| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
3. புண்ணகஸுத்தவண்ணனா
3. Puṇṇakasuttavaṇṇanā
1050. அனேஜந்தி புண்ணகஸுத்தங். இமம்பி புரிமனயேனேவ மோக⁴ராஜானங் படிக்கி²பித்வா வுத்தங். தத்த² மூலத³ஸ்ஸாவிந்தி அகுஸலமூலாதி³த³ஸ்ஸாவிங். இஸயோதி இஸினாமகா ஜடிலா. யஞ்ஞந்தி தெ³ய்யத⁴ம்மங். அகப்பயிங்ஸூதி பரியேஸந்தி.
1050.Anejanti puṇṇakasuttaṃ. Imampi purimanayeneva mogharājānaṃ paṭikkhipitvā vuttaṃ. Tattha mūladassāvinti akusalamūlādidassāviṃ. Isayoti isināmakā jaṭilā. Yaññanti deyyadhammaṃ. Akappayiṃsūti pariyesanti.
1051. ஆஸீஸமானாதி ரூபாதீ³னி பத்த²யமானா. இத்த²த்தந்தி இத்த²பா⁴வஞ்ச பத்த²யமானா, மனுஸ்ஸாதி³பா⁴வங் இச்ச²ந்தாதி வுத்தங் ஹோதி. ஜரங் ஸிதாதி ஜரங் நிஸ்ஸிதா. ஜராமுகே²ன செத்த² ஸப்³ப³வட்டது³க்க²ங் வுத்தங். தேன வட்டது³க்க²னிஸ்ஸிதா ததோ அபரிமுச்சமானா ஏவ கப்பயிங்ஸூதி தீ³பேதி.
1051.Āsīsamānāti rūpādīni patthayamānā. Itthattanti itthabhāvañca patthayamānā, manussādibhāvaṃ icchantāti vuttaṃ hoti. Jaraṃ sitāti jaraṃ nissitā. Jarāmukhena cettha sabbavaṭṭadukkhaṃ vuttaṃ. Tena vaṭṭadukkhanissitā tato aparimuccamānā eva kappayiṃsūti dīpeti.
1052. கச்சிஸ்ஸு தே ப⁴க³வா யஞ்ஞபதே² அப்பமத்தா, அதாருங் ஜாதிஞ்ச ஜரஞ்ச மாரிஸாதி எத்த² யஞ்ஞோயேவ யஞ்ஞபதோ². இத³ங் வுத்தங் ஹோதி – கச்சி தே யஞ்ஞே அப்பமத்தா ஹுத்வா யஞ்ஞங் கப்பயந்தா வட்டது³க்க²மதரிங்ஸூதி.
1052.Kaccissu te bhagavā yaññapathe appamattā, atāruṃ jātiñca jarañca mārisāti ettha yaññoyeva yaññapatho. Idaṃ vuttaṃ hoti – kacci te yaññe appamattā hutvā yaññaṃ kappayantā vaṭṭadukkhamatariṃsūti.
1053. ஆஸீஸந்தீதி ரூபபடிலாபா⁴த³யோ பத்தெ²ந்தி. தோ²மயந்தீதி ‘‘ஸுயிட்ட²ங் ஸுசி தி³ன்ன’’ந்திஆதி³னா நயேன யஞ்ஞாதீ³னி பஸங்ஸந்தி. அபி⁴ஜப்பந்தீதி ரூபாதி³படிலாபா⁴ய வாசங் பி⁴ந்த³ந்தி. ஜுஹந்தீதி தெ³ந்தி. காமாபி⁴ஜப்பந்தி படிச்ச லாப⁴ந்தி ரூபாதி³படிலாப⁴ங் படிச்ச புனப்புனங் காமே ஏவ அபி⁴ஜப்பந்தி, ‘‘அஹோ வத அம்ஹாகங் ஸியு’’ந்தி வத³ந்தி, தண்ஹஞ்ச தத்த² வட்³டெ⁴ந்தீதி வுத்தங் ஹோதி. யாஜயோகா³தி யாகா³தி⁴முத்தா. ப⁴வராக³ரத்தாதி ஏவமிமேஹி ஆஸீஸனாதீ³ஹி ப⁴வராகே³னேவ ரத்தா, ப⁴வராக³ரத்தா வா ஹுத்வா ஏதானி ஆஸீஸனாதீ³னி கரொந்தா நாதரிங்ஸு ஜாதிஆதி³வட்டது³க்க²ங் ந உத்தரிங்ஸூதி.
1053.Āsīsantīti rūpapaṭilābhādayo patthenti. Thomayantīti ‘‘suyiṭṭhaṃ suci dinna’’ntiādinā nayena yaññādīni pasaṃsanti. Abhijappantīti rūpādipaṭilābhāya vācaṃ bhindanti. Juhantīti denti. Kāmābhijappanti paṭicca lābhanti rūpādipaṭilābhaṃ paṭicca punappunaṃ kāme eva abhijappanti, ‘‘aho vata amhākaṃ siyu’’nti vadanti, taṇhañca tattha vaḍḍhentīti vuttaṃ hoti. Yājayogāti yāgādhimuttā. Bhavarāgarattāti evamimehi āsīsanādīhi bhavarāgeneva rattā, bhavarāgarattā vā hutvā etāni āsīsanādīni karontā nātariṃsu jātiādivaṭṭadukkhaṃ na uttariṃsūti.
1054-5. அத²கோசரஹீதி அத² இதா³னி கோ அஞ்ஞோ அதாரீதி. ஸங்கா²யாதி ஞாணேன வீமங்ஸித்வா. பரோபரானீதி பரானி ச ஓரானி ச, பரத்தபா⁴வஸகத்தபா⁴வாதீ³னி பரானி ச ஓரானி சாதி வுத்தங் ஹோதி. விதூ⁴மோதி காயது³ச்சரிதாதி³தூ⁴மவிரஹிதோ. அனீகோ⁴தி ராகா³தி³ஈக⁴விரஹிதோ . அதாரி ஸோதி ஸோ ஏவரூபோ அரஹா ஜாதிஜரங் அதாரி. ஸேஸமெத்த² பாகடமேவ.
1054-5.Athakocarahīti atha idāni ko añño atārīti. Saṅkhāyāti ñāṇena vīmaṃsitvā. Paroparānīti parāni ca orāni ca, parattabhāvasakattabhāvādīni parāni ca orāni cāti vuttaṃ hoti. Vidhūmoti kāyaduccaritādidhūmavirahito. Anīghoti rāgādiīghavirahito . Atāri soti so evarūpo arahā jātijaraṃ atāri. Sesamettha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே அயம்பி ப்³ராஹ்மணோ அரஹத்தே பதிட்டா²ஸி ஸத்³தி⁴ங் அந்தேவாஸிஸஹஸ்ஸேன, அஞ்ஞேஸஞ்ச அனேகஸதானங் த⁴ம்மசக்கு²ங் உத³பாதி³. ஸேஸங் வுத்தஸதி³ஸமேவாதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsisahassena, aññesañca anekasatānaṃ dhammacakkhuṃ udapādi. Sesaṃ vuttasadisamevāti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய புண்ணகஸுத்தவண்ணனா நிட்டி²தா.
Suttanipāta-aṭṭhakathāya puṇṇakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 3. புண்ணகமாணவபுச்சா² • 3. Puṇṇakamāṇavapucchā
