| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. පුණ්‌ණියසුත්‌තං
3. Puṇṇiyasuttaṃ
83. අථ ඛො ආයස්‌මා පුණ්‌ණියො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා පුණ්‌ණියො භගවන්‌තං එතදවොච – ‘‘කො නු ඛො, භන්‌තෙ, හෙතු කො පච්‌චයො යෙන අප්‌පෙකදා තථාගතං ධම්‌මදෙසනා පටිභාති අප්‌පෙකදා නප්‌පටිභාතී’’ති?
83. Atha kho āyasmā puṇṇiyo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā puṇṇiyo bhagavantaṃ etadavoca – ‘‘ko nu kho, bhante, hetu ko paccayo yena appekadā tathāgataṃ dhammadesanā paṭibhāti appekadā nappaṭibhātī’’ti?
‘‘සද්‌ධො ච, පුණ්‌ණිය, භික්‌ඛු හොති, නො ච උපසඞ්‌කමිතා; නෙව තාව තථාගතං ධම්‌මදෙසනා පටිභාති. යතො ච ඛො, පුණ්‌ණිය, භික්‌ඛු සද්‌ධො ච හොති උපසඞ්‌කමිතා ච, එවං තථාගතං ධම්‌මදෙසනා පටිභාති.
‘‘Saddho ca, puṇṇiya, bhikkhu hoti, no ca upasaṅkamitā; neva tāva tathāgataṃ dhammadesanā paṭibhāti. Yato ca kho, puṇṇiya, bhikkhu saddho ca hoti upasaṅkamitā ca, evaṃ tathāgataṃ dhammadesanā paṭibhāti.
‘‘සද්‌ධො ච, පුණ්‌ණිය, භික්‌ඛු හොති උපසඞ්‌කමිතා ච, නො ච පයිරුපාසිතා…පෙ.… පයිරුපාසිතා ච, නො ච පරිපුච්‌ඡිතා… පරිපුච්‌ඡිතා ච, නො ච ඔහිතසොතො ධම්‌මං සුණාති… ඔහිතසොතො ච ධම්‌මං සුණාති, නො ච සුත්‌වා ධම්‌මං ධාරෙති… සුත්‌වා ච ධම්‌මං ධාරෙති, නො ච ධාතානං ධම්‌මානං අත්‌ථං උපපරික්‌ඛති… ධාතානඤ්‌ච ධම්‌මානං අත්‌ථං උපපරික්‌ඛති නො ච අත්‌ථමඤ්‌ඤාය ධම්‌මමඤ්‌ඤාය ධම්‌මානුධම්‌මප්‌පටිපන්‌නො හොති… අත්‌ථමඤ්‌ඤාය ධම්‌මමඤ්‌ඤාය ධම්‌මානුධම්‌මප්‌පටිපන්‌නො ච හොති, නො ච කල්‍යාණවාචො හොති කල්‍යාණවාක්‌කරණො පොරියා වාචාය සමන්‌නාගතො විස්‌සට්‌ඨාය අනෙලගළාය අත්‌ථස්‌ස විඤ්‌ඤාපනියා… කල්‍යාණවාචො ච හොති කල්‍යාණවාක්‌කරණො පොරියා වාචාය සමන්‌නාගතො විස්‌සට්‌ඨාය අනෙලගළාය අත්‌ථස්‌ස විඤ්‌ඤාපනියා, නො ච සන්‌දස්‌සකො හොති සමාදපකො සමුත්‌තෙජකො සම්‌පහංසකො සබ්‍රහ්‌මචාරීනං, නෙව තාව තථාගතං ධම්‌මදෙසනා පටිභාති.
‘‘Saddho ca, puṇṇiya, bhikkhu hoti upasaṅkamitā ca, no ca payirupāsitā…pe… payirupāsitā ca, no ca paripucchitā… paripucchitā ca, no ca ohitasoto dhammaṃ suṇāti… ohitasoto ca dhammaṃ suṇāti, no ca sutvā dhammaṃ dhāreti… sutvā ca dhammaṃ dhāreti, no ca dhātānaṃ dhammānaṃ atthaṃ upaparikkhati… dhātānañca dhammānaṃ atthaṃ upaparikkhati no ca atthamaññāya dhammamaññāya dhammānudhammappaṭipanno hoti… atthamaññāya dhammamaññāya dhammānudhammappaṭipanno ca hoti, no ca kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā… kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, no ca sandassako hoti samādapako samuttejako sampahaṃsako sabrahmacārīnaṃ, neva tāva tathāgataṃ dhammadesanā paṭibhāti.
‘‘යතො ච ඛො, පුණ්‌ණිය, භික්‌ඛු සද්‌ධො ච හොති, උපසඞ්‌කමිතා ච, පයිරුපාසිතා ච, පරිපුච්‌ඡිතා ච, ඔහිතසොතො ච ධම්‌මං සුණාති, සුත්‌වා ච ධම්‌මං ධාරෙති, ධාතානඤ්‌ච ධම්‌මානං අත්‌ථං උපපරික්‌ඛති, අත්‌ථමඤ්‌ඤාය ධම්‌මමඤ්‌ඤාය ධම්‌මානුධම්‌මප්‌පටිපන්‌නො ච හොති, කල්‍යාණවාචො ච හොති කල්‍යාණවාක්‌කරණො පොරියා වාචාය සමන්‌නාගතො විස්‌සට්‌ඨාය අනෙලගළාය අත්‌ථස්‌ස විඤ්‌ඤාපනියා, සන්‌දස්‌සකො ච හොති සමාදපකො සමුත්‌තෙජකො සම්‌පහංසකො සබ්‍රහ්‌මචාරීනං – එවං තථාගතං ධම්‌මදෙසනා පටිභාති. ඉමෙහි ඛො, පුණ්‌ණිය , දසහි ධම්‌මෙහි සමන්‌නාගතා 1 2 එකන්‌තපටිභානා 3 තථාගතං ධම්‌මදෙසනා හොතී’’ති 4. තතියං.
‘‘Yato ca kho, puṇṇiya, bhikkhu saddho ca hoti, upasaṅkamitā ca, payirupāsitā ca, paripucchitā ca, ohitasoto ca dhammaṃ suṇāti, sutvā ca dhammaṃ dhāreti, dhātānañca dhammānaṃ atthaṃ upaparikkhati, atthamaññāya dhammamaññāya dhammānudhammappaṭipanno ca hoti, kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, sandassako ca hoti samādapako samuttejako sampahaṃsako sabrahmacārīnaṃ – evaṃ tathāgataṃ dhammadesanā paṭibhāti. Imehi kho, puṇṇiya , dasahi dhammehi samannāgatā 56 ekantapaṭibhānā 7 tathāgataṃ dhammadesanā hotī’’ti 8. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-3. වාහනසුත්‌තාදිවණ්‌ණනා • 1-3. Vāhanasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-8. වාහනසුත්‌තාදිවණ්‌ණනා • 1-8. Vāhanasuttādivaṇṇanā
