| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[53] 3. புண்ணபாதிஜாதகவண்ணனா
[53] 3. Puṇṇapātijātakavaṇṇanā
ததே²வ புண்ணா பாதியோதி இத³ங் ஸத்தா² ஜேதவனே விஹரந்தோ விஸவாருணிங் ஆரப்³ப⁴ கதே²ஸி. ஏகங் ஸமயங் ஸாவத்தி²யங் ஸுராது⁴த்தா ஸன்னிபதித்வா மந்தயிங்ஸு – ‘‘ஸுராமூலங் நோ கீ²ணங், கஹங் நு கோ² லபி⁴ஸ்ஸாமா’’தி. அதே²கோ கக்க²ளது⁴த்தோ ஆஹ ‘‘மா சிந்தயித்த², அத்தே²கோ உபாயோ’’தி. ‘‘கதரோ உபாயோ நாமா’’தி? ‘‘அனாத²பிண்டி³கோ அங்கு³லிமுத்³தி³கா பிளந்தி⁴த்வா மட்ட²ஸாடகனிவத்தோ² ராஜுபட்டா²னங் க³ச்ச²தி, மயங் ஸுராபாதியங் விஸஞ்ஞீகரணங் பே⁴ஸஜ்ஜங் பக்கி²பித்வா ஆபானங் ஸஜ்ஜெத்வா நிஸீதி³த்வா அனாத²பிண்டி³கஸ்ஸ ஆக³மனகாலே ‘இதோ ஏஹி மஹாஸெட்டீ²’தி பக்கோஸித்வா தங் ஸுரங் பாயெத்வா விஸஞ்ஞீபூ⁴தஸ்ஸ அங்கு³லிமுத்³தி³கா ச ஸாடகே ச க³ஹெத்வா ஸுராமூலங் கரிஸ்ஸாமா’’தி. தே ‘‘ஸாதூ⁴’’தி ஸம்படிச்சி²த்வா ததா² கத்வா ஸெட்டி²ஸ்ஸ ஆக³மனகாலே படிமக்³க³ங் க³ந்த்வா ‘‘ஸாமி, இதோ தாவ ஆக³ச்ச²த² , அயங் அம்ஹாகங் ஸந்திகே அதிமனாபா ஸுரா, தோ²கங் பிவித்வா க³ச்ச²தா²’’தி வதி³ங்ஸு. ஸோதாபன்னோ அரியஸாவகோ கிங் ஸுரங் பிவிஸ்ஸதி, அனத்தி²கோ ஸமானோபி பன ‘‘இமே து⁴த்தே பரிக்³க³ண்ஹிஸ்ஸாமீ’’தி தேஸங் ஆபானபூ⁴மிங் க³ந்த்வா தேஸங் கிரியங் ஓலோகெத்வா ‘‘அயங் ஸுரா இமேஹி இமினா நாம காரணேன யோஜிதா’’தி ஞத்வா ‘‘இதோ தா³னி பட்டா²ய இமே இதோ பலாபெஸ்ஸாமீ’’தி சிந்தெத்வா ஆஹ – ‘‘ஹரே து³ட்ட²து⁴த்தா, தும்ஹே ‘ஸுராபாதியங் பே⁴ஸஜ்ஜங் பக்கி²பித்வா ஆக³தாக³தே பாயெத்வா விஸஞ்ஞீ கத்வா விலும்பிஸ்ஸாமா’தி ஆபானமண்ட³லங் ஸஜ்ஜெத்வா நிஸின்னா கேவலங் இமங் ஸுரங் வண்ணேத², ஏகோபி தங் உக்கி²பித்வா பிவிதுங் ந உஸ்ஸஹதி. ஸசே அயங் அயோஜிதா அஸ்ஸ, இமங் தும்ஹேவ பிவெய்யாதா²’’தி தே து⁴த்தே தஜ்ஜெத்வா ததோ பலாபெத்வா அத்தனோ கே³ஹங் க³ந்த்வா ‘‘து⁴த்தேஹி கதகாரணங் ததா²க³தஸ்ஸ ஆரோசெஸ்ஸாமீ’’தி சிந்தெந்தோ ஜேதவனங் க³ந்த்வா ஆரோசேஸி. ஸத்தா² ‘‘இதா³னி தாவ க³ஹபதி தே து⁴த்தா தங் வஞ்சேதுகாமா ஜாதா, புப்³பே³ பன பண்டி³தேபி வஞ்சேதுகாமா அஹேஸு’’ந்தி வத்வா தேன யாசிதோ அதீதங் ஆஹரி.
Tathevapuṇṇā pātiyoti idaṃ satthā jetavane viharanto visavāruṇiṃ ārabbha kathesi. Ekaṃ samayaṃ sāvatthiyaṃ surādhuttā sannipatitvā mantayiṃsu – ‘‘surāmūlaṃ no khīṇaṃ, kahaṃ nu kho labhissāmā’’ti. Atheko kakkhaḷadhutto āha ‘‘mā cintayittha, attheko upāyo’’ti. ‘‘Kataro upāyo nāmā’’ti? ‘‘Anāthapiṇḍiko aṅgulimuddikā piḷandhitvā maṭṭhasāṭakanivattho rājupaṭṭhānaṃ gacchati, mayaṃ surāpātiyaṃ visaññīkaraṇaṃ bhesajjaṃ pakkhipitvā āpānaṃ sajjetvā nisīditvā anāthapiṇḍikassa āgamanakāle ‘ito ehi mahāseṭṭhī’ti pakkositvā taṃ suraṃ pāyetvā visaññībhūtassa aṅgulimuddikā ca sāṭake ca gahetvā surāmūlaṃ karissāmā’’ti. Te ‘‘sādhū’’ti sampaṭicchitvā tathā katvā seṭṭhissa āgamanakāle paṭimaggaṃ gantvā ‘‘sāmi, ito tāva āgacchatha , ayaṃ amhākaṃ santike atimanāpā surā, thokaṃ pivitvā gacchathā’’ti vadiṃsu. Sotāpanno ariyasāvako kiṃ suraṃ pivissati, anatthiko samānopi pana ‘‘ime dhutte pariggaṇhissāmī’’ti tesaṃ āpānabhūmiṃ gantvā tesaṃ kiriyaṃ oloketvā ‘‘ayaṃ surā imehi iminā nāma kāraṇena yojitā’’ti ñatvā ‘‘ito dāni paṭṭhāya ime ito palāpessāmī’’ti cintetvā āha – ‘‘hare duṭṭhadhuttā, tumhe ‘surāpātiyaṃ bhesajjaṃ pakkhipitvā āgatāgate pāyetvā visaññī katvā vilumpissāmā’ti āpānamaṇḍalaṃ sajjetvā nisinnā kevalaṃ imaṃ suraṃ vaṇṇetha, ekopi taṃ ukkhipitvā pivituṃ na ussahati. Sace ayaṃ ayojitā assa, imaṃ tumheva piveyyāthā’’ti te dhutte tajjetvā tato palāpetvā attano gehaṃ gantvā ‘‘dhuttehi katakāraṇaṃ tathāgatassa ārocessāmī’’ti cintento jetavanaṃ gantvā ārocesi. Satthā ‘‘idāni tāva gahapati te dhuttā taṃ vañcetukāmā jātā, pubbe pana paṇḍitepi vañcetukāmā ahesu’’nti vatvā tena yācito atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ பா³ராணஸிஸெட்டி² அஹோஸி. ததா³பேதே து⁴த்தா ஏவமேவ ஸம்மந்தெத்வா ஸுரங் யோஜெத்வா பா³ராணஸிஸெட்டி²ஸ்ஸ ஆக³மனகாலே படிமக்³க³ங் க³ந்த்வா ஏவமேவ கத²யிங்ஸு. ஸெட்டி² அனத்தி²கோபி ஹுத்வா தே பரிக்³க³ண்ஹிதுகாமோ க³ந்த்வா தேஸங் கிரியங் ஓலோகெத்வா ‘‘இத³ங் நாமேதே காதுகாமா, பலாபெஸ்ஸாமி நே இதோ’’தி சிந்தெத்வா ஏவமாஹ ‘‘பொ⁴ந்தோ, து⁴த்தா ஸுரங் பிவித்வா ராஜகுலங் க³ந்துங் நாம அயுத்தங், ராஜானங் தி³ஸ்வா புன ஆக³ச்ச²ந்தோ ஜானிஸ்ஸாமி, தும்ஹே இதே⁴வ நிஸீத³தா²’’தி ராஜுபட்டா²னங் க³ந்த்வா பச்சாக³ஞ்சி². து⁴த்தா ‘‘இதோ ஏத², ஸாமீ’’தி. ஸோபி தத்த² க³ந்த்வா பே⁴ஸஜ்ஜேன ஸங்யோஜிதா ஸுராபாதியோ ஓலோகெத்வா ஏவமாஹ ‘‘பொ⁴ந்தோ து⁴த்தா தும்ஹாகங் கிரியா மய்ஹங் ந ருச்சதி, தும்ஹாகங் ஸுராபாதியோ யதா²பூரிதாவ டி²தா, தும்ஹே கேவலங் ஸுரங் வண்ணேத², ந பன பிவத². ஸசாயங் மனாபா அஸ்ஸ, தும்ஹேபி பிவெய்யாத², இமாய பன விஸஸங்யுத்தாய ப⁴விதப்³ப³’’ந்தி தேஸங் மனோரத²ங் பி⁴ந்த³ந்தோ இமங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto bārāṇasiseṭṭhi ahosi. Tadāpete dhuttā evameva sammantetvā suraṃ yojetvā bārāṇasiseṭṭhissa āgamanakāle paṭimaggaṃ gantvā evameva kathayiṃsu. Seṭṭhi anatthikopi hutvā te pariggaṇhitukāmo gantvā tesaṃ kiriyaṃ oloketvā ‘‘idaṃ nāmete kātukāmā, palāpessāmi ne ito’’ti cintetvā evamāha ‘‘bhonto, dhuttā suraṃ pivitvā rājakulaṃ gantuṃ nāma ayuttaṃ, rājānaṃ disvā puna āgacchanto jānissāmi, tumhe idheva nisīdathā’’ti rājupaṭṭhānaṃ gantvā paccāgañchi. Dhuttā ‘‘ito etha, sāmī’’ti. Sopi tattha gantvā bhesajjena saṃyojitā surāpātiyo oloketvā evamāha ‘‘bhonto dhuttā tumhākaṃ kiriyā mayhaṃ na ruccati, tumhākaṃ surāpātiyo yathāpūritāva ṭhitā, tumhe kevalaṃ suraṃ vaṇṇetha, na pana pivatha. Sacāyaṃ manāpā assa, tumhepi piveyyātha, imāya pana visasaṃyuttāya bhavitabba’’nti tesaṃ manorathaṃ bhindanto imaṃ gāthamāha –
53.
53.
‘‘ததே²வ புண்ணா பாதியோ, அஞ்ஞாயங் வத்ததே கதா²;
‘‘Tatheva puṇṇā pātiyo, aññāyaṃ vattate kathā;
ஆகாரணேன ஜானாமி, ந சாயங் ப⁴த்³தி³கா ஸுரா’’தி.
Ākāraṇena jānāmi, na cāyaṃ bhaddikā surā’’ti.
தத்த² ததே²வாதி யதா² மயா க³மனகாலே தி³ட்டா², இதா³னிபி இமா ஸுராபாதியோ ததே²வ புண்ணா. அஞ்ஞாயங் வத்ததே கதா²தி யா அயங் தும்ஹாகங் ஸுராவண்ணனகதா² வத்ததி, ஸா அஞ்ஞாவ அபூ⁴தா அதச்சா². யதி³ ஹி ஏஸா ஸுரா மனாபா அஸ்ஸ, தும்ஹேபி பிவெய்யாத², உபட்³ட⁴பாதியோ அவஸிஸ்ஸெய்யுங். தும்ஹாகங் பன ஏகேனாபி ஸுரா ந பீதா. ஆகாரணேன ஜானாமீதி தஸ்மா இமினா காரணேன ஜானாமி. ந சாயங் ப⁴த்³தி³கா ஸுராதி ‘‘நேவாயங் ப⁴த்³தி³கா ஸுரா, விஸஸங்யோஜிதாய ஏதாய ப⁴விதப்³ப³’’ந்தி து⁴த்தே நிக்³க³ண்ஹித்வா யதா² ந புன ஏவரூபங் கரொந்தி, ததா² தே தஜ்ஜெத்வா விஸ்ஸஜ்ஜேஸி. ஸோ யாவஜீவங் தா³னாதீ³னி புஞ்ஞானி கத்வா யதா²கம்மங் க³தோ.
Tattha tathevāti yathā mayā gamanakāle diṭṭhā, idānipi imā surāpātiyo tatheva puṇṇā. Aññāyaṃ vattate kathāti yā ayaṃ tumhākaṃ surāvaṇṇanakathā vattati, sā aññāva abhūtā atacchā. Yadi hi esā surā manāpā assa, tumhepi piveyyātha, upaḍḍhapātiyo avasisseyyuṃ. Tumhākaṃ pana ekenāpi surā na pītā. Ākāraṇena jānāmīti tasmā iminā kāraṇena jānāmi. Na cāyaṃ bhaddikā surāti ‘‘nevāyaṃ bhaddikā surā, visasaṃyojitāya etāya bhavitabba’’nti dhutte niggaṇhitvā yathā na puna evarūpaṃ karonti, tathā te tajjetvā vissajjesi. So yāvajīvaṃ dānādīni puññāni katvā yathākammaṃ gato.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ து⁴த்தா ஏதரஹி து⁴த்தா, பா³ராணஸிஸெட்டி² பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā dhuttā etarahi dhuttā, bārāṇasiseṭṭhi pana ahameva ahosi’’nti.
புண்ணபாதிஜாதகவண்ணனா ததியா.
Puṇṇapātijātakavaṇṇanā tatiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 53. புண்ணபாதிஜாதகங் • 53. Puṇṇapātijātakaṃ
