| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. புஞ்ஞகிரியவத்து²ஸுத்தவண்ணனா
6. Puññakiriyavatthusuttavaṇṇanā
36. ச²ட்டே² புஞ்ஞகிரியானி ச தானி தேஸங் தேஸங் ஆனிஸங்ஸானங் வத்தூ²னி சாதி புஞ்ஞகிரியவத்தூ²னி. தா³னாதீ³னஞ்ஹி லக்க²ணே சித்தங் ட²பெத்வா ‘‘ஏவரூபங் நாம அம்ஹேஹி தா³னங் தா³தப்³ப³ங், ஸீலங் ரக்கி²தப்³ப³ங், பா⁴வனா பா⁴வேதப்³பா³’’தி ஸத்தா புஞ்ஞானி கரொந்தி. தா³னமேவ தா³னமயங், தா³னசேதனாஸு வா புரிமசேதனாதோ நிப்ப²ன்னா ஸன்னிட்டா²பகசேதனா தா³னமயங் ஸீலாதீ³ஹி ஸீலமயாதீ³னி விய. ஸேஸத்³வயேஸுபி ஏஸேவ நயோ. பரித்தங் கதங் ஹோதீதி தோ²கங் மந்த³ங் கதங் ஹோதி. நாபி⁴ஸம்போ⁴தீதி ந நிப்ப²ஜ்ஜதி. அகதங் ஹோதீதி பா⁴வனாயயோகோ³யேவ அனாரத்³தோ⁴ ஹோதீதி அத்தோ². மனுஸ்ஸதோ³ப⁴க்³யந்தி மனுஸ்ஸேஸு ஸம்பத்திரஹிதங் பஞ்சவித⁴ங் நீசகுலங். உபபஜ்ஜதீதி படிஸந்தி⁴வஸேன உபக³ச்ச²தி, தத்த² நிப்³ப³த்ததீதி அத்தோ². மத்தஸோ கதந்தி பமாணேன கதங், தோ²கங் ந ப³ஹு. மனுஸ்ஸஸோப⁴க்³யந்தி மனுஸ்ஸேஸு ஸுப⁴க³பா⁴வங் திவித⁴குலஸம்பத்திங். அதி⁴மத்தந்தி அதி⁴கப்பமாணங் ப³லவங் வா. அதி⁴க³ண்ஹந்தீதி அபி⁴ப⁴வித்வா க³ண்ஹந்தி, விஸிட்ட²தரா ஜெட்ட²கா ஹொந்தீதி அத்தோ².
36. Chaṭṭhe puññakiriyāni ca tāni tesaṃ tesaṃ ānisaṃsānaṃ vatthūni cāti puññakiriyavatthūni. Dānādīnañhi lakkhaṇe cittaṃ ṭhapetvā ‘‘evarūpaṃ nāma amhehi dānaṃ dātabbaṃ, sīlaṃ rakkhitabbaṃ, bhāvanā bhāvetabbā’’ti sattā puññāni karonti. Dānameva dānamayaṃ, dānacetanāsu vā purimacetanāto nipphannā sanniṭṭhāpakacetanā dānamayaṃ sīlādīhi sīlamayādīni viya. Sesadvayesupi eseva nayo. Parittaṃ kataṃ hotīti thokaṃ mandaṃ kataṃ hoti. Nābhisambhotīti na nipphajjati. Akataṃ hotīti bhāvanāyayogoyeva anāraddho hotīti attho. Manussadobhagyanti manussesu sampattirahitaṃ pañcavidhaṃ nīcakulaṃ. Upapajjatīti paṭisandhivasena upagacchati, tattha nibbattatīti attho. Mattaso katanti pamāṇena kataṃ, thokaṃ na bahu. Manussasobhagyanti manussesu subhagabhāvaṃ tividhakulasampattiṃ. Adhimattanti adhikappamāṇaṃ balavaṃ vā. Adhigaṇhantīti abhibhavitvā gaṇhanti, visiṭṭhatarā jeṭṭhakā hontīti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. புஞ்ஞகிரியவத்து²ஸுத்தங் • 6. Puññakiriyavatthusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. புஞ்ஞகிரியவத்து²ஸுத்தவண்ணனா • 6. Puññakiriyavatthusuttavaṇṇanā
