| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១០. បុណ្ណមសុត្តវណ្ណនា
10. Puṇṇamasuttavaṇṇanā
៨២. ទិស្សតិ អបទិស្សតីតិ ទេសោ, ការណំ, តញ្ច ខោ ញាបកំ ទដ្ឋព្ពំ។ យញ្ហិ សោ ជានិតុកាមោ រុប្បនាទិសភាវំ, បឋមំ បន សរូបំ បុច្ឆិត្វា បុន តស្ស វិសេសោ បុច្ឆិតព្ពោតិ បឋមំ ‘‘ឥមេ នុ ខោ’’តិអាទិនា បុច្ឆំ ករោតិ, ឥធាបិ ច សោ វិសេសោ ឯវ តស្ស ភិក្ខុនោ អន្តន្តិ ទស្សេតិ។ អជានន្តោ វិយ បុច្ឆតិ តេសំ ហេតុន្តិ អធិប្បាយោ។
82. Dissati apadissatīti deso, kāraṇaṃ, tañca kho ñāpakaṃ daṭṭhabbaṃ. Yañhi so jānitukāmo ruppanādisabhāvaṃ, paṭhamaṃ pana sarūpaṃ pucchitvā puna tassa viseso pucchitabboti paṭhamaṃ ‘‘ime nu kho’’tiādinā pucchaṃ karoti, idhāpi ca so viseso eva tassa bhikkhuno antanti dasseti. Ajānanto viya pucchati tesaṃ hetunti adhippāyo.
តណ្ហាឆន្ទមូលកា បភវត្តា។ បញ្ចុបាទានក្ខន្ធាតិ ឯត្ថ វិសេសតោ តណ្ហុបាទានស្ស គហណំ ឥតរស្ស តគ្គហណេនេវ គហិតំ តទវិនាភាវតោតិ ឆន្ទរាគោ ឯវ ឧទ្ធដោ។ ឥទន្តិ តប្បញ្ហបដិក្ខិបនំ។ យទិបិ ខន្ធា ឧបាទានេហិ អសហជាតាបិ ហោន្តិ ឧបាទានស្ស អនារម្មណភូតាបិ, ឧបាទានំ បន តេហិ សហជាតមេវ, តទារម្មណញ្ច ហោតិយេវាតិ ទស្សេតិ។ ន ហិ អសហជាតំ អនារម្មណញ្ច ឧបាទានំ អត្ថីតិ។ ឥទានិ តមត្ថំ វិវរិត្វា ទស្សេតុំ ‘‘តណ្ហាសម្បយុត្តស្មិ’’ន្តិអាទិ វុត្តំ, តំ សុវិញ្ញេយ្យមេវ។ អារម្មណតោតិ អារម្មណករណតោ។ ‘‘ឯវំរូបោ សិយ’’ន្តិ ឯវំបវត្តស្ស ឆន្ទរាគស្ស ‘‘ឯវំវេទនោ សិយ’’ន្តិ ឯវំបវត្តិយា អភាវតោ តត្ថ តត្ថេវ នតសង្ខារា ភិជ្ជន្តិ, តស្មា រូបវេទនារម្មណានំ ឆន្ទរាគាទីនំ អភាវតោ អត្ថេវ ឆន្ទរាគវេមត្តតា។ ឆន្ទរាគស្ស បហានាទិវសេន ឆន្ទរាគបដិសំយុត្តស្ស អបុច្ឆិតត្តា, ‘‘អនុសន្ធិ ន ឃដិយតី’’តិ វុត្តំ។ កិញ្ចាបិ ន ឃដិយតីតិ អញ្ញស្សេវ បុច្ឆិតត្តា, តថាបិ សានុសន្ធិកាវ បុច្ឆា , តតោ ឯវ សានុសន្ធិកំ វិស្សជ្ជនំ។ តត្ថ ការណមាហ ‘‘តេសំ តេស’’ន្តិអាទិនា។ តេន អជ្ឈាសយានុសន្ធិវសេន សានុសន្ធិកានេវ បុច្ឆាវិស្សជ្ជនានីតិ ទស្សេតិ។
Taṇhāchandamūlakā pabhavattā. Pañcupādānakkhandhāti ettha visesato taṇhupādānassa gahaṇaṃ itarassa taggahaṇeneva gahitaṃ tadavinābhāvatoti chandarāgo eva uddhaṭo. Idanti tappañhapaṭikkhipanaṃ. Yadipi khandhā upādānehi asahajātāpi honti upādānassa anārammaṇabhūtāpi, upādānaṃ pana tehi sahajātameva, tadārammaṇañca hotiyevāti dasseti. Na hi asahajātaṃ anārammaṇañca upādānaṃ atthīti. Idāni tamatthaṃ vivaritvā dassetuṃ ‘‘taṇhāsampayuttasmi’’ntiādi vuttaṃ, taṃ suviññeyyameva. Ārammaṇatoti ārammaṇakaraṇato. ‘‘Evaṃrūpo siya’’nti evaṃpavattassa chandarāgassa ‘‘evaṃvedano siya’’nti evaṃpavattiyā abhāvato tattha tattheva natasaṅkhārā bhijjanti, tasmā rūpavedanārammaṇānaṃ chandarāgādīnaṃ abhāvato attheva chandarāgavemattatā. Chandarāgassa pahānādivasena chandarāgapaṭisaṃyuttassa apucchitattā, ‘‘anusandhi na ghaṭiyatī’’ti vuttaṃ. Kiñcāpi na ghaṭiyatīti aññasseva pucchitattā, tathāpi sānusandhikāva pucchā, tato eva sānusandhikaṃ vissajjanaṃ. Tattha kāraṇamāha ‘‘tesaṃ tesa’’ntiādinā. Tena ajjhāsayānusandhivasena sānusandhikāneva pucchāvissajjanānīti dasseti.
បុណ្ណមសុត្តវណ្ណនា និដ្ឋិតា។
Puṇṇamasuttavaṇṇanā niṭṭhitā.
ខជ្ជនីយវគ្គវណ្ណនា និដ្ឋិតា។
Khajjanīyavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១០. បុណ្ណមសុត្តំ • 10. Puṇṇamasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. បុណ្ណមសុត្តវណ្ណនា • 10. Puṇṇamasuttavaṇṇanā
