Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ • Majjhimanikāya

    ༣. པུཎྞོཝཱདསུཏྟཾ

    3. Puṇṇovādasuttaṃ

    ༣༩༥. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ ཨཱཡསྨཱ པུཎྞོ སཱཡནྷསམཡཾ པཊིསལླཱནཱ ཝུཊྛིཏོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ པུཎྞོ བྷགཝནྟཾ ཨེཏདཝོཙ – ‘‘སཱདྷུ མཾ, བྷནྟེ, བྷགཝཱ སཾཁིཏྟེན ཨོཝཱདེན ཨོཝདཏུ, ཡམཧཾ བྷགཝཏོ དྷམྨཾ སུཏྭཱ ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརེཡྻ’’ནྟི། ‘‘ཏེན ཧི, པུཎྞ, སུཎཱཧི, སཱདྷུཀཾ མནསི ཀརོཧི; བྷཱསིསྶཱམཱི’’ཏི། ‘‘ཨེཝཾ, བྷནྟེ’’ཏི ཁོ ཨཱཡསྨཱ པུཎྞོ བྷགཝཏོ པཙྩསྶོསི། བྷགཝཱ ཨེཏདཝོཙ –

    395. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho āyasmā puṇṇo sāyanhasamayaṃ paṭisallānā vuṭṭhito yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā puṇṇo bhagavantaṃ etadavoca – ‘‘sādhu maṃ, bhante, bhagavā saṃkhittena ovādena ovadatu, yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyya’’nti. ‘‘Tena hi, puṇṇa, suṇāhi, sādhukaṃ manasi karohi; bhāsissāmī’’ti. ‘‘Evaṃ, bhante’’ti kho āyasmā puṇṇo bhagavato paccassosi. Bhagavā etadavoca –

    ‘‘སནྟི ཁོ, པུཎྞ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཾ ཙེ བྷིཀྑུ ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི། ཏསྶ ཏཾ ཨབྷིནནྡཏོ ཨབྷིཝདཏོ ཨཛ྄ཛྷོསཱཡ ཏིཊྛཏོ ཨུཔྤཛྫཏི ནནྡཱི 1། ‘ནནྡཱིསམུདཡཱ དུཀྑསམུདཡོ, པུཎྞཱ’ཏི ཝདཱམི།

    ‘‘Santi kho, puṇṇa, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Taṃ ce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī 2. ‘Nandīsamudayā dukkhasamudayo, puṇṇā’ti vadāmi.

    ‘‘སནྟི ཁོ, པུཎྞ, སོཏཝིཉྙེཡྻཱ སདྡཱ… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ… མནོཝིཉྙེཡྻཱ དྷམྨཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཾ ཙེ བྷིཀྑུ ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི། ཏསྶ ཏཾ ཨབྷིནནྡཏོ ཨབྷིཝདཏོ ཨཛ྄ཛྷོསཱཡ ཏིཊྛཏོ ཨུཔྤཛྫཏི ནནྡཱི། ‘ནནྡཱིསམུདཡཱ དུཀྑསམུདཡོ, པུཎྞཱ’ཏི ཝདཱམི།

    ‘‘Santi kho, puṇṇa, sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Taṃ ce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī. ‘Nandīsamudayā dukkhasamudayo, puṇṇā’ti vadāmi.

    ‘‘སནྟི ཙ ཁོ, པུཎྞ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཾ ཙེ བྷིཀྑུ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི། ཏསྶ ཏཾ ཨནབྷིནནྡཏོ ཨནབྷིཝདཏོ ཨནཛ྄ཛྷོསཱཡ ཏིཊྛཏོ ནནྡཱི ནིརུཛ྄ཛྷཏི། ‘ནནྡཱིནིརོདྷཱ དུཀྑནིརོདྷོ, པུཎྞཱ’ཏི ཝདཱམི།

    ‘‘Santi ca kho, puṇṇa, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Taṃ ce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato nandī nirujjhati. ‘Nandīnirodhā dukkhanirodho, puṇṇā’ti vadāmi.

    ‘‘སནྟི ཙ ཁོ, པུཎྞ, སོཏཝིཉྙེཡྻཱ སདྡཱ… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ… མནོཝིཉྙེཡྻཱ དྷམྨཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཾ ཙེ བྷིཀྑུ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི། ཏསྶ ཏཾ ཨནབྷིནནྡཏོ ཨནབྷིཝདཏོ ཨནཛ྄ཛྷོསཱཡ ཏིཊྛཏོ ནནྡཱི ནིརུཛ྄ཛྷཏི། ‘ནནྡཱིནིརོདྷཱ དུཀྑནིརོདྷོ, པུཎྞཱ’ཏི ཝདཱམི།

    ‘‘Santi ca kho, puṇṇa, sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Taṃ ce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato nandī nirujjhati. ‘Nandīnirodhā dukkhanirodho, puṇṇā’ti vadāmi.

    ‘‘ཨིམིནཱ ཙ ཏྭཾ པུཎྞ, མཡཱ སཾཁིཏྟེན ཨོཝཱདེན ཨོཝདིཏོ ཀཏརསྨིཾ ཛནཔདེ ཝིཧརིསྶསཱི’’ཏི? ‘‘ཨིམིནཱཧཾ, བྷནྟེ, བྷགཝཏཱ སཾཁིཏྟེན ཨོཝཱདེན ཨོཝདིཏོ, ཨཏྠི སུནཱཔརནྟོ ནཱམ ཛནཔདོ, ཏཏྠཱཧཾ ཝིཧརིསྶཱམཱི’’ཏི།

    ‘‘Iminā ca tvaṃ puṇṇa, mayā saṃkhittena ovādena ovadito katarasmiṃ janapade viharissasī’’ti? ‘‘Imināhaṃ, bhante, bhagavatā saṃkhittena ovādena ovadito, atthi sunāparanto nāma janapado, tatthāhaṃ viharissāmī’’ti.

    ༣༩༦. ‘‘ཙཎྜཱ ཁོ, པུཎྞ, སུནཱཔརནྟཀཱ མནུསྶཱ; ཕརུསཱ ཁོ, པུཎྞ, སུནཱཔརནྟཀཱ མནུསྶཱ། སཙེ ཏཾ, པུཎྞ, སུནཱཔརནྟཀཱ མནུསྶཱ ཨཀྐོསིསྶནྟི པརིབྷཱསིསྶནྟི, ཏཏྠ ཏེ, པུཎྞ, ཀིནྟི བྷཝིསྶཏཱི’’ཏི? ‘‘སཙེ མཾ, བྷནྟེ, སུནཱཔརནྟཀཱ མནུསྶཱ ཨཀྐོསིསྶནྟི པརིབྷཱསིསྶནྟི, ཏཏྠ མེ ཨེཝཾ བྷཝིསྶཏི – ‘བྷདྡཀཱ 3 ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ ནཡིམེ པཱཎིནཱ པཧཱརཾ དེནྟཱི’ཏི། ཨེཝམེཏྠ 4, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    396. ‘‘Caṇḍā kho, puṇṇa, sunāparantakā manussā; pharusā kho, puṇṇa, sunāparantakā manussā. Sace taṃ, puṇṇa, sunāparantakā manussā akkosissanti paribhāsissanti, tattha te, puṇṇa, kinti bhavissatī’’ti? ‘‘Sace maṃ, bhante, sunāparantakā manussā akkosissanti paribhāsissanti, tattha me evaṃ bhavissati – ‘bhaddakā 5 vatime sunāparantakā manussā, subhaddakā vatime sunāparantakā manussā, yaṃ me nayime pāṇinā pahāraṃ dentī’ti. Evamettha 6, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ པཱཎིནཱ པཧཱརཾ དསྶནྟི, ཏཏྠ པན ཏེ, པུཎྞ, ཀིནྟི བྷཝིསྶཏཱི’’ཏི? ‘‘སཙེ མེ, བྷནྟེ, སུནཱཔརནྟཀཱ མནུསྶཱ པཱཎིནཱ པཧཱརཾ དསྶནྟི, ཏཏྠ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ ནཡིམེ ལེཌྜུནཱ པཧཱརཾ དེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace pana te, puṇṇa, sunāparantakā manussā pāṇinā pahāraṃ dassanti, tattha pana te, puṇṇa, kinti bhavissatī’’ti? ‘‘Sace me, bhante, sunāparantakā manussā pāṇinā pahāraṃ dassanti, tattha me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime leḍḍunā pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ ལེཌྜུནཱ པཧཱརཾ དསྶནྟི, ཏཏྠ པན ཏེ, པུཎྞ, ཀིནྟི བྷཝིསྶཏཱི’’ཏི? ‘‘སཙེ མེ, བྷནྟེ, སུནཱཔརནྟཀཱ མནུསྶཱ ལེཌྜུནཱ པཧཱརཾ དསྶནྟི, ཏཏྠ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ ནཡིམེ དཎྜེན པཧཱརཾ དེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace pana te, puṇṇa, sunāparantakā manussā leḍḍunā pahāraṃ dassanti, tattha pana te, puṇṇa, kinti bhavissatī’’ti? ‘‘Sace me, bhante, sunāparantakā manussā leḍḍunā pahāraṃ dassanti, tattha me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime daṇḍena pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ དཎྜེན པཧཱརཾ དསྶནྟི, ཏཏྠ པན ཏེ, པུཎྞ, ཀིནྟི བྷཝིསྶཏཱི’’ཏི? ‘‘སཙེ མེ, བྷནྟེ, སུནཱཔརནྟཀཱ མནུསྶཱ དཎྜེན པཧཱརཾ དསྶནྟི, ཏཏྠ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མེ ནཡིམེ སཏྠེན པཧཱརཾ དེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace pana te, puṇṇa, sunāparantakā manussā daṇḍena pahāraṃ dassanti, tattha pana te, puṇṇa, kinti bhavissatī’’ti? ‘‘Sace me, bhante, sunāparantakā manussā daṇḍena pahāraṃ dassanti, tattha me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ me nayime satthena pahāraṃ dentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏེ, པུཎྞ, སུནཱཔརནྟཀཱ མནུསྶཱ སཏྠེན པཧཱརཾ དསྶནྟི, ཏཏྠ པན ཏེ, པུཎྞ, ཀིནྟི བྷཝིསྶཏཱི’’ཏི? ‘‘སཙེ མེ, བྷནྟེ, སུནཱཔརནྟཀཱ མནུསྶཱ སཏྠེན པཧཱརཾ དསྶནྟི, ཏཏྠ མེ ཨེཝཾ བྷཝིསྶཏི – ‘བྷདྡཀཱ ཝཏིམེ སུནཱཔརནྟཀཱ མནུསྶཱ, སུབྷདྡཀཱ ཝཏིམེ སུནཱཔརནྟཀཱ མནུསྶཱ, ཡཾ མཾ 7 ནཡིམེ ཏིཎྷེན སཏྠེན ཛཱིཝིཏཱ ཝོརོཔེནྟཱི’ཏི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི།

    ‘‘Sace pana te, puṇṇa, sunāparantakā manussā satthena pahāraṃ dassanti, tattha pana te, puṇṇa, kinti bhavissatī’’ti? ‘‘Sace me, bhante, sunāparantakā manussā satthena pahāraṃ dassanti, tattha me evaṃ bhavissati – ‘bhaddakā vatime sunāparantakā manussā, subhaddakā vatime sunāparantakā manussā, yaṃ maṃ 8 nayime tiṇhena satthena jīvitā voropentī’ti. Evamettha, bhagavā, bhavissati; evamettha, sugata, bhavissatī’’ti.

    ‘‘སཙེ པན ཏཾ, པུཎྞ, སུནཱཔརནྟཀཱ མནུསྶཱ ཏིཎྷེན སཏྠེན ཛཱིཝིཏཱ ཝོརོཔེསྶནྟི, ཏཏྠ པན ཏེ, པུཎྞ, ཀིནྟི བྷཝིསྶཏཱི’’ཏི? ‘‘སཙེ མཾ, བྷནྟེ, སུནཱཔརནྟཀཱ མནུསྶཱ ཏིཎྷེན སཏྠེན ཛཱིཝིཏཱ ཝོརོཔེསྶནྟི, ཏཏྠ མེ ཨེཝཾ བྷཝིསྶཏི – ‘སནྟི ཁོ བྷགཝཏོ སཱཝཀཱ ཀཱཡེ ཙ ཛཱིཝིཏེ ཙ ཨཊྚཱིཡམཱནཱ ཧརཱཡམཱནཱ ཛིགུཙྪམཱནཱ སཏྠཧཱརཀཾ པརིཡེསནྟི། ཏཾ མེ ཨིདཾ ཨཔརིཡིཊྛཾཡེཝ སཏྠཧཱརཀཾ ལདྡྷ’ནྟི། ཨེཝམེཏྠ, བྷགཝཱ, བྷཝིསྶཏི; ཨེཝམེཏྠ, སུགཏ, བྷཝིསྶཏཱི’’ཏི། ‘‘སཱདྷུ, སཱདྷུ, པུཎྞ! སཀྑིསྶསི ཁོ ཏྭཾ, པུཎྞ, ཨིམིནཱ དམཱུཔསམེན སམནྣཱགཏོ སུནཱཔརནྟསྨིཾ ཛནཔདེ ཝིཧརིཏུཾ། ཡསྶདཱནི ཏྭཾ, པུཎྞ, ཀཱལཾ མཉྙསཱི’’ཏི།

    ‘‘Sace pana taṃ, puṇṇa, sunāparantakā manussā tiṇhena satthena jīvitā voropessanti, tattha pana te, puṇṇa, kinti bhavissatī’’ti? ‘‘Sace maṃ, bhante, sunāparantakā manussā tiṇhena satthena jīvitā voropessanti, tattha me evaṃ bhavissati – ‘santi kho bhagavato sāvakā kāye ca jīvite ca aṭṭīyamānā harāyamānā jigucchamānā satthahārakaṃ pariyesanti. Taṃ me idaṃ apariyiṭṭhaṃyeva satthahārakaṃ laddha’nti. Evamettha, bhagavā, bhavissati; evamettha, sugata, bhavissatī’’ti. ‘‘Sādhu, sādhu, puṇṇa! Sakkhissasi kho tvaṃ, puṇṇa, iminā damūpasamena samannāgato sunāparantasmiṃ janapade viharituṃ. Yassadāni tvaṃ, puṇṇa, kālaṃ maññasī’’ti.

    ༣༩༧. ཨཐ ཁོ ཨཱཡསྨཱ པུཎྞོ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ སེནཱསནཾ སཾསཱམེཏྭཱ པཏྟཙཱིཝརམཱདཱཡ ཡེན སུནཱཔརནྟོ ཛནཔདོ ཏེན ཙཱརིཀཾ པཀྐཱམི། ཨནུཔུབྦེན ཙཱརིཀཾ ཙརམཱནོ ཡེན སུནཱཔརནྟོ ཛནཔདོ ཏདཝསརི། ཏཏྲ སུདཾ ཨཱཡསྨཱ པུཎྞོ སུནཱཔརནྟསྨིཾ ཛནཔདེ ཝིཧརཏི། ཨཐ ཁོ ཨཱཡསྨཱ པུཎྞོ ཏེནེཝནྟརཝསྶེན པཉྩམཏྟཱནི ཨུཔཱསཀསཏཱནི པཊིཝེདེསི 9, ཏེནེཝནྟརཝསྶེན པཉྩམཏྟཱནི ཨུཔཱསིཀསཏཱནི པཊིཝེདེསི, ཏེནེཝནྟརཝསྶེན ཏིསྶོ ཝིཛྫཱ སཙྪཱཀཱསི། ཨཐ ཁོ ཨཱཡསྨཱ པུཎྞོ ཨཔརེན སམཡེན པརིནིབྦཱཡི།

    397. Atha kho āyasmā puṇṇo bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā senāsanaṃ saṃsāmetvā pattacīvaramādāya yena sunāparanto janapado tena cārikaṃ pakkāmi. Anupubbena cārikaṃ caramāno yena sunāparanto janapado tadavasari. Tatra sudaṃ āyasmā puṇṇo sunāparantasmiṃ janapade viharati. Atha kho āyasmā puṇṇo tenevantaravassena pañcamattāni upāsakasatāni paṭivedesi 10, tenevantaravassena pañcamattāni upāsikasatāni paṭivedesi, tenevantaravassena tisso vijjā sacchākāsi. Atha kho āyasmā puṇṇo aparena samayena parinibbāyi.

    ཨཐ ཁོ སམྦཧུལཱ བྷིཀྑཱུ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘‘ཡོ སོ, བྷནྟེ, པུཎྞོ ནཱམ ཀུལཔུཏྟོ བྷགཝཏཱ སཾཁིཏྟེན ཨོཝཱདེན ཨོཝདིཏོ སོ ཀཱལངྐཏོ། ཏསྶ ཀཱ གཏི, ཀོ ཨབྷིསམྤརཱཡོ’’ཏི? ‘‘པཎྜིཏོ, བྷིཀྑཝེ, པུཎྞོ ཀུལཔུཏྟོ པཙྩཔཱདི 11 དྷམྨསྶཱནུདྷམྨཾ, ན ཙ མཾ དྷམྨཱདྷིཀརཎཾ ཝིཧེཋེསི། པརིནིབྦུཏོ, བྷིཀྑཝེ, པུཎྞོ ཀུལཔུཏྟོ’’ཏི།

    Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘yo so, bhante, puṇṇo nāma kulaputto bhagavatā saṃkhittena ovādena ovadito so kālaṅkato. Tassa kā gati, ko abhisamparāyo’’ti? ‘‘Paṇḍito, bhikkhave, puṇṇo kulaputto paccapādi 12 dhammassānudhammaṃ, na ca maṃ dhammādhikaraṇaṃ viheṭhesi. Parinibbuto, bhikkhave, puṇṇo kulaputto’’ti.

    ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི།

    Idamavoca bhagavā. Attamanā te bhikkhū bhagavato bhāsitaṃ abhinandunti.

    པུཎྞོཝཱདསུཏྟཾ ནིཊྛིཏཾ ཏཏིཡཾ།

    Puṇṇovādasuttaṃ niṭṭhitaṃ tatiyaṃ.




    Next: ༤. ནནྡཀོཝཱདསུཏྟཾ • 4. Nandakovādasuttaṃ




    Footnotes:
    1. ནནྡི (སྱཱ॰ ཀཾ॰)
    2. nandi (syā. kaṃ.)
    3. བྷདྲཀཱ (ཀ॰)
    4. ཨེཝམྨེཏྠ (?)
    5. bhadrakā (ka.)
    6. evammettha (?)
    7. ཡཾ མེ (སཱི॰ པཱི॰ ཀ॰)
    8. yaṃ me (sī. pī. ka.)
    9. པཊིཔཱདེསི (སཱི॰ པཱི॰), པཊིདེསེསི (སྱཱ॰ ཀཾ॰)
    10. paṭipādesi (sī. pī.), paṭidesesi (syā. kaṃ.)
    11. སཙྩཝཱདཱི དྷམྨཝཱདཱི (ཀ॰)
    12. saccavādī dhammavādī (ka.)



    Related texts:



    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༣. པུཎྞོཝཱདསུཏྟཝཎྞནཱ • 3. Puṇṇovādasuttavaṇṇanā

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༣. པུཎྞོཝཱདསུཏྟཝཎྞནཱ • 3. Puṇṇovādasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact