்ஞதரமயா யாக³யஜனத்தா²ய ஸுஜா ஹோதி, ஏவங் மய்ஹங் த⁴ம்மயாக³யஜனத்தா²ய பஹுதஜிவ்ஹா ஸுஜாதி வத³தி. யதா² துய்ஹங் நதீ³தீரே யஜனட்டா²னங், ஏவங் த⁴ம்மயாக³யஜனட்டா²னட்டே²ன ஹத³யங் ஜோதிட்டா²னங். அத்தாதி சித்தங்.
Māno hi te, brāhmaṇa, khāribhāroti yathā khāribhāro khandhena vayhamāno upariṭṭhitopi akkantakkantaṭṭhānaṃ pathaviyā saddhiṃ phasseti viya, evaṃ jātigottakulādīni mānavatthūni nissāya ussāpito māno, tattha tattha issaṃ uppādento catūsu apāyesu saṃsīdāpeti. Tenāha – ‘‘māno hi te, brāhmaṇa, khāribhāro’’ti. Kodho dhūmoti tava ñāṇaggissa upakkilesaṭṭhena kodho dhūmo. Tena hi te upakkiliṭṭho ñāṇaggi na virocati. Bhasmani mosavajjanti nirojaṭṭhena musāvādo chārikā nāma. Yathā hi chārikāya paṭicchanno aggi na jotati, evaṃ te musāvādena paṭicchannaṃ ñāṇanti dasseti. Jivhā sujāti yathā tuyhaṃ suvaṇṇarajatalohakaṭṭhamattikāsu aññataramayā yāgayajanatthāya sujā hoti, evaṃ mayhaṃ dhammayāgayajanatthāya pahutajivhā sujāti vadati. Yathā tuyhaṃ nadītīre yajanaṭṭhānaṃ, evaṃ dhammayāgayajanaṭṭhānaṭṭhena hadayaṃ jotiṭṭhānaṃ. Attāti cittaṃ.
ஜாதீதி ஜாயனகவஸேன ஜாதி. இத³மெத்த² ஸபா⁴வபச்சத்தங். ஸஞ்ஜாயனவஸேன ஸஞ்ஜாதி, உபஸக்³கே³ன பத³ங் வட்³டி⁴தங். ஓக்கமனவஸேன ஓக்கந்தி. ஜாயனட்டே²ன வா ஜாதி. ஸா அபரிபுண்ணாயதனவஸேன யுத்தா. ஸஞ்ஜாயனட்டே²ன ஸஞ்ஜாதி. ஸா பரிபுண்ணாயதனவஸேன யுத்தா. ஓக்கமனட்டே²ன ஓக்கந்தி. ஸா அண்ட³ஜஜலாபு³ஜவஸேன யுத்தா. தே ஹி அண்ட³கோஸஞ்ச வத்தி²கோஸஞ்ச ஓக்கமந்தி பவிஸந்தி ஓக்கமந்தா பவிஸந்தா விய படிஸந்தி⁴ங் க³ண்ஹந்தி. அபி⁴னிப்³ப³த்தனட்டே²ன அபி⁴னிப்³ப³த்தி. ஸா ஸங்ஸேத³ஜஓபபாதிகவஸேன யுத்தா. தே ஹி பாகடா ஏவ ஹுத்வா நிப்³ப³த்தந்தி. அயங் தாவ ஸம்முதிகதா².
Jātīti jāyanakavasena jāti. Idamettha sabhāvapaccattaṃ. Sañjāyanavasena sañjāti, upasaggena padaṃ vaḍḍhitaṃ. Okkamanavasena okkanti. Jāyanaṭṭhena vā jāti. Sā aparipuṇṇāyatanavasena yuttā. Sañjāyanaṭṭhena sañjāti. Sā paripuṇṇāyatanavasena yuttā. Okkamanaṭṭhena okkanti. Sā aṇḍajajalābujavasena yuttā. Te hi aṇḍakosañca vatthikosañca okkamanti pavisanti okkamantā pavisantā viya paṭisandhiṃ gaṇhanti. Abhinibbattanaṭṭhena abhinibbatti. Sā saṃsedajaopapātikavasena yuttā. Te hi pākaṭā eva hutvā nibbattanti. Ayaṃ tāva sammutikathā.
இதா³னி பரமத்த²கதா² ஹோதி. க²ந்தா⁴ ஏவ ஹி பரமத்த²தோ பாதுப⁴வந்தி, ந ஸத்தா. தத்த² ச க²ந்தா⁴னந்தி ஏகவோகாரப⁴வே ஏகஸ்ஸ, சதுவோகாரப⁴வே சதுன்னங், பஞ்சவோகாரப⁴வே பஞ்சன்னம்பி க³ஹணங் வேதி³தப்³ப³ங். பாதுபா⁴வோதி உப்பத்தி. ஆயதனானந்தி எத்த² தத்ர தத்ர உபபஜ்ஜமானாயதனானங் ஸங்க³ஹோ வேதி³தப்³போ³. படிலாபோ⁴தி ஸந்ததியா பாதுபா⁴வோயேவ. பாதுப⁴வந்தானேவ ஹி தானி படிலத்³தா⁴னி நாம ஹொந்தி. ஸா பனேஸா தத்த² தத்த² ப⁴வே பட²மாபி⁴னிப்³ப³த்திலக்க²ணா ஜாதி, நிய்யாதனரஸா, அதீதப⁴வதோ இத⁴ உம்முஜ்ஜனபச்சுபட்டா²னா, ப²லவஸேன து³க்க²விசித்ததாபச்சுபட்டா²னா வா.
Idāni paramatthakathā hoti. Khandhā eva hi paramatthato pātubhavanti, na sattā. Tattha ca khandhānanti ekavokārabhave ekassa, catuvokārabhave catunnaṃ, pañcavokārabhave pañcannampi gahaṇaṃ veditabbaṃ. Pātubhāvoti uppatti. Āyatanānanti ettha tatra tatra upapajjamānāyatanānaṃ saṅgaho veditabbo. Paṭilābhoti santatiyā pātubhāvoyeva. Pātubhavantāneva hi tāni paṭiladdhāni nāma honti. Sā panesā tattha tattha bhave paṭhamābhinibbattilakkhaṇā jāti, niyyātanarasā, atītabhavato idha ummujjanapaccupaṭṭhānā, phalavasena dukkhavicittatāpaccupaṭṭhānā vā.
ஜராதி ஸபா⁴வபச்சத்தங். ஜீரணதாதி ஆகாரபா⁴வனித்³தே³ஸோ. க²ண்டி³ச்சந்திஆத³யோ தயோ காலாதிக்கமே கிச்சனித்³தே³ஸா, பச்சி²மா த்³வே பகதினித்³தே³ஸா. அயஞ்ஹி ஜராதி இமினா பதே³ன ஸபா⁴வதோ தீ³பிதா. தேனஸ்ஸா இத³ங் ஸபா⁴வபச்சத்தங். ஜீரணதாதி இமினா ஆகாரதோ, தேனஸ்ஸாயங் ஆகாரனித்³தே³ஸோ. க²ண்டி³ச்சந்தி இமினா காலாதிக்கமே த³ந்தனகா²னங் க²ண்டி³தபா⁴வகரணகிச்சதோ. பாலிச்சந்தி இமினா கேஸலோமானங் பலிதபா⁴வகரணகிச்சதோ. வலித்தசதாதி இமினா மங்ஸங் மிலாபெத்வா தசே வலிபா⁴வகரணகிச்சதோ. தேனஸ்ஸா இமே க²ண்டி³ச்சந்திஆத³யோ தயோ காலாதிக்கமே கிச்சனித்³தே³ஸா. தேஹி இமேஸங் விகாரானங் த³ஸ்ஸனவஸேன பாகடீபூ⁴தா பாகடஜரா த³ஸ்ஸிதா. யதே²வ ஹி உத³கஸ்ஸ வா வாதஸ்ஸ வா அக்³கி³னோ வா திணருக்கா²தீ³னங் ஸங்ப⁴க்³க³பலிப⁴க்³க³தாய வா ஜா²மதாய வா க³தமக்³கோ³ பாகடோ ஹோதி, ந ச ஸோ க³தமக்³கோ³ தானேவ உத³காதீ³னி, ஏவமேவ ஜராய த³ந்தாதீ³னங் க²ண்டி³ச்சாதி³வஸேன க³தமக்³கோ³ பாகடோ, சக்கு²ங் உம்மீலெத்வாபி க³ய்ஹதி, ந ச க²ண்டி³ச்சாதீ³னேவ ஜரா. ந ஹி ஜரா சக்கு²விஞ்ஞெய்யா ஹோதி.
Jarāti sabhāvapaccattaṃ. Jīraṇatāti ākārabhāvaniddeso. Khaṇḍiccantiādayo tayo kālātikkame kiccaniddesā, pacchimā dve pakatiniddesā. Ayañhi jarāti iminā padena sabhāvato dīpitā. Tenassā idaṃ sabhāvapaccattaṃ. Jīraṇatāti iminā ākārato, tenassāyaṃ ākāraniddeso. Khaṇḍiccanti iminā kālātikkame dantanakhānaṃ khaṇḍitabhāvakaraṇakiccato. Pāliccanti iminā kesalomānaṃ palitabhāvakaraṇakiccato. Valittacatāti iminā maṃsaṃ milāpetvā tace valibhāvakaraṇakiccato. Tenassā ime khaṇḍiccantiādayo tayo kālātikkame kiccaniddesā. Tehi imesaṃ vikārānaṃ dassanavasena pākaṭībhūtā pākaṭajarā dassitā. Yatheva hi udakassa vā vātassa vā aggino vā tiṇarukkhādīnaṃ saṃbhaggapalibhaggatāya vā jhāmatāya vā gatamaggo pākaṭo hoti, na ca so gatamaggo tāneva udakādīni, evameva jarāya dantādīnaṃ khaṇḍiccādivasena gatamaggo pākaṭo, cakkhuṃ ummīletvāpi gayhati, na ca khaṇḍiccādīneva jarā. Na hi jarā cakkhuviññeyyā hoti.
ஆயுனோ ஸங்ஹானி இந்த்³ரியானங் பரிபாகோதி இமேஹி பன பதே³ஹி காலாதிக்கமேயேவ அபி⁴ப்³யத்தாய ஆயுக்க²யசக்கா²தி³இந்த்³ரியபரிபாகஸங்கா²தாய பகதியா தீ³பிதா, தேனஸ்ஸிமே பச்சி²மா த்³வே பகதினித்³தே³ஸாதி வேதி³தப்³பா³. தத்த² யஸ்மா ஜரங் பத்தஸ்ஸ ஆயு ஹாயதி, தஸ்மா ஜரா ‘‘ஆயுனோ ஸங்ஹானீ’’தி ப²லூபசாரேன வுத்தா. யஸ்மா ச த³ஹரகாலே ஸுப்பஸன்னானி ஸுகு²மம்பி அத்தனோ விஸயங் ஸுகே²னேவ க³ண்ஹனஸமத்தா²னி சக்கா²தீ³னி இந்த்³ரியானி ஜரங் பத்தஸ்ஸ பரிபக்கானி ஆலுளிதானி அவிஸதா³னி, ஓளாரிகம்பி அத்தனோ விஸயங் க³ஹேதுங் அஸமத்தா²னி ஹொந்தி. தஸ்மா ‘‘இந்த்³ரியானங் பரிபாகோ’’தி ப²லூபசாரேனேவ வுத்தா.
Āyunosaṃhāni indriyānaṃ paripākoti imehi pana padehi kālātikkameyeva abhibyattāya āyukkhayacakkhādiindriyaparipākasaṅkhātāya pakatiyā dīpitā, tenassime pacchimā dve pakatiniddesāti veditabbā. Tattha yasmā jaraṃ pattassa āyu hāyati, tasmā jarā ‘‘āyuno saṃhānī’’ti phalūpacārena vuttā. Yasmā ca daharakāle suppasannāni sukhumampi attano visayaṃ sukheneva gaṇhanasamatthāni cakkhādīni indriyāni jaraṃ pattassa paripakkāni āluḷitāni avisadāni, oḷārikampi attano visayaṃ gahetuṃ asamatthāni honti. Tasmā ‘‘indriyānaṃ paripāko’’ti phalūpacāreneva vuttā.
ஸா பனேஸா ஏவங் நித்³தி³ட்டா² ஸப்³பா³பி ஜரா பாகடா படிச்ச²ன்னாதி து³விதா⁴ ஹோதி. தத்த² த³ந்தாதீ³ஸு க²ண்டா³தி³பா⁴வத³ஸ்ஸனதோ ரூபத⁴ம்மேஸு ஜரா பாகடஜரா நாம. அரூபத⁴ம்மேஸு பன ஜரா தாதி³ஸஸ்ஸ விகாரஸ்ஸ அத³ஸ்ஸனதோ படிச்ச²ன்னஜரா நாம. தத்த² ய்வாயங் க²ண்டா³தி³பா⁴வோ தி³ஸ்ஸதி, ஸோ தாதி³ஸானங் த³ந்தாதீ³னங் ஸுவிஞ்ஞெய்யத்தா வண்ணோயேவ. தஞ்ச சக்கு²னா தி³ஸ்வா மனொத்³வாரேன சிந்தெத்வா ‘‘இமே த³ந்தா ஜராய பஹடா’’தி ஜரங் ஜானாதி. உத³கட்டா²னே ப³த்³தா⁴னி கோ³ஸிங்கா³தீ³னி ஓலோகெத்வா ஹெட்டா² உத³கஸ்ஸ அத்தி²பா⁴வஜானநங் விய.
Sā panesā evaṃ niddiṭṭhā sabbāpi jarā pākaṭā paṭicchannāti duvidhā hoti. Tattha dantādīsu khaṇḍādibhāvadassanato rūpadhammesu jarā pākaṭajarā nāma. Arūpadhammesu pana jarā tādisassa vikārassa adassanato paṭicchannajarā nāma. Tattha yvāyaṃ khaṇḍādibhāvo dissati, so tādisānaṃ dantādīnaṃ suviññeyyattā vaṇṇoyeva. Tañca cakkhunā disvā manodvārena cintetvā ‘‘ime dantā jarāya pahaṭā’’ti jaraṃ jānāti. Udakaṭṭhāne baddhāni gosiṅgādīni oloketvā heṭṭhā udakassa atthibhāvajānanaṃ viya.
புன அவீசி ஸவீசீதி ஏவம்பி அயங் ஜரா து³விதா⁴ ஹோதி. தத்த² மணிகனகரஜதபவாளசந்த³ஸூரியாதீ³னங் மந்த³த³ஸகாதீ³ஸு பாணீனங் விய ச புப்ப²ப²லபல்லவாதீ³ஸு அபாணீனங் விய ச அந்தரந்தரா வண்ணவிஸேஸாதீ³னங் து³ப்³பி³ஞ்ஞெய்யத்தா ஜரா அவீசிஜரா நாம, நிரந்தரஜராதி அத்தோ². ததோ அஞ்ஞேஸு பன யதா²வுத்தேஸு அந்தரந்தரா வண்ணவிஸேஸாதீ³னங் ஸுவிஞ்ஞெய்யத்தா ஜரா ஸவீசிஜரா நாம.
Puna avīci savīcīti evampi ayaṃ jarā duvidhā hoti. Tattha maṇikanakarajatapavāḷacandasūriyādīnaṃ mandadasakādīsu pāṇīnaṃ viya ca pupphaphalapallavādīsu apāṇīnaṃ viya ca antarantarā vaṇṇavisesādīnaṃ dubbiññeyyattā jarā avīcijarā nāma, nirantarajarāti attho. Tato aññesu pana yathāvuttesu antarantarā vaṇṇavisesādīnaṃ suviññeyyattā jarā savīcijarā nāma.
தத்த² ஸவீசிஜரா உபாதி³ன்னகஅனுபாதி³ன்னகவஸேன ஏவங் தீ³பேதப்³பா³ – த³ஹரகுமாரகானஞ்ஹி பட²மமேவ கீ²ரத³ந்தா நாம உட்ட²ஹந்தி, ந தே தி²ரா. தேஸு பன பதிதேஸு புன த³ந்தா உட்ட²ஹந்தி, தே பட²மமேவ ஸேதா ஹொந்தி, ஜராவாதேன பன பஹடகாலே காளகா ஹொந்தி. கேஸா பன பட²மமேவ தம்பா³பி ஹொந்தி காளகாபி ஸேதகாபி. ச²வி பன ஸலோஹிதகா ஹோதி. வட்³ட⁴ந்தானங் வட்³ட⁴ந்தானங் ஓதா³தானங் ஓதா³தபா⁴வோ, காளகானங் காளகபா⁴வோ பஞ்ஞாயதி. ஜராவாதேன பஹடகாலே ச வலிங் க³ண்ஹாதி. ஸப்³ப³ம்பி ஸஸ்ஸங் வபிதகாலே ஸேதங் ஹோதி, பச்சா² நீலங். ஜராவாதேன பன பஹடகாலே பண்ட³ரங் ஹோதி. அம்ப³ங்குரேனாபி தீ³பேதுங் வட்டதி ஏவ. ஸா பனேஸா க²ந்த⁴பரிபாகலக்க²ணா ஜரா, மரணூபனயனரஸா, யொப்³ப³னவினாஸபச்சுபட்டா²னா. ஸேஸங் ஸப்³ப³த்த² பாகடமேவ. ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி, தே³ஸனாபரியோஸானே அயம்பி ப்³ராஹ்மணோ அரஹத்தே பதிட்டா²ஸி ஸத்³தி⁴ங் அந்தேவாஸிகஸஹஸ்ஸேன. அஞ்ஞேஸஞ்ச அனேகஸஹஸ்ஸானங் த⁴ம்மசக்கு²ங் உத³பாதி³. ஸேஸங் வுத்தஸதி³ஸமேவ.
Tattha savīcijarā upādinnakaanupādinnakavasena evaṃ dīpetabbā – daharakumārakānañhi paṭhamameva khīradantā nāma uṭṭhahanti, na te thirā. Tesu pana patitesu puna dantā uṭṭhahanti, te paṭhamameva setā honti, jarāvātena pana pahaṭakāle kāḷakā honti. Kesā pana paṭhamameva tambāpi honti kāḷakāpi setakāpi. Chavi pana salohitakā hoti. Vaḍḍhantānaṃ vaḍḍhantānaṃ odātānaṃ odātabhāvo, kāḷakānaṃ kāḷakabhāvo paññāyati. Jarāvātena pahaṭakāle ca valiṃ gaṇhāti. Sabbampi sassaṃ vapitakāle setaṃ hoti, pacchā nīlaṃ. Jarāvātena pana pahaṭakāle paṇḍaraṃ hoti. Ambaṅkurenāpi dīpetuṃ vaṭṭati eva. Sā panesā khandhaparipākalakkhaṇā jarā, maraṇūpanayanarasā, yobbanavināsapaccupaṭṭhānā. Sesaṃ sabbattha pākaṭameva. Evaṃ bhagavā idampi suttaṃ arahattanikūṭeneva desesi, desanāpariyosāne ayampi brāhmaṇo arahatte patiṭṭhāsi saddhiṃ antevāsikasahassena. Aññesañca anekasahassānaṃ dhammacakkhuṃ udapādi. Sesaṃ vuttasadisameva.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
புண்ணகமாணவஸுத்தனித்³தே³ஸவண்ணனா நிட்டி²தா.
Puṇṇakamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
3. புண்ணகமாணவபுச்சா² • 3. Puṇṇakamāṇavapucchā
3. புண்ணகமாணவபுச்சா²னித்³தே³ஸோ • 3. Puṇṇakamāṇavapucchāniddeso
