| Library / Tipiṭaka / တိပိဋက • Tipiṭaka / ဓမ္မသင္ဂဏီ-မူလဋီကာ • Dhammasaṅgaṇī-mūlaṭīkā |
ပုညကိရိယဝတ္ထာဒိကထာဝဏ္ဏနာ
Puññakiriyavatthādikathāvaṇṇanā
အပစိတိ ဧဝ အပစိတိသဟဂတံ ပုညကိရိယာဝတ္ထု ယထာ ‘‘နန္ဒိရာဂသဟဂတာ’’တိ။ အပစိတိ ဝာ စေတနာသမ္ပယုတ္တကဓမ္မာ ကာယဝစီကိရိယာ ဝာ, တံသဟိတာ စေတနာ အပစိတိသဟဂတံ။ ဟိတဖရဏေနာတိ ဒေသကေ မေတ္တာဖရဏေန, ‘‘ဧဝံ မေ ဟိတံ ဘဝိသ္သတီ’’တိ ပဝတ္တေန ဟိတစိတ္တေန ဝာ။ ကမ္မသ္သကတာဉာဏံ ဒိဋ္ဌိဇုကမ္မံ။ နိယမလက္ခဏန္တိ မဟပ္ဖလတာနိယမသ္သ လက္ခဏံ။ သီလမယေ သင္ဂဟံ ဂစ္ဆန္တိ စာရိတ္တဝသေန။ အနဝဇ္ဇဝတ္ထုံ ပရိစ္စဇန္တော ဝိယ အဗ္ဘနုမောဒမာနောပိ ပရသ္သ သမ္ပတ္တိယာ မောဒတီတိ အဗ္ဘနုမောဒနာ ဒာနမယေ သင္ဂဟိတာ။ ဘာဝေန္တောပီတိ အသမတ္တဘာဝနံ သန္ဓာယာဟ။ သမတ္တာ ဟိ အပ္ပနာ ဟောတီတိ။ အဋ္ဌေဝ ကောဋ္ဌာသေ ကတ္ဝာတိ ဧကသ္သ သတ္တသ္သ ဧကသ္မိံ ခဏေ ဥပ္ပန္နမေကံ ပဌမစိတ္တံ ဒသ္သေတ္ဝာ အညာနိ တာဒိသာနိ အဒသ္သေန္တေန သဗ္ဗာနိ တာနိ သရိက္ခဋ္ဌေန ဧကီကတာနိ ဟောန္တိ, တထာ သေသာနိပီတိ ဧဝံ အဋ္ဌ ကတ္ဝာ။
Apaciti eva apacitisahagataṃ puññakiriyāvatthu yathā ‘‘nandirāgasahagatā’’ti. Apaciti vā cetanāsampayuttakadhammā kāyavacīkiriyā vā, taṃsahitā cetanā apacitisahagataṃ. Hitapharaṇenāti desake mettāpharaṇena, ‘‘evaṃ me hitaṃ bhavissatī’’ti pavattena hitacittena vā. Kammassakatāñāṇaṃ diṭṭhijukammaṃ. Niyamalakkhaṇanti mahapphalatāniyamassa lakkhaṇaṃ. Sīlamaye saṅgahaṃ gacchanti cārittavasena. Anavajjavatthuṃ pariccajanto viya abbhanumodamānopi parassa sampattiyā modatīti abbhanumodanā dānamaye saṅgahitā. Bhāventopīti asamattabhāvanaṃ sandhāyāha. Samattā hi appanā hotīti. Aṭṭheva koṭṭhāse katvāti ekassa sattassa ekasmiṃ khaṇe uppannamekaṃ paṭhamacittaṃ dassetvā aññāni tādisāni adassentena sabbāni tāni sarikkhaṭṭhena ekīkatāni honti, tathā sesānipīti evaṃ aṭṭha katvā.
ကာမာဝစရကုသလဝဏ္ဏနာ နိဋ္ဌိတာ။
Kāmāvacarakusalavaṇṇanā niṭṭhitā.
