| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫-৬. পুণ্ণসুত্তাদিৰণ্ণনা
5-6. Puṇṇasuttādivaṇṇanā
৮৮-৮৯. তন্তি চক্খুরূপদ্ৰযং। তেনাহ ‘‘চক্খুঞ্চেৰ রূপঞ্চা’’তি। নন্দিসমুদযাতি নন্দিযা সমুদযতণ্হায সেসকারণেহি নন্দিযা সমুদিতি সমোধানং নন্দিসমুদযো, তস্মা নন্দিসমুদযা। তেনাহ ‘‘তণ্হায সমোধানেনা’’তি। পঞ্চক্খন্ধসঙ্খাতস্স দুক্খস্স সমোধানেন সমুদিতি পৰত্তিযেৰাতি সহ সমুদযেন দুক্খস্স দস্সিতত্তা ‘‘ৰট্টং মত্থকং পাপেত্ৰা’’তি ৰুত্তং। নিরোধূপাযেন সদ্ধিং নিরোধস্স দস্সিতত্তা ‘‘ৰিৰট্টং মত্থকং পাপেত্ৰা’’তি। পুচ্ছানুসন্ধিআদীসু অঞ্ঞতরো ন হোতীতি আহ – ‘‘পাটিযেক্কো অনুসন্ধী’’তি।
88-89.Tanti cakkhurūpadvayaṃ. Tenāha ‘‘cakkhuñceva rūpañcā’’ti. Nandisamudayāti nandiyā samudayataṇhāya sesakāraṇehi nandiyā samuditi samodhānaṃ nandisamudayo, tasmā nandisamudayā. Tenāha ‘‘taṇhāya samodhānenā’’ti. Pañcakkhandhasaṅkhātassa dukkhassa samodhānena samuditi pavattiyevāti saha samudayena dukkhassa dassitattā ‘‘vaṭṭaṃ matthakaṃ pāpetvā’’ti vuttaṃ. Nirodhūpāyena saddhiṃ nirodhassa dassitattā ‘‘vivaṭṭaṃ matthakaṃ pāpetvā’’ti. Pucchānusandhiādīsu aññataro na hotīti āha – ‘‘pāṭiyekko anusandhī’’ti.
চণ্ডাতি কোধনা। দুট্ঠাতি দোসৰন্তোতি অত্থো। কিব্বিসাতি পাপা। কক্খল়াতি দারুণা। ঘটিকমুগ্গরেনাতি একস্মিং পক্খে ঘটিকং দস্সেত্ৰা কতেন রস্সদণ্ডেন। সত্তানং সসনতো সত্থং, ততো এৰ জীৰিতস্স হরণতো হারকঞ্চাতি সত্থহারকং। ইন্দ্রিযসংৰরো ‘‘দমো’’তি ৰুত্তো মনচ্ছট্ঠানং ইন্দ্রিযানং দমনতো। পঞ্ঞা ‘‘দমো’’তি ৰুত্তা কিলেসৰিসেৰিতানং দমনতো ৰূপসমনতো। উপোসথকম্মং ‘‘দমো’’তি ৰুত্তং কাযদ্ৰারাদীহি উপ্পজ্জনকঅসমস্স দমনতো। খন্তি ‘‘দমো’’তি ৰেদিতব্বা অক্খন্তিযা দমনতো ৰূপসমনতো। তেনাহ ‘‘উপসমোতি তস্সেৰ ৰেৰচন’’ন্তি।
Caṇḍāti kodhanā. Duṭṭhāti dosavantoti attho. Kibbisāti pāpā. Kakkhaḷāti dāruṇā. Ghaṭikamuggarenāti ekasmiṃ pakkhe ghaṭikaṃ dassetvā katena rassadaṇḍena. Sattānaṃ sasanato satthaṃ, tato eva jīvitassa haraṇato hārakañcāti satthahārakaṃ. Indriyasaṃvaro ‘‘damo’’ti vutto manacchaṭṭhānaṃ indriyānaṃ damanato. Paññā ‘‘damo’’ti vuttā kilesavisevitānaṃ damanato vūpasamanato. Uposathakammaṃ ‘‘damo’’tivuttaṃ kāyadvārādīhi uppajjanakaasamassa damanato. Khanti ‘‘damo’’ti veditabbā akkhantiyā damanato vūpasamanato. Tenāha ‘‘upasamoti tasseva vevacana’’nti.
এত্থাতি সুনাপরন্তজনপদে। এতে দ্ৰেতি অযং পুণ্ণত্থেরো তস্স কনিট্ঠোতি এতে দ্ৰে ভাতরো। আহচ্চ অট্ঠাসি উল়ারং বুদ্ধারম্মণং পীতিং উপ্পাদেত্ৰা। সত্ত সীহনাদে নদিত্ৰাতি মম্মচ্ছেদকানম্পি অক্কোসপরিভাসানং খমনে সন্তোসাভাৰদীপনং, পাণিপ্পহারস্স, লেড্ডুপ্পহারস্স, দণ্ডপ্পহারস্স, সত্থপ্পহারস্স, জীৰিতৰোরোপনস্স, খমনে সন্তোসাভাৰদীপনঞ্চাতি এৰং সত্ত সীহনাদে নদিত্ৰা। চতূসু ঠানেসু ৰসিতত্তা পাল়িযং ৰসনট্ঠানং অনুদ্দেসিকং কত্ৰা ‘‘সুনাপরন্তস্মিং জনপদে ৰিহরতি’’ইচ্চেৰ ৰুত্তং।
Etthāti sunāparantajanapade. Ete dveti ayaṃ puṇṇatthero tassa kaniṭṭhoti ete dve bhātaro. Āhacca aṭṭhāsi uḷāraṃ buddhārammaṇaṃ pītiṃ uppādetvā. Satta sīhanāde naditvāti mammacchedakānampi akkosaparibhāsānaṃ khamane santosābhāvadīpanaṃ, pāṇippahārassa, leḍḍuppahārassa, daṇḍappahārassa, satthappahārassa, jīvitavoropanassa, khamane santosābhāvadīpanañcāti evaṃ satta sīhanāde naditvā. Catūsu ṭhānesu vasitattā pāḷiyaṃ vasanaṭṭhānaṃ anuddesikaṃ katvā ‘‘sunāparantasmiṃ janapade viharati’’icceva vuttaṃ.
চতূসু ঠানেসূতি অব্বুহত্থপব্বতে, সমুদ্দগিরিৰিহারে, মাতুলগিরিম্হি, মকুল়কারামৰিহারেতি ইমেসু চতূসু ঠানেসু। তন্তি চঙ্কমং আরুয্হ কোচি ভিক্খু চঙ্কমিতুং সমত্থো নত্থি মহতা সমুদ্দপরিস্সযেন ভাৰনামনসিকারস্স অনভিসম্ভুণনতো। উপ্পাতিকন্তি উপ্পাতকরং মহাসঙ্খোভং উট্ঠপেত্ৰা। সম্মুখেতি অনিলপদেসে। পটিৰেদেসুন্তি পৰেদেসুং।
Catūsu ṭhānesūti abbuhatthapabbate, samuddagirivihāre, mātulagirimhi, makuḷakārāmavihāreti imesu catūsu ṭhānesu. Tanti caṅkamaṃ āruyha koci bhikkhu caṅkamituṃ samattho natthi mahatā samuddaparissayena bhāvanāmanasikārassa anabhisambhuṇanato. Uppātikanti uppātakaraṃ mahāsaṅkhobhaṃ uṭṭhapetvā. Sammukheti anilapadese. Paṭivedesunti pavedesuṃ.
আরদ্ধকালতো পট্ঠাযাতি মণ্ডলমাল়স্স কাতুং পথৰীমিতকালতো পভুতি। সচ্চবন্ধেন পঞ্চসতানি পরিপূরেতুং ‘‘একূনপঞ্চসতান’’ন্তি ৰুত্তং। গন্ধকুটিন্তি জেতৰনমহাৰিহারে মহাগন্ধকুটিং।
Āraddhakālato paṭṭhāyāti maṇḍalamāḷassa kātuṃ pathavīmitakālato pabhuti. Saccabandhena pañcasatāni paripūretuṃ ‘‘ekūnapañcasatāna’’nti vuttaṃ. Gandhakuṭinti jetavanamahāvihāre mahāgandhakuṭiṃ.
সচ্চবন্ধনামোতি সচ্চবন্ধে পব্বতে চিরনিৰাসিতায ‘‘সচ্চবন্ধো’’ত্ৰেৰ লদ্ধনামো। অরহত্তং পাপুণীতি পঞ্চাভিঞ্ঞাপরিৰারং অরহত্তং অধিগচ্ছি। তেনাহ ‘‘মগ্গেনেৰস্স অভিঞ্ঞা আগতা’’তি।
Saccabandhanāmoti saccabandhe pabbate ciranivāsitāya ‘‘saccabandho’’tveva laddhanāmo. Arahattaṃ pāpuṇīti pañcābhiññāparivāraṃ arahattaṃ adhigacchi. Tenāha ‘‘maggenevassa abhiññā āgatā’’ti.
তস্মিং সন্নিপতিতা মহাজনা কেচি সোতাপন্না, কেচি সকদাগামিনো, কেচি অনাগামিনো, কেচি অরহন্তো অহেসুং। তত্থাপি কেচি তেৰিজ্জা, কেচি ছল়ভিঞ্ঞা, কেচি পটিসম্ভিদপ্পত্তা অহেসুং। তং সন্ধায ৰুত্তং ‘‘মহাজনস্স বন্ধনমোক্খো জাতো’’তি। যে পন তত্থ সরণগমনপঞ্চসীলদসসীলসমাদানেন লদ্ধানুগ্গহা, তেসং দেৰতানঞ্চ ৰসেন ‘‘মহন্তং বুদ্ধকোলাহলং অহোসী’’তি ৰুত্তং।
Tasmiṃ sannipatitā mahājanā keci sotāpannā, keci sakadāgāmino, keci anāgāmino, keci arahanto ahesuṃ. Tatthāpi keci tevijjā, keci chaḷabhiññā, keci paṭisambhidappattā ahesuṃ. Taṃ sandhāya vuttaṃ ‘‘mahājanassa bandhanamokkho jāto’’ti. Ye pana tattha saraṇagamanapañcasīladasasīlasamādānena laddhānuggahā, tesaṃ devatānañca vasena ‘‘mahantaṃ buddhakolāhalaṃ ahosī’’ti vuttaṃ.
অরুণং পন মহাগন্ধকুটিযংযেৰ উট্ঠপেসি দেৰতানুগ্গহত্থঞ্চেৰ কুলানুদযায চ। অপাযমগ্গে ওতারিতো ‘‘কোচি লোকস্স সজিতা অত্থি, তস্স ৰসেন পৰত্তিসংহারা হোন্তি, তেনেৰাযং পজা সনাথা হোতি, তং যুঞ্জতি চ তস্মিং তস্মিং কম্মে’’তি মিচ্ছাগাহেহি। পরিচরিতব্বং যাচি ‘‘এত্থ মযা চিরং ৰসিতব্ব’’ন্তি।
Aruṇaṃpana mahāgandhakuṭiyaṃyeva uṭṭhapesi devatānuggahatthañceva kulānudayāya ca. Apāyamagge otārito ‘‘koci lokassa sajitā atthi, tassa vasena pavattisaṃhārā honti, tenevāyaṃ pajā sanāthā hoti, taṃ yuñjati ca tasmiṃ tasmiṃ kamme’’ti micchāgāhehi. Paricaritabbaṃ yāci ‘‘ettha mayā ciraṃ vasitabba’’nti.
ছট্ঠন্তি বাহিযসুত্তং। তং উত্তানমেৰ হেট্ঠা ৰুত্তনযত্তা।
Chaṭṭhanti bāhiyasuttaṃ. Taṃ uttānameva heṭṭhā vuttanayattā.
পুণ্ণসুত্তাদিৰণ্ণনা নিট্ঠিতা।
Puṇṇasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৫. পুণ্ণসুত্তং • 5. Puṇṇasuttaṃ
৬. বাহিযসুত্তং • 6. Bāhiyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫-৬. পুণ্ণসুত্তাদিৰণ্ণনা • 5-6. Puṇṇasuttādivaṇṇanā
