Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya

    ༥. པུཎྞསུཏྟཾ

    5. Puṇṇasuttaṃ

    ༨༨. ཨཐ 1 ཁོ ཨཱཡསྨཱ པུཎྞོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ…པེ॰… ཨེཀམནྟཾ ནིསིནྣོ ཁོ ཨཱཡསྨཱ པུཎྞོ བྷགཝནྟཾ ཨེཏདཝོཙ – ‘‘སཱདྷུ མེ, བྷནྟེ, བྷགཝཱ སཾཁིཏྟེན དྷམྨཾ དེསེཏུ, ཡམཧཾ བྷགཝཏོ དྷམྨཾ སུཏྭཱ ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརེཡྻ’’ནྟི།

    88. Atha 2 kho āyasmā puṇṇo yena bhagavā tenupasaṅkami; upasaṅkamitvā…pe… ekamantaṃ nisinno kho āyasmā puṇṇo bhagavantaṃ etadavoca – ‘‘sādhu me, bhante, bhagavā saṃkhittena dhammaṃ desetu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti.

    ‘‘སནྟི ཁོ, པུཎྞ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ བྷིཀྑུ ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི། ཏསྶ ཏཾ ཨབྷིནནྡཏོ ཨབྷིཝདཏོ ཨཛ྄ཛྷོསཱཡ ཏིཊྛཏོ ཨུཔྤཛྫཏི ནནྡཱི། ‘ནནྡིསམུདཡཱ དུཀྑསམུདཡོ, པུཎྞཱ’ཏི ཝདཱམི…པེ॰… སནྟི ཁོ, པུཎྞ, ཛིཝ྄ཧཱཝིཉྙེཡྻཱ རསཱ…པེ॰… སནྟི ཁོ, པུཎྞ, མནོཝིཉྙེཡྻཱ དྷམྨཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ བྷིཀྑུ ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི། ཏསྶ ཏཾ ཨབྷིནནྡཏོ ཨབྷིཝདཏོ ཨཛ྄ཛྷོསཱཡ ཏིཊྛཏོ ཨུཔྤཛྫཏི ནནྡཱི། ‘ནནྡིསམུདཡཱ དུཀྑསམུདཡོ, པུཎྞཱ’ཏི ཝདཱམི།

    ‘‘Santi kho, puṇṇa, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī. ‘Nandisamudayā dukkhasamudayo, puṇṇā’ti vadāmi…pe… santi kho, puṇṇa, jivhāviññeyyā rasā…pe… santi kho, puṇṇa, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī. ‘Nandisamudayā dukkhasamudayo, puṇṇā’ti vadāmi.

    ‘‘སནྟི ཁོ, པུཎྞ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ བྷིཀྑུ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི, ཏསྶ ཏཾ ཨནབྷིནནྡཏོ ཨནབྷིཝདཏོ ཨནཛ྄ཛྷོསཱཡ ཏིཊྛཏོ ནིརུཛ྄ཛྷཏི ནནྡཱི། ‘ནནྡིནིརོདྷཱ དུཀྑནིརོདྷོ, པུཎྞཱ’ཏི ཝདཱམི…པེ॰… སནྟི ཁོ, པུཎྞ, མནོཝིཉྙེཡྻཱ དྷམྨཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ བྷིཀྑུ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི, ཏསྶ ཏཾ ཨནབྷིནནྡཏོ ཨནབྷིཝདཏོ ཨནཛ྄ཛྷོསཱཡ ཏིཊྛཏོ ནིརུཛ྄ཛྷཏི ནནྡཱི། ‘ནནྡིནིརོདྷཱ དུཀྑནིརོདྷོ, པུཎྞཱ’ཏི ཝདཱམི།

    ‘‘Santi kho, puṇṇa, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, tassa taṃ anabhinandato anabhivadato anajjhosāya tiṭṭhato nirujjhati nandī. ‘Nandinirodhā dukkhanirodho, puṇṇā’ti vadāmi…pe… santi kho, puṇṇa, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, tassa taṃ anabhinandato anabhivadato anajjhosāya tiṭṭhato nirujjhati nandī. ‘Nandinirodhā dukkhanirodho, puṇṇā’ti vadāmi.

    ‘‘ཨིམིནཱ ཏྭཾ 3, པུཎྞ, མཡཱ སཾཁིཏྟེན ཨོཝཱདེན ཨོཝདིཏོ ཀཏམསྨིཾ 4 ཛནཔདེ ཝིཧརིསྶསཱི’’ཏི? ‘‘ཨཏྠི, བྷནྟེ, སུནཱཔརནྟོ ནཱམ ཛནཔདོ, ཏཏྠཱཧཾ ཝིཧརིསྶཱམཱི’’ཏི།

    ‘‘Iminā tvaṃ 5, puṇṇa, mayā saṃkhittena ovādena ovadito katamasmiṃ 6 janapade viharissasī’’ti? ‘‘Atthi, bhante, sunāparanto nāma janapado, tatthāhaṃ viharissāmī’’ti.

    ‘‘ཙཎྜཱ ཁོ, པུཎྞ, སུནཱཔརནྟཀཱ མནུསྶཱ; ཕརུསཱ ཁོ, པུཎྞ, སུནཱཔརནྟཀཱ མནུསྶཱ། སཙེ ཏཾ, པུཎྞ, སུནཱཔརནྟཀཱ མནུསྶཱ ཨཀྐོསིསྶནྟི པརིབྷཱསིསྶནྟི, ཏཏྲ ཏེ, པུཎྞ, ཀིནྟི བྷཝིསྶཏཱི’’ཏི?

    ‘‘Caṇḍā kho, puṇṇa, sunāparantakā manussā; pharusā kho, puṇṇa, sunāparantakā manussā. Sace taṃ, puṇṇa, sunāparantakā manussā akkosissanti paribhāsissanti, tatra te, puṇṇa, kinti bhavissatī’’ti?

    ‘‘སཙེ མཾ, བྷནྟེ, སུནཱཔརནྟཀཱ མནུསྶཱ ཨཀྐོསིསྶནྟི པརིབྷཱསིསྶནྟི, ཏཏྲ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ 7 ནཡིམེ པཱཎིནཱ པཧཱརཾ དེནྟཱི’ཏི། ཨེཝམེཏྠ 8, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace maṃ, bhante, sunāparantakā manussā akkosissanti paribhāsissanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me 9 nayime pāṇinā pahāraṃ dentī’ti. Evamettha 10, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ པཱཎིནཱ པཧཱརཾ དསྶནྟི, ཏཏྲ པན ཏེ, པུཎྞ, ཀིནྟི བྷཝིསྶཏཱི’’ཏི?

    ‘‘Sace pana te, puṇṇa, sunāparantakā manussā pāṇinā pahāraṃ dassanti, tatra pana te, puṇṇa, kinti bhavissatī’’ti?

    ‘‘སཙེ མེ, བྷནྟེ, སུནཱཔརནྟཀཱ མནུསྶཱ པཱཎིནཱ པཧཱརཾ དསྶནྟི, ཏཏྲ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ 11 ནཡིམེ ལེཌྜུནཱ པཧཱརཾ དེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace me, bhante, sunāparantakā manussā pāṇinā pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me 12 nayime leḍḍunā pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ ལེཌྜུནཱ པཧཱརཾ དསྶནྟི, ཏཏྲ པན ཏེ, པུཎྞ, ཀིནྟི བྷཝིསྶཏཱི’’ཏི?

    ‘‘Sace pana te, puṇṇa, sunāparantakā manussā leḍḍunā pahāraṃ dassanti, tatra pana te, puṇṇa, kinti bhavissatī’’ti?

    ‘‘སཙེ མེ, བྷནྟེ, སུནཱཔརནྟཀཱ མནུསྶཱ ལེཌྜུནཱ པཧཱརཾ དསྶནྟི, ཏཏྲ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ ནཡིམེ དཎྜེན པཧཱརཾ དེནྟཱི’ཏི ། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace me, bhante, sunāparantakā manussā leḍḍunā pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime daṇḍena pahāraṃ dentī’ti . Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན པུཎྞ, སུནཱཔརནྟཀཱ མནུསྶཱ དཎྜེན པཧཱརཾ དསྶནྟི, ཏཏྲ པན ཏེ, པུཎྞ, ཀིནྟི བྷཝིསྶཏཱི’’ཏི?

    ‘‘Sace pana puṇṇa, sunāparantakā manussā daṇḍena pahāraṃ dassanti, tatra pana te, puṇṇa, kinti bhavissatī’’ti?

    ‘‘སཙེ མེ, བྷནྟེ, སུནཱཔརནྟཀཱ མནུསྶཱ དཎྜེན པཧཱརཾ དསྶནྟི, ཏཏྲ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ ནཡིམེ སཏྠེན པཧཱརཾ དེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace me, bhante, sunāparantakā manussā daṇḍena pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime satthena pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ སཏྠེན པཧཱརཾ དསྶནྟི, ཏཏྲ པན ཏེ, པུཎྞ, ཀིནྟི བྷཝིསྶཏཱི’’ཏི?

    ‘‘Sace pana te, puṇṇa, sunāparantakā manussā satthena pahāraṃ dassanti, tatra pana te, puṇṇa, kinti bhavissatī’’ti?

    ‘‘སཙེ མེ, བྷནྟེ, སུནཱཔརནྟཀཱ མནུསྶཱ སཏྠེན པཧཱརཾ དསྶནྟི, ཏཏྲ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མཾ ནཡིམེ ཏིཎྷེན སཏྠེན ཛཱིཝིཏཱ ཝོརོཔེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace me, bhante, sunāparantakā manussā satthena pahāraṃ dassanti, tatra me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ maṃ nayime tiṇhena satthena jīvitā voropentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏཾ, པུཎྞ, སུནཱཔརནྟཀཱ མནུསྶཱ ཏིཎྷེན སཏྠེན ཛཱིཝིཏཱ ཝོརོཔེསྶནྟི, ཏཏྲ པན ཏེ, པུཎྞ, ཀིནྟི བྷཝིསྶཏཱི’’ཏི?

    ‘‘Sace pana taṃ, puṇṇa, sunāparantakā manussā tiṇhena satthena jīvitā voropessanti, tatra pana te, puṇṇa, kinti bhavissatī’’ti?

    ‘‘སཙེ མཾ, བྷནྟེ, སུནཱཔརནྟཀཱ མནུསྶཱ ཏིཎྷེན སཏྠེན ཛཱིཝིཏཱ ཝོརོཔེསྶནྟི, ཏཏྲ མེ ཨེཝཾ བྷཝིསྶཏི – ‘སནྟི ཁོ ཏསྶ བྷགཝཏོ སཱཝཀཱ ཀཱཡེན ཙ ཛཱིཝིཏེན ཙ ཨཊྚཱིཡམཱནཱ ཧརཱཡམཱནཱ ཛིགུཙྪམཱནཱ སཏྠཧཱརཀཾ པརིཡེསནྟི, ཏཾ མེ ཨིདཾ ཨཔརིཡིཊྛཉྙེཝ སཏྠཧཱརཀཾ ལདྡྷ’ནྟི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace maṃ, bhante, sunāparantakā manussā tiṇhena satthena jīvitā voropessanti, tatra me evaṃ bhavissati – ‘santi kho tassa bhagavato sāvakā kāyena ca jīvitena ca aṭṭīyamānā harāyamānā jigucchamānā satthahārakaṃ pariyesanti, taṃ me idaṃ apariyiṭṭhaññeva satthahārakaṃ laddha’nti. Evamettha, bhagavā, bhavissati; evamettha, sugata, bhavissatī’’ti.

    ‘‘སཱདྷུ སཱདྷུ, པུཎྞ! སཀྑིསྶསི ཁོ ཏྭཾ, པུཎྞ, ཨིམིནཱ དམཱུཔསམེན སམནྣཱགཏོ སུནཱཔརནྟསྨིཾ ཛནཔདེ ཝཏྠུཾ། ཡསྶ དཱནི ཏྭཾ, པུཎྞ, ཀཱལཾ མཉྙསཱི’’ཏི།

    ‘‘Sādhu sādhu, puṇṇa! Sakkhissasi kho tvaṃ, puṇṇa, iminā damūpasamena samannāgato sunāparantasmiṃ janapade vatthuṃ. Yassa dāni tvaṃ, puṇṇa, kālaṃ maññasī’’ti.

    ཨཐ ཁོ ཨཱཡསྨཱ པུཎྞོ བྷགཝཏོ ཝཙནཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ སེནཱསནཾ སཾསཱམེཏྭཱ པཏྟཙཱིཝརམཱདཱཡ ཡེན སུནཱཔརནྟོ ཛནཔདོ ཏེན ཙཱརིཀཾ པཀྐཱམི། ཨནུཔུབྦེན ཙཱརིཀཾ ཙརམཱནོ ཡེན སུནཱཔརནྟོ ཛནཔདོ ཏདཝསརི། ཏཏྲ སུདཾ ཨཱཡསྨཱ པུཎྞོ སུནཱཔརནྟསྨིཾ ཛནཔདེ ཝིཧརཏི། ཨཐ ཁོ ཨཱཡསྨཱ པུཎྞོ ཏེནེཝནྟརཝསྶེན པཉྩམཏྟཱནི ཨུཔཱསཀསཏཱནི པཊིཝེདེསི 13། ཏེནེཝནྟརཝསྶེན པཉྩམཏྟཱནི ཨུཔཱསིཀཱསཏཱནི པཊིཝེདེསི། ཏེནེཝནྟརཝསྶེན ཏིསྶོ ཝིཛྫཱ སཙྪཱཀཱསི། ཏེནེཝནྟརཝསྶེན པརིནིབྦཱཡི།

    Atha kho āyasmā puṇṇo bhagavato vacanaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā senāsanaṃ saṃsāmetvā pattacīvaramādāya yena sunāparanto janapado tena cārikaṃ pakkāmi. Anupubbena cārikaṃ caramāno yena sunāparanto janapado tadavasari. Tatra sudaṃ āyasmā puṇṇo sunāparantasmiṃ janapade viharati. Atha kho āyasmā puṇṇo tenevantaravassena pañcamattāni upāsakasatāni paṭivedesi 14. Tenevantaravassena pañcamattāni upāsikāsatāni paṭivedesi. Tenevantaravassena tisso vijjā sacchākāsi. Tenevantaravassena parinibbāyi.

    ཨཐ ཁོ སམྦཧུལཱ བྷིཀྑཱུ ཡེན བྷགཝཱ ཏེནུཔསངྐམིཾསུ…པེ॰… ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘‘ཡོ སོ, བྷནྟེ, པུཎྞོ ནཱམ ཀུལཔུཏྟོ བྷགཝཏཱ སཾཁིཏྟེན ཨོཝཱདེན ཨོཝདིཏོ, སོ ཀཱལངྐཏོ། ཏསྶ ཀཱ གཏི ཀོ ཨབྷིསམྤརཱཡོ’’ཏི?

    Atha kho sambahulā bhikkhū yena bhagavā tenupasaṅkamiṃsu…pe… ekamantaṃ nisinnā kho te bhikkhū bhagavantaṃ etadavocuṃ – ‘‘yo so, bhante, puṇṇo nāma kulaputto bhagavatā saṃkhittena ovādena ovadito, so kālaṅkato. Tassa kā gati ko abhisamparāyo’’ti?

    ‘‘པཎྜིཏོ, བྷིཀྑཝེ, པུཎྞོ ཀུལཔུཏྟོ 15, པཙྩཔཱདི 16 དྷམྨསྶཱནུདྷམྨཾ, ན ཙ མཾ དྷམྨཱདྷིཀརཎཾ ཝིཧེསེསི 17། པརིནིབྦུཏོ, བྷིཀྑཝེ, པུཎྞོ ཀུལཔུཏྟོ’’ཏི། པཉྩམཾ།

    ‘‘Paṇḍito, bhikkhave, puṇṇo kulaputto 18, paccapādi 19 dhammassānudhammaṃ, na ca maṃ dhammādhikaraṇaṃ vihesesi 20. Parinibbuto, bhikkhave, puṇṇo kulaputto’’ti. Pañcamaṃ.




    Next: ༦. བཱཧིཡསུཏྟཾ • 6. Bāhiyasuttaṃ




    Footnotes:
    1. སཱཝཏྠིནིདཱནཾ། ཨཐ (?) མ॰ ནི॰ ༣.༣༩༥ པསྶིཏབྦཾ
    2. sāvatthinidānaṃ. atha (?) ma. ni. 3.395 passitabbaṃ
    3. ཨིམིནཱ ཙ ཏྭཾ
    4. ཀཏརསྨིཾ (མ॰ ནི॰ ༣.༣༩༥)
    5. iminā ca tvaṃ
    6. katarasmiṃ (ma. ni. 3.395)
    7. མཾ (སབྦཏྠ)
    8. ཨེཝམྨེཏྠ (?)
    9. maṃ (sabbattha)
    10. evammettha (?)
    11. ཨེཝམྨེཏྠ (?)
    12. evammettha (?)
    13. པཊིཔཱདེསི (སཱི॰ པཱི॰), པཊིདེསེསི (སྱཱ॰ ཀཾ॰)
    14. paṭipādesi (sī. pī.), paṭidesesi (syā. kaṃ.)
    15. ཀུལཔུཏྟོ ཨཧོསི (སབྦཏྠ)
    16. སཙྩཝཱདཱི (སྱཱ॰ ཀཾ॰ ཀ॰)
    17. ཝིཧེཋེསི (སཱི॰ སྱཱ॰ ཀཾ॰)
    18. kulaputto ahosi (sabbattha)
    19. saccavādī (syā. kaṃ. ka.)
    20. viheṭhesi (sī. syā. kaṃ.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༥-༦. པུཎྞསུཏྟཱདིཝཎྞནཱ • 5-6. Puṇṇasuttādivaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥-༦. པུཎྞསུཏྟཱདིཝཎྞནཱ • 5-6. Puṇṇasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact