| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༢. དུཏིཡཝགྒོ
2. Dutiyavaggo
༡. པུཉྙཀིརིཡཝཏྠུསུཏྟཝཎྞནཱ
1. Puññakiriyavatthusuttavaṇṇanā
༦༠. དུཏིཡཝགྒསྶ པཋམེ པུཉྙཀིརིཡཝཏྠཱུནཱིཏི པུཛྫབྷཝཕལཾ ནིབྦཏྟེནྟི, ཨཏྟནོ སནྟཱནཾ པུནནྟཱིཏི ཝཱ པུཉྙཱནི, པུཉྙཱནི ཙ ཏཱནི ཧེཏུཔཙྩཡེཧི ཀཏྟབྦཏོ ཀིརིཡཱ ཙཱཏི པུཉྙཀིརིཡཱ། ཏཱ ཨེཝ ཙ ཏེསཾ ཏེསཾ ཨཱནིསཾསཱནཾ ཝཏྠུབྷཱཝཏོ པུཉྙཀིརིཡཝཏྠཱུནི། དཱནམཡནྟི ཨནུཔཙྪིནྣབྷཝམཱུལསྶ ཨནུགྒཧཝསེན པཱུཛཱཝསེན ཝཱ ཨཏྟནོ དེཡྻདྷམྨསྶ པརེསཾ པརིཙྩཱགཙེཏནཱ དཱིཡཏི ཨེཏཱཡཱཏི དཱནཾ, དཱནམེཝ དཱནམཡཾ། ཙཱིཝརཱདཱིསུ ཧི ཙཏཱུསུ པཙྩཡེསུ ཨནྣཱདཱིསུ ཝཱ དསསུ དཱནཝཏྠཱུསུ རཱུཔཱདཱིསུ ཝཱ ཚསུ ཨཱརམྨཎེསུ ཏཾ ཏཾ དེནྟསྶ ཏེསཾ ཨུཔྤཱདནཏོ པཊྛཱཡ པུབྦབྷཱགེ པརིཙྩཱགཀཱལེ པཙྪཱ སོམནསྶཙིཏྟེན ཨནུསྶརཎེ ཙཱཏི ཏཱིསུ ཀཱལེསུ ཝུཏྟནཡེན པཝཏྟཙེཏནཱ དཱནམཡཾ པུཉྙཀིརིཡཝཏྠུ ནཱམ།
60. Dutiyavaggassa paṭhame puññakiriyavatthūnīti pujjabhavaphalaṃ nibbattenti, attano santānaṃ punantīti vā puññāni, puññāni ca tāni hetupaccayehi kattabbato kiriyā cāti puññakiriyā. Tā eva ca tesaṃ tesaṃ ānisaṃsānaṃ vatthubhāvato puññakiriyavatthūni. Dānamayanti anupacchinnabhavamūlassa anuggahavasena pūjāvasena vā attano deyyadhammassa paresaṃ pariccāgacetanā dīyati etāyāti dānaṃ, dānameva dānamayaṃ. Cīvarādīsu hi catūsu paccayesu annādīsu vā dasasu dānavatthūsu rūpādīsu vā chasu ārammaṇesu taṃ taṃ dentassa tesaṃ uppādanato paṭṭhāya pubbabhāge pariccāgakāle pacchā somanassacittena anussaraṇe cāti tīsu kālesu vuttanayena pavattacetanā dānamayaṃ puññakiriyavatthu nāma.
སཱིལམཡནྟི ནིཙྩསཱིལཨུཔོསཐནིཡམཱདིཝསེན པཉྩ, ཨཊྛ, དས ཝཱ སཱིལཱནི སམཱདིཡནྟསྶ སཱིལཔཱུརཎཏྠཾ པབྦཛིསྶཱམཱིཏི ཝིཧཱརཾ གཙྪནྟསྶ པབྦཛནྟསྶ མནོརཐཾ མཏྠཀཾ པཱཔེཏྭཱ ‘‘པབྦཛིཏོ ཝཏམྷི སཱདྷུ སུཊྛཱུ’’ཏི ཨཱཝཛྫེནྟསྶ སདྡྷཱཡ པཱཏིམོཀྑཾ པརིཔཱུརེནྟསྶ པཉྙཱཡ ཙཱིཝརཱདིཀེ པཙྩཝེཀྑནྟསྶ སཏིཡཱ ཨཱཔཱཐགཏེསུ རཱུཔཱདཱིསུ ཙཀྑུདྭཱརཱདཱིནི སཾཝརནྟསྶ ཝཱིརིཡེན ཨཱཛཱིཝཾ སོདྷེནྟསྶ ཙ པཝཏྟཱ ཙེཏནཱ སཱིལཏཱིཏི སཱིལམཡཾ པུཉྙཀིརིཡཝཏྠུ ནཱམ།
Sīlamayanti niccasīlauposathaniyamādivasena pañca, aṭṭha, dasa vā sīlāni samādiyantassa sīlapūraṇatthaṃ pabbajissāmīti vihāraṃ gacchantassa pabbajantassa manorathaṃ matthakaṃ pāpetvā ‘‘pabbajito vatamhi sādhu suṭṭhū’’ti āvajjentassa saddhāya pātimokkhaṃ paripūrentassa paññāya cīvarādike paccavekkhantassa satiyā āpāthagatesu rūpādīsu cakkhudvārādīni saṃvarantassa vīriyena ājīvaṃ sodhentassa ca pavattā cetanā sīlatīti sīlamayaṃ puññakiriyavatthu nāma.
ཏཐཱ པཊིསམྦྷིདཱཡཾ (པཊི॰ མ॰ ༡.༤༨) ཝུཏྟེན ཝིཔསྶནཱམགྒེན ཙཀྑུཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟསྶ སོཏཾ, གྷཱནཾ, ཛིཝ྄ཧཾ, ཀཱཡཾ, མནཾ། རཱུཔེ…པེ॰… དྷམྨེ, ཙཀྑུཝིཉྙཱཎཾ…པེ॰… མནོཝིཉྙཱཎཾ། ཙཀྑུསམྥསྶཾ…པེ॰… མནོསམྥསྶཾ, ཙཀྑུསམྥསྶཛཾ ཝེདནཾ…པེ॰… མནོསམྥསྶཛཾ ཝེདནཾ། རཱུཔསཉྙཾ…པེ॰… དྷམྨསཉྙཾ། ཛརཱམརཎཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟསྶ ཡཱ ཙེཏནཱ, ཡཱ ཙ པཐཝཱིཀསིཎཱདཱིསུ ཨཊྛཏིཾསཱཡ ཨཱརམྨཎེསུ པཝཏྟཱ ཛྷཱནཙེཏནཱ, ཡཱ ཙ ཨནཝཛྫེསུ ཀམྨཱཡཏནསིཔྤཱཡཏནཝིཛྫཱཊྛཱནེསུ པརིཙཡམནསིཀཱརཱདིཝསེན པཝཏྟཱ ཙེཏནཱ, སབྦཱ བྷཱཝེཏི ཨེཏཱཡཱཏི བྷཱཝནཱམཡཾ ཝུཏྟནཡེན པུཉྙཀིརིཡཝཏྠུ ཙཱཏི།
Tathā paṭisambhidāyaṃ (paṭi. ma. 1.48) vuttena vipassanāmaggena cakkhuṃ aniccato dukkhato anattato vipassantassa sotaṃ, ghānaṃ, jivhaṃ, kāyaṃ, manaṃ. Rūpe…pe… dhamme, cakkhuviññāṇaṃ…pe… manoviññāṇaṃ. Cakkhusamphassaṃ…pe… manosamphassaṃ, cakkhusamphassajaṃ vedanaṃ…pe… manosamphassajaṃ vedanaṃ. Rūpasaññaṃ…pe… dhammasaññaṃ. Jarāmaraṇaṃ aniccato dukkhato anattato vipassantassa yā cetanā, yā ca pathavīkasiṇādīsu aṭṭhatiṃsāya ārammaṇesu pavattā jhānacetanā, yā ca anavajjesu kammāyatanasippāyatanavijjāṭṭhānesu paricayamanasikārādivasena pavattā cetanā, sabbā bhāveti etāyāti bhāvanāmayaṃ vuttanayena puññakiriyavatthu cāti.
ཨེཀམེཀཉྩེཏྠ ཡཐཱརཧཾ པུབྦབྷཱགཏོ པཊྛཱཡ ཀཱཡེན ཀརོནྟསྶ ཀཱཡཀམྨཾ ཧོཏི, ཏདཏྠཾ ཝཱཙཾ ནིཙྪཱརེནྟསྶ ཝཙཱིཀམྨཾ, ཀཱཡངྒཾ ཝཱཙངྒཉྩ ཨཙོཔེཏྭཱ མནསཱ ཙིནྟེནྟསྶ མནོཀམྨཾ། ཨནྣཱདཱིནི དེནྟསྶ ཙཱཔི ‘‘ཨནྣདཱནཱདཱིནི དེམཱི’’ཏི ཝཱ དཱནཔཱརམིཾ ཨཱཝཛྫེཏྭཱ ཝཱ དཱནཀཱལེ དཱནམཡཾ པུཉྙཀིརིཡཝཏྠུ ཧོཏི། ཝཏྟསཱིསེ ཋཏྭཱ དདཏོ སཱིལམཡཾ, ཁཡཏོ ཝཡཏོ ཀམྨཏོ སམྨསནཾ པཊྛཔེཏྭཱ དདཏོ བྷཱཝནཱམཡཾ པུཉྙཀིརིཡཝཏྠུ ཧོཏི།
Ekamekañcettha yathārahaṃ pubbabhāgato paṭṭhāya kāyena karontassa kāyakammaṃ hoti, tadatthaṃ vācaṃ nicchārentassa vacīkammaṃ, kāyaṅgaṃ vācaṅgañca acopetvā manasā cintentassa manokammaṃ. Annādīni dentassa cāpi ‘‘annadānādīni demī’’ti vā dānapāramiṃ āvajjetvā vā dānakāle dānamayaṃ puññakiriyavatthu hoti. Vattasīse ṭhatvā dadato sīlamayaṃ, khayato vayato kammato sammasanaṃ paṭṭhapetvā dadato bhāvanāmayaṃ puññakiriyavatthu hoti.
ཨཔརཱནིཔི སཏྟ པུཉྙཀིརིཡཝཏྠཱུནི – ཨཔཙིཏིསཧགཏཾ པུཉྙཀིརིཡཝཏྠུ ཝེཡྻཱཝཙྩསཧགཏཾ པཏྟིཨནུཔྤདཱནཾ ཨབྦྷནུམོདནཾ དེསནཱམཡཾ སཝནམཡཾ དིཊྛིཛུགཏཾ པུཉྙཀིརིཡཝཏྠཱུཏི། སརཎགམནམྤི ཧི དིཊྛིཛུགཏེནེཝ སངྒཡ྄ཧཏི། ཡཾ པནེཏྠ ཝཏྟབྦཾ, ཏཾ པརཏོ ཨཱཝི བྷཝིསྶཏི།
Aparānipi satta puññakiriyavatthūni – apacitisahagataṃ puññakiriyavatthu veyyāvaccasahagataṃ pattianuppadānaṃ abbhanumodanaṃ desanāmayaṃ savanamayaṃ diṭṭhijugataṃ puññakiriyavatthūti. Saraṇagamanampi hi diṭṭhijugateneva saṅgayhati. Yaṃ panettha vattabbaṃ, taṃ parato āvi bhavissati.
ཏཏྠ ཝུཌྜྷཏརཾ དིསྭཱ པཙྩུགྒམནཔཏྟཙཱིཝརཔཊིགྒཧཎཱབྷིཝཱདནམགྒསམྤདཱནཱདིཝསེན ཨཔཙཱཡནསཧགཏཾ ཝེདིཏབྦཾ། ཝུཌྜྷཏརཱནཾ ཝཏྟཔཊིཔཏྟིཀརཎཝསེན, གཱམཾ པིཎྜཱཡ པཝིཊྛཾ བྷིཀྑུཾ དིསྭཱ པཏྟཾ གཧེཏྭཱ གཱམེ བྷིཀྑཾ སམྤཱདེཏྭཱ ཨུཔསཾཧརཎཝསེན ‘‘གཙྪ བྷིཀྑཱུནཾ པཏྟཾ ཨཱཧརཱ’’ཏི སུཏྭཱ ཝེགེན གནྟྭཱ པཏྟཱཧརཎཱདིཝསེན ཙ ཝེཡྻཱཝཙྩསཧགཏཾ ཝེདིཏབྦཾ། ཙཏྟཱརོ པཙྩཡེ དཏྭཱ པུཔྥགནྡྷཱདཱིཧི རཏནཏྟཡསྶ པཱུཛཾ ཀཏྭཱ ཨཉྙཾ ཝཱ ཏཱདིསཾ པུཉྙཾ ཀཏྭཱ ‘‘སབྦསཏྟཱནཾ པཏྟི ཧོཏཱུ’’ཏི པརིཎཱམཝསེན པཏྟིཨནུཔྤདཱནཾ ཝེདིཏབྦཾ། ཏཐཱ པརེཧི དིནྣཱཡ པཏྟིཡཱ ཀེཝལཾ ཝཱ པརེཧི ཀཏཾ པུཉྙཾ ‘‘སཱདྷུ, སུཊྛཱུ’’ཏི ཨནུམོདནཝསེན ཨབྦྷནུམོདནཾ ཝེདིཏབྦཾ། ཨཏྟནོ པགུཎདྷམྨཾ ཨཔཙྩཱསཱིསནྟོ ཧིཏཛ྄ཛྷཱསཡེན པརེསཾ དེསེཏི – ཨིདཾ དེསནཱམཡཾ པུཉྙཀིརིཡཝཏྠུ ནཱམ། ཡཾ པན ཨེཀོ ‘‘ཨེཝཾ མཾ དྷམྨཀཐིཀོཏི ཛཱནིསྶནྟཱི’’ཏི ཨིཙྪཱཡ ཋཏྭཱ ལཱབྷསཀྐཱརསིལོཀསནྣིསྶིཏོ དྷམྨཾ དེསེཏི, ཏཾ ན མཧཔྥལཾ ཧོཏི། ‘‘ཨདྡྷཱ ཨཡཾ ཨཏྟཧིཏཔརཧིཏཱནཾ པཊིཔཛྫནཱུཔཱཡོ’’ཏི ཡོནིསོམནསིཀཱརཔུརེཙཱརིཀཧིཏཕརཎེན མུདུཙིཏྟེན དྷམྨཾ སུཎཱཏི, ཨིདཾ སཝནམཡཾ པུཉྙཀིརིཡཝཏྠུ ཧོཏི། ཡཾ པནེཀོ ‘‘ཨིཏི མཾ སདྡྷོཏི ཛཱནིསྶནྟཱི’’ཏི སུཎཱཏི, ཏཾ ན མཧཔྥལཾ ཧོཏི། དིཊྛིཡཱ ཨུཛུགམནཾ དིཊྛིཛུགཏཾ, ‘‘ཨཏྠི དིནྣ’’ནྟིཨཱདིནཡཔྤཝཏྟསྶ སམྨཱདསྶནསྶ ཨེཏཾ ཨདྷིཝཙནཾ། ཨིདཉྷི པུབྦབྷཱགེ ཝཱ པཙྪཱབྷཱགེ ཝཱ ཉཱཎཝིཔྤཡུཏྟམྤི ཨུཛུཀརཎཀཱལེ ཉཱཎསམྤཡུཏྟམེཝ ཧོཏི། ཨཔརེ པནཱཧུ ‘‘ཝིཛཱནནཔཛཱནནཝསེན དསྶནཾ དིཊྛི ཀུསལཉྩ ཝིཉྙཱཎཾ ཀམྨསྶཀཏཱཉཱཎཱདི ཙ སམྨཱདསྶན’’ནྟི ། ཏཏྠ ཀུསལེན ཝིཉྙཱཎེན ཉཱཎསྶ ཨནུཔྤཱདེཔི ཨཏྟནཱ ཀཏཔུཉྙཱནུསྶརཎཝཎྞཱརཧཝཎྞནཱདཱིནཾ སངྒཧོ, ཀམྨསྶཀཏཱཉཱཎེན ཀམྨཔཐསམྨཱདིཊྛིཡཱ ། ཨིཏརཾ པན དིཊྛིཛུགཏཾ སབྦེསཾ ནིཡམལཀྑཎཾ། ཡཉྷི ཀིཉྩི པུཉྙཾ ཀརོནྟསྶ དིཊྛིཡཱ ཨུཛུབྷཱཝེནེཝ ཏཾ མཧཔྥལཾ ཧོཏི།
Tattha vuḍḍhataraṃ disvā paccuggamanapattacīvarapaṭiggahaṇābhivādanamaggasampadānādivasena apacāyanasahagataṃ veditabbaṃ. Vuḍḍhatarānaṃ vattapaṭipattikaraṇavasena, gāmaṃ piṇḍāya paviṭṭhaṃ bhikkhuṃ disvā pattaṃ gahetvā gāme bhikkhaṃ sampādetvā upasaṃharaṇavasena ‘‘gaccha bhikkhūnaṃ pattaṃ āharā’’ti sutvā vegena gantvā pattāharaṇādivasena ca veyyāvaccasahagataṃ veditabbaṃ. Cattāro paccaye datvā pupphagandhādīhi ratanattayassa pūjaṃ katvā aññaṃ vā tādisaṃ puññaṃ katvā ‘‘sabbasattānaṃ patti hotū’’ti pariṇāmavasena pattianuppadānaṃ veditabbaṃ. Tathā parehi dinnāya pattiyā kevalaṃ vā parehi kataṃ puññaṃ ‘‘sādhu, suṭṭhū’’ti anumodanavasena abbhanumodanaṃ veditabbaṃ. Attano paguṇadhammaṃ apaccāsīsanto hitajjhāsayena paresaṃ deseti – idaṃ desanāmayaṃ puññakiriyavatthu nāma. Yaṃ pana eko ‘‘evaṃ maṃ dhammakathikoti jānissantī’’ti icchāya ṭhatvā lābhasakkārasilokasannissito dhammaṃ deseti, taṃ na mahapphalaṃ hoti. ‘‘Addhā ayaṃ attahitaparahitānaṃ paṭipajjanūpāyo’’ti yonisomanasikārapurecārikahitapharaṇena muducittena dhammaṃ suṇāti, idaṃ savanamayaṃ puññakiriyavatthu hoti. Yaṃ paneko ‘‘iti maṃ saddhoti jānissantī’’ti suṇāti, taṃ na mahapphalaṃ hoti. Diṭṭhiyā ujugamanaṃ diṭṭhijugataṃ, ‘‘atthi dinna’’ntiādinayappavattassa sammādassanassa etaṃ adhivacanaṃ. Idañhi pubbabhāge vā pacchābhāge vā ñāṇavippayuttampi ujukaraṇakāle ñāṇasampayuttameva hoti. Apare panāhu ‘‘vijānanapajānanavasena dassanaṃ diṭṭhi kusalañca viññāṇaṃ kammassakatāñāṇādi ca sammādassana’’nti . Tattha kusalena viññāṇena ñāṇassa anuppādepi attanā katapuññānussaraṇavaṇṇārahavaṇṇanādīnaṃ saṅgaho, kammassakatāñāṇena kammapathasammādiṭṭhiyā . Itaraṃ pana diṭṭhijugataṃ sabbesaṃ niyamalakkhaṇaṃ. Yañhi kiñci puññaṃ karontassa diṭṭhiyā ujubhāveneva taṃ mahapphalaṃ hoti.
ཨིམེསཾ པན སཏྟནྣཾ པུཉྙཀིརིཡཝཏྠཱུནཾ པུརིམེཧི ཏཱིཧི དཱནམཡཱདཱིཧི པུཉྙཀིརིཡཝཏྠཱུཧི སངྒཧོ། ཏཏྠ ཧི ཨཔཙཱཡནཝེཡྻཱཝཙྩཱནི སཱིལམཡེ, པཏྟིཨནུཔྤདཱནཨབྦྷནུམོདནཱནི དཱནམཡེ, དྷམྨདེསནཱསཝནཱནི བྷཱཝནཱམཡེ, དིཊྛིཛུགཏཾ ཏཱིསུཔི། ཏེནཱཧ བྷགཝཱ –
Imesaṃ pana sattannaṃ puññakiriyavatthūnaṃ purimehi tīhi dānamayādīhi puññakiriyavatthūhi saṅgaho. Tattha hi apacāyanaveyyāvaccāni sīlamaye, pattianuppadānaabbhanumodanāni dānamaye, dhammadesanāsavanāni bhāvanāmaye, diṭṭhijugataṃ tīsupi. Tenāha bhagavā –
‘‘ཏཱིཎིམཱནི, བྷིཀྑཝེ, པུཉྙཀིརིཡཝཏྠཱུནི། ཀཏམཱནི ཏཱིཎི? དཱནམཡཾ…པེ॰… བྷཱཝནཱམཡཾ པུཉྙཀིརིཡཝཏྠཱུ’’ཏི (ཨ॰ ནི॰ ༨.༣༦)།
‘‘Tīṇimāni, bhikkhave, puññakiriyavatthūni. Katamāni tīṇi? Dānamayaṃ…pe… bhāvanāmayaṃ puññakiriyavatthū’’ti (a. ni. 8.36).
ཨེཏྠ ཙ ཨཊྛནྣཾ ཀཱམཱཝཙརཀུསལཙེཏནཱནཾ ཝསེན ཏིཎྞམྤི པུཉྙཀིརིཡཝཏྠཱུནཾ པཝཏྟི ཧོཏི། ཡཐཱ ཧི པགུཎཾ དྷམྨཾ པརིཝཏྟེནྟསྶ ཨེཀཙྩེ ཨནུསནྡྷིཾ ཨསལླཀྑེནྟསྶེཝ གཙྪནྟི, ཨེཝཾ པགུཎཾ སམཐཝིཔསྶནཱབྷཱཝནཾ ཨནུཡུཉྫནྟསྶ ཨནྟརནྟརཱ ཉཱཎཝིཔྤཡུཏྟཙིཏྟེནཱཔི མནསིཀཱརོ པཝཏྟཏི། སབྦཾ ཏཾ པན མཧགྒཏཀུསལཙེཏནཱནཾ ཝསེན བྷཱཝནཱམཡམེཝ པུཉྙཀིརིཡཝཏྠུ ཧོཏི, ན ཨིཏརཱནི། གཱཐཱཡ ཨཏྠོ ཧེཊྛཱ ཝུཏྟོཡེཝ།
Ettha ca aṭṭhannaṃ kāmāvacarakusalacetanānaṃ vasena tiṇṇampi puññakiriyavatthūnaṃ pavatti hoti. Yathā hi paguṇaṃ dhammaṃ parivattentassa ekacce anusandhiṃ asallakkhentasseva gacchanti, evaṃ paguṇaṃ samathavipassanābhāvanaṃ anuyuñjantassa antarantarā ñāṇavippayuttacittenāpi manasikāro pavattati. Sabbaṃ taṃ pana mahaggatakusalacetanānaṃ vasena bhāvanāmayameva puññakiriyavatthu hoti, na itarāni. Gāthāya attho heṭṭhā vuttoyeva.
པཋམསུཏྟཝཎྞནཱ ནིཊྛིཏཱ།
Paṭhamasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༡. པུཉྙཀིརིཡཝཏྠུསུཏྟཾ • 1. Puññakiriyavatthusuttaṃ
