| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. புண்ணகத்தே²ரஅபதா³னவண்ணனா
2. Puṇṇakattheraapadānavaṇṇanā
29. து³தியாபதா³னே பப்³பா⁴ரகூடங் நிஸ்ஸாயாதிஆதி³கங் ஆயஸ்மதோ புண்ணகத்தே²ரஸ்ஸ அபதா³னங். தத்த² ஹிமவந்தே யக்க²ஸேனாபதி ஹுத்வா பரினிப்³பு³தஸ்ஸ பச்சேகபு³த்³த⁴ஸ்ஸ ஆளஹனகரணமேவ நானத்தங். ஸேஸங் பாடா²னுஸாரேன ஸுவிஞ்ஞெய்யமேவ.
29. Dutiyāpadāne pabbhārakūṭaṃ nissāyātiādikaṃ āyasmato puṇṇakattherassa apadānaṃ. Tattha himavante yakkhasenāpati hutvā parinibbutassa paccekabuddhassa āḷahanakaraṇameva nānattaṃ. Sesaṃ pāṭhānusārena suviññeyyameva.
45. ததியாபதா³னே ஹிமவந்தஸ்ஸாவிதூ³ரேதிஆதி³கங் ஆயஸ்மதோ மெத்தகு³த்தே²ரஸ்ஸ அபதா³னங். தத்த² ஹிமவந்தஸமீபே அஸோகபப்³ப³தே ஸோ தாபஸோ ஹுத்வா பண்ணஸாலாயங் வஸந்தோ ஸுமேத⁴ஸம்பு³த்³த⁴ங் தி³ஸ்வா பத்தங் க³ஹெத்வா ஸப்பிபூரணங் விஸேஸோ. ஸேஸங் புஞ்ஞப²லானி ச ஸுவிஞ்ஞெய்யானேவ. அபதா³னகா³தா²னங் அத்தோ² ச பாகடோயேவ.
45. Tatiyāpadāne himavantassāvidūretiādikaṃ āyasmato mettaguttherassa apadānaṃ. Tattha himavantasamīpe asokapabbate so tāpaso hutvā paṇṇasālāyaṃ vasanto sumedhasambuddhaṃ disvā pattaṃ gahetvā sappipūraṇaṃ viseso. Sesaṃ puññaphalāni ca suviññeyyāneva. Apadānagāthānaṃ attho ca pākaṭoyeva.
72. சதுத்தா²பதா³னே க³ங்கா³ பா⁴கீ³ரதீ² நாமாதிஆதி³கங் ஆயஸ்மதோ தோ⁴தகத்தே²ரஸ்ஸ அபதா³னங். தத்ராபி ப்³ராஹ்மணோ ஹுத்வா பா⁴கீ³ரதீ²க³ங்கா³ய தரமானே பி⁴க்கூ² தி³ஸ்வா பஸன்னமானஸோ ஸேதுங் காராபெத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ நிய்யாதி³தபா⁴வோயேவ விஸேஸோ. புஞ்ஞப²லபரிதீ³பனகா³தா²னங் அத்தோ² நயானுஸாரேன ஸுவிஞ்ஞெய்யோவ.
72. Catutthāpadāne gaṅgā bhāgīrathī nāmātiādikaṃ āyasmato dhotakattherassa apadānaṃ. Tatrāpi brāhmaṇo hutvā bhāgīrathīgaṅgāya taramāne bhikkhū disvā pasannamānaso setuṃ kārāpetvā buddhappamukhassa bhikkhusaṅghassa niyyāditabhāvoyeva viseso. Puññaphalaparidīpanagāthānaṃ attho nayānusārena suviññeyyova.
100. பஞ்சமாபதா³னே ஹிமவந்தஸ்ஸாவிதூ³ரேதிஆதி³கங் ஆயஸ்மதோ உபஸிவத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸங் பஹாய இஸிபப்³ப³ஜ்ஜங் பப்³ப³ஜித்வா ஹிமவந்தே பது³முத்தரங் ப⁴க³வந்தங் தி³ஸ்வா திணஸந்த²ரங் ஸந்த²ரித்வா தத்த² நிஸின்னஸ்ஸ ப⁴க³வதோ ஸாலபுப்ப²பூஜங் அகாஸீதி அயங் விஸேஸோ, ஸேஸமுத்தானமேவ.
100. Pañcamāpadāne himavantassāvidūretiādikaṃ āyasmato upasivattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharāvāsaṃ pahāya isipabbajjaṃ pabbajitvā himavante padumuttaraṃ bhagavantaṃ disvā tiṇasantharaṃ santharitvā tattha nisinnassa bhagavato sālapupphapūjaṃ akāsīti ayaṃ viseso, sesamuttānameva.
161. ச²ட்டா²பதா³னே மிக³லுத்³தோ³ புரே ஆஸிந்திஆதி³கங் ஆயஸ்மதோ நந்த³கத்தே²ரஸ்ஸ அபதா³னங். அயங் கிர பது³முத்தரஸ்ஸ ப⁴க³வதோ காலே கரவிகஸகுணோ ஹுத்வா மது⁴ரகூஜிதங் கரொந்தோ ஸத்தா²ரங் பத³க்கி²ணங் அகாஸி. அபரபா⁴கே³ மயூரோ ஹுத்வா அஞ்ஞதரஸ்ஸ பச்சேகபு³த்³த⁴ஸ்ஸ வஸனகு³ஹாத்³வாரே பஸன்னமானஸோ தி³வஸஸ்ஸ திக்க²த்துங் மது⁴ரேன வஸ்ஸிதங் வஸ்ஸி. ஏவங் தத்த² தத்த² ப⁴வே புஞ்ஞானி கத்வா அம்ஹாகங் ப⁴க³வதோ காலே ஸாவத்தி²யங் குலகே³ஹே நிப்³ப³த்தோ நந்த³கோதி லத்³த⁴னாமோ ஸத்து² ஸந்திகே த⁴ம்மங் ஸுத்வா பப்³ப³ஜித்வா விபஸ்ஸனங் வட்³டெ⁴த்வா அரஹத்தங் பாபுணி. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ மிக³லுத்³தோ³ புரே ஆஸிந்திஆதி³மாஹ. தத்த² பச்சேகபு³த்³த⁴ஸ்ஸ மண்ட³பங் கத்வா பது³மபுப்பே²ஹி ச²த³னமேவ விஸேஸோ.
161. Chaṭṭhāpadāne migaluddo pure āsintiādikaṃ āyasmato nandakattherassa apadānaṃ. Ayaṃ kira padumuttarassa bhagavato kāle karavikasakuṇo hutvā madhurakūjitaṃ karonto satthāraṃ padakkhiṇaṃ akāsi. Aparabhāge mayūro hutvā aññatarassa paccekabuddhassa vasanaguhādvāre pasannamānaso divasassa tikkhattuṃ madhurena vassitaṃ vassi. Evaṃ tattha tattha bhave puññāni katvā amhākaṃ bhagavato kāle sāvatthiyaṃ kulagehe nibbatto nandakoti laddhanāmo satthu santike dhammaṃ sutvā pabbajitvā vipassanaṃ vaḍḍhetvā arahattaṃ pāpuṇi. So aparabhāge attano pubbakammaṃ saritvā somanassajāto pubbacaritāpadānaṃ pakāsento migaluddo pure āsintiādimāha. Tattha paccekabuddhassa maṇḍapaṃ katvā padumapupphehi chadanameva viseso.
183. ஸத்தமாபதா³னே பப்³பா⁴ரகூடங் நிஸ்ஸாயாதிஆதி³கங் ஆயஸ்மதோ ஹேமகத்தே²ரஸ்ஸ அபதா³னங். தத்தா²பி இஸிபப்³ப³ஜ்ஜங் பப்³ப³ஜித்வா ஹிமவந்தே வஸந்தோ பியத³ஸ்ஸிங் ப⁴க³வந்தங் உபக³தங் தி³ஸ்வா ரதனமயங் பீட²ங் அத்த²ரித்வா அட்டா²ஸி. தத்த² நிஸின்னஸ்ஸ கும்ப⁴மத்தங் ஜம்பு³ப²லங் ஆஹரித்வா அதா³ஸி. ப⁴க³வா தஸ்ஸ சித்தப்பஸாத³த்தா²ய தங் ப²லங் பரிபு⁴ஞ்ஜி. எத்தகமேவ விஸேஸோ.
183. Sattamāpadāne pabbhārakūṭaṃ nissāyātiādikaṃ āyasmato hemakattherassa apadānaṃ. Tatthāpi isipabbajjaṃ pabbajitvā himavante vasanto piyadassiṃ bhagavantaṃ upagataṃ disvā ratanamayaṃ pīṭhaṃ attharitvā aṭṭhāsi. Tattha nisinnassa kumbhamattaṃ jambuphalaṃ āharitvā adāsi. Bhagavā tassa cittappasādatthāya taṃ phalaṃ paribhuñji. Ettakameva viseso.
224. அட்ட²மாபதா³னே ராஜாஸி விஜயோ நாமாதிஆதி³கங் ஆயஸ்மதோ தோதெ³ய்யத்தே²ரஸ்ஸ அபதா³னங். தத்த² ராஜாஸி விஜயோ நாமாதி த³ஹரகாலதோ பட்டா²ய ஸப்³ப³ஸங்கா³மேஸு ஜினதோ, சதூஹி ஸங்க³ஹவத்தூ²ஹி ஜனங் ரஞ்ஜனதோ அல்லீயனதோ விஜயோ நாம ராஜா அஹோஸீதி அத்தோ². கேதுமதீபுருத்தமேதி கேது வுச்சந்தி த⁴ஜபடாகா. அத² வா நக³ரஸோப⁴னத்தா²ய நக³ரமஜ்ஜே² உஸ்ஸாபிதரதனதோரணானி, தே கேதூ நிச்சங் உஸ்ஸாபிதா ஸோப⁴யமானா அஸ்ஸா அத்தீ²தி கேதுமதீ. பூரேதி த⁴னத⁴ஞ்ஞேஹி ஸப்³ப³ஜனானங் மனந்தி புரங். கேதுமதீ ச ஸா புரஞ்ச ஸெட்ட²ட்டே²ன உத்தமஞ்சேதி கேதுமதீபுருத்தமங், தஸ்மிங் கேதுமதீபுருத்தமே. ஸூரோ விக்கமஸம்பன்னோதி அபீ⁴தோ வீரியஸம்பன்னோ விஜயோ நாம ராஜா அஜ்ஜா²வஸீதி ஸம்ப³ந்தோ⁴. இத்த²ங் பூ⁴தங் புரஞ்ச ஸப்³ப³வத்து²வாஹனஞ்ச ச²ட்³டெ³த்வா ஹிமவந்தங் பவிஸித்வா இஸிபப்³ப³ஜ்ஜங் பப்³ப³ஜித்வா வஸந்தோ ஸுமேத⁴ப⁴க³வந்தங் தி³ஸ்வா ஸோமனஸ்ஸங் உப்பாதெ³த்வா சந்த³னேன பூஜாகரணமேவ விஸேஸோ.
224. Aṭṭhamāpadāne rājāsi vijayo nāmātiādikaṃ āyasmato todeyyattherassa apadānaṃ. Tattha rājāsi vijayo nāmāti daharakālato paṭṭhāya sabbasaṅgāmesu jinato, catūhi saṅgahavatthūhi janaṃ rañjanato allīyanato vijayo nāma rājā ahosīti attho. Ketumatīpuruttameti ketu vuccanti dhajapaṭākā. Atha vā nagarasobhanatthāya nagaramajjhe ussāpitaratanatoraṇāni, te ketū niccaṃ ussāpitā sobhayamānā assā atthīti ketumatī. Pūreti dhanadhaññehi sabbajanānaṃ mananti puraṃ. Ketumatī ca sā purañca seṭṭhaṭṭhena uttamañceti ketumatīpuruttamaṃ, tasmiṃ ketumatīpuruttame. Sūro vikkamasampannoti abhīto vīriyasampanno vijayo nāma rājā ajjhāvasīti sambandho. Itthaṃ bhūtaṃ purañca sabbavatthuvāhanañca chaḍḍetvā himavantaṃ pavisitvā isipabbajjaṃ pabbajitvā vasanto sumedhabhagavantaṃ disvā somanassaṃ uppādetvā candanena pūjākaraṇameva viseso.
276. நவமாபதா³னே நக³ரே ஹங்ஸவதியாதிஆதி³கங் ஆயஸ்மதோ ஜதுகண்ணித்தே²ரஸ்ஸ அபதா³னங் . தத்த² ஸெட்டி²புத்தோ ஹுத்வா ஸுவண்ணபாஸாதே³ வஸனபா⁴வோ ச பஞ்சஹி காமகு³ணேஹி ஸமங்கீ³ ஹுத்வா வஸனபா⁴வோ ச ஸப்³ப³தே³ஸவாஸீனங் ஸப்³ப³ஸிப்பவிஞ்ஞூனஞ்ச ஆக³ந்த்வா ஸேவனபா⁴வோ ச விஸேஸோ.
276. Navamāpadāne nagare haṃsavatiyātiādikaṃ āyasmato jatukaṇṇittherassa apadānaṃ . Tattha seṭṭhiputto hutvā suvaṇṇapāsāde vasanabhāvo ca pañcahi kāmaguṇehi samaṅgī hutvā vasanabhāvo ca sabbadesavāsīnaṃ sabbasippaviññūnañca āgantvā sevanabhāvo ca viseso.
330. த³ஸமாபதா³னே ஹிமவந்தஸ்ஸாவிதூ³ரேதிஆதி³கங் ஆயஸ்மதோ உதே³னத்தே²ரஸ்ஸ அபதா³னங். தத்த² ஹிமவந்தஸமீபே பது³மபப்³ப³தங் நிஸ்ஸாய தாபஸபப்³ப³ஜ்ஜங் பப்³ப³ஜித்வா வஸந்தேன பது³முத்தரஸ்ஸ ப⁴க³வதோ பது³மபுப்ப²ங் க³ஹெத்வா பூஜிதபா⁴வோவ விஸேஸோ. ஸேஸங் ஸப்³ப³த்த² உத்தானமேவாதி.
330. Dasamāpadāne himavantassāvidūretiādikaṃ āyasmato udenattherassa apadānaṃ. Tattha himavantasamīpe padumapabbataṃ nissāya tāpasapabbajjaṃ pabbajitvā vasantena padumuttarassa bhagavato padumapupphaṃ gahetvā pūjitabhāvova viseso. Sesaṃ sabbattha uttānamevāti.
ஏகசத்தாலீஸமவக்³க³வண்ணனா ஸமத்தா.
Ekacattālīsamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
2. புண்ணகத்தே²ரஅபதா³னங் • 2. Puṇṇakattheraapadānaṃ
3. மெத்தகு³த்தே²ரஅபதா³னங் • 3. Mettaguttheraapadānaṃ
4. தோ⁴தகத்தே²ரஅபதா³னங் • 4. Dhotakattheraapadānaṃ
5. உபஸீவத்தே²ரஅபதா³னங் • 5. Upasīvattheraapadānaṃ
6. நந்த³கத்தே²ரஅபதா³னங் • 6. Nandakattheraapadānaṃ
7. ஹேமகத்தே²ரஅபதா³னங் • 7. Hemakattheraapadānaṃ
8. தோதெ³ய்யத்தே²ரஅபதா³னங் • 8. Todeyyattheraapadānaṃ
9. ஜதுகண்ணித்தே²ரஅபதா³னங் • 9. Jatukaṇṇittheraapadānaṃ
10. உதே³னத்தே²ரஅபதா³னங் • 10. Udenattheraapadānaṃ
