Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya

    ৫. পুণ্ণসুত্তং

    5. Puṇṇasuttaṃ

    ৮৮. অথ 1 খো আযস্মা পুণ্ণো যেন ভগৰা তেনুপসঙ্কমি; উপসঙ্কমিত্ৰা…পে॰… একমন্তং নিসিন্নো খো আযস্মা পুণ্ণো ভগৰন্তং এতদৰোচ – ‘‘সাধু মে, ভন্তে, ভগৰা সংখিত্তেন ধম্মং দেসেতু, যমহং ভগৰতো ধম্মং সুত্ৰা একো ৰূপকট্ঠো অপ্পমত্তো আতাপী পহিতত্তো ৰিহরেয্য’’ন্তি।

    88. Atha 2 kho āyasmā puṇṇo yena bhagavā tenupasaṅkami; upasaṅkamitvā…pe… ekamantaṃ nisinno kho āyasmā puṇṇo bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti.

    ‘‘সন্তি খো, পুণ্ণ, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি। তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী। ‘নন্দিসমুদযা দুক্খসমুদযো, পুণ্ণা’তি ৰদামি…পে॰… সন্তি খো, পুণ্ণ, জিৰ্হাৰিঞ্ঞেয্যা রসা…পে॰… সন্তি খো, পুণ্ণ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি। তস্স তং অভিনন্দতো অভিৰদতো অজ্ঝোসায তিট্ঠতো উপ্পজ্জতি নন্দী। ‘নন্দিসমুদযা দুক্খসমুদযো, পুণ্ণা’তি ৰদামি।

    ‘‘Santi kho, puṇṇa, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī. ‘Nandisamudayā dukkhasamudayo, puṇṇā’ti vadāmi…pe… santi kho, puṇṇa, jivhāviññeyyā rasā…pe… santi kho, puṇṇa, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī. ‘Nandisamudayā dukkhasamudayo, puṇṇā’ti vadāmi.

    ‘‘সন্তি খো, পুণ্ণ, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো নিরুজ্ঝতি নন্দী। ‘নন্দিনিরোধা দুক্খনিরোধো, পুণ্ণা’তি ৰদামি…পে॰… সন্তি খো, পুণ্ণ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো নিরুজ্ঝতি নন্দী। ‘নন্দিনিরোধা দুক্খনিরোধো, পুণ্ণা’তি ৰদামি।

    ‘‘Santi kho, puṇṇa, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, tassa taṃ anabhinandato anabhivadato anajjhosāya tiṭṭhato nirujjhati nandī. ‘Nandinirodhā dukkhanirodho, puṇṇā’ti vadāmi…pe… santi kho, puṇṇa, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, tassa taṃ anabhinandato anabhivadato anajjhosāya tiṭṭhato nirujjhati nandī. ‘Nandinirodhā dukkhanirodho, puṇṇā’ti vadāmi.

    ‘‘ইমিনা ত্ৰং 3, পুণ্ণ, মযা সংখিত্তেন ওৰাদেন ওৰদিতো কতমস্মিং 4 জনপদে ৰিহরিস্সসী’’তি? ‘‘অত্থি, ভন্তে, সুনাপরন্তো নাম জনপদো, তত্থাহং ৰিহরিস্সামী’’তি।

    ‘‘Iminā tvaṃ 5, puṇṇa, mayā saṃkhittena ovādena ovadito katamasmiṃ 6 janapade viharissasī’’ti? ‘‘Atthi, bhante, sunāparanto nāma janapado, tatthāhaṃ viharissāmī’’ti.

    ‘‘চণ্ডা খো, পুণ্ণ, সুনাপরন্তকা মনুস্সা; ফরুসা খো, পুণ্ণ, সুনাপরন্তকা মনুস্সা। সচে তং, পুণ্ণ, সুনাপরন্তকা মনুস্সা অক্কোসিস্সন্তি পরিভাসিস্সন্তি, তত্র তে, পুণ্ণ, কিন্তি ভৰিস্সতী’’তি?

    ‘‘Caṇḍā kho, puṇṇa, sunāparantakā manussā; pharusā kho, puṇṇa, sunāparantakā manussā. Sace taṃ, puṇṇa, sunāparantakā manussā akkosissanti paribhāsissanti, tatra te, puṇṇa, kinti bhavissatī’’ti?

    ‘‘সচে মং, ভন্তে, সুনাপরন্তকা মনুস্সা অক্কোসিস্সন্তি পরিভাসিস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে 7 নযিমে পাণিনা পহারং দেন্তী’তি। এৰমেত্থ 8, ভগৰা, ভৰিস্সতি; এৰমেত্থ, সুগত, ভৰিস্সতী’’তি।

    ‘‘Sace maṃ, bhante, sunāparantakā manussā akkosissanti paribhāsissanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me 9 nayime pāṇinā pahāraṃ dentī’ti. Evamettha 10, bhagavā, bhavissati; evamettha, sugata, bhavissatī’’ti.

    ‘‘সচে পন তে, পুণ্ণ, সুনাপরন্তকা মনুস্সা পাণিনা পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

    ‘‘Sace pana te, puṇṇa, sunāparantakā manussā pāṇinā pahāraṃ dassanti, tatra pana te, puṇṇa, kinti bhavissatī’’ti?

    ‘‘সচে মে, ভন্তে, সুনাপরন্তকা মনুস্সা পাণিনা পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে 11 নযিমে লেড্ডুনা পহারং দেন্তী’তি। এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি।

    ‘‘Sace me, bhante, sunāparantakā manussā pāṇinā pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me 12 nayime leḍḍunā pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘সচে পন তে, পুণ্ণ, সুনাপরন্তকা মনুস্সা লেড্ডুনা পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

    ‘‘Sace pana te, puṇṇa, sunāparantakā manussā leḍḍunā pahāraṃ dassanti, tatra pana te, puṇṇa, kinti bhavissatī’’ti?

    ‘‘সচে মে, ভন্তে, সুনাপরন্তকা মনুস্সা লেড্ডুনা পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে নযিমে দণ্ডেন পহারং দেন্তী’তি । এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি।

    ‘‘Sace me, bhante, sunāparantakā manussā leḍḍunā pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime daṇḍena pahāraṃ dentī’ti . Evamettha, bhagavā, bhavissati; evamettha, sugata, bhavissatī’’ti.

    ‘‘সচে পন পুণ্ণ, সুনাপরন্তকা মনুস্সা দণ্ডেন পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

    ‘‘Sace pana puṇṇa, sunāparantakā manussā daṇḍena pahāraṃ dassanti, tatra pana te, puṇṇa, kinti bhavissatī’’ti?

    ‘‘সচে মে, ভন্তে, সুনাপরন্তকা মনুস্সা দণ্ডেন পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মে নযিমে সত্থেন পহারং দেন্তী’তি। এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি।

    ‘‘Sace me, bhante, sunāparantakā manussā daṇḍena pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime satthena pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘সচে পন তে, পুণ্ণ, সুনাপরন্তকা মনুস্সা সত্থেন পহারং দস্সন্তি, তত্র পন তে, পুণ্ণ, কিন্তি ভৰিস্সতী’’তি?

    ‘‘Sace pana te, puṇṇa, sunāparantakā manussā satthena pahāraṃ dassanti, tatra pana te, puṇṇa, kinti bhavissatī’’ti?

    ‘‘সচে মে, ভন্তে, সুনাপরন্তকা মনুস্সা সত্থেন পহারং দস্সন্তি, তত্র মে এৰং ভৰিস্সতি – ‘ভদ্দকা ৰতিমে সুনাপরন্তকা মনুস্সা, সুভদ্দকা ৰতিমে সুনাপরন্তকা মনুস্সা, যং মং নযিমে তিণ্হেন সত্থেন জীৰিতা ৰোরোপেন্তী’তি। এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি।

    ‘‘Sace me, bhante, sunāparantakā manussā satthena pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ maṃ nayime tiṇhena satthena jīvitā voropentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘সচে পন তং, পুণ্ণ, সুনাপরন্তকা মনুস্সা তিণ্হেন সত্থেন জীৰিতা ৰোরোপেস্সন্তি, তত্র পন তে, পুণ্ণ, কিন্তি ভৰিস্সতী’’তি?

    ‘‘Sace pana taṃ, puṇṇa, sunāparantakā manussā tiṇhena satthena jīvitā voropessanti, tatra pana te, puṇṇa, kinti bhavissatī’’ti?

    ‘‘সচে মং, ভন্তে, সুনাপরন্তকা মনুস্সা তিণ্হেন সত্থেন জীৰিতা ৰোরোপেস্সন্তি, তত্র মে এৰং ভৰিস্সতি – ‘সন্তি খো তস্স ভগৰতো সাৰকা কাযেন চ জীৰিতেন চ অট্টীযমানা হরাযমানা জিগুচ্ছমানা সত্থহারকং পরিযেসন্তি, তং মে ইদং অপরিযিট্ঠঞ্ঞেৰ সত্থহারকং লদ্ধ’ন্তি। এৰমেত্থ, ভগৰা, ভৰিস্সতি; এৰমেত্থ, সুগত, ভৰিস্সতী’’তি।

    ‘‘Sace maṃ, bhante, sunāparantakā manussā tiṇhena satthena jīvitā voropessanti, tatra me evaṃ bhavissati – ‘santi kho tassa bhagavato sāvakā kāyena ca jīvitena ca aṭṭīyamānā harāyamānā jigucchamānā satthahārakaṃ pariyesanti, taṃ me idaṃ apariyiṭṭhaññeva satthahārakaṃ laddha’nti. Evamettha, bhagavā, bhavissati; evamettha, sugata, bhavissatī’’ti.

    ‘‘সাধু সাধু, পুণ্ণ! সক্খিস্সসি খো ত্ৰং, পুণ্ণ, ইমিনা দমূপসমেন সমন্নাগতো সুনাপরন্তস্মিং জনপদে ৰত্থুং। যস্স দানি ত্ৰং, পুণ্ণ, কালং মঞ্ঞসী’’তি।

    ‘‘Sādhu sādhu, puṇṇa! Sakkhissasi kho tvaṃ, puṇṇa, iminā damūpasamena samannāgato sunāparantasmiṃ janapade vatthuṃ. Yassa dāni tvaṃ, puṇṇa, kālaṃ maññasī’’ti.

    অথ খো আযস্মা পুণ্ণো ভগৰতো ৰচনং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা সেনাসনং সংসামেত্ৰা পত্তচীৰরমাদায যেন সুনাপরন্তো জনপদো তেন চারিকং পক্কামি। অনুপুব্বেন চারিকং চরমানো যেন সুনাপরন্তো জনপদো তদৰসরি। তত্র সুদং আযস্মা পুণ্ণো সুনাপরন্তস্মিং জনপদে ৰিহরতি। অথ খো আযস্মা পুণ্ণো তেনেৰন্তরৰস্সেন পঞ্চমত্তানি উপাসকসতানি পটিৰেদেসি 13। তেনেৰন্তরৰস্সেন পঞ্চমত্তানি উপাসিকাসতানি পটিৰেদেসি। তেনেৰন্তরৰস্সেন তিস্সো ৰিজ্জা সচ্ছাকাসি। তেনেৰন্তরৰস্সেন পরিনিব্বাযি।

    Atha kho āyasmā puṇṇo bhagavato vacanaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā senāsanaṃ saṃsāmetvā pattacīvaramādāya yena sunāparanto janapado tena cārikaṃ pakkāmi. Anupubbena cārikaṃ caramāno yena sunāparanto janapado tadavasari. Tatra sudaṃ āyasmā puṇṇo sunāparantasmiṃ janapade viharati. Atha kho āyasmā puṇṇo tenevantaravassena pañcamattāni upāsakasatāni paṭivedesi 14. Tenevantaravassena pañcamattāni upāsikāsatāni paṭivedesi. Tenevantaravassena tisso vijjā sacchākāsi. Tenevantaravassena parinibbāyi.

    অথ খো সম্বহুলা ভিক্খূ যেন ভগৰা তেনুপসঙ্কমিংসু…পে॰… একমন্তং নিসিন্না খো তে ভিক্খূ ভগৰন্তং এতদৰোচুং – ‘‘যো সো, ভন্তে, পুণ্ণো নাম কুলপুত্তো ভগৰতা সংখিত্তেন ওৰাদেন ওৰদিতো, সো কালঙ্কতো। তস্স কা গতি কো অভিসম্পরাযো’’তি?

    Atha kho sambahulā bhikkhū yena bhagavā tenupasaṅkamiṃsu…pe… ekamantaṃ nisinnā kho te bhikkhū bhagavantaṃ etadavocuṃ – ‘‘yo so, bhante, puṇṇo nāma kulaputto bhagavatā saṃkhittena ovādena ovadito, so kālaṅkato. Tassa kā gati ko abhisamparāyo’’ti?

    ‘‘পণ্ডিতো, ভিক্খৰে, পুণ্ণো কুলপুত্তো 15, পচ্চপাদি 16 ধম্মস্সানুধম্মং, ন চ মং ধম্মাধিকরণং ৰিহেসেসি 17। পরিনিব্বুতো, ভিক্খৰে, পুণ্ণো কুলপুত্তো’’তি। পঞ্চমং।

    ‘‘Paṇḍito, bhikkhave, puṇṇo kulaputto 18, paccapādi 19 dhammassānudhammaṃ, na ca maṃ dhammādhikaraṇaṃ vihesesi 20. Parinibbuto, bhikkhave, puṇṇo kulaputto’’ti. Pañcamaṃ.




    Next: ৬. বাহিযসুত্তং • 6. Bāhiyasuttaṃ




    Footnotes:
    1. সাৰত্থিনিদানং। অথ (?) ম॰ নি॰ ৩.৩৯৫ পস্সিতব্বং
    2. sāvatthinidānaṃ. atha (?) ma. ni. 3.395 passitabbaṃ
    3. ইমিনা চ ত্ৰং
    4. কতরস্মিং (ম॰ নি॰ ৩.৩৯৫)
    5. iminā ca tvaṃ
    6. katarasmiṃ (ma. ni. 3.395)
    7. মং (সব্বত্থ)
    8. এৰম্মেত্থ (?)
    9. maṃ (sabbattha)
    10. evammettha (?)
    11. এৰম্মেত্থ (?)
    12. evammettha (?)
    13. পটিপাদেসি (সী॰ পী॰), পটিদেসেসি (স্যা॰ কং॰)
    14. paṭipādesi (sī. pī.), paṭidesesi (syā. kaṃ.)
    15. কুলপুত্তো অহোসি (সব্বত্থ)
    16. সচ্চৰাদী (স্যা॰ কং॰ ক॰)
    17. ৰিহেঠেসি (সী॰ স্যা॰ কং॰)
    18. kulaputto ahosi (sabbattha)
    19. saccavādī (syā. kaṃ. ka.)
    20. viheṭhesi (sī. syā. kaṃ.)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫-৬. পুণ্ণসুত্তাদিৰণ্ণনা • 5-6. Puṇṇasuttādivaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫-৬. পুণ্ণসুত্তাদিৰণ্ণনা • 5-6. Puṇṇasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact