| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. ပုညကိရိယဝတ္ထုသုတ္တဝဏ္ဏနာ
6. Puññakiriyavatthusuttavaṇṇanā
၃၆. ဆဋ္ဌေ ပုညကိရိယာနိ စ တာနိ တေသံ တေသံ အာနိသံသာနံ ဝတ္ထူနိ စာတိ ပုညကိရိယဝတ္ထူနိ။ ဒာနာဒီနဉ္ဟိ လက္ခဏေ စိတ္တံ ဌပေတ္ဝာ ‘‘ဧဝရူပံ နာမ အမ္ဟေဟိ ဒာနံ ဒာတဗ္ဗံ, သီလံ ရက္ခိတဗ္ဗံ, ဘာဝနာ ဘာဝေတဗ္ဗာ’’တိ သတ္တာ ပုညာနိ ကရောန္တိ။ ဒာနမေဝ ဒာနမယံ, ဒာနစေတနာသု ဝာ ပုရိမစေတနာတော နိပ္ဖန္နာ သန္နိဋ္ဌာပကစေတနာ ဒာနမယံ သီလာဒီဟိ သီလမယာဒီနိ ဝိယ။ သေသဒ္ဝယေသုပိ ဧသေဝ နယော။ ပရိတ္တံ ကတံ ဟောတီတိ ထောကံ မန္ဒံ ကတံ ဟောတိ။ နာဘိသမ္ဘောတီတိ န နိပ္ဖဇ္ဇတိ။ အကတံ ဟောတီတိ ဘာဝနာယယောဂောယေဝ အနာရဒ္ဓော ဟောတီတိ အတ္ထော။ မနုသ္သဒောဘဂ္ယန္တိ မနုသ္သေသု သမ္ပတ္တိရဟိတံ ပဉ္စဝိဓံ နီစကုလံ။ ဥပပဇ္ဇတီတိ ပဋိသန္ဓိဝသေန ဥပဂစ္ဆတိ, တတ္ထ နိဗ္ဗတ္တတီတိ အတ္ထော။ မတ္တသော ကတန္တိ ပမာဏေန ကတံ, ထောကံ န ဗဟု။ မနုသ္သသောဘဂ္ယန္တိ မနုသ္သေသု သုဘဂဘာဝံ တိဝိဓကုလသမ္ပတ္တိံ။ အဓိမတ္တန္တိ အဓိကပ္ပမာဏံ ဗလဝံ ဝာ။ အဓိဂဏ္ဟန္တီတိ အဘိဘဝိတ္ဝာ ဂဏ္ဟန္တိ, ဝိသိဋ္ဌတရာ ဇေဋ္ဌကာ ဟောန္တီတိ အတ္ထော။
36. Chaṭṭhe puññakiriyāni ca tāni tesaṃ tesaṃ ānisaṃsānaṃ vatthūni cāti puññakiriyavatthūni. Dānādīnañhi lakkhaṇe cittaṃ ṭhapetvā ‘‘evarūpaṃ nāma amhehi dānaṃ dātabbaṃ, sīlaṃ rakkhitabbaṃ, bhāvanā bhāvetabbā’’ti sattā puññāni karonti. Dānameva dānamayaṃ, dānacetanāsu vā purimacetanāto nipphannā sanniṭṭhāpakacetanā dānamayaṃ sīlādīhi sīlamayādīni viya. Sesadvayesupi eseva nayo. Parittaṃ kataṃ hotīti thokaṃ mandaṃ kataṃ hoti. Nābhisambhotīti na nipphajjati. Akataṃ hotīti bhāvanāyayogoyeva anāraddho hotīti attho. Manussadobhagyanti manussesu sampattirahitaṃ pañcavidhaṃ nīcakulaṃ. Upapajjatīti paṭisandhivasena upagacchati, tattha nibbattatīti attho. Mattaso katanti pamāṇena kataṃ, thokaṃ na bahu. Manussasobhagyanti manussesu subhagabhāvaṃ tividhakulasampattiṃ. Adhimattanti adhikappamāṇaṃ balavaṃ vā. Adhigaṇhantīti abhibhavitvā gaṇhanti, visiṭṭhatarā jeṭṭhakā hontīti attho.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. ပုညကိရိယဝတ္ထုသုတ္တံ • 6. Puññakiriyavatthusuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. ပုညကိရိယဝတ္ထုသုတ္တဝဏ္ဏနာ • 6. Puññakiriyavatthusuttavaṇṇanā
