| Library / Tipiṭaka / তিপিটক • Tipiṭaka / ধম্মসঙ্গণি-অট্ঠকথা • Dhammasaṅgaṇi-aṭṭhakathā |
পুঞ্ঞকিরিযৰত্থাদিকথা
Puññakiriyavatthādikathā
তানি সব্বানিপি দসহি পুঞ্ঞকিরিযৰত্থূহি দীপেতব্বানি। কথং? দানমযং পুঞ্ঞকিরিযৰত্থু, সীলমযং… ভাৰনামযং… অপচিতিসহগতং… ৰেয্যাৰচ্চসহগতং… পত্তানুপ্পদানং… অব্ভনুমোদনং… দেসনামযং… সৰনমযং… দিট্ঠিজুকম্মং পুঞ্ঞকিরিযৰত্থূতি ইমানি দস পুঞ্ঞকিরিযৰত্থূনি নাম। তত্থ দানমেৰ দানমযং। পুঞ্ঞকিরিযা চ সা তেসং তেসং আনিসংসানং ৰত্থু চাতি পুঞ্ঞকিরিযৰত্থু। সেসেসুপি এসেৰ নযো।
Tāni sabbānipi dasahi puññakiriyavatthūhi dīpetabbāni. Kathaṃ? Dānamayaṃ puññakiriyavatthu, sīlamayaṃ… bhāvanāmayaṃ… apacitisahagataṃ… veyyāvaccasahagataṃ… pattānuppadānaṃ… abbhanumodanaṃ… desanāmayaṃ… savanamayaṃ… diṭṭhijukammaṃ puññakiriyavatthūti imāni dasa puññakiriyavatthūni nāma. Tattha dānameva dānamayaṃ. Puññakiriyā ca sā tesaṃ tesaṃ ānisaṃsānaṃ vatthu cāti puññakiriyavatthu. Sesesupi eseva nayo.
তত্থ চীৰরাদীসু চতূসু পচ্চযেসু, রূপাদীসু ৰা ছসু আরম্মণেসু, অন্নাদীসু ৰা দসসু দানৰত্থূসু, তং তং দেন্তস্স তেসং তেসং উপ্পাদনতো পট্ঠায পুব্বভাগে, পরিচ্চাগকালে, পচ্ছা সোমনস্সচিত্তেন অনুস্সরণকালে চাতি তীসু কালেসু পৰত্তা চেতনা ‘দানমযং পুঞ্ঞকিরিযৰত্থু’ নাম।
Tattha cīvarādīsu catūsu paccayesu, rūpādīsu vā chasu ārammaṇesu, annādīsu vā dasasu dānavatthūsu, taṃ taṃ dentassa tesaṃ tesaṃ uppādanato paṭṭhāya pubbabhāge, pariccāgakāle, pacchā somanassacittena anussaraṇakāle cāti tīsu kālesu pavattā cetanā ‘dānamayaṃ puññakiriyavatthu’ nāma.
পঞ্চসীলং অট্ঠসীলং দসসীলং সমাদিযন্তস্স, ‘পব্বজিস্সামী’তি ৰিহারং গচ্ছন্তস্স, পব্বজন্তস্স, ‘মনোরথং মত্থকং পাপেত্ৰা পব্বজিতো ৰত’ম্হি, ‘সাধু সাধূ’তি আৰজ্জেন্তস্স, পাতিমোক্খং সংৰরন্তস্স, চীৰরাদযো পচ্চযে পচ্চৰেক্খন্তস্স, আপাথগতেসু রূপাদীসু চক্খুদ্ৰারাদীনি সংৰরন্তস্স , আজীৰং সোধেন্তস্স চ পৰত্তা চেতনা ‘সীলমযং পুঞ্ঞকিরিযৰত্থু’ নাম।
Pañcasīlaṃ aṭṭhasīlaṃ dasasīlaṃ samādiyantassa, ‘pabbajissāmī’ti vihāraṃ gacchantassa, pabbajantassa, ‘manorathaṃ matthakaṃ pāpetvā pabbajito vata’mhi, ‘sādhu sādhū’ti āvajjentassa, pātimokkhaṃ saṃvarantassa, cīvarādayo paccaye paccavekkhantassa, āpāthagatesu rūpādīsu cakkhudvārādīni saṃvarantassa , ājīvaṃ sodhentassa ca pavattā cetanā ‘sīlamayaṃ puññakiriyavatthu’ nāma.
পটিসম্ভিদাযং ৰুত্তেন ৰিপস্সনামগ্গেন চক্খুং অনিচ্চতো দুক্খতো অনত্ততো ভাৰেন্তস্স…পে॰… মনং… রূপে…পে॰… ধম্মে… চক্খুৰিঞ্ঞাণং…পে॰… মনোৰিঞ্ঞাণং,… চক্খুসম্ফস্সং…পে॰… মনোসম্ফস্সং, চক্খুসম্ফস্সজং ৰেদনং…পে॰… মনোসম্ফস্সজং ৰেদনং, …পে॰… রূপসঞ্ঞং…পে॰… জরামরণং অনিচ্চতো দুক্খতো অনত্ততো ভাৰেন্তস্স পৰত্তা চেতনা, অট্ঠতিংসায ৰা আরম্মণেসু অপ্পনং অপ্পত্তা সব্বাপি চেতনা ‘ভাৰনামযং পুঞ্ঞকিরিযৰত্থু’ নাম।
Paṭisambhidāyaṃ vuttena vipassanāmaggena cakkhuṃ aniccato dukkhato anattato bhāventassa…pe… manaṃ… rūpe…pe… dhamme… cakkhuviññāṇaṃ…pe… manoviññāṇaṃ,… cakkhusamphassaṃ…pe… manosamphassaṃ, cakkhusamphassajaṃ vedanaṃ…pe… manosamphassajaṃ vedanaṃ, …pe… rūpasaññaṃ…pe… jarāmaraṇaṃ aniccato dukkhato anattato bhāventassa pavattā cetanā, aṭṭhatiṃsāya vā ārammaṇesu appanaṃ appattā sabbāpi cetanā ‘bhāvanāmayaṃ puññakiriyavatthu’ nāma.
মহল্লকং পন দিস্ৰা পচ্চুগ্গমনপত্তচীৰরপটিগ্গহণঅভিৰাদনমগ্গসম্পদানাদিৰসেন ‘অপচিতিসহগতং’ ৰেদিতব্বং।
Mahallakaṃ pana disvā paccuggamanapattacīvarapaṭiggahaṇaabhivādanamaggasampadānādivasena ‘apacitisahagataṃ’ veditabbaṃ.
ৰুড্ঢতরানং ৰত্তপ্পটিপত্তিকরণৰসেন গামং পিণ্ডায পৰিট্ঠং ভিক্খুং দিস্ৰা পত্তং গহেত্ৰা গামে ভিক্খং সমাদপেত্ৰা উপসংহরণৰসেন, ‘গচ্ছ ভিক্খূনং পত্তং আহরা’তি সুত্ৰা ৰেগেন গন্ত্ৰা পত্তাহরণাদিৰসেন চ কাযৰেয্যাৰটিককালে ‘ৰেয্যাৰচ্চসহগতং’ ৰেদিতব্বং।
Vuḍḍhatarānaṃ vattappaṭipattikaraṇavasena gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ samādapetvā upasaṃharaṇavasena, ‘gaccha bhikkhūnaṃ pattaṃ āharā’ti sutvā vegena gantvā pattāharaṇādivasena ca kāyaveyyāvaṭikakāle ‘veyyāvaccasahagataṃ’ veditabbaṃ.
দানং দত্ৰা গন্ধাদীহি পূজং কত্ৰা ‘অসুকস্স নাম পত্তি হোতূ’তি ৰা, ‘সব্বসত্তানং হোতূ’তি ৰা পত্তিং দদতো ‘পত্তানুপ্পদানং’ ৰেদিতব্বং। কিং পনেৰং পত্তিং দদতো পুঞ্ঞক্খযো হোতীতি? ন হোতি। যথা পন একং দীপং জালেত্ৰা ততো দীপসহস্সং জালেন্তস্স পঠমদীপো খীণোতি ন ৰত্তব্বো; পুরিমালোকেন পন সদ্ধিং পচ্ছিমালোকো একতো হুত্ৰা অতিমহা হোতি। এৰমেৰ পত্তিং দদতো পরিহানি নাম নত্থি। ৰুড্ঢিযেৰ পন হোতীতি ৰেদিতব্বো।
Dānaṃ datvā gandhādīhi pūjaṃ katvā ‘asukassa nāma patti hotū’ti vā, ‘sabbasattānaṃ hotū’ti vā pattiṃ dadato ‘pattānuppadānaṃ’ veditabbaṃ. Kiṃ panevaṃ pattiṃ dadato puññakkhayo hotīti? Na hoti. Yathā pana ekaṃ dīpaṃ jāletvā tato dīpasahassaṃ jālentassa paṭhamadīpo khīṇoti na vattabbo; purimālokena pana saddhiṃ pacchimāloko ekato hutvā atimahā hoti. Evameva pattiṃ dadato parihāni nāma natthi. Vuḍḍhiyeva pana hotīti veditabbo.
পরেহি দিন্নায পত্তিযা ৰা অঞ্ঞায ৰা পুঞ্ঞকিরিযায ‘সাধু সাধূ’তি অনুমোদনৰসেন ‘অব্ভনুমোদনং’ ৰেদিতব্বং।
Parehi dinnāya pattiyā vā aññāya vā puññakiriyāya ‘sādhu sādhū’ti anumodanavasena ‘abbhanumodanaṃ’ veditabbaṃ.
একো ‘এৰং মং ধম্মকথিকোতি মং জানিস্সন্তী’তি ইচ্ছায ঠত্ৰা লাভগরুকো হুত্ৰা দেসেতি, তং ন মহপ্ফলং। একো অত্তনো পগুণং ধম্মং অপচ্চাসীসমানো ৰিমুত্তাযতনসীসেন পরেসং দেসেতি, ইদং ‘দেসনামযং পুঞ্ঞকিরিযৰত্থু’ নাম।
Eko ‘evaṃ maṃ dhammakathikoti maṃ jānissantī’ti icchāya ṭhatvā lābhagaruko hutvā deseti, taṃ na mahapphalaṃ. Eko attano paguṇaṃ dhammaṃ apaccāsīsamāno vimuttāyatanasīsena paresaṃ deseti, idaṃ ‘desanāmayaṃ puññakiriyavatthu’ nāma.
একো সুণন্তো ‘ইতি মং সদ্ধোতি জানিস্সন্তী’তি সুণাতি, তং ন মহপ্ফলং। একো ‘এৰং মে মহপ্ফলং ভৰিস্সতী’তি হিতফরণেন মুদুচিত্তেন ধম্মং সুণাতি, ইদং ‘সৰনমযং পুঞ্ঞকিরিযৰত্থু’ নাম।
Eko suṇanto ‘iti maṃ saddhoti jānissantī’ti suṇāti, taṃ na mahapphalaṃ. Eko ‘evaṃ me mahapphalaṃ bhavissatī’ti hitapharaṇena muducittena dhammaṃ suṇāti, idaṃ ‘savanamayaṃ puññakiriyavatthu’ nāma.
দিট্ঠিং উজুং করোন্তস্স ‘দিট্ঠিজুকম্মং পুঞ্ঞকিরিযৰত্থু’ নাম। দীঘভাণকা পনাহু – ‘দিট্ঠিজুকম্মং সব্বেসং নিযমলক্খণং, যংকিঞ্চি পুঞ্ঞং করোন্তস্স হি দিট্ঠিযা উজুকভাৰেনেৰ মহপ্ফলং হোতী’তি।
Diṭṭhiṃ ujuṃ karontassa ‘diṭṭhijukammaṃ puññakiriyavatthu’ nāma. Dīghabhāṇakā panāhu – ‘diṭṭhijukammaṃ sabbesaṃ niyamalakkhaṇaṃ, yaṃkiñci puññaṃ karontassa hi diṭṭhiyā ujukabhāveneva mahapphalaṃ hotī’ti.
এতেসু পন পুঞ্ঞকিরিযৰত্থূসু দানমযং তাৰ ‘দানং দস্সামী’তি চিন্তেন্তস্স উপ্পজ্জতি, দানং দদতো উপ্পজ্জতি, ‘দিন্নং মে’তি পচ্চৰেক্খন্তস্স উপ্পজ্জতি। এৰং পুব্বচেতনং মুঞ্চনচেতনং অপরচেতনন্তি তিস্সোপি চেতনা একতো কত্ৰা ‘দানমযং পুঞ্ঞকিরিযৰত্থু’ নাম হোতি। সীলমযম্পি ‘সীলং পূরেস্সামী’তি চিন্তেন্তস্স উপ্পজ্জতি, সীলপূরণকালে উপ্পজ্জতি, ‘পূরিতং মে’তি পচ্চৰেক্খন্তস্স উপ্পজ্জতি। তা সব্বাপি একতো কত্ৰা ‘সীলমযং পুঞ্ঞকিরিযৰত্থু’ নাম হোতি…পে॰… দিট্ঠিজুকম্মম্পি ‘দিট্ঠিং উজুকং করিস্সামী’তি চিন্তেন্তস্স উপ্পজ্জতি, দিট্ঠিং উজুং করোন্তস্স উপ্পজ্জতি, ‘দিট্ঠি মে উজুকা কতা’তি পচ্চৰেক্খন্তস্স উপ্পজ্জতি। তা সব্বাপি একতো কত্ৰা ‘দিট্ঠিজুকম্মং পুঞ্ঞকিরিযৰত্থু’ নাম হোতি।
Etesu pana puññakiriyavatthūsu dānamayaṃ tāva ‘dānaṃ dassāmī’ti cintentassa uppajjati, dānaṃ dadato uppajjati, ‘dinnaṃ me’ti paccavekkhantassa uppajjati. Evaṃ pubbacetanaṃ muñcanacetanaṃ aparacetananti tissopi cetanā ekato katvā ‘dānamayaṃ puññakiriyavatthu’ nāma hoti. Sīlamayampi ‘sīlaṃ pūressāmī’ti cintentassa uppajjati, sīlapūraṇakāle uppajjati, ‘pūritaṃ me’ti paccavekkhantassa uppajjati. Tā sabbāpi ekato katvā ‘sīlamayaṃ puññakiriyavatthu’ nāma hoti…pe… diṭṭhijukammampi ‘diṭṭhiṃ ujukaṃ karissāmī’ti cintentassa uppajjati, diṭṭhiṃ ujuṃ karontassa uppajjati, ‘diṭṭhi me ujukā katā’ti paccavekkhantassa uppajjati. Tā sabbāpi ekato katvā ‘diṭṭhijukammaṃ puññakiriyavatthu’ nāma hoti.
সুত্তে পন তীণিযেৰ পুঞ্ঞকিরিযৰত্থূনি আগতানি। তেসু ইতরেসম্পি সঙ্গহো ৰেদিতব্বো। অপচিতিৰেয্যাৰচ্চানি হি সীলমযে সঙ্গহং গচ্ছন্তি। পত্তানুপ্পদানঅব্ভনুমোদনানি দানমযে। দেসনাসৰনদিট্ঠিজুকম্মানি ভাৰনামযে। যে পন ‘দিট্ঠিজুকম্মং সব্বেসং নিযমলক্খণ’ন্তি ৰদন্তি তেসং তং তীসুপি সঙ্গহং গচ্ছতি। এৰমেতানি সঙ্খেপতো তীণি হুত্ৰা ৰিত্থারতো দস হোন্তি।
Sutte pana tīṇiyeva puññakiriyavatthūni āgatāni. Tesu itaresampi saṅgaho veditabbo. Apacitiveyyāvaccāni hi sīlamaye saṅgahaṃ gacchanti. Pattānuppadānaabbhanumodanāni dānamaye. Desanāsavanadiṭṭhijukammāni bhāvanāmaye. Ye pana ‘diṭṭhijukammaṃ sabbesaṃ niyamalakkhaṇa’nti vadanti tesaṃ taṃ tīsupi saṅgahaṃ gacchati. Evametāni saṅkhepato tīṇi hutvā vitthārato dasa honti.
তেসু ‘দানং দস্সামী’তি চিন্তেন্তো অট্ঠন্নং কামাৰচরকুসলচিত্তানং অঞ্ঞতরেনেৰ চিন্তেতি; দদমানোপি তেসংযেৰ অঞ্ঞতরেন দেতি; ‘দানং মে দিন্ন’ন্তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘সীলং পূরেস্সামী’তি চিন্তেন্তোপি তেসংযেৰ অঞ্ঞতরেন চিন্তেতি; সীলং পূরেন্তোপি তেসংযেৰ অঞ্ঞতরেন পূরেতি, ‘সীলং মে পূরিত’ন্তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘ভাৰনং ভাৰেস্সামী’তি চিন্তেন্তোপি তেসংযেৰ অঞ্ঞতরেন চিন্তেতি; ভাৰেন্তোপি তেসংযেৰ অঞ্ঞতরেন ভাৰেতি; ‘ভাৰনা মে ভাৰিতা’তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি।
Tesu ‘dānaṃ dassāmī’ti cintento aṭṭhannaṃ kāmāvacarakusalacittānaṃ aññatareneva cinteti; dadamānopi tesaṃyeva aññatarena deti; ‘dānaṃ me dinna’nti paccavekkhantopi tesaṃyeva aññatarena paccavekkhati. ‘Sīlaṃ pūressāmī’ti cintentopi tesaṃyeva aññatarena cinteti; sīlaṃ pūrentopi tesaṃyeva aññatarena pūreti, ‘sīlaṃ me pūrita’nti paccavekkhantopi tesaṃyeva aññatarena paccavekkhati. ‘Bhāvanaṃ bhāvessāmī’ti cintentopi tesaṃyeva aññatarena cinteti; bhāventopi tesaṃyeva aññatarena bhāveti; ‘bhāvanā me bhāvitā’ti paccavekkhantopi tesaṃyeva aññatarena paccavekkhati.
‘জেট্ঠাপচিতিকম্মং করিস্সামী’তি চিন্তেন্তোপি তেসংযেৰ অঞ্ঞতরেন চিন্তেতি, করোন্তোপি তেসংযেৰ অঞ্ঞতরেন করোতি, ‘কতং মে’তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘কাযৰেয্যাৰটিককম্মং করিস্সামী’তি চিন্তেন্তোপি, করোন্তোপি, ‘কতং মে’তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘পত্তিং দস্সামী’তি চিন্তেন্তোপি, দদন্তোপি, ‘দিন্নং মে’তি পচ্চৰেক্খন্তোপি, ‘পত্তিং ৰা সেসকুসলং ৰা অনুমোদিস্সামী’তি চিন্তেন্তোপি তেসংযেৰ অঞ্ঞতরেন চিন্তেতি; অনুমোদন্তোপি তেসংযেৰ অঞ্ঞতরেন অনুমোদতি, ‘অনুমোদিতং মে’তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘ধম্মং দেসেস্সামী’তি চিন্তেন্তোপি তেসংযেৰ অঞ্ঞতরেন চিন্তেতি, দেসেন্তোপি তেসংযেৰ অঞ্ঞতরেন দেসেতি, ‘দেসিতো মে’তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘ধম্মং সোস্সামী’তি চিন্তেন্তোপি তেসংযেৰ অঞ্ঞতরেন চিন্তেতি, সুণন্তোপি তেসংযেৰ অঞ্ঞতরেন সুণাতি, ‘সুতো মে’তি পচ্চৰেক্খন্তোপি তেসংযেৰ অঞ্ঞতরেন পচ্চৰেক্খতি। ‘দিট্ঠিং উজুকং করিস্সামী’তি চিন্তেন্তোপি তেসংযেৰ অঞ্ঞতরেন চিন্তেতি, উজুং করোন্তো পন চতুন্নং ঞাণসম্পযুত্তানং অঞ্ঞতরেন করোতি, ‘দিট্ঠি মে উজুকা কতা’তি পচ্চৰেক্খন্তো অট্ঠন্নং অঞ্ঞতরেন পচ্চৰেক্খতি।
‘Jeṭṭhāpacitikammaṃ karissāmī’ti cintentopi tesaṃyeva aññatarena cinteti, karontopi tesaṃyeva aññatarena karoti, ‘kataṃ me’ti paccavekkhantopi tesaṃyeva aññatarena paccavekkhati. ‘Kāyaveyyāvaṭikakammaṃ karissāmī’ti cintentopi, karontopi, ‘kataṃ me’ti paccavekkhantopi tesaṃyeva aññatarena paccavekkhati. ‘Pattiṃ dassāmī’ti cintentopi, dadantopi, ‘dinnaṃ me’ti paccavekkhantopi, ‘pattiṃ vā sesakusalaṃ vā anumodissāmī’ti cintentopi tesaṃyeva aññatarena cinteti; anumodantopi tesaṃyeva aññatarena anumodati, ‘anumoditaṃ me’ti paccavekkhantopi tesaṃyeva aññatarena paccavekkhati. ‘Dhammaṃ desessāmī’ti cintentopi tesaṃyeva aññatarena cinteti, desentopi tesaṃyeva aññatarena deseti, ‘desito me’ti paccavekkhantopi tesaṃyeva aññatarena paccavekkhati. ‘Dhammaṃ sossāmī’ti cintentopi tesaṃyeva aññatarena cinteti, suṇantopi tesaṃyeva aññatarena suṇāti, ‘suto me’ti paccavekkhantopi tesaṃyeva aññatarena paccavekkhati. ‘Diṭṭhiṃ ujukaṃ karissāmī’ti cintentopi tesaṃyeva aññatarena cinteti, ujuṃ karonto pana catunnaṃ ñāṇasampayuttānaṃ aññatarena karoti, ‘diṭṭhi me ujukā katā’ti paccavekkhanto aṭṭhannaṃ aññatarena paccavekkhati.
ইমস্মিং ঠানে চত্তারি অনন্তানি নাম গহিতানি। চত্তারি হি অনন্তানি – আকাসো অনন্তো, চক্কৰাল়ানি অনন্তানি, সত্তনিকাযো অনন্তো, বুদ্ধঞ্ঞাণং অনন্তং। আকাসস্স হি পুরত্থিমায দিসায ৰা পচ্ছিমুত্তরদক্খিণাসু ৰা এত্তকানি ৰা যোজনসতানি এত্তকানি ৰা যোজনসহস্সানীতি পরিচ্ছেদো নত্থি। সিনেরুমত্তম্পি অযোকূটং পথৰিং দ্ৰিধা কত্ৰা হেট্ঠা খিত্তং ভস্সেথেৰ, নো পতিট্ঠং লভেথ, এৰং আকাসং অনন্তং নাম।
Imasmiṃ ṭhāne cattāri anantāni nāma gahitāni. Cattāri hi anantāni – ākāso ananto, cakkavāḷāni anantāni, sattanikāyo ananto, buddhaññāṇaṃ anantaṃ. Ākāsassa hi puratthimāya disāya vā pacchimuttaradakkhiṇāsu vā ettakāni vā yojanasatāni ettakāni vā yojanasahassānīti paricchedo natthi. Sinerumattampi ayokūṭaṃ pathaviṃ dvidhā katvā heṭṭhā khittaṃ bhassetheva, no patiṭṭhaṃ labhetha, evaṃ ākāsaṃ anantaṃ nāma.
চক্কৰাল়ানম্পি সতেহি ৰা সহস্সেহি ৰা পরিচ্ছেদো নত্থি। সচেপি হি অকনিট্ঠভৰনে নিব্বত্তা, দল়্হথামধনুগ্গহস্স লহুকেন সরেন তিরিযং তালচ্ছাযং অতিক্কমনমত্তেন কালেন চক্কৰাল়সতসহস্সং অতিক্কমনসমত্থেন জৰেন সমন্নাগতা চত্তারো মহাব্রহ্মানো ‘চক্কৰাল়পরিযন্তং পস্সিস্সামা’তি তেন জৰেন ধাৰেয্যুং, চক্কৰাল়পরিযন্তং অদিস্ৰাৰ পরিনিব্বাযেয্যুং, এৰং চক্কৰাল়ানি অনন্তানি নাম।
Cakkavāḷānampi satehi vā sahassehi vā paricchedo natthi. Sacepi hi akaniṭṭhabhavane nibbattā, daḷhathāmadhanuggahassa lahukena sarena tiriyaṃ tālacchāyaṃ atikkamanamattena kālena cakkavāḷasatasahassaṃ atikkamanasamatthena javena samannāgatā cattāro mahābrahmāno ‘cakkavāḷapariyantaṃ passissāmā’ti tena javena dhāveyyuṃ, cakkavāḷapariyantaṃ adisvāva parinibbāyeyyuṃ, evaṃ cakkavāḷāni anantāni nāma.
এত্তকেসু পন চক্কৰাল়েসু উদকট্ঠকথলট্ঠকসত্তানং পমাণং নত্থি। এৰং সত্তনিকাযো অনন্তো নাম। ততোপি বুদ্ধঞাণং অনন্তমেৰ।
Ettakesu pana cakkavāḷesu udakaṭṭhakathalaṭṭhakasattānaṃ pamāṇaṃ natthi. Evaṃ sattanikāyo ananto nāma. Tatopi buddhañāṇaṃ anantameva.
এৰং অপরিমাণেসু চক্কৰাল়েসু অপরিমাণানং সত্তানং কামাৰচরসোমনস্সসহগতঞাণসম্পযুত্তঅসঙ্খারিককুসলচিত্তানি একস্স বহূনি উপ্পজ্জন্তি। বহূনম্পি বহূনি উপ্পজ্জন্তি। তানি সব্বানিপি কামাৰচরট্ঠেন সোমনস্সসহগতট্ঠেন ঞাণসম্পযুত্তট্ঠেন অসঙ্খারিকট্ঠেন একত্তং গচ্ছন্তি। একমেৰ সোমনস্সসহগতং তিহেতুকং অসঙ্খারিকং মহাচিত্তং হোতি। তথা সসঙ্খারিকং মহাচিত্তং…পে॰… তথা উপেক্খাসহগতং ঞাণৰিপ্পযুত্তং দ্ৰিহেতুকং সসঙ্খারিকচিত্তন্তি। এৰং সব্বানিপি অপরিমাণেসু চক্কৰাল়েসু অপরিমাণানং সত্তানং উপ্পজ্জমানানি কামাৰচরকুসলচিত্তানি সম্মাসম্বুদ্ধো মহাতুলায তুলযমানো ৰিয, তুম্বে পক্খিপিত্ৰা মিনমানো ৰিয, সব্বঞ্ঞুতঞ্ঞাণেন পরিচ্ছিন্দিত্ৰা ‘অট্ঠেৰেতানী’তি সরিক্খট্ঠেন অট্ঠেৰ কোট্ঠাসে কত্ৰা দস্সেসি।
Evaṃ aparimāṇesu cakkavāḷesu aparimāṇānaṃ sattānaṃ kāmāvacarasomanassasahagatañāṇasampayuttaasaṅkhārikakusalacittāni ekassa bahūni uppajjanti. Bahūnampi bahūni uppajjanti. Tāni sabbānipi kāmāvacaraṭṭhena somanassasahagataṭṭhena ñāṇasampayuttaṭṭhena asaṅkhārikaṭṭhena ekattaṃ gacchanti. Ekameva somanassasahagataṃ tihetukaṃ asaṅkhārikaṃ mahācittaṃ hoti. Tathā sasaṅkhārikaṃ mahācittaṃ…pe… tathā upekkhāsahagataṃ ñāṇavippayuttaṃ dvihetukaṃ sasaṅkhārikacittanti. Evaṃ sabbānipi aparimāṇesu cakkavāḷesu aparimāṇānaṃ sattānaṃ uppajjamānāni kāmāvacarakusalacittāni sammāsambuddho mahātulāya tulayamāno viya, tumbe pakkhipitvā minamāno viya, sabbaññutaññāṇena paricchinditvā ‘aṭṭhevetānī’ti sarikkhaṭṭhena aṭṭheva koṭṭhāse katvā dassesi.
পুন ইমস্মিং ঠানে ছব্বিধেন পুঞ্ঞাযূহনং নাম গহিতং। পুঞ্ঞঞ্হি অত্থি সযংকারং অত্থি পরংকারং, অত্থি সাহত্থিকং অত্থি আণত্তিকং, অত্থি সম্পজানকতং অত্থি অসম্পজানকতন্তি।
Puna imasmiṃ ṭhāne chabbidhena puññāyūhanaṃ nāma gahitaṃ. Puññañhi atthi sayaṃkāraṃ atthi paraṃkāraṃ, atthi sāhatthikaṃ atthi āṇattikaṃ, atthi sampajānakataṃ atthi asampajānakatanti.
তত্থ অত্তনো ধম্মতায কতং ‘সযংকারং’ নাম। পরং করোন্তং দিস্ৰা কতং ‘পরংকারং’ নাম। সহত্থেন কতং ‘সাহত্থিকং’ নাম। আণাপেত্ৰা কারিতং ‘আণত্তিকং’ নাম। কম্মঞ্চ ফলঞ্চ সদ্দহিত্ৰা কতং ‘সম্পজানকতং’ নাম। কম্মম্পি ফলম্পি অজানিত্ৰা কতং ‘অসম্পজানকতং’ নাম। তেসু সযংকারং করোন্তোপি ইমেসং অট্ঠন্নং কুসলচিত্তানং অঞ্ঞতরেনেৰ করোতি। পরংকারং করোন্তোপি, সহত্থেন করোন্তোপি, আণাপেত্ৰা করোন্তোপি ইমেসং অট্ঠন্নং কুসলচিত্তানং অঞ্ঞতরেনেৰ করোতি। সম্পজানকরণং পন চতূহি ঞাণসম্পযুত্তেহি হোতি। অসম্পজানকরণং চতূহি ঞাণৰিপ্পযুত্তেহি।
Tattha attano dhammatāya kataṃ ‘sayaṃkāraṃ’ nāma. Paraṃ karontaṃ disvā kataṃ ‘paraṃkāraṃ’ nāma. Sahatthena kataṃ ‘sāhatthikaṃ’ nāma. Āṇāpetvā kāritaṃ ‘āṇattikaṃ’ nāma. Kammañca phalañca saddahitvā kataṃ ‘sampajānakataṃ’ nāma. Kammampi phalampi ajānitvā kataṃ ‘asampajānakataṃ’ nāma. Tesu sayaṃkāraṃ karontopi imesaṃ aṭṭhannaṃ kusalacittānaṃ aññatareneva karoti. Paraṃkāraṃ karontopi, sahatthena karontopi, āṇāpetvā karontopi imesaṃ aṭṭhannaṃ kusalacittānaṃ aññatareneva karoti. Sampajānakaraṇaṃ pana catūhi ñāṇasampayuttehi hoti. Asampajānakaraṇaṃ catūhi ñāṇavippayuttehi.
অপরাপি ইমস্মিং ঠানে চতস্সো দক্খিণাৰিসুদ্ধিযো গহিতা – পচ্চযানং ধম্মিকতা, চেতনামহত্তং, ৰত্থুসম্পত্তি, গুণাতিরেকতাতি। তত্থ ধম্মেন সমেন উপ্পন্না পচ্চযা ‘ধম্মিকা’ নাম। সদ্দহিত্ৰা ওকপ্পেত্ৰা দদতো পন ‘চেতনামহত্তং’ নাম হোতি। খীণাসৰভাৰো ‘ৰত্থুসম্পত্তি’ নাম। খীণাসৰস্সেৰ নিরোধা ৰুট্ঠিতভাৰো ‘গুণাতিরেকতা’ নাম। ইমানি চত্তারি সমোধানেত্ৰা দাতুং সক্কোন্তস্স কামাৰচরং কুসলং ইমস্মিংযেৰ অত্তভাৰে ৰিপাকং দেতি। পুণ্ণকসেট্ঠিকাকৰলিযসুমনমালাকারাদীনং (ধ॰ প॰ অট্ঠ॰ ২.২২৫ পুণ্ণদাসীৰত্থু) (ধ॰ প॰ অট্ঠ॰ ১.৬৭ সুমনমালাকারৰত্থু) ৰিয।
Aparāpi imasmiṃ ṭhāne catasso dakkhiṇāvisuddhiyo gahitā – paccayānaṃ dhammikatā, cetanāmahattaṃ, vatthusampatti, guṇātirekatāti. Tattha dhammena samena uppannā paccayā ‘dhammikā’ nāma. Saddahitvā okappetvā dadato pana ‘cetanāmahattaṃ’ nāma hoti. Khīṇāsavabhāvo ‘vatthusampatti’ nāma. Khīṇāsavasseva nirodhā vuṭṭhitabhāvo ‘guṇātirekatā’ nāma. Imāni cattāri samodhānetvā dātuṃ sakkontassa kāmāvacaraṃ kusalaṃ imasmiṃyeva attabhāve vipākaṃ deti. Puṇṇakaseṭṭhikākavaliyasumanamālākārādīnaṃ (dha. pa. aṭṭha. 2.225 puṇṇadāsīvatthu) (dha. pa. aṭṭha. 1.67 sumanamālākāravatthu) viya.
সঙ্খেপতো পনেতং সব্বম্পি কামাৰচরকুসলচিত্তং ‘চিত্ত’ন্তি করিত্ৰা চিত্তৰিচিত্তট্ঠেন একমেৰ হোতি। ৰেদনাৰসেন সোমনস্সসহগতং উপেক্খাসহগতন্তি দুৰিধং হোতি। ঞাণৰিভত্তিদেসনাৰসেন চতুব্বিধং হোতি। সোমনস্সসহগতং ঞাণসম্পযুত্তং অসঙ্খারিকং মহাচিত্তঞ্হি উপেক্খাসহগতং ঞাণসম্পযুত্তং অসঙ্খারিকং মহাচিত্তঞ্চ ঞাণসম্পযুত্তট্ঠেন অসঙ্খারিকট্ঠেন চ একমেৰ হোতি। তথা ঞাণসম্পযুত্তং সসঙ্খারিকং, ঞাণৰিপ্পযুত্তং অসঙ্খারিকং, ঞাণৰিপ্পযুত্তং সসঙ্খারিকঞ্চাতি। এৰং ঞাণৰিভত্তিদেসনাৰসেন চতুব্বিধে পনেতস্মিং অসঙ্খারসসঙ্খারৰিভত্তিতো চত্তারি অসঙ্খারিকানি চত্তারি সসঙ্খারিকানীতি অট্ঠেৰ কুসলচিত্তানি হোন্তি। তানি যাথাৰতো ঞত্ৰা ভগৰা সব্বঞ্ঞূ গণীৰরো মুনিসেট্ঠো আচিক্খতি দেসেতি পঞ্ঞপেতি পট্ঠপেতি ৰিৰরতি ৰিভজতি উত্তানীকরোতীতি।
Saṅkhepato panetaṃ sabbampi kāmāvacarakusalacittaṃ ‘citta’nti karitvā cittavicittaṭṭhena ekameva hoti. Vedanāvasena somanassasahagataṃ upekkhāsahagatanti duvidhaṃ hoti. Ñāṇavibhattidesanāvasena catubbidhaṃ hoti. Somanassasahagataṃ ñāṇasampayuttaṃ asaṅkhārikaṃ mahācittañhi upekkhāsahagataṃ ñāṇasampayuttaṃ asaṅkhārikaṃ mahācittañca ñāṇasampayuttaṭṭhena asaṅkhārikaṭṭhena ca ekameva hoti. Tathā ñāṇasampayuttaṃ sasaṅkhārikaṃ, ñāṇavippayuttaṃ asaṅkhārikaṃ, ñāṇavippayuttaṃ sasaṅkhārikañcāti. Evaṃ ñāṇavibhattidesanāvasena catubbidhe panetasmiṃ asaṅkhārasasaṅkhāravibhattito cattāri asaṅkhārikāni cattāri sasaṅkhārikānīti aṭṭheva kusalacittāni honti. Tāni yāthāvato ñatvā bhagavā sabbaññū gaṇīvaro muniseṭṭho ācikkhati deseti paññapeti paṭṭhapeti vivarati vibhajati uttānīkarotīti.
অট্ঠসালিনিযা ধম্মসঙ্গহট্ঠকথায
Aṭṭhasāliniyā dhammasaṅgahaṭṭhakathāya
কামাৰচরকুসলনিদ্দেসো সমত্তো।
Kāmāvacarakusalaniddeso samatto.
