| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
புஞ்ஞகிரியவத்தா²தி³கதா²
Puññakiriyavatthādikathā
தானி ஸப்³பா³னிபி த³ஸஹி புஞ்ஞகிரியவத்தூ²ஹி தீ³பேதப்³பா³னி. கத²ங்? தா³னமயங் புஞ்ஞகிரியவத்து², ஸீலமயங்… பா⁴வனாமயங்… அபசிதிஸஹக³தங்… வெய்யாவச்சஸஹக³தங்… பத்தானுப்பதா³னங்… அப்³ப⁴னுமோத³னங்… தே³ஸனாமயங்… ஸவனமயங்… தி³ட்டி²ஜுகம்மங் புஞ்ஞகிரியவத்தூ²தி இமானி த³ஸ புஞ்ஞகிரியவத்தூ²னி நாம. தத்த² தா³னமேவ தா³னமயங். புஞ்ஞகிரியா ச ஸா தேஸங் தேஸங் ஆனிஸங்ஸானங் வத்து² சாதி புஞ்ஞகிரியவத்து². ஸேஸேஸுபி ஏஸேவ நயோ.
Tāni sabbānipi dasahi puññakiriyavatthūhi dīpetabbāni. Kathaṃ? Dānamayaṃ puññakiriyavatthu, sīlamayaṃ… bhāvanāmayaṃ… apacitisahagataṃ… veyyāvaccasahagataṃ… pattānuppadānaṃ… abbhanumodanaṃ… desanāmayaṃ… savanamayaṃ… diṭṭhijukammaṃ puññakiriyavatthūti imāni dasa puññakiriyavatthūni nāma. Tattha dānameva dānamayaṃ. Puññakiriyā ca sā tesaṃ tesaṃ ānisaṃsānaṃ vatthu cāti puññakiriyavatthu. Sesesupi eseva nayo.
தத்த² சீவராதீ³ஸு சதூஸு பச்சயேஸு, ரூபாதீ³ஸு வா ச²ஸு ஆரம்மணேஸு, அன்னாதீ³ஸு வா த³ஸஸு தா³னவத்தூ²ஸு, தங் தங் தெ³ந்தஸ்ஸ தேஸங் தேஸங் உப்பாத³னதோ பட்டா²ய புப்³ப³பா⁴கே³, பரிச்சாக³காலே, பச்சா² ஸோமனஸ்ஸசித்தேன அனுஸ்ஸரணகாலே சாதி தீஸு காலேஸு பவத்தா சேதனா ‘தா³னமயங் புஞ்ஞகிரியவத்து²’ நாம.
Tattha cīvarādīsu catūsu paccayesu, rūpādīsu vā chasu ārammaṇesu, annādīsu vā dasasu dānavatthūsu, taṃ taṃ dentassa tesaṃ tesaṃ uppādanato paṭṭhāya pubbabhāge, pariccāgakāle, pacchā somanassacittena anussaraṇakāle cāti tīsu kālesu pavattā cetanā ‘dānamayaṃ puññakiriyavatthu’ nāma.
பஞ்சஸீலங் அட்ட²ஸீலங் த³ஸஸீலங் ஸமாதி³யந்தஸ்ஸ, ‘பப்³ப³ஜிஸ்ஸாமீ’தி விஹாரங் க³ச்ச²ந்தஸ்ஸ, பப்³ப³ஜந்தஸ்ஸ, ‘மனோரத²ங் மத்த²கங் பாபெத்வா பப்³ப³ஜிதோ வத’ம்ஹி, ‘ஸாது⁴ ஸாதூ⁴’தி ஆவஜ்ஜெந்தஸ்ஸ, பாதிமொக்க²ங் ஸங்வரந்தஸ்ஸ, சீவராத³யோ பச்சயே பச்சவெக்க²ந்தஸ்ஸ, ஆபாத²க³தேஸு ரூபாதீ³ஸு சக்கு²த்³வாராதீ³னி ஸங்வரந்தஸ்ஸ , ஆஜீவங் ஸோதெ⁴ந்தஸ்ஸ ச பவத்தா சேதனா ‘ஸீலமயங் புஞ்ஞகிரியவத்து²’ நாம.
Pañcasīlaṃ aṭṭhasīlaṃ dasasīlaṃ samādiyantassa, ‘pabbajissāmī’ti vihāraṃ gacchantassa, pabbajantassa, ‘manorathaṃ matthakaṃ pāpetvā pabbajito vata’mhi, ‘sādhu sādhū’ti āvajjentassa, pātimokkhaṃ saṃvarantassa, cīvarādayo paccaye paccavekkhantassa, āpāthagatesu rūpādīsu cakkhudvārādīni saṃvarantassa , ājīvaṃ sodhentassa ca pavattā cetanā ‘sīlamayaṃ puññakiriyavatthu’ nāma.
படிஸம்பி⁴தா³யங் வுத்தேன விபஸ்ஸனாமக்³கே³ன சக்கு²ங் அனிச்சதோ து³க்க²தோ அனத்ததோ பா⁴வெந்தஸ்ஸ…பே॰… மனங்… ரூபே…பே॰… த⁴ம்மே… சக்கு²விஞ்ஞாணங்…பே॰… மனோவிஞ்ஞாணங்,… சக்கு²ஸம்ப²ஸ்ஸங்…பே॰… மனோஸம்ப²ஸ்ஸங், சக்கு²ஸம்ப²ஸ்ஸஜங் வேத³னங்…பே॰… மனோஸம்ப²ஸ்ஸஜங் வேத³னங், …பே॰… ரூபஸஞ்ஞங்…பே॰… ஜராமரணங் அனிச்சதோ து³க்க²தோ அனத்ததோ பா⁴வெந்தஸ்ஸ பவத்தா சேதனா, அட்ட²திங்ஸாய வா ஆரம்மணேஸு அப்பனங் அப்பத்தா ஸப்³பா³பி சேதனா ‘பா⁴வனாமயங் புஞ்ஞகிரியவத்து²’ நாம.
Paṭisambhidāyaṃ vuttena vipassanāmaggena cakkhuṃ aniccato dukkhato anattato bhāventassa…pe… manaṃ… rūpe…pe… dhamme… cakkhuviññāṇaṃ…pe… manoviññāṇaṃ,… cakkhusamphassaṃ…pe… manosamphassaṃ, cakkhusamphassajaṃ vedanaṃ…pe… manosamphassajaṃ vedanaṃ, …pe… rūpasaññaṃ…pe… jarāmaraṇaṃ aniccato dukkhato anattato bhāventassa pavattā cetanā, aṭṭhatiṃsāya vā ārammaṇesu appanaṃ appattā sabbāpi cetanā ‘bhāvanāmayaṃ puññakiriyavatthu’ nāma.
மஹல்லகங் பன தி³ஸ்வா பச்சுக்³க³மனபத்தசீவரபடிக்³க³ஹணஅபி⁴வாத³னமக்³க³ஸம்பதா³னாதி³வஸேன ‘அபசிதிஸஹக³தங்’ வேதி³தப்³ப³ங்.
Mahallakaṃ pana disvā paccuggamanapattacīvarapaṭiggahaṇaabhivādanamaggasampadānādivasena ‘apacitisahagataṃ’ veditabbaṃ.
வுட்³ட⁴தரானங் வத்தப்படிபத்திகரணவஸேன கா³மங் பிண்டா³ய பவிட்ட²ங் பி⁴க்கு²ங் தி³ஸ்வா பத்தங் க³ஹெத்வா கா³மே பி⁴க்க²ங் ஸமாத³பெத்வா உபஸங்ஹரணவஸேன, ‘க³ச்ச² பி⁴க்கூ²னங் பத்தங் ஆஹரா’தி ஸுத்வா வேகே³ன க³ந்த்வா பத்தாஹரணாதி³வஸேன ச காயவெய்யாவடிககாலே ‘வெய்யாவச்சஸஹக³தங்’ வேதி³தப்³ப³ங்.
Vuḍḍhatarānaṃ vattappaṭipattikaraṇavasena gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ samādapetvā upasaṃharaṇavasena, ‘gaccha bhikkhūnaṃ pattaṃ āharā’ti sutvā vegena gantvā pattāharaṇādivasena ca kāyaveyyāvaṭikakāle ‘veyyāvaccasahagataṃ’ veditabbaṃ.
தா³னங் த³த்வா க³ந்தா⁴தீ³ஹி பூஜங் கத்வா ‘அஸுகஸ்ஸ நாம பத்தி ஹோதூ’தி வா, ‘ஸப்³ப³ஸத்தானங் ஹோதூ’தி வா பத்திங் த³த³தோ ‘பத்தானுப்பதா³னங்’ வேதி³தப்³ப³ங். கிங் பனேவங் பத்திங் த³த³தோ புஞ்ஞக்க²யோ ஹோதீதி? ந ஹோதி. யதா² பன ஏகங் தீ³பங் ஜாலெத்வா ததோ தீ³பஸஹஸ்ஸங் ஜாலெந்தஸ்ஸ பட²மதீ³போ கீ²ணோதி ந வத்தப்³போ³; புரிமாலோகேன பன ஸத்³தி⁴ங் பச்சி²மாலோகோ ஏகதோ ஹுத்வா அதிமஹா ஹோதி. ஏவமேவ பத்திங் த³த³தோ பரிஹானி நாம நத்தி². வுட்³டி⁴யேவ பன ஹோதீதி வேதி³தப்³போ³.
Dānaṃ datvā gandhādīhi pūjaṃ katvā ‘asukassa nāma patti hotū’ti vā, ‘sabbasattānaṃ hotū’ti vā pattiṃ dadato ‘pattānuppadānaṃ’ veditabbaṃ. Kiṃ panevaṃ pattiṃ dadato puññakkhayo hotīti? Na hoti. Yathā pana ekaṃ dīpaṃ jāletvā tato dīpasahassaṃ jālentassa paṭhamadīpo khīṇoti na vattabbo; purimālokena pana saddhiṃ pacchimāloko ekato hutvā atimahā hoti. Evameva pattiṃ dadato parihāni nāma natthi. Vuḍḍhiyeva pana hotīti veditabbo.
பரேஹி தி³ன்னாய பத்தியா வா அஞ்ஞாய வா புஞ்ஞகிரியாய ‘ஸாது⁴ ஸாதூ⁴’தி அனுமோத³னவஸேன ‘அப்³ப⁴னுமோத³னங்’ வேதி³தப்³ப³ங்.
Parehi dinnāya pattiyā vā aññāya vā puññakiriyāya ‘sādhu sādhū’ti anumodanavasena ‘abbhanumodanaṃ’ veditabbaṃ.
ஏகோ ‘ஏவங் மங் த⁴ம்மகதி²கோதி மங் ஜானிஸ்ஸந்தீ’தி இச்சா²ய ட²த்வா லாப⁴க³ருகோ ஹுத்வா தே³ஸேதி, தங் ந மஹப்ப²லங். ஏகோ அத்தனோ பகு³ணங் த⁴ம்மங் அபச்சாஸீஸமானோ விமுத்தாயதனஸீஸேன பரேஸங் தே³ஸேதி, இத³ங் ‘தே³ஸனாமயங் புஞ்ஞகிரியவத்து²’ நாம.
Eko ‘evaṃ maṃ dhammakathikoti maṃ jānissantī’ti icchāya ṭhatvā lābhagaruko hutvā deseti, taṃ na mahapphalaṃ. Eko attano paguṇaṃ dhammaṃ apaccāsīsamāno vimuttāyatanasīsena paresaṃ deseti, idaṃ ‘desanāmayaṃ puññakiriyavatthu’ nāma.
ஏகோ ஸுணந்தோ ‘இதி மங் ஸத்³தோ⁴தி ஜானிஸ்ஸந்தீ’தி ஸுணாதி, தங் ந மஹப்ப²லங். ஏகோ ‘ஏவங் மே மஹப்ப²லங் ப⁴விஸ்ஸதீ’தி ஹிதப²ரணேன முது³சித்தேன த⁴ம்மங் ஸுணாதி, இத³ங் ‘ஸவனமயங் புஞ்ஞகிரியவத்து²’ நாம.
Eko suṇanto ‘iti maṃ saddhoti jānissantī’ti suṇāti, taṃ na mahapphalaṃ. Eko ‘evaṃ me mahapphalaṃ bhavissatī’ti hitapharaṇena muducittena dhammaṃ suṇāti, idaṃ ‘savanamayaṃ puññakiriyavatthu’ nāma.
தி³ட்டி²ங் உஜுங் கரொந்தஸ்ஸ ‘தி³ட்டி²ஜுகம்மங் புஞ்ஞகிரியவத்து²’ நாம. தீ³க⁴பா⁴ணகா பனாஹு – ‘தி³ட்டி²ஜுகம்மங் ஸப்³பே³ஸங் நியமலக்க²ணங், யங்கிஞ்சி புஞ்ஞங் கரொந்தஸ்ஸ ஹி தி³ட்டி²யா உஜுகபா⁴வேனேவ மஹப்ப²லங் ஹோதீ’தி.
Diṭṭhiṃ ujuṃ karontassa ‘diṭṭhijukammaṃ puññakiriyavatthu’ nāma. Dīghabhāṇakā panāhu – ‘diṭṭhijukammaṃ sabbesaṃ niyamalakkhaṇaṃ, yaṃkiñci puññaṃ karontassa hi diṭṭhiyā ujukabhāveneva mahapphalaṃ hotī’ti.
ஏதேஸு பன புஞ்ஞகிரியவத்தூ²ஸு தா³னமயங் தாவ ‘தா³னங் த³ஸ்ஸாமீ’தி சிந்தெந்தஸ்ஸ உப்பஜ்ஜதி, தா³னங் த³த³தோ உப்பஜ்ஜதி, ‘தி³ன்னங் மே’தி பச்சவெக்க²ந்தஸ்ஸ உப்பஜ்ஜதி. ஏவங் புப்³ப³சேதனங் முஞ்சனசேதனங் அபரசேதனந்தி திஸ்ஸோபி சேதனா ஏகதோ கத்வா ‘தா³னமயங் புஞ்ஞகிரியவத்து²’ நாம ஹோதி. ஸீலமயம்பி ‘ஸீலங் பூரெஸ்ஸாமீ’தி சிந்தெந்தஸ்ஸ உப்பஜ்ஜதி, ஸீலபூரணகாலே உப்பஜ்ஜதி, ‘பூரிதங் மே’தி பச்சவெக்க²ந்தஸ்ஸ உப்பஜ்ஜதி. தா ஸப்³பா³பி ஏகதோ கத்வா ‘ஸீலமயங் புஞ்ஞகிரியவத்து²’ நாம ஹோதி…பே॰… தி³ட்டி²ஜுகம்மம்பி ‘தி³ட்டி²ங் உஜுகங் கரிஸ்ஸாமீ’தி சிந்தெந்தஸ்ஸ உப்பஜ்ஜதி, தி³ட்டி²ங் உஜுங் கரொந்தஸ்ஸ உப்பஜ்ஜதி, ‘தி³ட்டி² மே உஜுகா கதா’தி பச்சவெக்க²ந்தஸ்ஸ உப்பஜ்ஜதி. தா ஸப்³பா³பி ஏகதோ கத்வா ‘தி³ட்டி²ஜுகம்மங் புஞ்ஞகிரியவத்து²’ நாம ஹோதி.
Etesu pana puññakiriyavatthūsu dānamayaṃ tāva ‘dānaṃ dassāmī’ti cintentassa uppajjati, dānaṃ dadato uppajjati, ‘dinnaṃ me’ti paccavekkhantassa uppajjati. Evaṃ pubbacetanaṃ muñcanacetanaṃ aparacetananti tissopi cetanā ekato katvā ‘dānamayaṃ puññakiriyavatthu’ nāma hoti. Sīlamayampi ‘sīlaṃ pūressāmī’ti cintentassa uppajjati, sīlapūraṇakāle uppajjati, ‘pūritaṃ me’ti paccavekkhantassa uppajjati. Tā sabbāpi ekato katvā ‘sīlamayaṃ puññakiriyavatthu’ nāma hoti…pe… diṭṭhijukammampi ‘diṭṭhiṃ ujukaṃ karissāmī’ti cintentassa uppajjati, diṭṭhiṃ ujuṃ karontassa uppajjati, ‘diṭṭhi me ujukā katā’ti paccavekkhantassa uppajjati. Tā sabbāpi ekato katvā ‘diṭṭhijukammaṃ puññakiriyavatthu’ nāma hoti.
ஸுத்தே பன தீணியேவ புஞ்ஞகிரியவத்தூ²னி ஆக³தானி. தேஸு இதரேஸம்பி ஸங்க³ஹோ வேதி³தப்³போ³. அபசிதிவெய்யாவச்சானி ஹி ஸீலமயே ஸங்க³ஹங் க³ச்ச²ந்தி. பத்தானுப்பதா³னஅப்³ப⁴னுமோத³னானி தா³னமயே. தே³ஸனாஸவனதி³ட்டி²ஜுகம்மானி பா⁴வனாமயே. யே பன ‘தி³ட்டி²ஜுகம்மங் ஸப்³பே³ஸங் நியமலக்க²ண’ந்தி வத³ந்தி தேஸங் தங் தீஸுபி ஸங்க³ஹங் க³ச்ச²தி. ஏவமேதானி ஸங்கே²பதோ தீணி ஹுத்வா வித்தா²ரதோ த³ஸ ஹொந்தி.
Sutte pana tīṇiyeva puññakiriyavatthūni āgatāni. Tesu itaresampi saṅgaho veditabbo. Apacitiveyyāvaccāni hi sīlamaye saṅgahaṃ gacchanti. Pattānuppadānaabbhanumodanāni dānamaye. Desanāsavanadiṭṭhijukammāni bhāvanāmaye. Ye pana ‘diṭṭhijukammaṃ sabbesaṃ niyamalakkhaṇa’nti vadanti tesaṃ taṃ tīsupi saṅgahaṃ gacchati. Evametāni saṅkhepato tīṇi hutvā vitthārato dasa honti.
தேஸு ‘தா³னங் த³ஸ்ஸாமீ’தி சிந்தெந்தோ அட்ட²ன்னங் காமாவசரகுஸலசித்தானங் அஞ்ஞதரேனேவ சிந்தேதி; த³த³மானோபி தேஸங்யேவ அஞ்ஞதரேன தே³தி; ‘தா³னங் மே தி³ன்ன’ந்தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘ஸீலங் பூரெஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி; ஸீலங் பூரெந்தோபி தேஸங்யேவ அஞ்ஞதரேன பூரேதி, ‘ஸீலங் மே பூரித’ந்தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘பா⁴வனங் பா⁴வெஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி; பா⁴வெந்தோபி தேஸங்யேவ அஞ்ஞதரேன பா⁴வேதி; ‘பா⁴வனா மே பா⁴விதா’தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி.
Tesu ‘dānaṃ dassāmī’ti cintento aṭṭhannaṃ kāmāvacarakusalacittānaṃ aññatareneva cinteti; dadamānopi tesaṃyeva aññatarena deti; ‘dānaṃ me dinna’nti paccavekkhantopi tesaṃyeva aññatarena paccavekkhati. ‘Sīlaṃ pūressāmī’ti cintentopi tesaṃyeva aññatarena cinteti; sīlaṃ pūrentopi tesaṃyeva aññatarena pūreti, ‘sīlaṃ me pūrita’nti paccavekkhantopi tesaṃyeva aññatarena paccavekkhati. ‘Bhāvanaṃ bhāvessāmī’ti cintentopi tesaṃyeva aññatarena cinteti; bhāventopi tesaṃyeva aññatarena bhāveti; ‘bhāvanā me bhāvitā’ti paccavekkhantopi tesaṃyeva aññatarena paccavekkhati.
‘ஜெட்டா²பசிதிகம்மங் கரிஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி, கரொந்தோபி தேஸங்யேவ அஞ்ஞதரேன கரோதி, ‘கதங் மே’தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘காயவெய்யாவடிககம்மங் கரிஸ்ஸாமீ’தி சிந்தெந்தோபி, கரொந்தோபி, ‘கதங் மே’தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘பத்திங் த³ஸ்ஸாமீ’தி சிந்தெந்தோபி, த³த³ந்தோபி, ‘தி³ன்னங் மே’தி பச்சவெக்க²ந்தோபி, ‘பத்திங் வா ஸேஸகுஸலங் வா அனுமோதி³ஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி; அனுமோத³ந்தோபி தேஸங்யேவ அஞ்ஞதரேன அனுமோத³தி, ‘அனுமோதி³தங் மே’தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘த⁴ம்மங் தே³ஸெஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி, தே³ஸெந்தோபி தேஸங்யேவ அஞ்ஞதரேன தே³ஸேதி, ‘தே³ஸிதோ மே’தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘த⁴ம்மங் ஸொஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி, ஸுணந்தோபி தேஸங்யேவ அஞ்ஞதரேன ஸுணாதி, ‘ஸுதோ மே’தி பச்சவெக்க²ந்தோபி தேஸங்யேவ அஞ்ஞதரேன பச்சவெக்க²தி. ‘தி³ட்டி²ங் உஜுகங் கரிஸ்ஸாமீ’தி சிந்தெந்தோபி தேஸங்யேவ அஞ்ஞதரேன சிந்தேதி, உஜுங் கரொந்தோ பன சதுன்னங் ஞாணஸம்பயுத்தானங் அஞ்ஞதரேன கரோதி, ‘தி³ட்டி² மே உஜுகா கதா’தி பச்சவெக்க²ந்தோ அட்ட²ன்னங் அஞ்ஞதரேன பச்சவெக்க²தி.
‘Jeṭṭhāpacitikammaṃ karissāmī’ti cintentopi tesaṃyeva aññatarena cinteti, karontopi tesaṃyeva aññatarena karoti, ‘kataṃ me’ti paccavekkhantopi tesaṃyeva aññatarena paccavekkhati. ‘Kāyaveyyāvaṭikakammaṃ karissāmī’ti cintentopi, karontopi, ‘kataṃ me’ti paccavekkhantopi tesaṃyeva aññatarena paccavekkhati. ‘Pattiṃ dassāmī’ti cintentopi, dadantopi, ‘dinnaṃ me’ti paccavekkhantopi, ‘pattiṃ vā sesakusalaṃ vā anumodissāmī’ti cintentopi tesaṃyeva aññatarena cinteti; anumodantopi tesaṃyeva aññatarena anumodati, ‘anumoditaṃ me’ti paccavekkhantopi tesaṃyeva aññatarena paccavekkhati. ‘Dhammaṃ desessāmī’ti cintentopi tesaṃyeva aññatarena cinteti, desentopi tesaṃyeva aññatarena deseti, ‘desito me’ti paccavekkhantopi tesaṃyeva aññatarena paccavekkhati. ‘Dhammaṃ sossāmī’ti cintentopi tesaṃyeva aññatarena cinteti, suṇantopi tesaṃyeva aññatarena suṇāti, ‘suto me’ti paccavekkhantopi tesaṃyeva aññatarena paccavekkhati. ‘Diṭṭhiṃ ujukaṃ karissāmī’ti cintentopi tesaṃyeva aññatarena cinteti, ujuṃ karonto pana catunnaṃ ñāṇasampayuttānaṃ aññatarena karoti, ‘diṭṭhi me ujukā katā’ti paccavekkhanto aṭṭhannaṃ aññatarena paccavekkhati.
இமஸ்மிங் டா²னே சத்தாரி அனந்தாநி நாம க³ஹிதானி. சத்தாரி ஹி அனந்தானி – ஆகாஸோ அனந்தோ, சக்கவாளானி அனந்தானி, ஸத்தனிகாயோ அனந்தோ, பு³த்³த⁴ஞ்ஞாணங் அனந்தங். ஆகாஸஸ்ஸ ஹி புரத்தி²மாய தி³ஸாய வா பச்சி²முத்தரத³க்கி²ணாஸு வா எத்தகானி வா யோஜனஸதானி எத்தகானி வா யோஜனஸஹஸ்ஸானீதி பரிச்சே²தோ³ நத்தி². ஸினேருமத்தம்பி அயோகூடங் பத²விங் த்³விதா⁴ கத்வா ஹெட்டா² கி²த்தங் ப⁴ஸ்ஸேதே²வ, நோ பதிட்ட²ங் லபே⁴த², ஏவங் ஆகாஸங் அனந்தங் நாம.
Imasmiṃ ṭhāne cattāri anantāni nāma gahitāni. Cattāri hi anantāni – ākāso ananto, cakkavāḷāni anantāni, sattanikāyo ananto, buddhaññāṇaṃ anantaṃ. Ākāsassa hi puratthimāya disāya vā pacchimuttaradakkhiṇāsu vā ettakāni vā yojanasatāni ettakāni vā yojanasahassānīti paricchedo natthi. Sinerumattampi ayokūṭaṃ pathaviṃ dvidhā katvā heṭṭhā khittaṃ bhassetheva, no patiṭṭhaṃ labhetha, evaṃ ākāsaṃ anantaṃ nāma.
சக்கவாளானம்பி ஸதேஹி வா ஸஹஸ்ஸேஹி வா பரிச்சே²தோ³ நத்தி². ஸசேபி ஹி அகனிட்ட²ப⁴வனே நிப்³ப³த்தா, த³ள்ஹதா²மத⁴னுக்³க³ஹஸ்ஸ லஹுகேன ஸரேன திரியங் தாலச்சா²யங் அதிக்கமனமத்தேன காலேன சக்கவாளஸதஸஹஸ்ஸங் அதிக்கமனஸமத்தே²ன ஜவேன ஸமன்னாக³தா சத்தாரோ மஹாப்³ரஹ்மானோ ‘சக்கவாளபரியந்தங் பஸ்ஸிஸ்ஸாமா’தி தேன ஜவேன தா⁴வெய்யுங், சக்கவாளபரியந்தங் அதி³ஸ்வாவ பரினிப்³பா³யெய்யுங், ஏவங் சக்கவாளானி அனந்தானி நாம.
Cakkavāḷānampi satehi vā sahassehi vā paricchedo natthi. Sacepi hi akaniṭṭhabhavane nibbattā, daḷhathāmadhanuggahassa lahukena sarena tiriyaṃ tālacchāyaṃ atikkamanamattena kālena cakkavāḷasatasahassaṃ atikkamanasamatthena javena samannāgatā cattāro mahābrahmāno ‘cakkavāḷapariyantaṃ passissāmā’ti tena javena dhāveyyuṃ, cakkavāḷapariyantaṃ adisvāva parinibbāyeyyuṃ, evaṃ cakkavāḷāni anantāni nāma.
எத்தகேஸு பன சக்கவாளேஸு உத³கட்ட²கத²லட்ட²கஸத்தானங் பமாணங் நத்தி². ஏவங் ஸத்தனிகாயோ அனந்தோ நாம. ததோபி பு³த்³த⁴ஞாணங் அனந்தமேவ.
Ettakesu pana cakkavāḷesu udakaṭṭhakathalaṭṭhakasattānaṃ pamāṇaṃ natthi. Evaṃ sattanikāyo ananto nāma. Tatopi buddhañāṇaṃ anantameva.
ஏவங் அபரிமாணேஸு சக்கவாளேஸு அபரிமாணானங் ஸத்தானங் காமாவசரஸோமனஸ்ஸஸஹக³தஞாணஸம்பயுத்தஅஸங்கா²ரிககுஸலசித்தானி ஏகஸ்ஸ ப³ஹூனி உப்பஜ்ஜந்தி. ப³ஹூனம்பி ப³ஹூனி உப்பஜ்ஜந்தி. தானி ஸப்³பா³னிபி காமாவசரட்டே²ன ஸோமனஸ்ஸஸஹக³தட்டே²ன ஞாணஸம்பயுத்தட்டே²ன அஸங்கா²ரிகட்டே²ன ஏகத்தங் க³ச்ச²ந்தி. ஏகமேவ ஸோமனஸ்ஸஸஹக³தங் திஹேதுகங் அஸங்கா²ரிகங் மஹாசித்தங் ஹோதி. ததா² ஸஸங்கா²ரிகங் மஹாசித்தங்…பே॰… ததா² உபெக்கா²ஸஹக³தங் ஞாணவிப்பயுத்தங் த்³விஹேதுகங் ஸஸங்கா²ரிகசித்தந்தி. ஏவங் ஸப்³பா³னிபி அபரிமாணேஸு சக்கவாளேஸு அபரிமாணானங் ஸத்தானங் உப்பஜ்ஜமானானி காமாவசரகுஸலசித்தானி ஸம்மாஸம்பு³த்³தோ⁴ மஹாதுலாய துலயமானோ விய, தும்பே³ பக்கி²பித்வா மினமானோ விய, ஸப்³ப³ஞ்ஞுதஞ்ஞாணேன பரிச்சி²ந்தி³த்வா ‘அட்டே²வேதானீ’தி ஸரிக்க²ட்டே²ன அட்டே²வ கொட்டா²ஸே கத்வா த³ஸ்ஸேஸி.
Evaṃ aparimāṇesu cakkavāḷesu aparimāṇānaṃ sattānaṃ kāmāvacarasomanassasahagatañāṇasampayuttaasaṅkhārikakusalacittāni ekassa bahūni uppajjanti. Bahūnampi bahūni uppajjanti. Tāni sabbānipi kāmāvacaraṭṭhena somanassasahagataṭṭhena ñāṇasampayuttaṭṭhena asaṅkhārikaṭṭhena ekattaṃ gacchanti. Ekameva somanassasahagataṃ tihetukaṃ asaṅkhārikaṃ mahācittaṃ hoti. Tathā sasaṅkhārikaṃ mahācittaṃ…pe… tathā upekkhāsahagataṃ ñāṇavippayuttaṃ dvihetukaṃ sasaṅkhārikacittanti. Evaṃ sabbānipi aparimāṇesu cakkavāḷesu aparimāṇānaṃ sattānaṃ uppajjamānāni kāmāvacarakusalacittāni sammāsambuddho mahātulāya tulayamāno viya, tumbe pakkhipitvā minamāno viya, sabbaññutaññāṇena paricchinditvā ‘aṭṭhevetānī’ti sarikkhaṭṭhena aṭṭheva koṭṭhāse katvā dassesi.
புன இமஸ்மிங் டா²னே ச²ப்³பி³தே⁴ன புஞ்ஞாயூஹனங் நாம க³ஹிதங். புஞ்ஞஞ்ஹி அத்தி² ஸயங்காரங் அத்தி² பரங்காரங், அத்தி² ஸாஹத்தி²கங் அத்தி² ஆணத்திகங், அத்தி² ஸம்பஜானகதங் அத்தி² அஸம்பஜானகதந்தி.
Puna imasmiṃ ṭhāne chabbidhena puññāyūhanaṃ nāma gahitaṃ. Puññañhi atthi sayaṃkāraṃ atthi paraṃkāraṃ, atthi sāhatthikaṃ atthi āṇattikaṃ, atthi sampajānakataṃ atthi asampajānakatanti.
தத்த² அத்தனோ த⁴ம்மதாய கதங் ‘ஸயங்காரங்’ நாம. பரங் கரொந்தங் தி³ஸ்வா கதங் ‘பரங்காரங்’ நாம. ஸஹத்தே²ன கதங் ‘ஸாஹத்தி²கங்’ நாம. ஆணாபெத்வா காரிதங் ‘ஆணத்திகங்’ நாம. கம்மஞ்ச ப²லஞ்ச ஸத்³த³ஹித்வா கதங் ‘ஸம்பஜானகதங்’ நாம. கம்மம்பி ப²லம்பி அஜானித்வா கதங் ‘அஸம்பஜானகதங்’ நாம. தேஸு ஸயங்காரங் கரொந்தோபி இமேஸங் அட்ட²ன்னங் குஸலசித்தானங் அஞ்ஞதரேனேவ கரோதி. பரங்காரங் கரொந்தோபி, ஸஹத்தே²ன கரொந்தோபி, ஆணாபெத்வா கரொந்தோபி இமேஸங் அட்ட²ன்னங் குஸலசித்தானங் அஞ்ஞதரேனேவ கரோதி. ஸம்பஜானகரணங் பன சதூஹி ஞாணஸம்பயுத்தேஹி ஹோதி. அஸம்பஜானகரணங் சதூஹி ஞாணவிப்பயுத்தேஹி.
Tattha attano dhammatāya kataṃ ‘sayaṃkāraṃ’ nāma. Paraṃ karontaṃ disvā kataṃ ‘paraṃkāraṃ’ nāma. Sahatthena kataṃ ‘sāhatthikaṃ’ nāma. Āṇāpetvā kāritaṃ ‘āṇattikaṃ’ nāma. Kammañca phalañca saddahitvā kataṃ ‘sampajānakataṃ’ nāma. Kammampi phalampi ajānitvā kataṃ ‘asampajānakataṃ’ nāma. Tesu sayaṃkāraṃ karontopi imesaṃ aṭṭhannaṃ kusalacittānaṃ aññatareneva karoti. Paraṃkāraṃ karontopi, sahatthena karontopi, āṇāpetvā karontopi imesaṃ aṭṭhannaṃ kusalacittānaṃ aññatareneva karoti. Sampajānakaraṇaṃ pana catūhi ñāṇasampayuttehi hoti. Asampajānakaraṇaṃ catūhi ñāṇavippayuttehi.
அபராபி இமஸ்மிங் டா²னே சதஸ்ஸோ த³க்கி²ணாவிஸுத்³தி⁴யோ க³ஹிதா – பச்சயானங் த⁴ம்மிகதா, சேதனாமஹத்தங், வத்து²ஸம்பத்தி, கு³ணாதிரேகதாதி. தத்த² த⁴ம்மேன ஸமேன உப்பன்னா பச்சயா ‘த⁴ம்மிகா’ நாம. ஸத்³த³ஹித்வா ஓகப்பெத்வா த³த³தோ பன ‘சேதனாமஹத்தங்’ நாம ஹோதி. கீ²ணாஸவபா⁴வோ ‘வத்து²ஸம்பத்தி’ நாம. கீ²ணாஸவஸ்ஸேவ நிரோதா⁴ வுட்டி²தபா⁴வோ ‘கு³ணாதிரேகதா’ நாம. இமானி சத்தாரி ஸமோதா⁴னெத்வா தா³துங் ஸக்கொந்தஸ்ஸ காமாவசரங் குஸலங் இமஸ்மிங்யேவ அத்தபா⁴வே விபாகங் தே³தி. புண்ணகஸெட்டி²காகவலியஸுமனமாலாகாராதீ³னங் (த⁴॰ ப॰ அட்ட²॰ 2.225 புண்ணதா³ஸீவத்து²) (த⁴॰ ப॰ அட்ட²॰ 1.67 ஸுமனமாலாகாரவத்து²) விய.
Aparāpi imasmiṃ ṭhāne catasso dakkhiṇāvisuddhiyo gahitā – paccayānaṃ dhammikatā, cetanāmahattaṃ, vatthusampatti, guṇātirekatāti. Tattha dhammena samena uppannā paccayā ‘dhammikā’ nāma. Saddahitvā okappetvā dadato pana ‘cetanāmahattaṃ’ nāma hoti. Khīṇāsavabhāvo ‘vatthusampatti’ nāma. Khīṇāsavasseva nirodhā vuṭṭhitabhāvo ‘guṇātirekatā’ nāma. Imāni cattāri samodhānetvā dātuṃ sakkontassa kāmāvacaraṃ kusalaṃ imasmiṃyeva attabhāve vipākaṃ deti. Puṇṇakaseṭṭhikākavaliyasumanamālākārādīnaṃ (dha. pa. aṭṭha. 2.225 puṇṇadāsīvatthu) (dha. pa. aṭṭha. 1.67 sumanamālākāravatthu) viya.
ஸங்கே²பதோ பனேதங் ஸப்³ப³ம்பி காமாவசரகுஸலசித்தங் ‘சித்த’ந்தி கரித்வா சித்தவிசித்தட்டே²ன ஏகமேவ ஹோதி. வேத³னாவஸேன ஸோமனஸ்ஸஸஹக³தங் உபெக்கா²ஸஹக³தந்தி து³வித⁴ங் ஹோதி. ஞாணவிப⁴த்திதே³ஸனாவஸேன சதுப்³பி³த⁴ங் ஹோதி. ஸோமனஸ்ஸஸஹக³தங் ஞாணஸம்பயுத்தங் அஸங்கா²ரிகங் மஹாசித்தஞ்ஹி உபெக்கா²ஸஹக³தங் ஞாணஸம்பயுத்தங் அஸங்கா²ரிகங் மஹாசித்தஞ்ச ஞாணஸம்பயுத்தட்டே²ன அஸங்கா²ரிகட்டே²ன ச ஏகமேவ ஹோதி. ததா² ஞாணஸம்பயுத்தங் ஸஸங்கா²ரிகங், ஞாணவிப்பயுத்தங் அஸங்கா²ரிகங், ஞாணவிப்பயுத்தங் ஸஸங்கா²ரிகஞ்சாதி. ஏவங் ஞாணவிப⁴த்திதே³ஸனாவஸேன சதுப்³பி³தே⁴ பனேதஸ்மிங் அஸங்கா²ரஸஸங்கா²ரவிப⁴த்திதோ சத்தாரி அஸங்கா²ரிகானி சத்தாரி ஸஸங்கா²ரிகானீதி அட்டே²வ குஸலசித்தானி ஹொந்தி. தானி யாதா²வதோ ஞத்வா ப⁴க³வா ஸப்³ப³ஞ்ஞூ க³ணீவரோ முனிஸெட்டோ² ஆசிக்க²தி தே³ஸேதி பஞ்ஞபேதி பட்ட²பேதி விவரதி விப⁴ஜதி உத்தானீகரோதீதி.
Saṅkhepato panetaṃ sabbampi kāmāvacarakusalacittaṃ ‘citta’nti karitvā cittavicittaṭṭhena ekameva hoti. Vedanāvasena somanassasahagataṃ upekkhāsahagatanti duvidhaṃ hoti. Ñāṇavibhattidesanāvasena catubbidhaṃ hoti. Somanassasahagataṃ ñāṇasampayuttaṃ asaṅkhārikaṃ mahācittañhi upekkhāsahagataṃ ñāṇasampayuttaṃ asaṅkhārikaṃ mahācittañca ñāṇasampayuttaṭṭhena asaṅkhārikaṭṭhena ca ekameva hoti. Tathā ñāṇasampayuttaṃ sasaṅkhārikaṃ, ñāṇavippayuttaṃ asaṅkhārikaṃ, ñāṇavippayuttaṃ sasaṅkhārikañcāti. Evaṃ ñāṇavibhattidesanāvasena catubbidhe panetasmiṃ asaṅkhārasasaṅkhāravibhattito cattāri asaṅkhārikāni cattāri sasaṅkhārikānīti aṭṭheva kusalacittāni honti. Tāni yāthāvato ñatvā bhagavā sabbaññū gaṇīvaro muniseṭṭho ācikkhati deseti paññapeti paṭṭhapeti vivarati vibhajati uttānīkarotīti.
அட்ட²ஸாலினியா த⁴ம்மஸங்க³ஹட்ட²கதா²ய
Aṭṭhasāliniyā dhammasaṅgahaṭṭhakathāya
காமாவசரகுஸலனித்³தே³ஸோ ஸமத்தோ.
Kāmāvacarakusalaniddeso samatto.
