| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. புஞ்ஞகிரியவத்து²ஸுத்தவண்ணனா
6. Puññakiriyavatthusuttavaṇṇanā
36. ச²ட்டே² புஜ்ஜப⁴வப²லங் நிப்³ப³த்தெந்தி, அத்தனோ ஸந்தானங் புனந்தீதி வா புஞ்ஞானி ச தானி ஹேதுபச்சயேஹி கத்தப்³ப³தோ கிரியா சாதி புஞ்ஞகிரியா, தாயேவ ச தேஸங் தேஸங் பியமனாபதாதி³ஆனிஸங்ஸானங் வத்து²பா⁴வதோ புஞ்ஞகிரியவத்தூ²னி.
36. Chaṭṭhe pujjabhavaphalaṃ nibbattenti, attano santānaṃ punantīti vā puññāni ca tāni hetupaccayehi kattabbato kiriyā cāti puññakiriyā, tāyeva ca tesaṃ tesaṃ piyamanāpatādiānisaṃsānaṃ vatthubhāvato puññakiriyavatthūni.
அனுச்சி²ன்னப⁴வமூலஸ்ஸ அனுக்³க³ஹவஸேன, பூஜாவஸேன வா அத்தனோ தெ³ய்யத⁴ம்மஸ்ஸ பரஸ்ஸ பரிச்சாக³சேதனா தீ³யதி ஏதேனாதி தா³னங், தா³னமேவ தா³னமயங். பத³பூரணமத்தங் மய-ஸத்³தோ³. சீவராதீ³ஸு சதூஸு பச்சயேஸு (தீ³॰ நி॰ அட்ட²॰ 3.305), அன்னாதீ³ஸு வா த³ஸஸு தா³னவத்தூ²ஸு, ரூபாதீ³ஸு வா ச²ஸு ஆரம்மணேஸு தங் தங் தெ³ந்தஸ்ஸ தேஸங் உப்பாத³னதோ பட்டா²ய புப்³ப³பா⁴கே³ பரிச்சாக³காலே பச்சா² ஸோமனஸ்ஸசித்தேன அனுஸ்ஸரணே சாதி தீஸு காலேஸு பவத்தசேதனா தா³னமயங் புஞ்ஞகிரியவத்து² நாம.
Anucchinnabhavamūlassa anuggahavasena, pūjāvasena vā attano deyyadhammassa parassa pariccāgacetanā dīyati etenāti dānaṃ, dānameva dānamayaṃ. Padapūraṇamattaṃ maya-saddo. Cīvarādīsu catūsu paccayesu (dī. ni. aṭṭha. 3.305), annādīsu vā dasasu dānavatthūsu, rūpādīsu vā chasu ārammaṇesu taṃ taṃ dentassa tesaṃ uppādanato paṭṭhāya pubbabhāge pariccāgakāle pacchā somanassacittena anussaraṇe cāti tīsu kālesu pavattacetanā dānamayaṃ puññakiriyavatthu nāma.
நிச்சஸீலஉபோஸத²ஸீலாதி³வஸேன பஞ்ச அட்ட² த³ஸ வா ஸீலானி ஸமாதி³யந்தஸ்ஸ ‘‘ஸீலபூரணத்த²ங் பப்³ப³ஜிஸ்ஸாமீ’’தி விஹாரங் க³ச்ச²ந்தஸ்ஸ பப்³ப³ஜந்தஸ்ஸ, மனோரத²ங் மத்த²கங் பாபெத்வா ‘‘பப்³ப³ஜிதோ வதம்ஹி ஸாது⁴ ஸுட்டூ²’’தி ஆவஜ்ஜெந்தஸ்ஸ, ஸத்³தா⁴ய பாதிமொக்க²ங் பரிபூரெந்தஸ்ஸ, பஞ்ஞாய சீவராதி³கே பச்சயே பச்சவெக்க²ந்தஸ்ஸ, ஸதியா ஆபாத²க³தேஸு ரூபாதீ³ஸு சக்கு²த்³வாராதீ³னி ஸங்வரந்தஸ்ஸ, வீரியேன ஆஜீவங் ஸோதெ⁴ந்தஸ்ஸ ச பவத்தசேதனா ஸீலதி, ஸீலேதீதி வா ஸீலமயங் புஞ்ஞகிரியவத்து² நாம.
Niccasīlauposathasīlādivasena pañca aṭṭha dasa vā sīlāni samādiyantassa ‘‘sīlapūraṇatthaṃ pabbajissāmī’’ti vihāraṃ gacchantassa pabbajantassa, manorathaṃ matthakaṃ pāpetvā ‘‘pabbajito vatamhi sādhu suṭṭhū’’ti āvajjentassa, saddhāya pātimokkhaṃ paripūrentassa, paññāya cīvarādike paccaye paccavekkhantassa, satiyā āpāthagatesu rūpādīsu cakkhudvārādīni saṃvarantassa, vīriyena ājīvaṃ sodhentassa ca pavattacetanā sīlati, sīletīti vā sīlamayaṃ puññakiriyavatthu nāma.
படிஸம்பி⁴தா³யங் (படி॰ ம॰ 1.48) வுத்தேன விபஸ்ஸனாமக்³கே³ன சக்கு²ங் அனிச்சதோ து³க்க²தோ அனத்ததோ விபஸ்ஸந்தஸ்ஸ, ஸோதங்…பே॰… கா⁴னங்…பே॰… ஜிவ்ஹங்…பே॰… காயங்…பே॰… ரூபே…பே॰… த⁴ம்மே…பே॰… சக்கு²விஞ்ஞாணங்…பே॰… மனோவிஞ்ஞாணங்…பே॰… சக்கு²ஸம்ப²ஸ்ஸங் …பே॰… மனோஸம்ப²ஸ்ஸங்…பே॰… சக்கு²ஸம்ப²ஸ்ஸஜங் வேத³னங்…பே॰… மனோஸம்ப²ஸ்ஸஜங் வேத³னங்…பே॰… ஜராமரணங் அனிச்சதோ து³க்க²தோ அனத்ததோ விபஸ்ஸந்தஸ்ஸ யா சேதனா, யா ச பத²வீகஸிணாதீ³ஸு ஸப்³பா³ஸு அட்ட²த்திங்ஸாய ஆரம்மணேஸு பவத்தா ஜா²னசேதனா, யா ச அனவஜ்ஜேஸு கம்மாயதனஸிப்பாயதனவிஜ்ஜாட்டா²னேஸு பரிசயமனஸிகாராதி³வஸேன பவத்தா சேதனா, ஸப்³பா³ ஸா பா⁴வேதி ஏதாயாதி பா⁴வனாமயங் வுத்தனயேன புஞ்ஞகிரியவத்து² சாதி பா⁴வனாமயங் புஞ்ஞகிரியவத்து².
Paṭisambhidāyaṃ (paṭi. ma. 1.48) vuttena vipassanāmaggena cakkhuṃ aniccato dukkhato anattato vipassantassa, sotaṃ…pe… ghānaṃ…pe… jivhaṃ…pe… kāyaṃ…pe… rūpe…pe… dhamme…pe… cakkhuviññāṇaṃ…pe… manoviññāṇaṃ…pe… cakkhusamphassaṃ …pe… manosamphassaṃ…pe… cakkhusamphassajaṃ vedanaṃ…pe… manosamphassajaṃ vedanaṃ…pe… jarāmaraṇaṃ aniccato dukkhato anattato vipassantassa yā cetanā, yā ca pathavīkasiṇādīsu sabbāsu aṭṭhattiṃsāya ārammaṇesu pavattā jhānacetanā, yā ca anavajjesu kammāyatanasippāyatanavijjāṭṭhānesu paricayamanasikārādivasena pavattā cetanā, sabbā sā bhāveti etāyāti bhāvanāmayaṃ vuttanayena puññakiriyavatthu cāti bhāvanāmayaṃ puññakiriyavatthu.
ஏகமேகஞ்செத்த² யதா²ரஹங் புப்³ப³பா⁴க³தோ பட்டா²ய கரொந்தஸ்ஸ காயகம்மங் ஹோதி. தத³த்த²ங் வாசங் நிச்சா²ரெந்தஸ்ஸ வசீகம்மங். காயங்க³ங் வாசங்க³ஞ்ச அசோபெத்வா மனஸா சிந்தயந்தஸ்ஸ மனோகம்மங். அன்னாதீ³னி தெ³ந்தஸ்ஸ சாபி ‘‘அன்னதா³னாதீ³னி தே³மீ’’தி வா, தா³னபாரமிங் ஆவஜ்ஜெத்வா வா தா³னகாலே தா³னமயங் புஞ்ஞகிரியவத்து² ஹோதி. யதா² ஹி கேவலங் ‘‘அன்னதா³னாதீ³னி தே³மீ’’தி தா³னகாலே தா³னமயங் புஞ்ஞகிரியவத்து² ஹோதி, ஏவங் ‘‘இத³ங் தா³னமயங் ஸம்மாஸம்போ³தி⁴யா பச்சயோ ஹோதூ’’தி தா³னபாரமிங் ஆவஜ்ஜெத்வா தா³னகாலேபி தா³னஸீஸேனேவ பவத்திதத்தா. வத்தஸீஸே ட²த்வா த³த³ந்தோ ‘‘ஏதங் தா³னங் நாம மய்ஹங் குலவங்ஸஹேது பவேணிசாரித்த’’ந்தி சாரித்தஸீஸேன வா தெ³ந்தோ சாரித்தஸீலத்தா ஸீலமயங். க²யதோ வயதோ ஸம்மஸனங் பட்ட²பெத்வா த³த³தோ பா⁴வனாமயங் புஞ்ஞகிரியவத்து² ஹோதி. யதா² ஹி தெ³ய்யத⁴ம்மபரிச்சாக³வஸேன வத்தமானாபி தா³னசேதனா வத்தஸீஸே ட²த்வா த³த³தோ ஸீலமயங் புஞ்ஞகிரியவத்து² ஹோதி புப்³பா³பி⁴ஸங்கா²ரஸ்ஸ அபரபா⁴கே³ சேதனாய ச ததா²பவத்தத்தா.
Ekamekañcettha yathārahaṃ pubbabhāgato paṭṭhāya karontassa kāyakammaṃ hoti. Tadatthaṃ vācaṃ nicchārentassa vacīkammaṃ. Kāyaṅgaṃ vācaṅgañca acopetvā manasā cintayantassa manokammaṃ. Annādīni dentassa cāpi ‘‘annadānādīni demī’’ti vā, dānapāramiṃ āvajjetvā vā dānakāle dānamayaṃ puññakiriyavatthu hoti. Yathā hi kevalaṃ ‘‘annadānādīni demī’’ti dānakāle dānamayaṃ puññakiriyavatthu hoti, evaṃ ‘‘idaṃ dānamayaṃ sammāsambodhiyā paccayo hotū’’ti dānapāramiṃ āvajjetvā dānakālepi dānasīseneva pavattitattā. Vattasīse ṭhatvā dadanto ‘‘etaṃ dānaṃ nāma mayhaṃ kulavaṃsahetu paveṇicāritta’’nti cārittasīsena vā dento cārittasīlattā sīlamayaṃ. Khayato vayato sammasanaṃ paṭṭhapetvā dadato bhāvanāmayaṃ puññakiriyavatthu hoti. Yathā hi deyyadhammapariccāgavasena vattamānāpi dānacetanā vattasīse ṭhatvā dadato sīlamayaṃ puññakiriyavatthu hoti pubbābhisaṅkhārassa aparabhāge cetanāya ca tathāpavattattā.
புஞ்ஞகிரியவத்து²ஸுத்தவண்ணனா நிட்டி²தா.
Puññakiriyavatthusuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. புஞ்ஞகிரியவத்து²ஸுத்தங் • 6. Puññakiriyavatthusuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. புஞ்ஞகிரியவத்து²ஸுத்தவண்ணனா • 6. Puññakiriyavatthusuttavaṇṇanā
