| Library / Tipiṭaka / ཏིཔིཊཀ • Tipiṭaka / དྷམྨསངྒཎི-ཨཊྛཀཐཱ • Dhammasaṅgaṇi-aṭṭhakathā |
པུཉྙཀིརིཡཝཏྠཱདིཀཐཱ
Puññakiriyavatthādikathā
ཏཱནི སབྦཱནིཔི དསཧི པུཉྙཀིརིཡཝཏྠཱུཧི དཱིཔེཏབྦཱནི། ཀཐཾ? དཱནམཡཾ པུཉྙཀིརིཡཝཏྠུ, སཱིལམཡཾ… བྷཱཝནཱམཡཾ… ཨཔཙིཏིསཧགཏཾ… ཝེཡྻཱཝཙྩསཧགཏཾ… པཏྟཱནུཔྤདཱནཾ… ཨབྦྷནུམོདནཾ… དེསནཱམཡཾ… སཝནམཡཾ… དིཊྛིཛུཀམྨཾ པུཉྙཀིརིཡཝཏྠཱུཏི ཨིམཱནི དས པུཉྙཀིརིཡཝཏྠཱུནི ནཱམ། ཏཏྠ དཱནམེཝ དཱནམཡཾ། པུཉྙཀིརིཡཱ ཙ སཱ ཏེསཾ ཏེསཾ ཨཱནིསཾསཱནཾ ཝཏྠུ ཙཱཏི པུཉྙཀིརིཡཝཏྠུ། སེསེསུཔི ཨེསེཝ ནཡོ།
Tāni sabbānipi dasahi puññakiriyavatthūhi dīpetabbāni. Kathaṃ? Dānamayaṃ puññakiriyavatthu, sīlamayaṃ… bhāvanāmayaṃ… apacitisahagataṃ… veyyāvaccasahagataṃ… pattānuppadānaṃ… abbhanumodanaṃ… desanāmayaṃ… savanamayaṃ… diṭṭhijukammaṃ puññakiriyavatthūti imāni dasa puññakiriyavatthūni nāma. Tattha dānameva dānamayaṃ. Puññakiriyā ca sā tesaṃ tesaṃ ānisaṃsānaṃ vatthu cāti puññakiriyavatthu. Sesesupi eseva nayo.
ཏཏྠ ཙཱིཝརཱདཱིསུ ཙཏཱུསུ པཙྩཡེསུ, རཱུཔཱདཱིསུ ཝཱ ཚསུ ཨཱརམྨཎེསུ, ཨནྣཱདཱིསུ ཝཱ དསསུ དཱནཝཏྠཱུསུ, ཏཾ ཏཾ དེནྟསྶ ཏེསཾ ཏེསཾ ཨུཔྤཱདནཏོ པཊྛཱཡ པུབྦབྷཱགེ, པརིཙྩཱགཀཱལེ, པཙྪཱ སོམནསྶཙིཏྟེན ཨནུསྶརཎཀཱལེ ཙཱཏི ཏཱིསུ ཀཱལེསུ པཝཏྟཱ ཙེཏནཱ ‘དཱནམཡཾ པུཉྙཀིརིཡཝཏྠུ’ ནཱམ།
Tattha cīvarādīsu catūsu paccayesu, rūpādīsu vā chasu ārammaṇesu, annādīsu vā dasasu dānavatthūsu, taṃ taṃ dentassa tesaṃ tesaṃ uppādanato paṭṭhāya pubbabhāge, pariccāgakāle, pacchā somanassacittena anussaraṇakāle cāti tīsu kālesu pavattā cetanā ‘dānamayaṃ puññakiriyavatthu’ nāma.
པཉྩསཱིལཾ ཨཊྛསཱིལཾ དསསཱིལཾ སམཱདིཡནྟསྶ, ‘པབྦཛིསྶཱམཱི’ཏི ཝིཧཱརཾ གཙྪནྟསྶ, པབྦཛནྟསྶ, ‘མནོརཐཾ མཏྠཀཾ པཱཔེཏྭཱ པབྦཛིཏོ ཝཏ’མྷི, ‘སཱདྷུ སཱདྷཱུ’ཏི ཨཱཝཛྫེནྟསྶ, པཱཏིམོཀྑཾ སཾཝརནྟསྶ, ཙཱིཝརཱདཡོ པཙྩཡེ པཙྩཝེཀྑནྟསྶ, ཨཱཔཱཐགཏེསུ རཱུཔཱདཱིསུ ཙཀྑུདྭཱརཱདཱིནི སཾཝརནྟསྶ , ཨཱཛཱིཝཾ སོདྷེནྟསྶ ཙ པཝཏྟཱ ཙེཏནཱ ‘སཱིལམཡཾ པུཉྙཀིརིཡཝཏྠུ’ ནཱམ།
Pañcasīlaṃ aṭṭhasīlaṃ dasasīlaṃ samādiyantassa, ‘pabbajissāmī’ti vihāraṃ gacchantassa, pabbajantassa, ‘manorathaṃ matthakaṃ pāpetvā pabbajito vata’mhi, ‘sādhu sādhū’ti āvajjentassa, pātimokkhaṃ saṃvarantassa, cīvarādayo paccaye paccavekkhantassa, āpāthagatesu rūpādīsu cakkhudvārādīni saṃvarantassa , ājīvaṃ sodhentassa ca pavattā cetanā ‘sīlamayaṃ puññakiriyavatthu’ nāma.
པཊིསམྦྷིདཱཡཾ ཝུཏྟེན ཝིཔསྶནཱམགྒེན ཙཀྑུཾ ཨནིཙྩཏོ དུཀྑཏོ ཨནཏྟཏོ བྷཱཝེནྟསྶ…པེ॰… མནཾ… རཱུཔེ…པེ॰… དྷམྨེ… ཙཀྑུཝིཉྙཱཎཾ…པེ॰… མནོཝིཉྙཱཎཾ,… ཙཀྑུསམྥསྶཾ…པེ॰… མནོསམྥསྶཾ, ཙཀྑུསམྥསྶཛཾ ཝེདནཾ…པེ॰… མནོསམྥསྶཛཾ ཝེདནཾ, …པེ॰… རཱུཔསཉྙཾ…པེ॰… ཛརཱམརཎཾ ཨནིཙྩཏོ དུཀྑཏོ ཨནཏྟཏོ བྷཱཝེནྟསྶ པཝཏྟཱ ཙེཏནཱ, ཨཊྛཏིཾསཱཡ ཝཱ ཨཱརམྨཎེསུ ཨཔྤནཾ ཨཔྤཏྟཱ སབྦཱཔི ཙེཏནཱ ‘བྷཱཝནཱམཡཾ པུཉྙཀིརིཡཝཏྠུ’ ནཱམ།
Paṭisambhidāyaṃ vuttena vipassanāmaggena cakkhuṃ aniccato dukkhato anattato bhāventassa…pe… manaṃ… rūpe…pe… dhamme… cakkhuviññāṇaṃ…pe… manoviññāṇaṃ,… cakkhusamphassaṃ…pe… manosamphassaṃ, cakkhusamphassajaṃ vedanaṃ…pe… manosamphassajaṃ vedanaṃ, …pe… rūpasaññaṃ…pe… jarāmaraṇaṃ aniccato dukkhato anattato bhāventassa pavattā cetanā, aṭṭhatiṃsāya vā ārammaṇesu appanaṃ appattā sabbāpi cetanā ‘bhāvanāmayaṃ puññakiriyavatthu’ nāma.
མཧལླཀཾ པན དིསྭཱ པཙྩུགྒམནཔཏྟཙཱིཝརཔཊིགྒཧཎཨབྷིཝཱདནམགྒསམྤདཱནཱདིཝསེན ‘ཨཔཙིཏིསཧགཏཾ’ ཝེདིཏབྦཾ།
Mahallakaṃ pana disvā paccuggamanapattacīvarapaṭiggahaṇaabhivādanamaggasampadānādivasena ‘apacitisahagataṃ’ veditabbaṃ.
ཝུཌྜྷཏརཱནཾ ཝཏྟཔྤཊིཔཏྟིཀརཎཝསེན གཱམཾ པིཎྜཱཡ པཝིཊྛཾ བྷིཀྑུཾ དིསྭཱ པཏྟཾ གཧེཏྭཱ གཱམེ བྷིཀྑཾ སམཱདཔེཏྭཱ ཨུཔསཾཧརཎཝསེན, ‘གཙྪ བྷིཀྑཱུནཾ པཏྟཾ ཨཱཧརཱ’ཏི སུཏྭཱ ཝེགེན གནྟྭཱ པཏྟཱཧརཎཱདིཝསེན ཙ ཀཱཡཝེཡྻཱཝཊིཀཀཱལེ ‘ཝེཡྻཱཝཙྩསཧགཏཾ’ ཝེདིཏབྦཾ།
Vuḍḍhatarānaṃ vattappaṭipattikaraṇavasena gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ samādapetvā upasaṃharaṇavasena, ‘gaccha bhikkhūnaṃ pattaṃ āharā’ti sutvā vegena gantvā pattāharaṇādivasena ca kāyaveyyāvaṭikakāle ‘veyyāvaccasahagataṃ’ veditabbaṃ.
དཱནཾ དཏྭཱ གནྡྷཱདཱིཧི པཱུཛཾ ཀཏྭཱ ‘ཨསུཀསྶ ནཱམ པཏྟི ཧོཏཱུ’ཏི ཝཱ, ‘སབྦསཏྟཱནཾ ཧོཏཱུ’ཏི ཝཱ པཏྟིཾ དདཏོ ‘པཏྟཱནུཔྤདཱནཾ’ ཝེདིཏབྦཾ། ཀིཾ པནེཝཾ པཏྟིཾ དདཏོ པུཉྙཀྑཡོ ཧོཏཱིཏི? ན ཧོཏི། ཡཐཱ པན ཨེཀཾ དཱིཔཾ ཛཱལེཏྭཱ ཏཏོ དཱིཔསཧསྶཾ ཛཱལེནྟསྶ པཋམདཱིཔོ ཁཱིཎོཏི ན ཝཏྟབྦོ; པུརིམཱལོཀེན པན སདྡྷིཾ པཙྪིམཱལོཀོ ཨེཀཏོ ཧུཏྭཱ ཨཏིམཧཱ ཧོཏི། ཨེཝམེཝ པཏྟིཾ དདཏོ པརིཧཱནི ནཱམ ནཏྠི། ཝུཌྜྷིཡེཝ པན ཧོཏཱིཏི ཝེདིཏབྦོ།
Dānaṃ datvā gandhādīhi pūjaṃ katvā ‘asukassa nāma patti hotū’ti vā, ‘sabbasattānaṃ hotū’ti vā pattiṃ dadato ‘pattānuppadānaṃ’ veditabbaṃ. Kiṃ panevaṃ pattiṃ dadato puññakkhayo hotīti? Na hoti. Yathā pana ekaṃ dīpaṃ jāletvā tato dīpasahassaṃ jālentassa paṭhamadīpo khīṇoti na vattabbo; purimālokena pana saddhiṃ pacchimāloko ekato hutvā atimahā hoti. Evameva pattiṃ dadato parihāni nāma natthi. Vuḍḍhiyeva pana hotīti veditabbo.
པརེཧི དིནྣཱཡ པཏྟིཡཱ ཝཱ ཨཉྙཱཡ ཝཱ པུཉྙཀིརིཡཱཡ ‘སཱདྷུ སཱདྷཱུ’ཏི ཨནུམོདནཝསེན ‘ཨབྦྷནུམོདནཾ’ ཝེདིཏབྦཾ།
Parehi dinnāya pattiyā vā aññāya vā puññakiriyāya ‘sādhu sādhū’ti anumodanavasena ‘abbhanumodanaṃ’ veditabbaṃ.
ཨེཀོ ‘ཨེཝཾ མཾ དྷམྨཀཐིཀོཏི མཾ ཛཱནིསྶནྟཱི’ཏི ཨིཙྪཱཡ ཋཏྭཱ ལཱབྷགརུཀོ ཧུཏྭཱ དེསེཏི, ཏཾ ན མཧཔྥལཾ། ཨེཀོ ཨཏྟནོ པགུཎཾ དྷམྨཾ ཨཔཙྩཱསཱིསམཱནོ ཝིམུཏྟཱཡཏནསཱིསེན པརེསཾ དེསེཏི, ཨིདཾ ‘དེསནཱམཡཾ པུཉྙཀིརིཡཝཏྠུ’ ནཱམ།
Eko ‘evaṃ maṃ dhammakathikoti maṃ jānissantī’ti icchāya ṭhatvā lābhagaruko hutvā deseti, taṃ na mahapphalaṃ. Eko attano paguṇaṃ dhammaṃ apaccāsīsamāno vimuttāyatanasīsena paresaṃ deseti, idaṃ ‘desanāmayaṃ puññakiriyavatthu’ nāma.
ཨེཀོ སུཎནྟོ ‘ཨིཏི མཾ སདྡྷོཏི ཛཱནིསྶནྟཱི’ཏི སུཎཱཏི, ཏཾ ན མཧཔྥལཾ། ཨེཀོ ‘ཨེཝཾ མེ མཧཔྥལཾ བྷཝིསྶཏཱི’ཏི ཧིཏཕརཎེན མུདུཙིཏྟེན དྷམྨཾ སུཎཱཏི, ཨིདཾ ‘སཝནམཡཾ པུཉྙཀིརིཡཝཏྠུ’ ནཱམ།
Eko suṇanto ‘iti maṃ saddhoti jānissantī’ti suṇāti, taṃ na mahapphalaṃ. Eko ‘evaṃ me mahapphalaṃ bhavissatī’ti hitapharaṇena muducittena dhammaṃ suṇāti, idaṃ ‘savanamayaṃ puññakiriyavatthu’ nāma.
དིཊྛིཾ ཨུཛུཾ ཀརོནྟསྶ ‘དིཊྛིཛུཀམྨཾ པུཉྙཀིརིཡཝཏྠུ’ ནཱམ། དཱིགྷབྷཱཎཀཱ པནཱཧུ – ‘དིཊྛིཛུཀམྨཾ སབྦེསཾ ནིཡམལཀྑཎཾ, ཡཾཀིཉྩི པུཉྙཾ ཀརོནྟསྶ ཧི དིཊྛིཡཱ ཨུཛུཀབྷཱཝེནེཝ མཧཔྥལཾ ཧོཏཱི’ཏི།
Diṭṭhiṃ ujuṃ karontassa ‘diṭṭhijukammaṃ puññakiriyavatthu’ nāma. Dīghabhāṇakā panāhu – ‘diṭṭhijukammaṃ sabbesaṃ niyamalakkhaṇaṃ, yaṃkiñci puññaṃ karontassa hi diṭṭhiyā ujukabhāveneva mahapphalaṃ hotī’ti.
ཨེཏེསུ པན པུཉྙཀིརིཡཝཏྠཱུསུ དཱནམཡཾ ཏཱཝ ‘དཱནཾ དསྶཱམཱི’ཏི ཙིནྟེནྟསྶ ཨུཔྤཛྫཏི, དཱནཾ དདཏོ ཨུཔྤཛྫཏི, ‘དིནྣཾ མེ’ཏི པཙྩཝེཀྑནྟསྶ ཨུཔྤཛྫཏི། ཨེཝཾ པུབྦཙེཏནཾ མུཉྩནཙེཏནཾ ཨཔརཙེཏནནྟི ཏིསྶོཔི ཙེཏནཱ ཨེཀཏོ ཀཏྭཱ ‘དཱནམཡཾ པུཉྙཀིརིཡཝཏྠུ’ ནཱམ ཧོཏི། སཱིལམཡམྤི ‘སཱིལཾ པཱུརེསྶཱམཱི’ཏི ཙིནྟེནྟསྶ ཨུཔྤཛྫཏི, སཱིལཔཱུརཎཀཱལེ ཨུཔྤཛྫཏི, ‘པཱུརིཏཾ མེ’ཏི པཙྩཝེཀྑནྟསྶ ཨུཔྤཛྫཏི། ཏཱ སབྦཱཔི ཨེཀཏོ ཀཏྭཱ ‘སཱིལམཡཾ པུཉྙཀིརིཡཝཏྠུ’ ནཱམ ཧོཏི…པེ॰… དིཊྛིཛུཀམྨམྤི ‘དིཊྛིཾ ཨུཛུཀཾ ཀརིསྶཱམཱི’ཏི ཙིནྟེནྟསྶ ཨུཔྤཛྫཏི, དིཊྛིཾ ཨུཛུཾ ཀརོནྟསྶ ཨུཔྤཛྫཏི, ‘དིཊྛི མེ ཨུཛུཀཱ ཀཏཱ’ཏི པཙྩཝེཀྑནྟསྶ ཨུཔྤཛྫཏི། ཏཱ སབྦཱཔི ཨེཀཏོ ཀཏྭཱ ‘དིཊྛིཛུཀམྨཾ པུཉྙཀིརིཡཝཏྠུ’ ནཱམ ཧོཏི།
Etesu pana puññakiriyavatthūsu dānamayaṃ tāva ‘dānaṃ dassāmī’ti cintentassa uppajjati, dānaṃ dadato uppajjati, ‘dinnaṃ me’ti paccavekkhantassa uppajjati. Evaṃ pubbacetanaṃ muñcanacetanaṃ aparacetananti tissopi cetanā ekato katvā ‘dānamayaṃ puññakiriyavatthu’ nāma hoti. Sīlamayampi ‘sīlaṃ pūressāmī’ti cintentassa uppajjati, sīlapūraṇakāle uppajjati, ‘pūritaṃ me’ti paccavekkhantassa uppajjati. Tā sabbāpi ekato katvā ‘sīlamayaṃ puññakiriyavatthu’ nāma hoti…pe… diṭṭhijukammampi ‘diṭṭhiṃ ujukaṃ karissāmī’ti cintentassa uppajjati, diṭṭhiṃ ujuṃ karontassa uppajjati, ‘diṭṭhi me ujukā katā’ti paccavekkhantassa uppajjati. Tā sabbāpi ekato katvā ‘diṭṭhijukammaṃ puññakiriyavatthu’ nāma hoti.
སུཏྟེ པན ཏཱིཎིཡེཝ པུཉྙཀིརིཡཝཏྠཱུནི ཨཱགཏཱནི། ཏེསུ ཨིཏརེསམྤི སངྒཧོ ཝེདིཏབྦོ། ཨཔཙིཏིཝེཡྻཱཝཙྩཱནི ཧི སཱིལམཡེ སངྒཧཾ གཙྪནྟི། པཏྟཱནུཔྤདཱནཨབྦྷནུམོདནཱནི དཱནམཡེ། དེསནཱསཝནདིཊྛིཛུཀམྨཱནི བྷཱཝནཱམཡེ། ཡེ པན ‘དིཊྛིཛུཀམྨཾ སབྦེསཾ ནིཡམལཀྑཎ’ནྟི ཝདནྟི ཏེསཾ ཏཾ ཏཱིསུཔི སངྒཧཾ གཙྪཏི། ཨེཝམེཏཱནི སངྑེཔཏོ ཏཱིཎི ཧུཏྭཱ ཝིཏྠཱརཏོ དས ཧོནྟི།
Sutte pana tīṇiyeva puññakiriyavatthūni āgatāni. Tesu itaresampi saṅgaho veditabbo. Apacitiveyyāvaccāni hi sīlamaye saṅgahaṃ gacchanti. Pattānuppadānaabbhanumodanāni dānamaye. Desanāsavanadiṭṭhijukammāni bhāvanāmaye. Ye pana ‘diṭṭhijukammaṃ sabbesaṃ niyamalakkhaṇa’nti vadanti tesaṃ taṃ tīsupi saṅgahaṃ gacchati. Evametāni saṅkhepato tīṇi hutvā vitthārato dasa honti.
ཏེསུ ‘དཱནཾ དསྶཱམཱི’ཏི ཙིནྟེནྟོ ཨཊྛནྣཾ ཀཱམཱཝཙརཀུསལཙིཏྟཱནཾ ཨཉྙཏརེནེཝ ཙིནྟེཏི; དདམཱནོཔི ཏེསཾཡེཝ ཨཉྙཏརེན དེཏི; ‘དཱནཾ མེ དིནྣ’ནྟི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘སཱིལཾ པཱུརེསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི; སཱིལཾ པཱུརེནྟོཔི ཏེསཾཡེཝ ཨཉྙཏརེན པཱུརེཏི, ‘སཱིལཾ མེ པཱུརིཏ’ནྟི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘བྷཱཝནཾ བྷཱཝེསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི; བྷཱཝེནྟོཔི ཏེསཾཡེཝ ཨཉྙཏརེན བྷཱཝེཏི; ‘བྷཱཝནཱ མེ བྷཱཝིཏཱ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི།
Tesu ‘dānaṃ dassāmī’ti cintento aṭṭhannaṃ kāmāvacarakusalacittānaṃ aññatareneva cinteti; dadamānopi tesaṃyeva aññatarena deti; ‘dānaṃ me dinna’nti paccavekkhantopi tesaṃyeva aññatarena paccavekkhati. ‘Sīlaṃ pūressāmī’ti cintentopi tesaṃyeva aññatarena cinteti; sīlaṃ pūrentopi tesaṃyeva aññatarena pūreti, ‘sīlaṃ me pūrita’nti paccavekkhantopi tesaṃyeva aññatarena paccavekkhati. ‘Bhāvanaṃ bhāvessāmī’ti cintentopi tesaṃyeva aññatarena cinteti; bhāventopi tesaṃyeva aññatarena bhāveti; ‘bhāvanā me bhāvitā’ti paccavekkhantopi tesaṃyeva aññatarena paccavekkhati.
‘ཛེཊྛཱཔཙིཏིཀམྨཾ ཀརིསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, ཀརོནྟོཔི ཏེསཾཡེཝ ཨཉྙཏརེན ཀརོཏི, ‘ཀཏཾ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘ཀཱཡཝེཡྻཱཝཊིཀཀམྨཾ ཀརིསྶཱམཱི’ཏི ཙིནྟེནྟོཔི, ཀརོནྟོཔི, ‘ཀཏཾ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘པཏྟིཾ དསྶཱམཱི’ཏི ཙིནྟེནྟོཔི, དདནྟོཔི, ‘དིནྣཾ མེ’ཏི པཙྩཝེཀྑནྟོཔི, ‘པཏྟིཾ ཝཱ སེསཀུསལཾ ཝཱ ཨནུམོདིསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི; ཨནུམོདནྟོཔི ཏེསཾཡེཝ ཨཉྙཏརེན ཨནུམོདཏི, ‘ཨནུམོདིཏཾ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘དྷམྨཾ དེསེསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, དེསེནྟོཔི ཏེསཾཡེཝ ཨཉྙཏརེན དེསེཏི, ‘དེསིཏོ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘དྷམྨཾ སོསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, སུཎནྟོཔི ཏེསཾཡེཝ ཨཉྙཏརེན སུཎཱཏི, ‘སུཏོ མེ’ཏི པཙྩཝེཀྑནྟོཔི ཏེསཾཡེཝ ཨཉྙཏརེན པཙྩཝེཀྑཏི། ‘དིཊྛིཾ ཨུཛུཀཾ ཀརིསྶཱམཱི’ཏི ཙིནྟེནྟོཔི ཏེསཾཡེཝ ཨཉྙཏརེན ཙིནྟེཏི, ཨུཛུཾ ཀརོནྟོ པན ཙཏུནྣཾ ཉཱཎསམྤཡུཏྟཱནཾ ཨཉྙཏརེན ཀརོཏི, ‘དིཊྛི མེ ཨུཛུཀཱ ཀཏཱ’ཏི པཙྩཝེཀྑནྟོ ཨཊྛནྣཾ ཨཉྙཏརེན པཙྩཝེཀྑཏི།
‘Jeṭṭhāpacitikammaṃ karissāmī’ti cintentopi tesaṃyeva aññatarena cinteti, karontopi tesaṃyeva aññatarena karoti, ‘kataṃ me’ti paccavekkhantopi tesaṃyeva aññatarena paccavekkhati. ‘Kāyaveyyāvaṭikakammaṃ karissāmī’ti cintentopi, karontopi, ‘kataṃ me’ti paccavekkhantopi tesaṃyeva aññatarena paccavekkhati. ‘Pattiṃ dassāmī’ti cintentopi, dadantopi, ‘dinnaṃ me’ti paccavekkhantopi, ‘pattiṃ vā sesakusalaṃ vā anumodissāmī’ti cintentopi tesaṃyeva aññatarena cinteti; anumodantopi tesaṃyeva aññatarena anumodati, ‘anumoditaṃ me’ti paccavekkhantopi tesaṃyeva aññatarena paccavekkhati. ‘Dhammaṃ desessāmī’ti cintentopi tesaṃyeva aññatarena cinteti, desentopi tesaṃyeva aññatarena deseti, ‘desito me’ti paccavekkhantopi tesaṃyeva aññatarena paccavekkhati. ‘Dhammaṃ sossāmī’ti cintentopi tesaṃyeva aññatarena cinteti, suṇantopi tesaṃyeva aññatarena suṇāti, ‘suto me’ti paccavekkhantopi tesaṃyeva aññatarena paccavekkhati. ‘Diṭṭhiṃ ujukaṃ karissāmī’ti cintentopi tesaṃyeva aññatarena cinteti, ujuṃ karonto pana catunnaṃ ñāṇasampayuttānaṃ aññatarena karoti, ‘diṭṭhi me ujukā katā’ti paccavekkhanto aṭṭhannaṃ aññatarena paccavekkhati.
ཨིམསྨིཾ ཋཱནེ ཙཏྟཱརི ཨནནྟཱནི ནཱམ གཧིཏཱནི། ཙཏྟཱརི ཧི ཨནནྟཱནི – ཨཱཀཱསོ ཨནནྟོ, ཙཀྐཝཱལཱ༹ནི ཨནནྟཱནི, སཏྟནིཀཱཡོ ཨནནྟོ, བུདྡྷཉྙཱཎཾ ཨནནྟཾ། ཨཱཀཱསསྶ ཧི པུརཏྠིམཱཡ དིསཱཡ ཝཱ པཙྪིམུཏྟརདཀྑིཎཱསུ ཝཱ ཨེཏྟཀཱནི ཝཱ ཡོཛནསཏཱནི ཨེཏྟཀཱནི ཝཱ ཡོཛནསཧསྶཱནཱིཏི པརིཙྪེདོ ནཏྠི། སིནེརུམཏྟམྤི ཨཡོཀཱུཊཾ པཐཝིཾ དྭིདྷཱ ཀཏྭཱ ཧེཊྛཱ ཁིཏྟཾ བྷསྶེཐེཝ, ནོ པཏིཊྛཾ ལབྷེཐ, ཨེཝཾ ཨཱཀཱསཾ ཨནནྟཾ ནཱམ།
Imasmiṃ ṭhāne cattāri anantāni nāma gahitāni. Cattāri hi anantāni – ākāso ananto, cakkavāḷāni anantāni, sattanikāyo ananto, buddhaññāṇaṃ anantaṃ. Ākāsassa hi puratthimāya disāya vā pacchimuttaradakkhiṇāsu vā ettakāni vā yojanasatāni ettakāni vā yojanasahassānīti paricchedo natthi. Sinerumattampi ayokūṭaṃ pathaviṃ dvidhā katvā heṭṭhā khittaṃ bhassetheva, no patiṭṭhaṃ labhetha, evaṃ ākāsaṃ anantaṃ nāma.
ཙཀྐཝཱལཱ༹ནམྤི སཏེཧི ཝཱ སཧསྶེཧི ཝཱ པརིཙྪེདོ ནཏྠི། སཙེཔི ཧི ཨཀནིཊྛབྷཝནེ ནིབྦཏྟཱ, དལ༹ྷཐཱམདྷནུགྒཧསྶ ལཧུཀེན སརེན ཏིརིཡཾ ཏཱལཙྪཱཡཾ ཨཏིཀྐམནམཏྟེན ཀཱལེན ཙཀྐཝཱལ༹སཏསཧསྶཾ ཨཏིཀྐམནསམཏྠེན ཛཝེན སམནྣཱགཏཱ ཙཏྟཱརོ མཧཱབྲཧྨཱནོ ‘ཙཀྐཝཱལ༹པརིཡནྟཾ པསྶིསྶཱམཱ’ཏི ཏེན ཛཝེན དྷཱཝེཡྻུཾ, ཙཀྐཝཱལ༹པརིཡནྟཾ ཨདིསྭཱཝ པརིནིབྦཱཡེཡྻུཾ, ཨེཝཾ ཙཀྐཝཱལཱ༹ནི ཨནནྟཱནི ནཱམ།
Cakkavāḷānampi satehi vā sahassehi vā paricchedo natthi. Sacepi hi akaniṭṭhabhavane nibbattā, daḷhathāmadhanuggahassa lahukena sarena tiriyaṃ tālacchāyaṃ atikkamanamattena kālena cakkavāḷasatasahassaṃ atikkamanasamatthena javena samannāgatā cattāro mahābrahmāno ‘cakkavāḷapariyantaṃ passissāmā’ti tena javena dhāveyyuṃ, cakkavāḷapariyantaṃ adisvāva parinibbāyeyyuṃ, evaṃ cakkavāḷāni anantāni nāma.
ཨེཏྟཀེསུ པན ཙཀྐཝཱལེ༹སུ ཨུདཀཊྛཀཐལཊྛཀསཏྟཱནཾ པམཱཎཾ ནཏྠི། ཨེཝཾ སཏྟནིཀཱཡོ ཨནནྟོ ནཱམ། ཏཏོཔི བུདྡྷཉཱཎཾ ཨནནྟམེཝ།
Ettakesu pana cakkavāḷesu udakaṭṭhakathalaṭṭhakasattānaṃ pamāṇaṃ natthi. Evaṃ sattanikāyo ananto nāma. Tatopi buddhañāṇaṃ anantameva.
ཨེཝཾ ཨཔརིམཱཎེསུ ཙཀྐཝཱལེ༹སུ ཨཔརིམཱཎཱནཾ སཏྟཱནཾ ཀཱམཱཝཙརསོམནསྶསཧགཏཉཱཎསམྤཡུཏྟཨསངྑཱརིཀཀུསལཙིཏྟཱནི ཨེཀསྶ བཧཱུནི ཨུཔྤཛྫནྟི། བཧཱུནམྤི བཧཱུནི ཨུཔྤཛྫནྟི། ཏཱནི སབྦཱནིཔི ཀཱམཱཝཙརཊྛེན སོམནསྶསཧགཏཊྛེན ཉཱཎསམྤཡུཏྟཊྛེན ཨསངྑཱརིཀཊྛེན ཨེཀཏྟཾ གཙྪནྟི། ཨེཀམེཝ སོམནསྶསཧགཏཾ ཏིཧེཏུཀཾ ཨསངྑཱརིཀཾ མཧཱཙིཏྟཾ ཧོཏི། ཏཐཱ སསངྑཱརིཀཾ མཧཱཙིཏྟཾ…པེ॰… ཏཐཱ ཨུཔེཀྑཱསཧགཏཾ ཉཱཎཝིཔྤཡུཏྟཾ དྭིཧེཏུཀཾ སསངྑཱརིཀཙིཏྟནྟི། ཨེཝཾ སབྦཱནིཔི ཨཔརིམཱཎེསུ ཙཀྐཝཱལེ༹སུ ཨཔརིམཱཎཱནཾ སཏྟཱནཾ ཨུཔྤཛྫམཱནཱནི ཀཱམཱཝཙརཀུསལཙིཏྟཱནི སམྨཱསམྦུདྡྷོ མཧཱཏུལཱཡ ཏུལཡམཱནོ ཝིཡ, ཏུམྦེ པཀྑིཔིཏྭཱ མིནམཱནོ ཝིཡ, སབྦཉྙུཏཉྙཱཎེན པརིཙྪིནྡིཏྭཱ ‘ཨཊྛེཝེཏཱནཱི’ཏི སརིཀྑཊྛེན ཨཊྛེཝ ཀོཊྛཱསེ ཀཏྭཱ དསྶེསི།
Evaṃ aparimāṇesu cakkavāḷesu aparimāṇānaṃ sattānaṃ kāmāvacarasomanassasahagatañāṇasampayuttaasaṅkhārikakusalacittāni ekassa bahūni uppajjanti. Bahūnampi bahūni uppajjanti. Tāni sabbānipi kāmāvacaraṭṭhena somanassasahagataṭṭhena ñāṇasampayuttaṭṭhena asaṅkhārikaṭṭhena ekattaṃ gacchanti. Ekameva somanassasahagataṃ tihetukaṃ asaṅkhārikaṃ mahācittaṃ hoti. Tathā sasaṅkhārikaṃ mahācittaṃ…pe… tathā upekkhāsahagataṃ ñāṇavippayuttaṃ dvihetukaṃ sasaṅkhārikacittanti. Evaṃ sabbānipi aparimāṇesu cakkavāḷesu aparimāṇānaṃ sattānaṃ uppajjamānāni kāmāvacarakusalacittāni sammāsambuddho mahātulāya tulayamāno viya, tumbe pakkhipitvā minamāno viya, sabbaññutaññāṇena paricchinditvā ‘aṭṭhevetānī’ti sarikkhaṭṭhena aṭṭheva koṭṭhāse katvā dassesi.
པུན ཨིམསྨིཾ ཋཱནེ ཚབྦིདྷེན པུཉྙཱཡཱུཧནཾ ནཱམ གཧིཏཾ། པུཉྙཉྷི ཨཏྠི སཡཾཀཱརཾ ཨཏྠི པརཾཀཱརཾ, ཨཏྠི སཱཧཏྠིཀཾ ཨཏྠི ཨཱཎཏྟིཀཾ, ཨཏྠི སམྤཛཱནཀཏཾ ཨཏྠི ཨསམྤཛཱནཀཏནྟི།
Puna imasmiṃ ṭhāne chabbidhena puññāyūhanaṃ nāma gahitaṃ. Puññañhi atthi sayaṃkāraṃ atthi paraṃkāraṃ, atthi sāhatthikaṃ atthi āṇattikaṃ, atthi sampajānakataṃ atthi asampajānakatanti.
ཏཏྠ ཨཏྟནོ དྷམྨཏཱཡ ཀཏཾ ‘སཡཾཀཱརཾ’ ནཱམ། པརཾ ཀརོནྟཾ དིསྭཱ ཀཏཾ ‘པརཾཀཱརཾ’ ནཱམ། སཧཏྠེན ཀཏཾ ‘སཱཧཏྠིཀཾ’ ནཱམ། ཨཱཎཱཔེཏྭཱ ཀཱརིཏཾ ‘ཨཱཎཏྟིཀཾ’ ནཱམ། ཀམྨཉྩ ཕལཉྩ སདྡཧིཏྭཱ ཀཏཾ ‘སམྤཛཱནཀཏཾ’ ནཱམ། ཀམྨམྤི ཕལམྤི ཨཛཱནིཏྭཱ ཀཏཾ ‘ཨསམྤཛཱནཀཏཾ’ ནཱམ། ཏེསུ སཡཾཀཱརཾ ཀརོནྟོཔི ཨིམེསཾ ཨཊྛནྣཾ ཀུསལཙིཏྟཱནཾ ཨཉྙཏརེནེཝ ཀརོཏི། པརཾཀཱརཾ ཀརོནྟོཔི, སཧཏྠེན ཀརོནྟོཔི, ཨཱཎཱཔེཏྭཱ ཀརོནྟོཔི ཨིམེསཾ ཨཊྛནྣཾ ཀུསལཙིཏྟཱནཾ ཨཉྙཏརེནེཝ ཀརོཏི། སམྤཛཱནཀརཎཾ པན ཙཏཱུཧི ཉཱཎསམྤཡུཏྟེཧི ཧོཏི། ཨསམྤཛཱནཀརཎཾ ཙཏཱུཧི ཉཱཎཝིཔྤཡུཏྟེཧི།
Tattha attano dhammatāya kataṃ ‘sayaṃkāraṃ’ nāma. Paraṃ karontaṃ disvā kataṃ ‘paraṃkāraṃ’ nāma. Sahatthena kataṃ ‘sāhatthikaṃ’ nāma. Āṇāpetvā kāritaṃ ‘āṇattikaṃ’ nāma. Kammañca phalañca saddahitvā kataṃ ‘sampajānakataṃ’ nāma. Kammampi phalampi ajānitvā kataṃ ‘asampajānakataṃ’ nāma. Tesu sayaṃkāraṃ karontopi imesaṃ aṭṭhannaṃ kusalacittānaṃ aññatareneva karoti. Paraṃkāraṃ karontopi, sahatthena karontopi, āṇāpetvā karontopi imesaṃ aṭṭhannaṃ kusalacittānaṃ aññatareneva karoti. Sampajānakaraṇaṃ pana catūhi ñāṇasampayuttehi hoti. Asampajānakaraṇaṃ catūhi ñāṇavippayuttehi.
ཨཔརཱཔི ཨིམསྨིཾ ཋཱནེ ཙཏསྶོ དཀྑིཎཱཝིསུདྡྷིཡོ གཧིཏཱ – པཙྩཡཱནཾ དྷམྨིཀཏཱ, ཙེཏནཱམཧཏྟཾ, ཝཏྠུསམྤཏྟི, གུཎཱཏིརེཀཏཱཏི། ཏཏྠ དྷམྨེན སམེན ཨུཔྤནྣཱ པཙྩཡཱ ‘དྷམྨིཀཱ’ ནཱམ། སདྡཧིཏྭཱ ཨོཀཔྤེཏྭཱ དདཏོ པན ‘ཙེཏནཱམཧཏྟཾ’ ནཱམ ཧོཏི། ཁཱིཎཱསཝབྷཱཝོ ‘ཝཏྠུསམྤཏྟི’ ནཱམ། ཁཱིཎཱསཝསྶེཝ ནིརོདྷཱ ཝུཊྛིཏབྷཱཝོ ‘གུཎཱཏིརེཀཏཱ’ ནཱམ། ཨིམཱནི ཙཏྟཱརི སམོདྷཱནེཏྭཱ དཱཏུཾ སཀྐོནྟསྶ ཀཱམཱཝཙརཾ ཀུསལཾ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏི། པུཎྞཀསེཊྛིཀཱཀཝལིཡསུམནམཱལཱཀཱརཱདཱིནཾ (དྷ॰ པ॰ ཨཊྛ॰ ༢.༢༢༥ པུཎྞདཱསཱིཝཏྠུ) (དྷ॰ པ॰ ཨཊྛ॰ ༡.༦༧ སུམནམཱལཱཀཱརཝཏྠུ) ཝིཡ།
Aparāpi imasmiṃ ṭhāne catasso dakkhiṇāvisuddhiyo gahitā – paccayānaṃ dhammikatā, cetanāmahattaṃ, vatthusampatti, guṇātirekatāti. Tattha dhammena samena uppannā paccayā ‘dhammikā’ nāma. Saddahitvā okappetvā dadato pana ‘cetanāmahattaṃ’ nāma hoti. Khīṇāsavabhāvo ‘vatthusampatti’ nāma. Khīṇāsavasseva nirodhā vuṭṭhitabhāvo ‘guṇātirekatā’ nāma. Imāni cattāri samodhānetvā dātuṃ sakkontassa kāmāvacaraṃ kusalaṃ imasmiṃyeva attabhāve vipākaṃ deti. Puṇṇakaseṭṭhikākavaliyasumanamālākārādīnaṃ (dha. pa. aṭṭha. 2.225 puṇṇadāsīvatthu) (dha. pa. aṭṭha. 1.67 sumanamālākāravatthu) viya.
སངྑེཔཏོ པནེཏཾ སབྦམྤི ཀཱམཱཝཙརཀུསལཙིཏྟཾ ‘ཙིཏྟ’ནྟི ཀརིཏྭཱ ཙིཏྟཝིཙིཏྟཊྛེན ཨེཀམེཝ ཧོཏི། ཝེདནཱཝསེན སོམནསྶསཧགཏཾ ཨུཔེཀྑཱསཧགཏནྟི དུཝིདྷཾ ཧོཏི། ཉཱཎཝིབྷཏྟིདེསནཱཝསེན ཙཏུབྦིདྷཾ ཧོཏི། སོམནསྶསཧགཏཾ ཉཱཎསམྤཡུཏྟཾ ཨསངྑཱརིཀཾ མཧཱཙིཏྟཉྷི ཨུཔེཀྑཱསཧགཏཾ ཉཱཎསམྤཡུཏྟཾ ཨསངྑཱརིཀཾ མཧཱཙིཏྟཉྩ ཉཱཎསམྤཡུཏྟཊྛེན ཨསངྑཱརིཀཊྛེན ཙ ཨེཀམེཝ ཧོཏི། ཏཐཱ ཉཱཎསམྤཡུཏྟཾ སསངྑཱརིཀཾ, ཉཱཎཝིཔྤཡུཏྟཾ ཨསངྑཱརིཀཾ, ཉཱཎཝིཔྤཡུཏྟཾ སསངྑཱརིཀཉྩཱཏི། ཨེཝཾ ཉཱཎཝིབྷཏྟིདེསནཱཝསེན ཙཏུབྦིདྷེ པནེཏསྨིཾ ཨསངྑཱརསསངྑཱརཝིབྷཏྟིཏོ ཙཏྟཱརི ཨསངྑཱརིཀཱནི ཙཏྟཱརི སསངྑཱརིཀཱནཱིཏི ཨཊྛེཝ ཀུསལཙིཏྟཱནི ཧོནྟི། ཏཱནི ཡཱཐཱཝཏོ ཉཏྭཱ བྷགཝཱ སབྦཉྙཱུ གཎཱིཝརོ མུནིསེཊྛོ ཨཱཙིཀྑཏི དེསེཏི པཉྙཔེཏི པཊྛཔེཏི ཝིཝརཏི ཝིབྷཛཏི ཨུཏྟཱནཱིཀརོཏཱིཏི།
Saṅkhepato panetaṃ sabbampi kāmāvacarakusalacittaṃ ‘citta’nti karitvā cittavicittaṭṭhena ekameva hoti. Vedanāvasena somanassasahagataṃ upekkhāsahagatanti duvidhaṃ hoti. Ñāṇavibhattidesanāvasena catubbidhaṃ hoti. Somanassasahagataṃ ñāṇasampayuttaṃ asaṅkhārikaṃ mahācittañhi upekkhāsahagataṃ ñāṇasampayuttaṃ asaṅkhārikaṃ mahācittañca ñāṇasampayuttaṭṭhena asaṅkhārikaṭṭhena ca ekameva hoti. Tathā ñāṇasampayuttaṃ sasaṅkhārikaṃ, ñāṇavippayuttaṃ asaṅkhārikaṃ, ñāṇavippayuttaṃ sasaṅkhārikañcāti. Evaṃ ñāṇavibhattidesanāvasena catubbidhe panetasmiṃ asaṅkhārasasaṅkhāravibhattito cattāri asaṅkhārikāni cattāri sasaṅkhārikānīti aṭṭheva kusalacittāni honti. Tāni yāthāvato ñatvā bhagavā sabbaññū gaṇīvaro muniseṭṭho ācikkhati deseti paññapeti paṭṭhapeti vivarati vibhajati uttānīkarotīti.
ཨཊྛསཱལིནིཡཱ དྷམྨསངྒཧཊྛཀཐཱཡ
Aṭṭhasāliniyā dhammasaṅgahaṭṭhakathāya
ཀཱམཱཝཙརཀུསལནིདྡེསོ སམཏྟོ།
Kāmāvacarakusalaniddeso samatto.
