| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༣. པུཎྞིཡསུཏྟཾ
3. Puṇṇiyasuttaṃ
༨༣. ཨཐ ཁོ ཨཱཡསྨཱ པུཎྞིཡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ པུཎྞིཡོ བྷགཝནྟཾ ཨེཏདཝོཙ – ‘‘ཀོ ནུ ཁོ, བྷནྟེ, ཧེཏུ ཀོ པཙྩཡོ ཡེན ཨཔྤེཀདཱ ཏཐཱགཏཾ དྷམྨདེསནཱ པཊིབྷཱཏི ཨཔྤེཀདཱ ནཔྤཊིབྷཱཏཱི’’ཏི?
83. Atha kho āyasmā puṇṇiyo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā puṇṇiyo bhagavantaṃ etadavoca – ‘‘ko nu kho, bhante, hetu ko paccayo yena appekadā tathāgataṃ dhammadesanā paṭibhāti appekadā nappaṭibhātī’’ti?
‘‘སདྡྷོ ཙ, པུཎྞིཡ, བྷིཀྑུ ཧོཏི, ནོ ཙ ཨུཔསངྐམིཏཱ; ནེཝ ཏཱཝ ཏཐཱགཏཾ དྷམྨདེསནཱ པཊིབྷཱཏི། ཡཏོ ཙ ཁོ, པུཎྞིཡ, བྷིཀྑུ སདྡྷོ ཙ ཧོཏི ཨུཔསངྐམིཏཱ ཙ, ཨེཝཾ ཏཐཱགཏཾ དྷམྨདེསནཱ པཊིབྷཱཏི།
‘‘Saddho ca, puṇṇiya, bhikkhu hoti, no ca upasaṅkamitā; neva tāva tathāgataṃ dhammadesanā paṭibhāti. Yato ca kho, puṇṇiya, bhikkhu saddho ca hoti upasaṅkamitā ca, evaṃ tathāgataṃ dhammadesanā paṭibhāti.
‘‘སདྡྷོ ཙ, པུཎྞིཡ, བྷིཀྑུ ཧོཏི ཨུཔསངྐམིཏཱ ཙ, ནོ ཙ པཡིརུཔཱསིཏཱ…པེ॰… པཡིརུཔཱསིཏཱ ཙ, ནོ ཙ པརིཔུཙྪིཏཱ… པརིཔུཙྪིཏཱ ཙ, ནོ ཙ ཨོཧིཏསོཏོ དྷམྨཾ སུཎཱཏི… ཨོཧིཏསོཏོ ཙ དྷམྨཾ སུཎཱཏི, ནོ ཙ སུཏྭཱ དྷམྨཾ དྷཱརེཏི… སུཏྭཱ ཙ དྷམྨཾ དྷཱརེཏི, ནོ ཙ དྷཱཏཱནཾ དྷམྨཱནཾ ཨཏྠཾ ཨུཔཔརིཀྑཏི… དྷཱཏཱནཉྩ དྷམྨཱནཾ ཨཏྠཾ ཨུཔཔརིཀྑཏི ནོ ཙ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཧོཏི… ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཙ ཧོཏི, ནོ ཙ ཀལྱཱཎཝཱཙོ ཧོཏི ཀལྱཱཎཝཱཀྐརཎོ པོརིཡཱ ཝཱཙཱཡ སམནྣཱགཏོ ཝིསྶཊྛཱཡ ཨནེལགལཱ༹ཡ ཨཏྠསྶ ཝིཉྙཱཔནིཡཱ… ཀལྱཱཎཝཱཙོ ཙ ཧོཏི ཀལྱཱཎཝཱཀྐརཎོ པོརིཡཱ ཝཱཙཱཡ སམནྣཱགཏོ ཝིསྶཊྛཱཡ ཨནེལགལཱ༹ཡ ཨཏྠསྶ ཝིཉྙཱཔནིཡཱ, ནོ ཙ སནྡསྶཀོ ཧོཏི སམཱདཔཀོ སམུཏྟེཛཀོ སམྤཧཾསཀོ སབྲཧྨཙཱརཱིནཾ, ནེཝ ཏཱཝ ཏཐཱགཏཾ དྷམྨདེསནཱ པཊིབྷཱཏི།
‘‘Saddho ca, puṇṇiya, bhikkhu hoti upasaṅkamitā ca, no ca payirupāsitā…pe… payirupāsitā ca, no ca paripucchitā… paripucchitā ca, no ca ohitasoto dhammaṃ suṇāti… ohitasoto ca dhammaṃ suṇāti, no ca sutvā dhammaṃ dhāreti… sutvā ca dhammaṃ dhāreti, no ca dhātānaṃ dhammānaṃ atthaṃ upaparikkhati… dhātānañca dhammānaṃ atthaṃ upaparikkhati no ca atthamaññāya dhammamaññāya dhammānudhammappaṭipanno hoti… atthamaññāya dhammamaññāya dhammānudhammappaṭipanno ca hoti, no ca kalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā… kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, no ca sandassako hoti samādapako samuttejako sampahaṃsako sabrahmacārīnaṃ, neva tāva tathāgataṃ dhammadesanā paṭibhāti.
‘‘ཡཏོ ཙ ཁོ, པུཎྞིཡ, བྷིཀྑུ སདྡྷོ ཙ ཧོཏི, ཨུཔསངྐམིཏཱ ཙ, པཡིརུཔཱསིཏཱ ཙ, པརིཔུཙྪིཏཱ ཙ, ཨོཧིཏསོཏོ ཙ དྷམྨཾ སུཎཱཏི, སུཏྭཱ ཙ དྷམྨཾ དྷཱརེཏི, དྷཱཏཱནཉྩ དྷམྨཱནཾ ཨཏྠཾ ཨུཔཔརིཀྑཏི, ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཔྤཊིཔནྣོ ཙ ཧོཏི, ཀལྱཱཎཝཱཙོ ཙ ཧོཏི ཀལྱཱཎཝཱཀྐརཎོ པོརིཡཱ ཝཱཙཱཡ སམནྣཱགཏོ ཝིསྶཊྛཱཡ ཨནེལགལཱ༹ཡ ཨཏྠསྶ ཝིཉྙཱཔནིཡཱ, སནྡསྶཀོ ཙ ཧོཏི སམཱདཔཀོ སམུཏྟེཛཀོ སམྤཧཾསཀོ སབྲཧྨཙཱརཱིནཾ – ཨེཝཾ ཏཐཱགཏཾ དྷམྨདེསནཱ པཊིབྷཱཏི། ཨིམེཧི ཁོ, པུཎྞིཡ , དསཧི དྷམྨེཧི སམནྣཱགཏཱ 1 2 ཨེཀནྟཔཊིབྷཱནཱ 3 ཏཐཱགཏཾ དྷམྨདེསནཱ ཧོཏཱི’’ཏི 4། ཏཏིཡཾ།
‘‘Yato ca kho, puṇṇiya, bhikkhu saddho ca hoti, upasaṅkamitā ca, payirupāsitā ca, paripucchitā ca, ohitasoto ca dhammaṃ suṇāti, sutvā ca dhammaṃ dhāreti, dhātānañca dhammānaṃ atthaṃ upaparikkhati, atthamaññāya dhammamaññāya dhammānudhammappaṭipanno ca hoti, kalyāṇavāco ca hoti kalyāṇavākkaraṇo poriyā vācāya samannāgato vissaṭṭhāya anelagaḷāya atthassa viññāpaniyā, sandassako ca hoti samādapako samuttejako sampahaṃsako sabrahmacārīnaṃ – evaṃ tathāgataṃ dhammadesanā paṭibhāti. Imehi kho, puṇṇiya , dasahi dhammehi samannāgatā 56 ekantapaṭibhānā 7 tathāgataṃ dhammadesanā hotī’’ti 8. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡-༣. ཝཱཧནསུཏྟཱདིཝཎྞནཱ • 1-3. Vāhanasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༨. ཝཱཧནསུཏྟཱདིཝཎྞནཱ • 1-8. Vāhanasuttādivaṇṇanā
