| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3-5. புண்ணமந்தாணிபுத்தத்தே²ரஅபதா³னவண்ணனா
3-5. Puṇṇamantāṇiputtattheraapadānavaṇṇanā
அஜ்ஜா²யகோ மந்தத⁴ரோதிஆதி³கங் ஆயஸ்மதோ புண்ணஸ்ஸ மந்தாணிபுத்தத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ உப்பத்திதோ புரேதரமேவ ஹங்ஸவதீனக³ரே ப்³ராஹ்மணமஹாஸாலகுலே நிப்³ப³த்தித்வா அனுக்கமேன விஞ்ஞுதங் பத்தோ. அபரபா⁴கே³ பது³முத்தரே ப⁴க³வதி உப்பஜ்ஜித்வா போ³த⁴னெய்யானங் த⁴ம்மங் தே³ஸெந்தே ஹெட்டா² வுத்தனயேன மஹாஜனேன ஸத்³தி⁴ங் விஹாரங் க³ந்த்வா பரிஸபரியந்தே நிஸீதி³த்வா த⁴ம்மங் ஸுணந்தோ ஸத்தா²ரங் ஏகங் பி⁴க்கு²ங் த⁴ம்மகதி²கானங் அக்³க³ட்டா²னே ட²பெந்தங் தி³ஸ்வா ‘‘மயாபி அனாக³தே ஏவரூபேன ப⁴விதுங் வட்டதீ’’தி சிந்தெத்வா தே³ஸனாவஸானே உட்டி²தாய பரிஸாய ஸத்தா²ரங் உபஸங்கமித்வா நிமந்தெத்வா ஹெட்டா² வுத்தனயேன மஹாஸக்காரங் கத்வா ப⁴க³வந்தங் ஏவமாஹ – ‘‘ப⁴ந்தே, அஹங் இமினா அதி⁴காரேன ந அஞ்ஞங் ஸம்பத்திங் பத்தே²மி, யதா² பனேஸோ பி⁴க்கு² ஸத்தமதி³வஸமத்த²கே தும்ஹேஹி த⁴ம்மகதி²கானங் அக்³க³ட்டா²னே ட²பிதோ, ஏவங் அஹம்பி அனாக³தே ஏகஸ்ஸ பு³த்³த⁴ஸ்ஸ ஸாஸனே த⁴ம்மகதி²கானங் அக்³கோ³ ப⁴வெய்ய’’ந்தி பத்த²னங் அகாஸி. ஸத்தா² அனாக³தங் ஓலோகெத்வா தஸ்ஸ பத்த²னாய ஸமிஜ்ஜ²னபா⁴வங் தி³ஸ்வா ‘‘அனாக³தே கப்பஸதஸஹஸ்ஸமத்த²கே கோ³தமோ நாம பு³த்³தோ⁴ உப்பஜ்ஜிஸ்ஸதி, தஸ்ஸ ஸாஸனே பப்³ப³ஜித்வா த்வங் த⁴ம்மகதி²கானங் அக்³கோ³ ப⁴விஸ்ஸஸீ’’தி ப்³யாகாஸி.
Ajjhāyakomantadharotiādikaṃ āyasmato puṇṇassa mantāṇiputtattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato uppattito puretarameva haṃsavatīnagare brāhmaṇamahāsālakule nibbattitvā anukkamena viññutaṃ patto. Aparabhāge padumuttare bhagavati uppajjitvā bodhaneyyānaṃ dhammaṃ desente heṭṭhā vuttanayena mahājanena saddhiṃ vihāraṃ gantvā parisapariyante nisīditvā dhammaṃ suṇanto satthāraṃ ekaṃ bhikkhuṃ dhammakathikānaṃ aggaṭṭhāne ṭhapentaṃ disvā ‘‘mayāpi anāgate evarūpena bhavituṃ vaṭṭatī’’ti cintetvā desanāvasāne uṭṭhitāya parisāya satthāraṃ upasaṅkamitvā nimantetvā heṭṭhā vuttanayena mahāsakkāraṃ katvā bhagavantaṃ evamāha – ‘‘bhante, ahaṃ iminā adhikārena na aññaṃ sampattiṃ patthemi, yathā paneso bhikkhu sattamadivasamatthake tumhehi dhammakathikānaṃ aggaṭṭhāne ṭhapito, evaṃ ahampi anāgate ekassa buddhassa sāsane dhammakathikānaṃ aggo bhaveyya’’nti patthanaṃ akāsi. Satthā anāgataṃ oloketvā tassa patthanāya samijjhanabhāvaṃ disvā ‘‘anāgate kappasatasahassamatthake gotamo nāma buddho uppajjissati, tassa sāsane pabbajitvā tvaṃ dhammakathikānaṃ aggo bhavissasī’’ti byākāsi.
ஸோ யாவதாயுகங் கல்யாணகம்மங் கத்வா ததோ சுதோ கப்பஸதஸஹஸ்ஸங் புஞ்ஞஸம்பா⁴ரங் ஸம்ப⁴ரந்தோ தே³வமனுஸ்ஸேஸு ஸங்ஸரித்வா அம்ஹாகங் ப⁴க³வதோ காலே கபிலவத்து²னக³ரஸ்ஸ அவிதூ³ரே தோ³ணவத்து²னாமகே ப்³ராஹ்மணகா³மே ப்³ராஹ்மணமஹாஸாலகுலே அஞ்ஞாஸிகொண்ட³ஞ்ஞத்தே²ரஸ்ஸ பா⁴கி³னெய்யோ ஹுத்வா நிப்³ப³த்தி. தஸ்ஸ புண்ணோதி நாமங் அகங்ஸு. ஸோ ஸத்த²ரி அபி⁴ஸம்போ³தி⁴ங் பத்வா பவத்திதவரத⁴ம்மசக்கே அனுக்கமேன ராஜக³ஹங் உபனிஸ்ஸாய விஹரந்தே அஞ்ஞாஸிகொண்ட³ஞ்ஞஸ்ஸ ஸந்திகே பப்³ப³ஜித்வா லத்³தூ⁴பஸம்பதோ³ பதா⁴னமனுயுஞ்ஜந்தோ ஸப்³ப³ங் பப்³ப³ஜிதகிச்சங் மத்த²கங் பாபெத்வா ‘‘த³ஸப³லஸ்ஸ ஸந்திகங் க³மிஸ்ஸாமீ’’தி மாதுலத்தே²ரேன ஸத்³தி⁴ங் ஸத்து² ஸந்திகங் ஆக³ந்த்வா கபிலவத்து²ஸாமந்தாயேவ ஓஹியித்வா யோனிஸோ மனஸிகாரே கம்மங் கரொந்தோ நசிரஸ்ஸேவ விபஸ்ஸனங் உஸ்ஸுக்காபெத்வா அரஹத்தங் பாபுணி.
So yāvatāyukaṃ kalyāṇakammaṃ katvā tato cuto kappasatasahassaṃ puññasambhāraṃ sambharanto devamanussesu saṃsaritvā amhākaṃ bhagavato kāle kapilavatthunagarassa avidūre doṇavatthunāmake brāhmaṇagāme brāhmaṇamahāsālakule aññāsikoṇḍaññattherassa bhāgineyyo hutvā nibbatti. Tassa puṇṇoti nāmaṃ akaṃsu. So satthari abhisambodhiṃ patvā pavattitavaradhammacakke anukkamena rājagahaṃ upanissāya viharante aññāsikoṇḍaññassa santike pabbajitvā laddhūpasampado padhānamanuyuñjanto sabbaṃ pabbajitakiccaṃ matthakaṃ pāpetvā ‘‘dasabalassa santikaṃ gamissāmī’’ti mātulattherena saddhiṃ satthu santikaṃ āgantvā kapilavatthusāmantāyeva ohiyitvā yoniso manasikāre kammaṃ karonto nacirasseva vipassanaṃ ussukkāpetvā arahattaṃ pāpuṇi.
தஸ்ஸ பன புண்ணத்தே²ரஸ்ஸ ஸந்திகே பப்³ப³ஜிதா குலபுத்தா பஞ்சஸதா அஹேஸுங். தே²ரோ தே த³ஸகதா²வத்தூ²ஹி ஓவதி³. தேபி ஸப்³பே³ த³ஸகதா²வத்தூ²ஹி ஓவதி³தா தஸ்ஸ ஓவாதே³ ட²த்வா அரஹத்தங் பாபுணித்வா அத்தனோ பப்³ப³ஜிதகிச்சங் மத்த²கப்பத்தங் ஞத்வா உபஜ்ஜா²யங் உபஸங்கமித்வா ஆஹங்ஸு – ‘‘ப⁴ந்தே, மயங் பப்³ப³ஜிதகிச்சஸ்ஸ மத்த²கங் பத்தா, த³ஸன்னஞ்ச கதா²வத்தூ²னங் லாபி⁴னோ, ஸமயோ தா³னி நோ த³ஸப³லங் பஸ்ஸிது’’ந்தி, தே²ரோ தேஸங் வசனங் ஸுத்வா சிந்தேஸி – ‘‘மய்ஹங் த³ஸகதா²வத்து²லாபி⁴தங் ஸத்தா² ஜானாதி. அஹங் த⁴ம்மங் தே³ஸெந்தோ த³ஸகதா²வத்தூ²னி அமுஞ்சித்வாவ தே³ஸேமி, மயி ச க³ச்ச²ந்தே ஸப்³பே³பிமே பி⁴க்கூ² மங் பரிவாரெத்வா க³ச்சி²ஸ்ஸந்தி, ஏவங் மே க³ணேன ஸத்³தி⁴ங் க³ந்த்வா அயுத்தங் த³ஸப³லங் பஸ்ஸிதுங், இமே தாவ த³ஸப³லங் பஸ்ஸிதுங் க³ச்ச²ந்தூ’’தி. அத² தே ஏவமாஹ – ‘‘ஆவுஸோ, தும்ஹே புரதோ க³ந்த்வா த³ஸப³லங் பஸ்ஸத², மம வசனேன ததா²க³தஸ்ஸ பாதே³ வந்த³த², அஹம்பி தும்ஹாகங் க³தமக்³கே³ன ஆக³ச்சி²ஸ்ஸாமீ’’தி. தேபி தே²ரா ஸப்³பே³ த³ஸப³லஸ்ஸ ஜாதிபூ⁴மிரட்ட²வாஸினோ ஸப்³பே³ கீ²ணாஸவா ஸப்³பே³ த³ஸகதா²வத்து²லாபி⁴னோ உபஜ்ஜா²யஸ்ஸ ஓவாத³ங் அச்சி²ந்தி³த்வா தே²ரங் வந்தி³த்வா அனுபுப்³பே³ன சாரிகங் சரந்தா ஸட்டி²யோஜனமக்³க³ங் அதிக்கம்ம ராஜக³ஹே வேளுவனமஹாவிஹாரங் க³ந்த்வா த³ஸப³லஸ்ஸ பாதே³ வந்தி³த்வா ஏகமந்தங் நிஸீதி³ங்ஸு. ஆசிண்ணங் கோ² பனேதங் பு³த்³தா⁴னங் ப⁴க³வந்தானங் ஆக³ந்துகேஹி பி⁴க்கூ²ஹி ஸத்³தி⁴ங் படிஸம்மோதி³துந்தி ப⁴க³வா தேஹி ஸத்³தி⁴ங் ‘‘கச்சி, பி⁴க்க²வே, க²மனீய’’ந்திஆதி³னா நயேன மது⁴ரபடிஸந்தா²ரங் கத்வா ‘‘குதோ ச தும்ஹே, பி⁴க்க²வே, ஆக³தத்தா²’’தி புச்சி²த்வா புன தேஹி ‘‘ஜாதிபூ⁴மிதோ’’தி வுத்தே ‘‘கோ நு கோ², பி⁴க்க²வே, ஜாதிபூ⁴மியங் ஜாதிபூ⁴மகானங் பி⁴க்கூ²னங் ஸப்³ரஹ்மசாரீனங் ஏவங் ஸம்பா⁴விதோ ‘அத்தனா ச அப்பிச்சோ² அப்பிச்ச²கத²ஞ்ச பி⁴க்கூ²னங் கத்தா’’’தி (ம॰ நி॰ 1.252) த³ஸகதா²வத்து²லாபி⁴ங் பி⁴க்கு²ங் புச்சி². தேபி ‘‘புண்ணோ நாம, ப⁴ந்தே, ஆயஸ்மா மந்தாணிபுத்தோ’’தி ஆரோசயிங்ஸு.
Tassa pana puṇṇattherassa santike pabbajitā kulaputtā pañcasatā ahesuṃ. Thero te dasakathāvatthūhi ovadi. Tepi sabbe dasakathāvatthūhi ovaditā tassa ovāde ṭhatvā arahattaṃ pāpuṇitvā attano pabbajitakiccaṃ matthakappattaṃ ñatvā upajjhāyaṃ upasaṅkamitvā āhaṃsu – ‘‘bhante, mayaṃ pabbajitakiccassa matthakaṃ pattā, dasannañca kathāvatthūnaṃ lābhino, samayo dāni no dasabalaṃ passitu’’nti, thero tesaṃ vacanaṃ sutvā cintesi – ‘‘mayhaṃ dasakathāvatthulābhitaṃ satthā jānāti. Ahaṃ dhammaṃ desento dasakathāvatthūni amuñcitvāva desemi, mayi ca gacchante sabbepime bhikkhū maṃ parivāretvā gacchissanti, evaṃ me gaṇena saddhiṃ gantvā ayuttaṃ dasabalaṃ passituṃ, ime tāva dasabalaṃ passituṃ gacchantū’’ti. Atha te evamāha – ‘‘āvuso, tumhe purato gantvā dasabalaṃ passatha, mama vacanena tathāgatassa pāde vandatha, ahampi tumhākaṃ gatamaggena āgacchissāmī’’ti. Tepi therā sabbe dasabalassa jātibhūmiraṭṭhavāsino sabbe khīṇāsavā sabbe dasakathāvatthulābhino upajjhāyassa ovādaṃ acchinditvā theraṃ vanditvā anupubbena cārikaṃ carantā saṭṭhiyojanamaggaṃ atikkamma rājagahe veḷuvanamahāvihāraṃ gantvā dasabalassa pāde vanditvā ekamantaṃ nisīdiṃsu. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammoditunti bhagavā tehi saddhiṃ ‘‘kacci, bhikkhave, khamanīya’’ntiādinā nayena madhurapaṭisanthāraṃ katvā ‘‘kuto ca tumhe, bhikkhave, āgatatthā’’ti pucchitvā puna tehi ‘‘jātibhūmito’’ti vutte ‘‘ko nu kho, bhikkhave, jātibhūmiyaṃ jātibhūmakānaṃ bhikkhūnaṃ sabrahmacārīnaṃ evaṃ sambhāvito ‘attanā ca appiccho appicchakathañca bhikkhūnaṃ kattā’’’ti (ma. ni. 1.252) dasakathāvatthulābhiṃ bhikkhuṃ pucchi. Tepi ‘‘puṇṇo nāma, bhante, āyasmā mantāṇiputto’’ti ārocayiṃsu.
தேஸங் கத²ங் ஸுத்வா ஆயஸ்மா ஸாரிபுத்தோ தே²ரங் த³ஸ்ஸனகாமோ அஹோஸி. அத² ஸத்தா² ராஜக³ஹதோ ஸாவத்தி²ங் அக³மாஸி. புண்ணத்தே²ரோபி த³ஸப³லஸ்ஸ தத்த² ஆக³தபா⁴வங் ஸுத்வா ‘‘ஸத்தா²ரங் பஸ்ஸிஸ்ஸாமீ’’தி க³ந்த்வா அந்தோக³ந்த⁴குடியங்யேவ ததா²க³தங் ஸம்பாபுணி. ஸத்தா² தஸ்ஸ த⁴ம்மங் தே³ஸேஸி. தே²ரோ த⁴ம்மங் ஸுத்வா த³ஸப³லங் வந்தி³த்வா படிஸல்லானத்தா²ய அந்த⁴வனங் க³ந்த்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³. ஸாரிபுத்தத்தே²ரோபி தஸ்ஸாக³மனங் ஸுத்வா ஸீஸானுலோகிகோ க³ந்த்வா ஓகாஸங் ஸல்லக்கெ²த்வா தஸ்மிங் ருக்க²மூலே நிஸின்னகங் உபஸங்கமித்வா தே²ரேன ஸத்³தி⁴ங் ஸம்மோதி³த்வா தங் விஸுத்³தி⁴க்கமங் (ம॰ நி॰ 1.257) புச்சி². ஸோபிஸ்ஸ புச்சி²தபுச்சி²தங் ப்³யாகரொந்தோ ரத²வினீதூபமாய அதிவிய சித்தங் ஆராதே⁴ஸி. தே அஞ்ஞமஞ்ஞஸ்ஸ ஸுபா⁴ஸிதங் ஸமனுமோதி³ங்ஸு.
Tesaṃ kathaṃ sutvā āyasmā sāriputto theraṃ dassanakāmo ahosi. Atha satthā rājagahato sāvatthiṃ agamāsi. Puṇṇattheropi dasabalassa tattha āgatabhāvaṃ sutvā ‘‘satthāraṃ passissāmī’’ti gantvā antogandhakuṭiyaṃyeva tathāgataṃ sampāpuṇi. Satthā tassa dhammaṃ desesi. Thero dhammaṃ sutvā dasabalaṃ vanditvā paṭisallānatthāya andhavanaṃ gantvā aññatarasmiṃ rukkhamūle divāvihāraṃ nisīdi. Sāriputtattheropi tassāgamanaṃ sutvā sīsānulokiko gantvā okāsaṃ sallakkhetvā tasmiṃ rukkhamūle nisinnakaṃ upasaṅkamitvā therena saddhiṃ sammoditvā taṃ visuddhikkamaṃ (ma. ni. 1.257) pucchi. Sopissa pucchitapucchitaṃ byākaronto rathavinītūpamāya ativiya cittaṃ ārādhesi. Te aññamaññassa subhāsitaṃ samanumodiṃsu.
434. அத² நங் ஸத்தா² அபரபா⁴கே³ பி⁴க்கு²ஸங்க⁴ஸ்ஸ மஜ்ஜே² நிஸின்னோ தே²ரங் ‘‘ஏதத³க்³க³ங், பி⁴க்க²வே , மம ஸாவகானங் பி⁴க்கூ²னங் த⁴ம்மகதி²கானங் யதி³த³ங் புண்ணோ’’தி (அ॰ நி॰ 1.188, 196) ஏதத³க்³கே³ ட²பேஸி. ஸோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் விபா⁴வெந்தோ அஜ்ஜா²யகோதிஆதி³மாஹ. தத்த² அஜ்ஜா²யகோதி அனேகப்³ராஹ்மணானங் வாசேதா ஸிக்கா²பேதா. மந்தத⁴ரோதி மந்தானங் தா⁴ரேதாதி அத்தோ², வேத³ஸங்கா²தஸ்ஸ சதுத்த²வேத³ஸ்ஸ ஸஜ்ஜா²யனஸவனதா³னானங் வஸேன தா⁴ரேதாதி வுத்தங் ஹோதி. திண்ணங் வேதா³னந்தி இருவேத³யஜுவேத³ஸாமவேத³ஸங்கா²தானங் திண்ணங் வேதா³னங் ஞாணேன தா⁴ரேதப்³ப³தா ‘‘வேதோ³’’தி லத்³த⁴னாமேஸு தீஸு வேத³க³ந்தே²ஸு பாரங் பரியோஸானங் க³தோதி அத்தோ² . புரக்க²தொம்ஹி ஸிஸ்ஸேஹீதி மம நிச்சபரிவாரபூ⁴தேஹி ஸிஸ்ஸேஹி பரிவுதோ அஹங் அம்ஹி. உபக³ச்சி²ங் நருத்தமந்தி நரானங் உத்தமங் ப⁴க³வந்தங் உபஸங்கமிங், ஸமீபங் க³தோதி அத்தோ². ஸேஸங் ஸுவிஞ்ஞெய்யமேவ.
434. Atha naṃ satthā aparabhāge bhikkhusaṅghassa majjhe nisinno theraṃ ‘‘etadaggaṃ, bhikkhave , mama sāvakānaṃ bhikkhūnaṃ dhammakathikānaṃ yadidaṃ puṇṇo’’ti (a. ni. 1.188, 196) etadagge ṭhapesi. So pubbakammaṃ saritvā somanassavasena pubbacaritāpadānaṃ vibhāvento ajjhāyakotiādimāha. Tattha ajjhāyakoti anekabrāhmaṇānaṃ vācetā sikkhāpetā. Mantadharoti mantānaṃ dhāretāti attho, vedasaṅkhātassa catutthavedassa sajjhāyanasavanadānānaṃ vasena dhāretāti vuttaṃ hoti. Tiṇṇaṃ vedānanti iruvedayajuvedasāmavedasaṅkhātānaṃ tiṇṇaṃ vedānaṃ ñāṇena dhāretabbatā ‘‘vedo’’ti laddhanāmesu tīsu vedaganthesu pāraṃ pariyosānaṃ gatoti attho . Purakkhatomhi sissehīti mama niccaparivārabhūtehi sissehi parivuto ahaṃ amhi. Upagacchiṃ naruttamanti narānaṃ uttamaṃ bhagavantaṃ upasaṅkamiṃ, samīpaṃ gatoti attho. Sesaṃ suviññeyyameva.
438. அபி⁴த⁴ம்மனயஞ்ஞூஹந்தி அஹங் ததா³ தஸ்ஸ பு³த்³த⁴ஸ்ஸ காலே அபி⁴த⁴ம்மனயகோவிதோ³தி அத்தோ². கதா²வத்து²விஸுத்³தி⁴யாதி கதா²வத்து²ப்பகரணே விஸுத்³தி⁴யா சே²கோ, அப்பிச்ச²ஸந்துட்டி²கதா²தீ³ஸு த³ஸஸு கதா²வத்தூ²ஸு வா சே²கோ, தாய கதா²வத்து²விஸுத்³தி⁴யா ஸப்³பே³ஸங் யதிஜனானங் பண்டி³தானங் விஞ்ஞாபெத்வான போ³தெ⁴த்வான அனாஸவோ நிக்கிலேஸோ விஹராமி வாஸங் கப்பேமி.
438.Abhidhammanayaññūhanti ahaṃ tadā tassa buddhassa kāle abhidhammanayakovidoti attho. Kathāvatthuvisuddhiyāti kathāvatthuppakaraṇe visuddhiyā cheko, appicchasantuṭṭhikathādīsu dasasu kathāvatthūsu vā cheko, tāya kathāvatthuvisuddhiyā sabbesaṃ yatijanānaṃ paṇḍitānaṃ viññāpetvāna bodhetvāna anāsavo nikkileso viharāmi vāsaṃ kappemi.
439. இதோ பஞ்சஸதே கப்பேதி இதோ பஞ்சபு³த்³த⁴படிமண்டி³ததோ ப⁴த்³த³கப்பதோ பஞ்சஸதே கப்பே ஸுப்பகாஸகா ஸுட்டு² பாகடா சக்கரதனாதி³ ஸத்தஹி ரதனேஹி ஸம்பன்னா ஜம்பு³தீ³பாதி³சதுதீ³பம்ஹி இஸ்ஸரா பதா⁴னா சதுரோ சத்தாரோ சக்கவத்திராஜானோ அஹேஸுந்தி அத்தோ². ஸேஸங் வுத்தனயமேவாதி.
439.Ito pañcasate kappeti ito pañcabuddhapaṭimaṇḍitato bhaddakappato pañcasate kappe suppakāsakā suṭṭhu pākaṭā cakkaratanādi sattahi ratanehi sampannā jambudīpādicatudīpamhi issarā padhānā caturo cattāro cakkavattirājāno ahesunti attho. Sesaṃ vuttanayamevāti.
புண்ணமந்தாணிபுத்தத்தே²ரஅபதா³னவண்ணனா ஸமத்தா.
Puṇṇamantāṇiputtattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3-5. புண்ணமந்தாணிபுத்தத்தே²ரஅபதா³னங் • 3-5. Puṇṇamantāṇiputtattheraapadānaṃ
