| Library / Tipiṭaka / ਤਿਪਿਟਕ • Tipiṭaka / ਸੁਤ੍ਤਨਿਪਾਤ-ਅਟ੍ਠਕਥਾ • Suttanipāta-aṭṭhakathā |
੩. ਪੁਣ੍ਣਕਸੁਤ੍ਤવਣ੍ਣਨਾ
3. Puṇṇakasuttavaṇṇanā
੧੦੫੦. ਅਨੇਜਨ੍ਤਿ ਪੁਣ੍ਣਕਸੁਤ੍ਤਂ। ਇਮਮ੍ਪਿ ਪੁਰਿਮਨਯੇਨੇવ ਮੋਘਰਾਜਾਨਂ ਪਟਿਕ੍ਖਿਪਿਤ੍વਾ વੁਤ੍ਤਂ। ਤਤ੍ਥ ਮੂਲਦਸ੍ਸਾવਿਨ੍ਤਿ ਅਕੁਸਲਮੂਲਾਦਿਦਸ੍ਸਾવਿਂ। ਇਸਯੋਤਿ ਇਸਿਨਾਮਕਾ ਜਟਿਲਾ। ਯਞ੍ਞਨ੍ਤਿ ਦੇਯ੍ਯਧਮ੍ਮਂ। ਅਕਪ੍ਪਯਿਂਸੂਤਿ ਪਰਿਯੇਸਨ੍ਤਿ।
1050.Anejanti puṇṇakasuttaṃ. Imampi purimanayeneva mogharājānaṃ paṭikkhipitvā vuttaṃ. Tattha mūladassāvinti akusalamūlādidassāviṃ. Isayoti isināmakā jaṭilā. Yaññanti deyyadhammaṃ. Akappayiṃsūti pariyesanti.
੧੦੫੧. ਆਸੀਸਮਾਨਾਤਿ ਰੂਪਾਦੀਨਿ ਪਤ੍ਥਯਮਾਨਾ। ਇਤ੍ਥਤ੍ਤਨ੍ਤਿ ਇਤ੍ਥਭਾવਞ੍ਚ ਪਤ੍ਥਯਮਾਨਾ, ਮਨੁਸ੍ਸਾਦਿਭਾવਂ ਇਚ੍ਛਨ੍ਤਾਤਿ વੁਤ੍ਤਂ ਹੋਤਿ। ਜਰਂ ਸਿਤਾਤਿ ਜਰਂ ਨਿਸ੍ਸਿਤਾ। ਜਰਾਮੁਖੇਨ ਚੇਤ੍ਥ ਸਬ੍ਬવਟ੍ਟਦੁਕ੍ਖਂ વੁਤ੍ਤਂ। ਤੇਨ વਟ੍ਟਦੁਕ੍ਖਨਿਸ੍ਸਿਤਾ ਤਤੋ ਅਪਰਿਮੁਚ੍ਚਮਾਨਾ ਏવ ਕਪ੍ਪਯਿਂਸੂਤਿ ਦੀਪੇਤਿ।
1051.Āsīsamānāti rūpādīni patthayamānā. Itthattanti itthabhāvañca patthayamānā, manussādibhāvaṃ icchantāti vuttaṃ hoti. Jaraṃ sitāti jaraṃ nissitā. Jarāmukhena cettha sabbavaṭṭadukkhaṃ vuttaṃ. Tena vaṭṭadukkhanissitā tato aparimuccamānā eva kappayiṃsūti dīpeti.
੧੦੫੨. ਕਚ੍ਚਿਸ੍ਸੁ ਤੇ ਭਗવਾ ਯਞ੍ਞਪਥੇ ਅਪ੍ਪਮਤ੍ਤਾ, ਅਤਾਰੁਂ ਜਾਤਿਞ੍ਚ ਜਰਞ੍ਚ ਮਾਰਿਸਾਤਿ ਏਤ੍ਥ ਯਞ੍ਞੋਯੇવ ਯਞ੍ਞਪਥੋ। ਇਦਂ વੁਤ੍ਤਂ ਹੋਤਿ – ਕਚ੍ਚਿ ਤੇ ਯਞ੍ਞੇ ਅਪ੍ਪਮਤ੍ਤਾ ਹੁਤ੍વਾ ਯਞ੍ਞਂ ਕਪ੍ਪਯਨ੍ਤਾ વਟ੍ਟਦੁਕ੍ਖਮਤਰਿਂਸੂਤਿ।
1052.Kaccissu te bhagavā yaññapathe appamattā, atāruṃ jātiñca jarañca mārisāti ettha yaññoyeva yaññapatho. Idaṃ vuttaṃ hoti – kacci te yaññe appamattā hutvā yaññaṃ kappayantā vaṭṭadukkhamatariṃsūti.
੧੦੫੩. ਆਸੀਸਨ੍ਤੀਤਿ ਰੂਪਪਟਿਲਾਭਾਦਯੋ ਪਤ੍ਥੇਨ੍ਤਿ। ਥੋਮਯਨ੍ਤੀਤਿ ‘‘ਸੁਯਿਟ੍ਠਂ ਸੁਚਿ ਦਿਨ੍ਨ’’ਨ੍ਤਿਆਦਿਨਾ ਨਯੇਨ ਯਞ੍ਞਾਦੀਨਿ ਪਸਂਸਨ੍ਤਿ। ਅਭਿਜਪ੍ਪਨ੍ਤੀਤਿ ਰੂਪਾਦਿਪਟਿਲਾਭਾਯ વਾਚਂ ਭਿਨ੍ਦਨ੍ਤਿ। ਜੁਹਨ੍ਤੀਤਿ ਦੇਨ੍ਤਿ। ਕਾਮਾਭਿਜਪ੍ਪਨ੍ਤਿ ਪਟਿਚ੍ਚ ਲਾਭਨ੍ਤਿ ਰੂਪਾਦਿਪਟਿਲਾਭਂ ਪਟਿਚ੍ਚ ਪੁਨਪ੍ਪੁਨਂ ਕਾਮੇ ਏવ ਅਭਿਜਪ੍ਪਨ੍ਤਿ, ‘‘ਅਹੋ વਤ ਅਮ੍ਹਾਕਂ ਸਿਯੁ’’ਨ੍ਤਿ વਦਨ੍ਤਿ, ਤਣ੍ਹਞ੍ਚ ਤਤ੍ਥ વਡ੍ਢੇਨ੍ਤੀਤਿ વੁਤ੍ਤਂ ਹੋਤਿ। ਯਾਜਯੋਗਾਤਿ ਯਾਗਾਧਿਮੁਤ੍ਤਾ। ਭવਰਾਗਰਤ੍ਤਾਤਿ ਏવਮਿਮੇਹਿ ਆਸੀਸਨਾਦੀਹਿ ਭવਰਾਗੇਨੇવ ਰਤ੍ਤਾ, ਭવਰਾਗਰਤ੍ਤਾ વਾ ਹੁਤ੍વਾ ਏਤਾਨਿ ਆਸੀਸਨਾਦੀਨਿ ਕਰੋਨ੍ਤਾ ਨਾਤਰਿਂਸੁ ਜਾਤਿਆਦਿવਟ੍ਟਦੁਕ੍ਖਂ ਨ ਉਤ੍ਤਰਿਂਸੂਤਿ।
1053.Āsīsantīti rūpapaṭilābhādayo patthenti. Thomayantīti ‘‘suyiṭṭhaṃ suci dinna’’ntiādinā nayena yaññādīni pasaṃsanti. Abhijappantīti rūpādipaṭilābhāya vācaṃ bhindanti. Juhantīti denti. Kāmābhijappanti paṭicca lābhanti rūpādipaṭilābhaṃ paṭicca punappunaṃ kāme eva abhijappanti, ‘‘aho vata amhākaṃ siyu’’nti vadanti, taṇhañca tattha vaḍḍhentīti vuttaṃ hoti. Yājayogāti yāgādhimuttā. Bhavarāgarattāti evamimehi āsīsanādīhi bhavarāgeneva rattā, bhavarāgarattā vā hutvā etāni āsīsanādīni karontā nātariṃsu jātiādivaṭṭadukkhaṃ na uttariṃsūti.
੧੦੫੪-੫. ਅਥਕੋਚਰਹੀਤਿ ਅਥ ਇਦਾਨਿ ਕੋ ਅਞ੍ਞੋ ਅਤਾਰੀਤਿ। ਸਙ੍ਖਾਯਾਤਿ ਞਾਣੇਨ વੀਮਂਸਿਤ੍વਾ। ਪਰੋਪਰਾਨੀਤਿ ਪਰਾਨਿ ਚ ਓਰਾਨਿ ਚ, ਪਰਤ੍ਤਭਾવਸਕਤ੍ਤਭਾવਾਦੀਨਿ ਪਰਾਨਿ ਚ ਓਰਾਨਿ ਚਾਤਿ વੁਤ੍ਤਂ ਹੋਤਿ। વਿਧੂਮੋਤਿ ਕਾਯਦੁਚ੍ਚਰਿਤਾਦਿਧੂਮવਿਰਹਿਤੋ। ਅਨੀਘੋਤਿ ਰਾਗਾਦਿਈਘવਿਰਹਿਤੋ । ਅਤਾਰਿ ਸੋਤਿ ਸੋ ਏવਰੂਪੋ ਅਰਹਾ ਜਾਤਿਜਰਂ ਅਤਾਰਿ। ਸੇਸਮੇਤ੍ਥ ਪਾਕਟਮੇવ।
1054-5.Athakocarahīti atha idāni ko añño atārīti. Saṅkhāyāti ñāṇena vīmaṃsitvā. Paroparānīti parāni ca orāni ca, parattabhāvasakattabhāvādīni parāni ca orāni cāti vuttaṃ hoti. Vidhūmoti kāyaduccaritādidhūmavirahito. Anīghoti rāgādiīghavirahito . Atāri soti so evarūpo arahā jātijaraṃ atāri. Sesamettha pākaṭameva.
ਏવਂ ਭਗવਾ ਇਮਮ੍ਪਿ ਸੁਤ੍ਤਂ ਅਰਹਤ੍ਤਨਿਕੂਟੇਨੇવ ਦੇਸੇਸਿ। ਦੇਸਨਾਪਰਿਯੋਸਾਨੇ ਅਯਮ੍ਪਿ ਬ੍ਰਾਹ੍ਮਣੋ ਅਰਹਤ੍ਤੇ ਪਤਿਟ੍ਠਾਸਿ ਸਦ੍ਧਿਂ ਅਨ੍ਤੇવਾਸਿਸਹਸ੍ਸੇਨ, ਅਞ੍ਞੇਸਞ੍ਚ ਅਨੇਕਸਤਾਨਂ ਧਮ੍ਮਚਕ੍ਖੁਂ ਉਦਪਾਦਿ। ਸੇਸਂ વੁਤ੍ਤਸਦਿਸਮੇવਾਤਿ।
Evaṃ bhagavā imampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsisahassena, aññesañca anekasatānaṃ dhammacakkhuṃ udapādi. Sesaṃ vuttasadisamevāti.
ਪਰਮਤ੍ਥਜੋਤਿਕਾਯ ਖੁਦ੍ਦਕ-ਅਟ੍ਠਕਥਾਯ
Paramatthajotikāya khuddaka-aṭṭhakathāya
ਸੁਤ੍ਤਨਿਪਾਤ-ਅਟ੍ਠਕਥਾਯ ਪੁਣ੍ਣਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Suttanipāta-aṭṭhakathāya puṇṇakasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਸੁਤ੍ਤਨਿਪਾਤਪਾਲ਼ਿ • Suttanipātapāḷi / ੩. ਪੁਣ੍ਣਕਮਾਣવਪੁਚ੍ਛਾ • 3. Puṇṇakamāṇavapucchā
