6. бун̃н̃агирияавад̇т̇усуд̇д̇ам̣

6. Puññakiriyavatthusuttaṃ

36. ‘‘д̇ийн̣имаани, бхигкавз, бун̃н̃агирияавад̇т̇ууни. гад̇амаани д̇ийн̣и? д̣̇аанамаяам̣ бун̃н̃агирияавад̇т̇у ¹, сийламаяам̣ бун̃н̃агирияавад̇т̇у, бхааванаамаяам̣ бун̃н̃агирияавад̇т̇у. ид̇ха, бхигкавз, згажжасса д̣̇аанамаяам̣ бун̃н̃агирияавад̇т̇у барид̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у барид̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ ² наабхисамбход̇и. со гааяасса бхзд̣̇аа барам̣ маран̣аа мануссад̣̇обхаг̇яам̣ убабаж̇ж̇ад̇и.

36. ‘‘Tīṇimāni, bhikkhave, puññakiriyavatthūni. Katamāni tīṇi? Dānamayaṃ puññakiriyavatthu ³, sīlamayaṃ puññakiriyavatthu, bhāvanāmayaṃ puññakiriyavatthu. Idha, bhikkhave, ekaccassa dānamayaṃ puññakiriyavatthu parittaṃ kataṃ hoti, sīlamayaṃ puññakiriyavatthu parittaṃ kataṃ hoti, bhāvanāmayaṃ puññakiriyavatthuṃ ⁴ nābhisambhoti. So kāyassa bhedā paraṃ maraṇā manussadobhagyaṃ upapajjati.

‘‘ид̇ха бана, бхигкавз, згажжасса д̣̇аанамаяам̣ бун̃н̃агирияавад̇т̇у мад̇д̇асо гад̇ам̣ ход̇и, сийламаяам̣ бун̃н̃агирияавад̇т̇у мад̇д̇асо гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа мануссасобхаг̇яам̣ убабаж̇ж̇ад̇и.

‘‘Idha pana, bhikkhave, ekaccassa dānamayaṃ puññakiriyavatthu mattaso kataṃ hoti, sīlamayaṃ puññakiriyavatthu mattaso kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā manussasobhagyaṃ upapajjati.

‘‘ид̇ха бана, бхигкавз , згажжасса д̣̇аанамаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа жаад̇умахаарааж̇игаанам̣ д̣̇зваанам̣ сахаб̣яад̇ам̣ убабаж̇ж̇ад̇и. д̇ад̇ра, бхигкавз, жад̇д̇ааро махаарааж̇аано д̣̇аанамаяам̣ бун̃н̃агирияавад̇т̇ум̣ ад̇ирзгам̣ гарид̇ваа, сийламаяам̣ бун̃н̃агирияавад̇т̇ум̣ ад̇ирзгам̣ гарид̇ваа, жаад̇умахаарааж̇игз д̣̇звз д̣̇асахи таанзхи ад̇хиг̇ан̣ханд̇и – д̣̇иб̣б̣зна ааяунаа, д̣̇иб̣б̣зна ван̣н̣зна, д̣̇иб̣б̣зна сукзна, д̣̇иб̣б̣зна яасзна, д̣̇иб̣б̣зна аад̇хибад̇зяязна, д̣̇иб̣б̣зхи руубзхи, д̣̇иб̣б̣зхи сад̣̇д̣̇зхи, д̣̇иб̣б̣зхи г̇анд̇хзхи, д̣̇иб̣б̣зхи расзхи, д̣̇иб̣б̣зхи подтаб̣б̣зхи.

‘‘Idha pana, bhikkhave , ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā cātumahārājikānaṃ devānaṃ sahabyataṃ upapajjati. Tatra, bhikkhave, cattāro mahārājāno dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, cātumahārājike deve dasahi ṭhānehi adhigaṇhanti – dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi.

‘‘ид̇ха бана, бхигкавз, згажжасса д̣̇аанамаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа д̇аавад̇им̣саанам̣ д̣̇зваанам̣ сахаб̣яад̇ам̣ убабаж̇ж̇ад̇и. д̇ад̇ра, бхигкавз, сагго д̣̇зваанаминд̣̇о д̣̇аанамаяам̣ бун̃н̃агирияавад̇т̇ум̣ ад̇ирзгам̣ гарид̇ваа сийламаяам̣ бун̃н̃агирияавад̇т̇ум̣ ад̇ирзгам̣ гарид̇ваа д̇аавад̇им̣сз д̣̇звз д̣̇асахи таанзхи ад̇хиг̇ан̣хаад̇и – д̣̇иб̣б̣зна ааяунаа…бз… д̣̇иб̣б̣зхи подтаб̣б̣зхи.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā tāvatiṃsānaṃ devānaṃ sahabyataṃ upapajjati. Tatra, bhikkhave, sakko devānamindo dānamayaṃ puññakiriyavatthuṃ atirekaṃ karitvā sīlamayaṃ puññakiriyavatthuṃ atirekaṃ karitvā tāvatiṃse deve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘ид̇ха бана, бхигкавз, згажжасса д̣̇аанамаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа яаамаанам̣ д̣̇зваанам̣ сахаб̣яад̇ам̣ убабаж̇ж̇ад̇и. д̇ад̇ра, бхигкавз, суяаамо д̣̇звабуд̇д̇о д̣̇аанамаяам̣ бун̃н̃агирияавад̇т̇ум̣ ад̇ирзгам̣ гарид̇ваа , сийламаяам̣ бун̃н̃агирияавад̇т̇ум̣ ад̇ирзгам̣ гарид̇ваа, яаамз д̣̇звз д̣̇асахи таанзхи ад̇хиг̇ан̣хаад̇и – д̣̇иб̣б̣зна ааяунаа…бз… д̣̇иб̣б̣зхи подтаб̣б̣зхи.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā yāmānaṃ devānaṃ sahabyataṃ upapajjati. Tatra, bhikkhave, suyāmo devaputto dānamayaṃ puññakiriyavatthuṃ atirekaṃ karitvā , sīlamayaṃ puññakiriyavatthuṃ atirekaṃ karitvā, yāme deve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘ид̇ха бана, бхигкавз, згажжасса д̣̇аанамаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа д̇усид̇аанам̣ д̣̇зваанам̣ сахаб̣яад̇ам̣ убабаж̇ж̇ад̇и. д̇ад̇ра , бхигкавз, санд̇усид̇о д̣̇звабуд̇д̇о д̣̇аанамаяам̣ бун̃н̃агирияавад̇т̇ум̣ ад̇ирзгам̣ гарид̇ваа, сийламаяам̣ бун̃н̃агирияавад̇т̇ум̣ ад̇ирзгам̣ гарид̇ваа, д̇усид̇з д̣̇звз д̣̇асахи таанзхи ад̇хиг̇ан̣хаад̇и – д̣̇иб̣б̣зна ааяунаа…бз… д̣̇иб̣б̣зхи подтаб̣б̣зхи.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā tusitānaṃ devānaṃ sahabyataṃ upapajjati. Tatra , bhikkhave, santusito devaputto dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, tusite deve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘ид̇ха бана, бхигкавз, згажжасса д̣̇аанамаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа ниммаанарад̇ийнам̣ д̣̇зваанам̣ сахаб̣яад̇ам̣ убабаж̇ж̇ад̇и. д̇ад̇ра, бхигкавз, суниммид̇о д̣̇звабуд̇д̇о д̣̇аанамаяам̣ бун̃н̃агирияавад̇т̇ум̣ ад̇ирзгам̣ гарид̇ваа, сийламаяам̣ бун̃н̃агирияавад̇т̇ум̣ ад̇ирзгам̣ гарид̇ваа, ниммаанарад̇ийд̣̇звз д̣̇асахи таанзхи ад̇хиг̇ан̣хаад̇и – д̣̇иб̣б̣зна ааяунаа…бз… д̣̇иб̣б̣зхи подтаб̣б̣зхи.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā nimmānaratīnaṃ devānaṃ sahabyataṃ upapajjati. Tatra, bhikkhave, sunimmito devaputto dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, nimmānaratīdeve dasahi ṭhānehi adhigaṇhāti – dibbena āyunā…pe… dibbehi phoṭṭhabbehi.

‘‘ид̇ха бана, бхигкавз, згажжасса д̣̇аанамаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, сийламаяам̣ бун̃н̃агирияавад̇т̇у ад̇химад̇д̇ам̣ гад̇ам̣ ход̇и, бхааванаамаяам̣ бун̃н̃агирияавад̇т̇ум̣ наабхисамбход̇и. со гааяасса бхзд̣̇аа барам̣ маран̣аа бараниммид̇авасавад̇д̇ийнам̣ д̣̇зваанам̣ сахаб̣яад̇ам̣ убабаж̇ж̇ад̇и. д̇ад̇ра, бхигкавз, васавад̇д̇ий д̣̇звабуд̇д̇о д̣̇аанамаяам̣ бун̃н̃агирияавад̇т̇ум̣ ад̇ирзгам̣ гарид̇ваа, сийламаяам̣ бун̃н̃агирияавад̇т̇ум̣ ад̇ирзгам̣ гарид̇ваа, бараниммид̇авасавад̇д̇ийд̣̇звз д̣̇асахи таанзхи ад̇хиг̇ан̣хаад̇и – д̣̇иб̣б̣зна ааяунаа, д̣̇иб̣б̣зна ван̣н̣зна, д̣̇иб̣б̣зна сукзна, д̣̇иб̣б̣зна яасзна, д̣̇иб̣б̣зна аад̇хибад̇зяязна, д̣̇иб̣б̣зхи руубзхи, д̣̇иб̣б̣зхи сад̣̇д̣̇зхи, д̣̇иб̣б̣зхи г̇анд̇хзхи, д̣̇иб̣б̣зхи расзхи, д̣̇иб̣б̣зхи подтаб̣б̣зхи. имаани ко, бхигкавз, д̇ийн̣и бун̃н̃агирияавад̇т̇ууний’’д̇и. чадтам̣.

‘‘Idha pana, bhikkhave, ekaccassa dānamayaṃ puññakiriyavatthu adhimattaṃ kataṃ hoti, sīlamayaṃ puññakiriyavatthu adhimattaṃ kataṃ hoti, bhāvanāmayaṃ puññakiriyavatthuṃ nābhisambhoti. So kāyassa bhedā paraṃ maraṇā paranimmitavasavattīnaṃ devānaṃ sahabyataṃ upapajjati. Tatra, bhikkhave, vasavattī devaputto dānamayaṃ puññakiriyavatthuṃ atirekaṃ karitvā, sīlamayaṃ puññakiriyavatthuṃ atirekaṃ karitvā, paranimmitavasavattīdeve dasahi ṭhānehi adhigaṇhāti – dibbena āyunā, dibbena vaṇṇena, dibbena sukhena, dibbena yasena, dibbena ādhipateyyena, dibbehi rūpehi, dibbehi saddehi, dibbehi gandhehi, dibbehi rasehi, dibbehi phoṭṭhabbehi. Imāni kho, bhikkhave, tīṇi puññakiriyavatthūnī’’ti. Chaṭṭhaṃ.