| Library / Tipiṭaka / д̇ибидага • Tipiṭaka / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā |
бун̃н̃агирияавад̇т̇аад̣̇игат̇аа
Puññakiriyavatthādikathā
д̇аани саб̣б̣ааниби д̣̇асахи бун̃н̃агирияавад̇т̇уухи д̣̇ийбзд̇аб̣б̣аани. гат̇ам̣? д̣̇аанамаяам̣ бун̃н̃агирияавад̇т̇у, сийламаяам̣… бхааванаамаяам̣… абажид̇исахаг̇ад̇ам̣… взяяааважжасахаг̇ад̇ам̣… бад̇д̇аануббад̣̇аанам̣… аб̣бханумод̣̇анам̣… д̣̇зсанаамаяам̣… саванамаяам̣… д̣̇идтиж̇угаммам̣ бун̃н̃агирияавад̇т̇ууд̇и имаани д̣̇аса бун̃н̃агирияавад̇т̇ууни наама. д̇ад̇т̇а д̣̇аанамзва д̣̇аанамаяам̣. бун̃н̃агирияаа жа саа д̇зсам̣ д̇зсам̣ аанисам̣саанам̣ вад̇т̇у жаад̇и бун̃н̃агирияавад̇т̇у. сзсзсуби зсзва наяо.
Tāni sabbānipi dasahi puññakiriyavatthūhi dīpetabbāni. Kathaṃ? Dānamayaṃ puññakiriyavatthu, sīlamayaṃ… bhāvanāmayaṃ… apacitisahagataṃ… veyyāvaccasahagataṃ… pattānuppadānaṃ… abbhanumodanaṃ… desanāmayaṃ… savanamayaṃ… diṭṭhijukammaṃ puññakiriyavatthūti imāni dasa puññakiriyavatthūni nāma. Tattha dānameva dānamayaṃ. Puññakiriyā ca sā tesaṃ tesaṃ ānisaṃsānaṃ vatthu cāti puññakiriyavatthu. Sesesupi eseva nayo.
д̇ад̇т̇а жийвараад̣̇ийсу жад̇уусу бажжаязсу, руубаад̣̇ийсу ваа часу аарамман̣зсу, аннаад̣̇ийсу ваа д̣̇асасу д̣̇аанавад̇т̇уусу, д̇ам̣ д̇ам̣ д̣̇знд̇асса д̇зсам̣ д̇зсам̣ уббаад̣̇анад̇о бадтааяа буб̣б̣абхааг̇з, барижжааг̇агаалз, бажчаа соманассажид̇д̇зна ануссаран̣агаалз жаад̇и д̇ийсу гаалзсу бавад̇д̇аа жзд̇анаа ‘д̣̇аанамаяам̣ бун̃н̃агирияавад̇т̇у’ наама.
Tattha cīvarādīsu catūsu paccayesu, rūpādīsu vā chasu ārammaṇesu, annādīsu vā dasasu dānavatthūsu, taṃ taṃ dentassa tesaṃ tesaṃ uppādanato paṭṭhāya pubbabhāge, pariccāgakāle, pacchā somanassacittena anussaraṇakāle cāti tīsu kālesu pavattā cetanā ‘dānamayaṃ puññakiriyavatthu’ nāma.
бан̃жасийлам̣ адтасийлам̣ д̣̇асасийлам̣ самаад̣̇ияанд̇асса, ‘баб̣б̣аж̇иссаамий’д̇и вихаарам̣ г̇ажчанд̇асса, баб̣б̣аж̇анд̇асса, ‘манорат̇ам̣ мад̇т̇агам̣ баабзд̇ваа баб̣б̣аж̇ид̇о вад̇а’мхи, ‘саад̇ху саад̇хуу’д̇и ааваж̇ж̇знд̇асса, баад̇имогкам̣ сам̣варанд̇асса, жийвараад̣̇аяо бажжаяз бажжавзгканд̇асса, аабаат̇аг̇ад̇зсу руубаад̣̇ийсу жагкуд̣̇ваараад̣̇ийни сам̣варанд̇асса , ааж̇ийвам̣ сод̇хзнд̇асса жа бавад̇д̇аа жзд̇анаа ‘сийламаяам̣ бун̃н̃агирияавад̇т̇у’ наама.
Pañcasīlaṃ aṭṭhasīlaṃ dasasīlaṃ samādiyantassa, ‘pabbajissāmī’ti vihāraṃ gacchantassa, pabbajantassa, ‘manorathaṃ matthakaṃ pāpetvā pabbajito vata’mhi, ‘sādhu sādhū’ti āvajjentassa, pātimokkhaṃ saṃvarantassa, cīvarādayo paccaye paccavekkhantassa, āpāthagatesu rūpādīsu cakkhudvārādīni saṃvarantassa , ājīvaṃ sodhentassa ca pavattā cetanā ‘sīlamayaṃ puññakiriyavatthu’ nāma.
бадисамбхид̣̇ааяам̣ вуд̇д̇зна вибассанаамаг̇г̇зна жагкум̣ анижжад̇о д̣̇угкад̇о анад̇д̇ад̇о бхаавзнд̇асса…бз… манам̣… руубз…бз… д̇хаммз… жагкувин̃н̃аан̣ам̣…бз… мановин̃н̃аан̣ам̣,… жагкусампассам̣…бз… маносампассам̣, жагкусампассаж̇ам̣ взд̣̇анам̣…бз… маносампассаж̇ам̣ взд̣̇анам̣, …бз… руубасан̃н̃ам̣…бз… ж̇араамаран̣ам̣ анижжад̇о д̣̇угкад̇о анад̇д̇ад̇о бхаавзнд̇асса бавад̇д̇аа жзд̇анаа, адтад̇им̣сааяа ваа аарамман̣зсу аббанам̣ аббад̇д̇аа саб̣б̣ааби жзд̇анаа ‘бхааванаамаяам̣ бун̃н̃агирияавад̇т̇у’ наама.
Paṭisambhidāyaṃ vuttena vipassanāmaggena cakkhuṃ aniccato dukkhato anattato bhāventassa…pe… manaṃ… rūpe…pe… dhamme… cakkhuviññāṇaṃ…pe… manoviññāṇaṃ,… cakkhusamphassaṃ…pe… manosamphassaṃ, cakkhusamphassajaṃ vedanaṃ…pe… manosamphassajaṃ vedanaṃ, …pe… rūpasaññaṃ…pe… jarāmaraṇaṃ aniccato dukkhato anattato bhāventassa pavattā cetanā, aṭṭhatiṃsāya vā ārammaṇesu appanaṃ appattā sabbāpi cetanā ‘bhāvanāmayaṃ puññakiriyavatthu’ nāma.
махаллагам̣ бана д̣̇исваа бажжуг̇г̇аманабад̇д̇ажийварабадиг̇г̇ахан̣аабхиваад̣̇анамаг̇г̇асамбад̣̇аанаад̣̇ивасзна ‘абажид̇исахаг̇ад̇ам̣’ взд̣̇ид̇аб̣б̣ам̣.
Mahallakaṃ pana disvā paccuggamanapattacīvarapaṭiggahaṇaabhivādanamaggasampadānādivasena ‘apacitisahagataṃ’ veditabbaṃ.
вуд̣дхад̇араанам̣ вад̇д̇аббадибад̇д̇игаран̣авасзна г̇аамам̣ бин̣д̣ааяа бавидтам̣ бхигкум̣ д̣̇исваа бад̇д̇ам̣ г̇ахзд̇ваа г̇аамз бхигкам̣ самаад̣̇абзд̇ваа убасам̣харан̣авасзна, ‘г̇ажча бхигкуунам̣ бад̇д̇ам̣ аахараа’д̇и суд̇ваа взг̇зна г̇анд̇ваа бад̇д̇аахаран̣аад̣̇ивасзна жа гааяавзяяаавадигагаалз ‘взяяааважжасахаг̇ад̇ам̣’ взд̣̇ид̇аб̣б̣ам̣.
Vuḍḍhatarānaṃ vattappaṭipattikaraṇavasena gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ samādapetvā upasaṃharaṇavasena, ‘gaccha bhikkhūnaṃ pattaṃ āharā’ti sutvā vegena gantvā pattāharaṇādivasena ca kāyaveyyāvaṭikakāle ‘veyyāvaccasahagataṃ’ veditabbaṃ.
д̣̇аанам̣ д̣̇ад̇ваа г̇анд̇хаад̣̇ийхи бууж̇ам̣ гад̇ваа ‘асугасса наама бад̇д̇и ход̇уу’д̇и ваа, ‘саб̣б̣асад̇д̇аанам̣ ход̇уу’д̇и ваа бад̇д̇им̣ д̣̇ад̣̇ад̇о ‘бад̇д̇аануббад̣̇аанам̣’ взд̣̇ид̇аб̣б̣ам̣. гим̣ банзвам̣ бад̇д̇им̣ д̣̇ад̣̇ад̇о бун̃н̃агкаяо ход̇ийд̇и? на ход̇и. яат̇аа бана згам̣ д̣̇ийбам̣ ж̇аалзд̇ваа д̇ад̇о д̣̇ийбасахассам̣ ж̇аалзнд̇асса батамад̣̇ийбо кийн̣од̇и на вад̇д̇аб̣б̣о; буримаалогзна бана сад̣̇д̇хим̣ бажчимаалого згад̇о худ̇ваа ад̇имахаа ход̇и. звамзва бад̇д̇им̣ д̣̇ад̣̇ад̇о барихаани наама над̇т̇и. вуд̣дхиязва бана ход̇ийд̇и взд̣̇ид̇аб̣б̣о.
Dānaṃ datvā gandhādīhi pūjaṃ katvā ‘asukassa nāma patti hotū’ti vā, ‘sabbasattānaṃ hotū’ti vā pattiṃ dadato ‘pattānuppadānaṃ’ veditabbaṃ. Kiṃ panevaṃ pattiṃ dadato puññakkhayo hotīti? Na hoti. Yathā pana ekaṃ dīpaṃ jāletvā tato dīpasahassaṃ jālentassa paṭhamadīpo khīṇoti na vattabbo; purimālokena pana saddhiṃ pacchimāloko ekato hutvā atimahā hoti. Evameva pattiṃ dadato parihāni nāma natthi. Vuḍḍhiyeva pana hotīti veditabbo.
барзхи д̣̇иннааяа бад̇д̇ияаа ваа ан̃н̃ааяа ваа бун̃н̃агирияааяа ‘саад̇ху саад̇хуу’д̇и анумод̣̇анавасзна ‘аб̣бханумод̣̇анам̣’ взд̣̇ид̇аб̣б̣ам̣.
Parehi dinnāya pattiyā vā aññāya vā puññakiriyāya ‘sādhu sādhū’ti anumodanavasena ‘abbhanumodanaṃ’ veditabbaṃ.
зго ‘звам̣ мам̣ д̇хаммагат̇игод̇и мам̣ ж̇ааниссанд̇ий’д̇и ижчааяа тад̇ваа лаабхаг̇аруго худ̇ваа д̣̇зсзд̇и, д̇ам̣ на махабпалам̣. зго ад̇д̇ано баг̇ун̣ам̣ д̇хаммам̣ абажжаасийсамаано вимуд̇д̇ааяад̇анасийсзна барзсам̣ д̣̇зсзд̇и, ид̣̇ам̣ ‘д̣̇зсанаамаяам̣ бун̃н̃агирияавад̇т̇у’ наама.
Eko ‘evaṃ maṃ dhammakathikoti maṃ jānissantī’ti icchāya ṭhatvā lābhagaruko hutvā deseti, taṃ na mahapphalaṃ. Eko attano paguṇaṃ dhammaṃ apaccāsīsamāno vimuttāyatanasīsena paresaṃ deseti, idaṃ ‘desanāmayaṃ puññakiriyavatthu’ nāma.
зго сун̣анд̇о ‘ид̇и мам̣ сад̣̇д̇ход̇и ж̇ааниссанд̇ий’д̇и сун̣аад̇и, д̇ам̣ на махабпалам̣. зго ‘звам̣ мз махабпалам̣ бхависсад̇ий’д̇и хид̇апаран̣зна муд̣̇ужид̇д̇зна д̇хаммам̣ сун̣аад̇и, ид̣̇ам̣ ‘саванамаяам̣ бун̃н̃агирияавад̇т̇у’ наама.
Eko suṇanto ‘iti maṃ saddhoti jānissantī’ti suṇāti, taṃ na mahapphalaṃ. Eko ‘evaṃ me mahapphalaṃ bhavissatī’ti hitapharaṇena muducittena dhammaṃ suṇāti, idaṃ ‘savanamayaṃ puññakiriyavatthu’ nāma.
д̣̇идтим̣ уж̇ум̣ гаронд̇асса ‘д̣̇идтиж̇угаммам̣ бун̃н̃агирияавад̇т̇у’ наама. д̣̇ийгхабхаан̣агаа банааху – ‘д̣̇идтиж̇угаммам̣ саб̣б̣зсам̣ нияамалагкан̣ам̣, яам̣гин̃жи бун̃н̃ам̣ гаронд̇асса хи д̣̇идтияаа уж̇угабхаавзнзва махабпалам̣ ход̇ий’д̇и.
Diṭṭhiṃ ujuṃ karontassa ‘diṭṭhijukammaṃ puññakiriyavatthu’ nāma. Dīghabhāṇakā panāhu – ‘diṭṭhijukammaṃ sabbesaṃ niyamalakkhaṇaṃ, yaṃkiñci puññaṃ karontassa hi diṭṭhiyā ujukabhāveneva mahapphalaṃ hotī’ti.
зд̇зсу бана бун̃н̃агирияавад̇т̇уусу д̣̇аанамаяам̣ д̇аава ‘д̣̇аанам̣ д̣̇ассаамий’д̇и жинд̇знд̇асса уббаж̇ж̇ад̇и, д̣̇аанам̣ д̣̇ад̣̇ад̇о уббаж̇ж̇ад̇и, ‘д̣̇иннам̣ мз’д̇и бажжавзгканд̇асса уббаж̇ж̇ад̇и. звам̣ буб̣б̣ажзд̇анам̣ мун̃жанажзд̇анам̣ абаражзд̇ананд̇и д̇иссоби жзд̇анаа згад̇о гад̇ваа ‘д̣̇аанамаяам̣ бун̃н̃агирияавад̇т̇у’ наама ход̇и. сийламаяамби ‘сийлам̣ буурзссаамий’д̇и жинд̇знд̇асса уббаж̇ж̇ад̇и, сийлабууран̣агаалз уббаж̇ж̇ад̇и, ‘буурид̇ам̣ мз’д̇и бажжавзгканд̇асса уббаж̇ж̇ад̇и. д̇аа саб̣б̣ааби згад̇о гад̇ваа ‘сийламаяам̣ бун̃н̃агирияавад̇т̇у’ наама ход̇и…бз… д̣̇идтиж̇угаммамби ‘д̣̇идтим̣ уж̇угам̣ гариссаамий’д̇и жинд̇знд̇асса уббаж̇ж̇ад̇и, д̣̇идтим̣ уж̇ум̣ гаронд̇асса уббаж̇ж̇ад̇и, ‘д̣̇идти мз уж̇угаа гад̇аа’д̇и бажжавзгканд̇асса уббаж̇ж̇ад̇и. д̇аа саб̣б̣ааби згад̇о гад̇ваа ‘д̣̇идтиж̇угаммам̣ бун̃н̃агирияавад̇т̇у’ наама ход̇и.
Etesu pana puññakiriyavatthūsu dānamayaṃ tāva ‘dānaṃ dassāmī’ti cintentassa uppajjati, dānaṃ dadato uppajjati, ‘dinnaṃ me’ti paccavekkhantassa uppajjati. Evaṃ pubbacetanaṃ muñcanacetanaṃ aparacetananti tissopi cetanā ekato katvā ‘dānamayaṃ puññakiriyavatthu’ nāma hoti. Sīlamayampi ‘sīlaṃ pūressāmī’ti cintentassa uppajjati, sīlapūraṇakāle uppajjati, ‘pūritaṃ me’ti paccavekkhantassa uppajjati. Tā sabbāpi ekato katvā ‘sīlamayaṃ puññakiriyavatthu’ nāma hoti…pe… diṭṭhijukammampi ‘diṭṭhiṃ ujukaṃ karissāmī’ti cintentassa uppajjati, diṭṭhiṃ ujuṃ karontassa uppajjati, ‘diṭṭhi me ujukā katā’ti paccavekkhantassa uppajjati. Tā sabbāpi ekato katvā ‘diṭṭhijukammaṃ puññakiriyavatthu’ nāma hoti.
суд̇д̇з бана д̇ийн̣иязва бун̃н̃агирияавад̇т̇ууни ааг̇ад̇аани. д̇зсу ид̇арзсамби сан̇г̇ахо взд̣̇ид̇аб̣б̣о. абажид̇ивзяяааважжаани хи сийламаяз сан̇г̇ахам̣ г̇ажчанд̇и. бад̇д̇аануббад̣̇аанааб̣бханумод̣̇анаани д̣̇аанамаяз. д̣̇зсанаасаванад̣̇идтиж̇угаммаани бхааванаамаяз. яз бана ‘д̣̇идтиж̇угаммам̣ саб̣б̣зсам̣ нияамалагкан̣а’нд̇и вад̣̇анд̇и д̇зсам̣ д̇ам̣ д̇ийсуби сан̇г̇ахам̣ г̇ажчад̇и. звамзд̇аани сан̇кзбад̇о д̇ийн̣и худ̇ваа вид̇т̇аарад̇о д̣̇аса хонд̇и.
Sutte pana tīṇiyeva puññakiriyavatthūni āgatāni. Tesu itaresampi saṅgaho veditabbo. Apacitiveyyāvaccāni hi sīlamaye saṅgahaṃ gacchanti. Pattānuppadānaabbhanumodanāni dānamaye. Desanāsavanadiṭṭhijukammāni bhāvanāmaye. Ye pana ‘diṭṭhijukammaṃ sabbesaṃ niyamalakkhaṇa’nti vadanti tesaṃ taṃ tīsupi saṅgahaṃ gacchati. Evametāni saṅkhepato tīṇi hutvā vitthārato dasa honti.
д̇зсу ‘д̣̇аанам̣ д̣̇ассаамий’д̇и жинд̇знд̇о адтаннам̣ гаамааважарагусалажид̇д̇аанам̣ ан̃н̃ад̇арзнзва жинд̇зд̇и; д̣̇ад̣̇амааноби д̇зсам̣язва ан̃н̃ад̇арзна д̣̇зд̇и; ‘д̣̇аанам̣ мз д̣̇инна’нд̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘сийлам̣ буурзссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и; сийлам̣ буурзнд̇оби д̇зсам̣язва ан̃н̃ад̇арзна буурзд̇и, ‘сийлам̣ мз буурид̇а’нд̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘бхааванам̣ бхаавзссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и; бхаавзнд̇оби д̇зсам̣язва ан̃н̃ад̇арзна бхаавзд̇и; ‘бхааванаа мз бхаавид̇аа’д̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и.
Tesu ‘dānaṃ dassāmī’ti cintento aṭṭhannaṃ kāmāvacarakusalacittānaṃ aññatareneva cinteti; dadamānopi tesaṃyeva aññatarena deti; ‘dānaṃ me dinna’nti paccavekkhantopi tesaṃyeva aññatarena paccavekkhati. ‘Sīlaṃ pūressāmī’ti cintentopi tesaṃyeva aññatarena cinteti; sīlaṃ pūrentopi tesaṃyeva aññatarena pūreti, ‘sīlaṃ me pūrita’nti paccavekkhantopi tesaṃyeva aññatarena paccavekkhati. ‘Bhāvanaṃ bhāvessāmī’ti cintentopi tesaṃyeva aññatarena cinteti; bhāventopi tesaṃyeva aññatarena bhāveti; ‘bhāvanā me bhāvitā’ti paccavekkhantopi tesaṃyeva aññatarena paccavekkhati.
‘ж̇здтаабажид̇игаммам̣ гариссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и, гаронд̇оби д̇зсам̣язва ан̃н̃ад̇арзна гарод̇и, ‘гад̇ам̣ мз’д̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘гааяавзяяаавадигагаммам̣ гариссаамий’д̇и жинд̇знд̇оби, гаронд̇оби, ‘гад̇ам̣ мз’д̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘бад̇д̇им̣ д̣̇ассаамий’д̇и жинд̇знд̇оби, д̣̇ад̣̇анд̇оби, ‘д̣̇иннам̣ мз’д̇и бажжавзгканд̇оби, ‘бад̇д̇им̣ ваа сзсагусалам̣ ваа анумод̣̇иссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и; анумод̣̇анд̇оби д̇зсам̣язва ан̃н̃ад̇арзна анумод̣̇ад̇и, ‘анумод̣̇ид̇ам̣ мз’д̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘д̇хаммам̣ д̣̇зсзссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и, д̣̇зсзнд̇оби д̇зсам̣язва ан̃н̃ад̇арзна д̣̇зсзд̇и, ‘д̣̇зсид̇о мз’д̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘д̇хаммам̣ соссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и, сун̣анд̇оби д̇зсам̣язва ан̃н̃ад̇арзна сун̣аад̇и, ‘суд̇о мз’д̇и бажжавзгканд̇оби д̇зсам̣язва ан̃н̃ад̇арзна бажжавзгкад̇и. ‘д̣̇идтим̣ уж̇угам̣ гариссаамий’д̇и жинд̇знд̇оби д̇зсам̣язва ан̃н̃ад̇арзна жинд̇зд̇и, уж̇ум̣ гаронд̇о бана жад̇уннам̣ н̃аан̣асамбаяуд̇д̇аанам̣ ан̃н̃ад̇арзна гарод̇и, ‘д̣̇идти мз уж̇угаа гад̇аа’д̇и бажжавзгканд̇о адтаннам̣ ан̃н̃ад̇арзна бажжавзгкад̇и.
‘Jeṭṭhāpacitikammaṃ karissāmī’ti cintentopi tesaṃyeva aññatarena cinteti, karontopi tesaṃyeva aññatarena karoti, ‘kataṃ me’ti paccavekkhantopi tesaṃyeva aññatarena paccavekkhati. ‘Kāyaveyyāvaṭikakammaṃ karissāmī’ti cintentopi, karontopi, ‘kataṃ me’ti paccavekkhantopi tesaṃyeva aññatarena paccavekkhati. ‘Pattiṃ dassāmī’ti cintentopi, dadantopi, ‘dinnaṃ me’ti paccavekkhantopi, ‘pattiṃ vā sesakusalaṃ vā anumodissāmī’ti cintentopi tesaṃyeva aññatarena cinteti; anumodantopi tesaṃyeva aññatarena anumodati, ‘anumoditaṃ me’ti paccavekkhantopi tesaṃyeva aññatarena paccavekkhati. ‘Dhammaṃ desessāmī’ti cintentopi tesaṃyeva aññatarena cinteti, desentopi tesaṃyeva aññatarena deseti, ‘desito me’ti paccavekkhantopi tesaṃyeva aññatarena paccavekkhati. ‘Dhammaṃ sossāmī’ti cintentopi tesaṃyeva aññatarena cinteti, suṇantopi tesaṃyeva aññatarena suṇāti, ‘suto me’ti paccavekkhantopi tesaṃyeva aññatarena paccavekkhati. ‘Diṭṭhiṃ ujukaṃ karissāmī’ti cintentopi tesaṃyeva aññatarena cinteti, ujuṃ karonto pana catunnaṃ ñāṇasampayuttānaṃ aññatarena karoti, ‘diṭṭhi me ujukā katā’ti paccavekkhanto aṭṭhannaṃ aññatarena paccavekkhati.
имасмим̣ таанз жад̇д̇аари ананд̇аани наама г̇ахид̇аани. жад̇д̇аари хи ананд̇аани – аагаасо ананд̇о, жаггаваал̣аани ананд̇аани, сад̇д̇анигааяо ананд̇о, б̣уд̣̇д̇хан̃н̃аан̣ам̣ ананд̇ам̣. аагаасасса хи бурад̇т̇имааяа д̣̇исааяа ваа бажчимуд̇д̇арад̣̇агкин̣аасу ваа зд̇д̇агаани ваа яож̇анасад̇аани зд̇д̇агаани ваа яож̇анасахассаанийд̇и барижчзд̣̇о над̇т̇и. синзрумад̇д̇амби аяогуудам̣ бат̇авим̣ д̣̇вид̇хаа гад̇ваа хздтаа кид̇д̇ам̣ бхассзт̇зва, но бад̇идтам̣ лабхзт̇а, звам̣ аагаасам̣ ананд̇ам̣ наама.
Imasmiṃ ṭhāne cattāri anantāni nāma gahitāni. Cattāri hi anantāni – ākāso ananto, cakkavāḷāni anantāni, sattanikāyo ananto, buddhaññāṇaṃ anantaṃ. Ākāsassa hi puratthimāya disāya vā pacchimuttaradakkhiṇāsu vā ettakāni vā yojanasatāni ettakāni vā yojanasahassānīti paricchedo natthi. Sinerumattampi ayokūṭaṃ pathaviṃ dvidhā katvā heṭṭhā khittaṃ bhassetheva, no patiṭṭhaṃ labhetha, evaṃ ākāsaṃ anantaṃ nāma.
жаггаваал̣аанамби сад̇зхи ваа сахассзхи ваа барижчзд̣̇о над̇т̇и. сажзби хи аганидтабхаванз ниб̣б̣ад̇д̇аа, д̣̇ал̣хат̇аамад̇хануг̇г̇ахасса лахугзна сарзна д̇ирияам̣ д̇аалажчааяам̣ ад̇иггаманамад̇д̇зна гаалзна жаггаваал̣асад̇асахассам̣ ад̇иггаманасамад̇т̇зна ж̇авзна саманнааг̇ад̇аа жад̇д̇ааро махааб̣рахмаано ‘жаггаваал̣абарияанд̇ам̣ бассиссаамаа’д̇и д̇зна ж̇авзна д̇хаавзяяум̣, жаггаваал̣абарияанд̇ам̣ ад̣̇исваава бариниб̣б̣ааязяяум̣, звам̣ жаггаваал̣аани ананд̇аани наама.
Cakkavāḷānampi satehi vā sahassehi vā paricchedo natthi. Sacepi hi akaniṭṭhabhavane nibbattā, daḷhathāmadhanuggahassa lahukena sarena tiriyaṃ tālacchāyaṃ atikkamanamattena kālena cakkavāḷasatasahassaṃ atikkamanasamatthena javena samannāgatā cattāro mahābrahmāno ‘cakkavāḷapariyantaṃ passissāmā’ti tena javena dhāveyyuṃ, cakkavāḷapariyantaṃ adisvāva parinibbāyeyyuṃ, evaṃ cakkavāḷāni anantāni nāma.
зд̇д̇агзсу бана жаггаваал̣зсу уд̣̇агадтагат̇аладтагасад̇д̇аанам̣ бамаан̣ам̣ над̇т̇и. звам̣ сад̇д̇анигааяо ананд̇о наама. д̇ад̇оби б̣уд̣̇д̇хан̃аан̣ам̣ ананд̇амзва.
Ettakesu pana cakkavāḷesu udakaṭṭhakathalaṭṭhakasattānaṃ pamāṇaṃ natthi. Evaṃ sattanikāyo ananto nāma. Tatopi buddhañāṇaṃ anantameva.
звам̣ абаримаан̣зсу жаггаваал̣зсу абаримаан̣аанам̣ сад̇д̇аанам̣ гаамааважарасоманассасахаг̇ад̇ан̃аан̣асамбаяуд̇д̇аасан̇кааригагусалажид̇д̇аани згасса б̣ахууни уббаж̇ж̇анд̇и. б̣ахуунамби б̣ахууни уббаж̇ж̇анд̇и. д̇аани саб̣б̣ааниби гаамааважарадтзна соманассасахаг̇ад̇адтзна н̃аан̣асамбаяуд̇д̇адтзна асан̇кааригадтзна згад̇д̇ам̣ г̇ажчанд̇и. згамзва соманассасахаг̇ад̇ам̣ д̇ихзд̇угам̣ асан̇кааригам̣ махаажид̇д̇ам̣ ход̇и. д̇ат̇аа сасан̇кааригам̣ махаажид̇д̇ам̣…бз… д̇ат̇аа убзгкаасахаг̇ад̇ам̣ н̃аан̣авиббаяуд̇д̇ам̣ д̣̇вихзд̇угам̣ сасан̇кааригажид̇д̇анд̇и. звам̣ саб̣б̣ааниби абаримаан̣зсу жаггаваал̣зсу абаримаан̣аанам̣ сад̇д̇аанам̣ уббаж̇ж̇амаанаани гаамааважарагусалажид̇д̇аани саммаасамб̣уд̣̇д̇хо махаад̇улааяа д̇улаяамаано вияа, д̇умб̣з багкибид̇ваа минамаано вияа, саб̣б̣ан̃н̃уд̇ан̃н̃аан̣зна барижчинд̣̇ид̇ваа ‘адтзвзд̇ааний’д̇и саригкадтзна адтзва годтаасз гад̇ваа д̣̇ассзси.
Evaṃ aparimāṇesu cakkavāḷesu aparimāṇānaṃ sattānaṃ kāmāvacarasomanassasahagatañāṇasampayuttaasaṅkhārikakusalacittāni ekassa bahūni uppajjanti. Bahūnampi bahūni uppajjanti. Tāni sabbānipi kāmāvacaraṭṭhena somanassasahagataṭṭhena ñāṇasampayuttaṭṭhena asaṅkhārikaṭṭhena ekattaṃ gacchanti. Ekameva somanassasahagataṃ tihetukaṃ asaṅkhārikaṃ mahācittaṃ hoti. Tathā sasaṅkhārikaṃ mahācittaṃ…pe… tathā upekkhāsahagataṃ ñāṇavippayuttaṃ dvihetukaṃ sasaṅkhārikacittanti. Evaṃ sabbānipi aparimāṇesu cakkavāḷesu aparimāṇānaṃ sattānaṃ uppajjamānāni kāmāvacarakusalacittāni sammāsambuddho mahātulāya tulayamāno viya, tumbe pakkhipitvā minamāno viya, sabbaññutaññāṇena paricchinditvā ‘aṭṭhevetānī’ti sarikkhaṭṭhena aṭṭheva koṭṭhāse katvā dassesi.
буна имасмим̣ таанз чаб̣б̣ид̇хзна бун̃н̃ааяууханам̣ наама г̇ахид̇ам̣. бун̃н̃ан̃хи ад̇т̇и саяам̣гаарам̣ ад̇т̇и барам̣гаарам̣, ад̇т̇и саахад̇т̇игам̣ ад̇т̇и аан̣ад̇д̇игам̣, ад̇т̇и самбаж̇аанагад̇ам̣ ад̇т̇и асамбаж̇аанагад̇анд̇и.
Puna imasmiṃ ṭhāne chabbidhena puññāyūhanaṃ nāma gahitaṃ. Puññañhi atthi sayaṃkāraṃ atthi paraṃkāraṃ, atthi sāhatthikaṃ atthi āṇattikaṃ, atthi sampajānakataṃ atthi asampajānakatanti.
д̇ад̇т̇а ад̇д̇ано д̇хаммад̇ааяа гад̇ам̣ ‘саяам̣гаарам̣’ наама. барам̣ гаронд̇ам̣ д̣̇исваа гад̇ам̣ ‘барам̣гаарам̣’ наама. сахад̇т̇зна гад̇ам̣ ‘саахад̇т̇игам̣’ наама. аан̣аабзд̇ваа гаарид̇ам̣ ‘аан̣ад̇д̇игам̣’ наама. гамман̃жа палан̃жа сад̣̇д̣̇ахид̇ваа гад̇ам̣ ‘самбаж̇аанагад̇ам̣’ наама. гаммамби паламби аж̇аанид̇ваа гад̇ам̣ ‘асамбаж̇аанагад̇ам̣’ наама. д̇зсу саяам̣гаарам̣ гаронд̇оби имзсам̣ адтаннам̣ гусалажид̇д̇аанам̣ ан̃н̃ад̇арзнзва гарод̇и. барам̣гаарам̣ гаронд̇оби, сахад̇т̇зна гаронд̇оби, аан̣аабзд̇ваа гаронд̇оби имзсам̣ адтаннам̣ гусалажид̇д̇аанам̣ ан̃н̃ад̇арзнзва гарод̇и. самбаж̇аанагаран̣ам̣ бана жад̇уухи н̃аан̣асамбаяуд̇д̇зхи ход̇и. асамбаж̇аанагаран̣ам̣ жад̇уухи н̃аан̣авиббаяуд̇д̇зхи.
Tattha attano dhammatāya kataṃ ‘sayaṃkāraṃ’ nāma. Paraṃ karontaṃ disvā kataṃ ‘paraṃkāraṃ’ nāma. Sahatthena kataṃ ‘sāhatthikaṃ’ nāma. Āṇāpetvā kāritaṃ ‘āṇattikaṃ’ nāma. Kammañca phalañca saddahitvā kataṃ ‘sampajānakataṃ’ nāma. Kammampi phalampi ajānitvā kataṃ ‘asampajānakataṃ’ nāma. Tesu sayaṃkāraṃ karontopi imesaṃ aṭṭhannaṃ kusalacittānaṃ aññatareneva karoti. Paraṃkāraṃ karontopi, sahatthena karontopi, āṇāpetvā karontopi imesaṃ aṭṭhannaṃ kusalacittānaṃ aññatareneva karoti. Sampajānakaraṇaṃ pana catūhi ñāṇasampayuttehi hoti. Asampajānakaraṇaṃ catūhi ñāṇavippayuttehi.
абарааби имасмим̣ таанз жад̇ассо д̣̇агкин̣аависуд̣̇д̇хияо г̇ахид̇аа – бажжаяаанам̣ д̇хаммигад̇аа, жзд̇анаамахад̇д̇ам̣, вад̇т̇усамбад̇д̇и, г̇ун̣аад̇ирзгад̇аад̇и. д̇ад̇т̇а д̇хаммзна самзна уббаннаа бажжаяаа ‘д̇хаммигаа’ наама. сад̣̇д̣̇ахид̇ваа огаббзд̇ваа д̣̇ад̣̇ад̇о бана ‘жзд̇анаамахад̇д̇ам̣’ наама ход̇и. кийн̣аасавабхааво ‘вад̇т̇усамбад̇д̇и’ наама. кийн̣аасавассзва нирод̇хаа вудтид̇абхааво ‘г̇ун̣аад̇ирзгад̇аа’ наама. имаани жад̇д̇аари самод̇хаанзд̇ваа д̣̇аад̇ум̣ саггонд̇асса гаамааважарам̣ гусалам̣ имасмим̣язва ад̇д̇абхаавз вибаагам̣ д̣̇зд̇и. бун̣н̣агасздтигаагавалияасуманамаалаагаараад̣̇ийнам̣ (д̇ха. ба. адта. 2.225 бун̣н̣ад̣̇аасийвад̇т̇у) (д̇ха. ба. адта. 1.67 суманамаалаагааравад̇т̇у) вияа.
Aparāpi imasmiṃ ṭhāne catasso dakkhiṇāvisuddhiyo gahitā – paccayānaṃ dhammikatā, cetanāmahattaṃ, vatthusampatti, guṇātirekatāti. Tattha dhammena samena uppannā paccayā ‘dhammikā’ nāma. Saddahitvā okappetvā dadato pana ‘cetanāmahattaṃ’ nāma hoti. Khīṇāsavabhāvo ‘vatthusampatti’ nāma. Khīṇāsavasseva nirodhā vuṭṭhitabhāvo ‘guṇātirekatā’ nāma. Imāni cattāri samodhānetvā dātuṃ sakkontassa kāmāvacaraṃ kusalaṃ imasmiṃyeva attabhāve vipākaṃ deti. Puṇṇakaseṭṭhikākavaliyasumanamālākārādīnaṃ (dha. pa. aṭṭha. 2.225 puṇṇadāsīvatthu) (dha. pa. aṭṭha. 1.67 sumanamālākāravatthu) viya.
сан̇кзбад̇о банзд̇ам̣ саб̣б̣амби гаамааважарагусалажид̇д̇ам̣ ‘жид̇д̇а’нд̇и гарид̇ваа жид̇д̇авижид̇д̇адтзна згамзва ход̇и. взд̣̇анаавасзна соманассасахаг̇ад̇ам̣ убзгкаасахаг̇ад̇анд̇и д̣̇увид̇хам̣ ход̇и. н̃аан̣авибхад̇д̇ид̣̇зсанаавасзна жад̇уб̣б̣ид̇хам̣ ход̇и. соманассасахаг̇ад̇ам̣ н̃аан̣асамбаяуд̇д̇ам̣ асан̇кааригам̣ махаажид̇д̇ан̃хи убзгкаасахаг̇ад̇ам̣ н̃аан̣асамбаяуд̇д̇ам̣ асан̇кааригам̣ махаажид̇д̇ан̃жа н̃аан̣асамбаяуд̇д̇адтзна асан̇кааригадтзна жа згамзва ход̇и. д̇ат̇аа н̃аан̣асамбаяуд̇д̇ам̣ сасан̇кааригам̣, н̃аан̣авиббаяуд̇д̇ам̣ асан̇кааригам̣, н̃аан̣авиббаяуд̇д̇ам̣ сасан̇каариган̃жаад̇и. звам̣ н̃аан̣авибхад̇д̇ид̣̇зсанаавасзна жад̇уб̣б̣ид̇хз банзд̇асмим̣ асан̇каарасасан̇кааравибхад̇д̇ид̇о жад̇д̇аари асан̇кааригаани жад̇д̇аари сасан̇кааригаанийд̇и адтзва гусалажид̇д̇аани хонд̇и. д̇аани яаат̇аавад̇о н̃ад̇ваа бхаг̇аваа саб̣б̣ан̃н̃уу г̇ан̣ийваро мунисздто аажигкад̇и д̣̇зсзд̇и бан̃н̃абзд̇и бадтабзд̇и виварад̇и вибхаж̇ад̇и уд̇д̇аанийгарод̇ийд̇и.
Saṅkhepato panetaṃ sabbampi kāmāvacarakusalacittaṃ ‘citta’nti karitvā cittavicittaṭṭhena ekameva hoti. Vedanāvasena somanassasahagataṃ upekkhāsahagatanti duvidhaṃ hoti. Ñāṇavibhattidesanāvasena catubbidhaṃ hoti. Somanassasahagataṃ ñāṇasampayuttaṃ asaṅkhārikaṃ mahācittañhi upekkhāsahagataṃ ñāṇasampayuttaṃ asaṅkhārikaṃ mahācittañca ñāṇasampayuttaṭṭhena asaṅkhārikaṭṭhena ca ekameva hoti. Tathā ñāṇasampayuttaṃ sasaṅkhārikaṃ, ñāṇavippayuttaṃ asaṅkhārikaṃ, ñāṇavippayuttaṃ sasaṅkhārikañcāti. Evaṃ ñāṇavibhattidesanāvasena catubbidhe panetasmiṃ asaṅkhārasasaṅkhāravibhattito cattāri asaṅkhārikāni cattāri sasaṅkhārikānīti aṭṭheva kusalacittāni honti. Tāni yāthāvato ñatvā bhagavā sabbaññū gaṇīvaro muniseṭṭho ācikkhati deseti paññapeti paṭṭhapeti vivarati vibhajati uttānīkarotīti.
адтасаалинияаа д̇хаммасан̇г̇ахадтагат̇ааяа
Aṭṭhasāliniyā dhammasaṅgahaṭṭhakathāya
гаамааважарагусаланид̣̇д̣̇зсо самад̇д̇о.
Kāmāvacarakusalaniddeso samatto.
