| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. புண்ணமஸுத்தவண்ணனா
10. Puṇṇamasuttavaṇṇanā
82. த³ஸமே தத³ஹுபோஸதே²திஆதி³ பவாரணஸுத்தே வித்தா²ரிதமேவ. கிஞ்சிதே³வ தே³ஸந்தி கிஞ்சி காரணங். ஸகே ஆஸனே நிஸீதி³த்வா புச்ச² யதா³கங்க²ஸீதி கஸ்மா ஏவமாஹ? ஸோ கிர பி⁴க்கு² பஞ்சஸதபி⁴க்கு²பரிவாரோ. ஆசரியே பன டி²தகே புச்ச²ந்தே ஸசே தே பி⁴க்கூ² நிஸீத³ந்தி, ஸத்த²ரி கா³ரவங் கதங் ஹோதி, ஆசரியே அகா³ரவங். ஸசே உட்ட²ஹந்தி, ஆசரியே கா³ரவங் கதங் ஹோதி, ஸத்த²ரி அகா³ரவங். இதி நேஸங் சித்தங் அனேகக்³க³ங் ப⁴விஸ்ஸதி, தே³ஸனங் ஸம்படிச்சி²துங் ந ஸக்கி²ஸ்ஸந்தி. தஸ்மிங் பன நிஸீதி³த்வா புச்ச²ந்தே தேஸங் சித்தங் ஏகக்³க³ங் ப⁴விஸ்ஸதி, தே³ஸனங் ஸம்படிச்சி²துங் ஸக்கி²ஸ்ஸந்தீதி ஞத்வா ப⁴க³வா ஏவமாஹ. இமே நு கோ², ப⁴ந்தேதி அயங் தே²ரோ பஞ்சன்னங் பி⁴க்கு²ஸதானங் ஆசரியோ, பஞ்சக்க²ந்த⁴மத்தம்பி நப்பஜானாதீதி ந வத்தப்³போ³. பஞ்ஹங் புச்ச²ந்தேன பன ‘‘இமே பஞ்சுபாதா³னக்க²ந்தா⁴, ந அஞ்ஞே’’தி ஏவங் ஜானந்தேன விய ஹுத்வா புச்சி²துங் ந வட்டதி, தஸ்மா அஜானந்தோ விய புச்ச²தி. தேபி சஸ்ஸ அந்தேவாஸிகா ‘‘அம்ஹாகங் ஆசரியோ ‘அஹங் ஜானாமீ’தி ந கதே²தி, ஸப்³ப³ஞ்ஞுதஞ்ஞாணேன பன ஸத்³தி⁴ங் ஸங்ஸந்தி³த்வாவ கதே²தீ’’தி ஸோதப்³ப³ங் ஸத்³தா⁴தப்³ப³ங் மஞ்ஞிஸ்ஸந்தீதிபி அஜானந்தோ விய புச்ச²தி.
82. Dasame tadahuposathetiādi pavāraṇasutte vitthāritameva. Kiñcideva desanti kiñci kāraṇaṃ. Sake āsane nisīditvā puccha yadākaṅkhasīti kasmā evamāha? So kira bhikkhu pañcasatabhikkhuparivāro. Ācariye pana ṭhitake pucchante sace te bhikkhū nisīdanti, satthari gāravaṃ kataṃ hoti, ācariye agāravaṃ. Sace uṭṭhahanti, ācariye gāravaṃ kataṃ hoti, satthari agāravaṃ. Iti nesaṃ cittaṃ anekaggaṃ bhavissati, desanaṃ sampaṭicchituṃ na sakkhissanti. Tasmiṃ pana nisīditvā pucchante tesaṃ cittaṃ ekaggaṃ bhavissati, desanaṃ sampaṭicchituṃ sakkhissantīti ñatvā bhagavā evamāha. Ime nu kho, bhanteti ayaṃ thero pañcannaṃ bhikkhusatānaṃ ācariyo, pañcakkhandhamattampi nappajānātīti na vattabbo. Pañhaṃ pucchantena pana ‘‘ime pañcupādānakkhandhā, na aññe’’ti evaṃ jānantena viya hutvā pucchituṃ na vaṭṭati, tasmā ajānanto viya pucchati. Tepi cassa antevāsikā ‘‘amhākaṃ ācariyo ‘ahaṃ jānāmī’ti na katheti, sabbaññutaññāṇena pana saddhiṃ saṃsanditvāva kathetī’’ti sotabbaṃ saddhātabbaṃ maññissantītipi ajānanto viya pucchati.
ச²ந்த³மூலகாதி தண்ஹாச²ந்த³மூலகா. ந கோ² பி⁴க்கு² தஞ்ஞேவ உபாதா³னங் தே பஞ்சுபாதா³னக்க²ந்தா⁴தி யஸ்மா ச²ந்த³ராக³மத்தங் பஞ்சக்க²ந்தா⁴ ந ஹோதி, தஸ்மா இத³ங் வுத்தங். யஸ்மா பன ஸஹஜாததோ வா ஆரம்மணதோ வா க²ந்தே⁴ முஞ்சித்வா உபாதா³னங் நத்தி², தஸ்மா நாபி அஞ்ஞத்ர பஞ்சஹி உபாதா³னக்க²ந்தே⁴ஹி உபாதா³னந்தி வுத்தங். தண்ஹாஸம்பயுத்தஸ்மிஞ்ஹி சித்தே வத்தமானே தங்சித்தஸமுட்டா²னரூபங் ரூபக்க²ந்தோ⁴, ட²பெத்வா தங் தண்ஹங் ஸேஸா அரூபத⁴ம்மா சத்தாரோ க²ந்தா⁴தி ஸஹஜாததோபி க²ந்தே⁴ முஞ்சித்வா உபாதா³னங் நத்தி². உபாதா³னஸ்ஸ பன ரூபாதீ³ஸு அஞ்ஞதரங் ஆரம்மணங் கத்வா உப்பஜ்ஜனதோ ஆரம்மணதோபி பஞ்சக்க²ந்தே⁴ முஞ்சித்வா உபாதா³னங் நத்தி². ச²ந்த³ராக³வேமத்ததாதி ச²ந்த³ராக³னானத்தங். ஏவங் கோ² பி⁴க்கூ²தி ஏவங் ரூபாரம்மணஸ்ஸ ச²ந்த³ராக³ஸ்ஸ வேத³னாதீ³ஸு அஞ்ஞதரங் ஆரம்மணங் அகரணதோ ஸியா ச²ந்த³ராக³வேமத்ததா. க²ந்தா⁴தி⁴வசனந்தி க²ந்தா⁴தி அயங் பஞ்ஞத்தி. அயங் பன அனுஸந்தி⁴ ந க⁴டியதி, கிஞ்சாபி ந க⁴டியதி, ஸானுஸந்தி⁴காவ புச்சா², ஸானுஸந்தி⁴கங் விஸ்ஸஜ்ஜனங். அயஞ்ஹி தே²ரோ தேஸங் தேஸங் பி⁴க்கூ²னங் அஜ்ஜா²ஸயேன புச்ச²தி, ஸத்தா²பி தேஸங் தேஸங் அஜ்ஜா²ஸயேனேவ விஸ்ஸஜ்ஜேதி. ஸேஸங் ஸப்³ப³த்த² உத்தானமேவ. த³ஸமங்.
Chandamūlakāti taṇhāchandamūlakā. Na kho bhikkhu taññeva upādānaṃ te pañcupādānakkhandhāti yasmā chandarāgamattaṃ pañcakkhandhā na hoti, tasmā idaṃ vuttaṃ. Yasmā pana sahajātato vā ārammaṇato vā khandhe muñcitvā upādānaṃ natthi, tasmā nāpi aññatra pañcahiupādānakkhandhehi upādānanti vuttaṃ. Taṇhāsampayuttasmiñhi citte vattamāne taṃcittasamuṭṭhānarūpaṃ rūpakkhandho, ṭhapetvā taṃ taṇhaṃ sesā arūpadhammā cattāro khandhāti sahajātatopi khandhe muñcitvā upādānaṃ natthi. Upādānassa pana rūpādīsu aññataraṃ ārammaṇaṃ katvā uppajjanato ārammaṇatopi pañcakkhandhe muñcitvā upādānaṃ natthi. Chandarāgavemattatāti chandarāganānattaṃ. Evaṃ kho bhikkhūti evaṃ rūpārammaṇassa chandarāgassa vedanādīsu aññataraṃ ārammaṇaṃ akaraṇato siyā chandarāgavemattatā. Khandhādhivacananti khandhāti ayaṃ paññatti. Ayaṃ pana anusandhi na ghaṭiyati, kiñcāpi na ghaṭiyati, sānusandhikāva pucchā, sānusandhikaṃ vissajjanaṃ. Ayañhi thero tesaṃ tesaṃ bhikkhūnaṃ ajjhāsayena pucchati, satthāpi tesaṃ tesaṃ ajjhāsayeneva vissajjeti. Sesaṃ sabbattha uttānameva. Dasamaṃ.
இமஸ்ஸ ச பன வக்³க³ஸ்ஸ ஏகேகஸ்மிங் ஸுத்தே பஞ்சஸதா பஞ்சஸதா பி⁴க்கூ² அரஹத்தங் பத்தாதி.
Imassa ca pana vaggassa ekekasmiṃ sutte pañcasatā pañcasatā bhikkhū arahattaṃ pattāti.
க²ஜ்ஜனீயவக்³கோ³ அட்ட²மோ.
Khajjanīyavaggo aṭṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. புண்ணமஸுத்தங் • 10. Puṇṇamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. புண்ணமஸுத்தவண்ணனா • 10. Puṇṇamasuttavaṇṇanā
