| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৩. পুণ্ণোৰাদসুত্তৰণ্ণনা
3. Puṇṇovādasuttavaṇṇanā
৩৯৫. এৰং মে সুতন্তি পুণ্ণোৰাদসুত্তং। তত্থ পটিসল্লানাতি একীভাৰা। তং চেতি তং চক্খুঞ্চেৰ রূপঞ্চ। নন্দীসমুদযা দুক্খসমুদযোতি নন্দিযা তণ্হায সমোধানেন পঞ্চক্খন্ধদুক্খস্স সমোধানং হোতি। ইতি ছসু দ্ৰারেসু দুক্খং সমুদযোতি দ্ৰিন্নং সচ্চানং ৰসেন ৰট্টং মত্থকং পাপেত্ৰা দস্সেসি। দুতিযনযে নিরোধো মগ্গোতি দ্ৰিন্নং সচ্চানং ৰসেন ৰিৰট্টং মত্থকং পাপেত্ৰা দস্সেসি। ইমিনা চ ত্ৰং পুণ্ণাতি পাটিযেক্কো অনুসন্ধি। এৰং তাৰ ৰট্টৰিৰট্টৰসেন দেসনং অরহত্তে পক্খিপিত্ৰা ইদানি পুণ্ণত্থেরং সত্তসু ঠানেসু সীহনাদং নদাপেতুং ইমিনা চ ত্ৰন্তিআদিমাহ।
395.Evaṃme sutanti puṇṇovādasuttaṃ. Tattha paṭisallānāti ekībhāvā. Taṃ ceti taṃ cakkhuñceva rūpañca. Nandīsamudayā dukkhasamudayoti nandiyā taṇhāya samodhānena pañcakkhandhadukkhassa samodhānaṃ hoti. Iti chasu dvāresu dukkhaṃ samudayoti dvinnaṃ saccānaṃ vasena vaṭṭaṃ matthakaṃ pāpetvā dassesi. Dutiyanaye nirodho maggoti dvinnaṃ saccānaṃ vasena vivaṭṭaṃ matthakaṃ pāpetvā dassesi. Iminā ca tvaṃ puṇṇāti pāṭiyekko anusandhi. Evaṃ tāva vaṭṭavivaṭṭavasena desanaṃ arahatte pakkhipitvā idāni puṇṇattheraṃ sattasu ṭhānesu sīhanādaṃ nadāpetuṃ iminā ca tvantiādimāha.
৩৯৬. চণ্ডাতি দুট্ঠা কিব্বিসা। ফরুসাতি কক্খল়া। অক্কোসিস্সন্তীতি দসহি অক্কোসৰত্থূহি অক্কোসিস্সন্তি। পরিভাসিস্সন্তীতি কিং সমণো নাম ত্ৰং, ইদঞ্চ ইদঞ্চ তে করিস্সামাতি তজ্জেস্সন্তি। এৰমেত্থাতি এৰং ময্হং এত্থ ভৰিস্সতি।
396.Caṇḍāti duṭṭhā kibbisā. Pharusāti kakkhaḷā. Akkosissantīti dasahi akkosavatthūhi akkosissanti. Paribhāsissantīti kiṃ samaṇo nāma tvaṃ, idañca idañca te karissāmāti tajjessanti. Evametthāti evaṃ mayhaṃ ettha bhavissati.
দণ্ডেনাতি চতুহত্থেন দণ্ডেন ৰা ঘটিকমুগ্গরেন ৰা। সত্থেনাতি একতোধারাদিনা। সত্থহারকং পরিযেসন্তীতি জীৰিতহারকং সত্থং পরিযেসন্তি। ইদং থেরো ততিযপারাজিকৰত্থুস্মিং অসুভকথং সুত্ৰা অত্তভাৰেন জিগুচ্ছন্তানং ভিক্খূনং সত্থহারকপরিযেসনং সন্ধাযাহ। দমূপসমেনাতি এত্থ দমোতি ইন্দ্রিযসংৰরাদীনং এতং নামং। ‘‘সচ্চেন দন্তো দমসা উপেতো, ৰেদন্তগূ ৰুসিতব্রহ্মচরিযো’’তি (সং॰ নি॰ ১.১৯৫; সু॰ নি॰ ৪৬৭) এত্থ হি ইন্দ্রিযসংৰরো দমোতি ৰুত্তো। ‘‘যদি সচ্চা দমা চাগা, খন্ত্যা ভিয্যোধ ৰিজ্জতী’’তি (সং॰ নি॰ ১.২৪৬; সু॰ নি॰ ১৯১) এত্থ পঞ্ঞা দমোতি ৰুত্তো। ‘‘দানেন দমেন সংযমেন সচ্চৰজ্জেনা’’তি (দী॰ নি॰ ১.১৬৬; ম॰ নি॰ ২.২২৬) এত্থ উপোসথকম্মং দমোতি ৰুত্তং। ইমস্মিং পন সুত্তে খন্তি দমোতি ৰেদিতব্বা। উপসমোতি তস্সেৰ ৰেৰচনং।
Daṇḍenāti catuhatthena daṇḍena vā ghaṭikamuggarena vā. Satthenāti ekatodhārādinā. Satthahārakaṃ pariyesantīti jīvitahārakaṃ satthaṃ pariyesanti. Idaṃ thero tatiyapārājikavatthusmiṃ asubhakathaṃ sutvā attabhāvena jigucchantānaṃ bhikkhūnaṃ satthahārakapariyesanaṃ sandhāyāha. Damūpasamenāti ettha damoti indriyasaṃvarādīnaṃ etaṃ nāmaṃ. ‘‘Saccena danto damasā upeto, vedantagū vusitabrahmacariyo’’ti (saṃ. ni. 1.195; su. ni. 467) ettha hi indriyasaṃvaro damoti vutto. ‘‘Yadi saccā damā cāgā, khantyā bhiyyodha vijjatī’’ti (saṃ. ni. 1.246; su. ni. 191) ettha paññā damoti vutto. ‘‘Dānena damena saṃyamena saccavajjenā’’ti (dī. ni. 1.166; ma. ni. 2.226) ettha uposathakammaṃ damoti vuttaṃ. Imasmiṃ pana sutte khanti damoti veditabbā. Upasamoti tasseva vevacanaṃ.
৩৯৭. অথ খো আযস্মা পুণ্ণোতি কো পনেস পুণ্ণো, কস্মা পনেত্থ গন্তুকামো অহোসীতি । সুনাপরন্তৰাসিকো এৰ এসো, সাৰত্থিযং পন অসপ্পাযৰিহারং সল্লক্খেত্ৰা তত্থ গন্তুকামো অহোসি।
397.Atha kho āyasmā puṇṇoti ko panesa puṇṇo, kasmā panettha gantukāmo ahosīti . Sunāparantavāsiko eva eso, sāvatthiyaṃ pana asappāyavihāraṃ sallakkhetvā tattha gantukāmo ahosi.
তত্রাযং অনুপুব্বিকথা – সুনাপরন্তরট্ঠে কির একস্মিং ৰাণিজকগামে এতে দ্ৰে ভাতরো। তেসু কদাচি জেট্ঠো পঞ্চ সকটসতানি গহেত্ৰা জনপদং গন্ত্ৰা ভণ্ডং আহরতি, কদাচি কনিট্ঠো। ইমস্মিং পন সমযে কনিট্ঠং ঘরে ঠপেত্ৰা জেট্ঠভাতিকো পঞ্চ সকটসতানি গহেত্ৰা জনপদচারিকং চরন্তো অনুপুব্বেন সাৰত্থিং পত্ৰা জেতৰনস্স নাতিদূরে সকটসত্থং নিৰাসেত্ৰা ভুত্তপাতরাসো পরিজনপরিৰুতো ফাসুকট্ঠানে নিসীদি।
Tatrāyaṃ anupubbikathā – sunāparantaraṭṭhe kira ekasmiṃ vāṇijakagāme ete dve bhātaro. Tesu kadāci jeṭṭho pañca sakaṭasatāni gahetvā janapadaṃ gantvā bhaṇḍaṃ āharati, kadāci kaniṭṭho. Imasmiṃ pana samaye kaniṭṭhaṃ ghare ṭhapetvā jeṭṭhabhātiko pañca sakaṭasatāni gahetvā janapadacārikaṃ caranto anupubbena sāvatthiṃ patvā jetavanassa nātidūre sakaṭasatthaṃ nivāsetvā bhuttapātarāso parijanaparivuto phāsukaṭṭhāne nisīdi.
তেন চ সমযেন সাৰত্থিৰাসিনো ভুত্তপাতরাসা উপোসথঙ্গানি অধিট্ঠায সুদ্ধুত্তরাসঙ্গা গন্ধপুপ্ফাদিহত্থা যেন বুদ্ধো যেন ধম্মো যেন সঙ্ঘো, তন্নিন্না তপ্পোণা তপ্পাব্ভারা হুত্ৰা দক্খিণদ্ৰারেন নিক্খমিত্ৰা জেতৰনং গচ্ছন্তি। সো তে দিস্ৰা ‘‘কহং ইমে গচ্ছন্তি’’তি একমনুস্সং পুচ্ছি। কিং ত্ৰং অয্যো ন জানাসি, লোকে বুদ্ধধম্মসঙ্ঘরতনানি নাম উপ্পন্নানি, ইচ্চেস মহাজনো সত্থু সন্তিকে ধম্মকথং সোতুং গচ্ছতীতি। তস্স বুদ্ধোতি ৰচনং ছৰিচম্মাদীনি ছিন্দিত্ৰা অট্ঠিমিঞ্জং আহচ্চ অট্ঠাসি। অথ অত্তনো পরিজনপরিৰুতো তায পরিসায সদ্ধিং ৰিহারং গন্ত্ৰা সত্থু মধুরস্সরেন ধম্মং দেসেন্তস্স পরিসপরিযন্তে ঠিতো ধম্মং সুত্ৰা পব্বজ্জায চিত্তং উপ্পাদেসি। অথ তথাগতেন কালং ৰিদিত্ৰা পরিসায উয্যোজিতায সত্থারং উপসঙ্কমিত্ৰা ৰন্দিত্ৰা স্ৰাতনায নিমন্তেত্ৰা দুতিযদিৰসে মণ্ডপং কারেত্ৰা আসনানি পঞ্ঞপেত্ৰা বুদ্ধপ্পমুখস্স সঙ্ঘস্স মহাদানং দত্ৰা ভুত্তপাতরাসো উপোসথঙ্গানি অধিট্ঠায ভণ্ডাগারিকং পক্কোসাপেত্ৰা, এত্তকং ভণ্ডং ৰিস্সজ্জিতং, এত্তকং ন ৰিস্সজ্জিতন্তি সব্বং আচিক্খিত্ৰা – ‘‘ইমং সাপতেয্যং ময্হং কনিট্ঠস্স দেহী’’তি সব্বং নিয্যাতেত্ৰা সত্থু সন্তিকে পব্বজিত্ৰা কম্মট্ঠানপরাযণো অহোসি।
Tena ca samayena sāvatthivāsino bhuttapātarāsā uposathaṅgāni adhiṭṭhāya suddhuttarāsaṅgā gandhapupphādihatthā yena buddho yena dhammo yena saṅgho, tanninnā tappoṇā tappābbhārā hutvā dakkhiṇadvārena nikkhamitvā jetavanaṃ gacchanti. So te disvā ‘‘kahaṃ ime gacchanti’’ti ekamanussaṃ pucchi. Kiṃ tvaṃ ayyo na jānāsi, loke buddhadhammasaṅgharatanāni nāma uppannāni, iccesa mahājano satthu santike dhammakathaṃ sotuṃ gacchatīti. Tassa buddhoti vacanaṃ chavicammādīni chinditvā aṭṭhimiñjaṃ āhacca aṭṭhāsi. Atha attano parijanaparivuto tāya parisāya saddhiṃ vihāraṃ gantvā satthu madhurassarena dhammaṃ desentassa parisapariyante ṭhito dhammaṃ sutvā pabbajjāya cittaṃ uppādesi. Atha tathāgatena kālaṃ viditvā parisāya uyyojitāya satthāraṃ upasaṅkamitvā vanditvā svātanāya nimantetvā dutiyadivase maṇḍapaṃ kāretvā āsanāni paññapetvā buddhappamukhassa saṅghassa mahādānaṃ datvā bhuttapātarāso uposathaṅgāni adhiṭṭhāya bhaṇḍāgārikaṃ pakkosāpetvā, ettakaṃ bhaṇḍaṃ vissajjitaṃ, ettakaṃ na vissajjitanti sabbaṃ ācikkhitvā – ‘‘imaṃ sāpateyyaṃ mayhaṃ kaniṭṭhassa dehī’’ti sabbaṃ niyyātetvā satthu santike pabbajitvā kammaṭṭhānaparāyaṇo ahosi.
অথস্স কম্মট্ঠানং মনসিকরোন্তস্স কম্মট্ঠানং ন উপট্ঠাতি। ততো চিন্তেসি – ‘‘অযং জনপদো ময্হং অসপ্পাযো, যংনূনাহং সত্থু সন্তিকে কম্মট্ঠানং গহেত্ৰা সকট্ঠানমেৰ গচ্ছেয্য’’ন্তি। অথ পুব্বণ্হসমযে পিণ্ডায চরিত্ৰা সাযন্হসমযে পটিসল্লানা ৰুট্ঠহিত্ৰা ভগৰন্তং উপসঙ্কমিত্ৰা কম্মট্ঠানং কথাপেত্ৰা সত্ত সীহনাদে নদিত্ৰা পক্কামি। তেন ৰুত্তং – ‘‘অথ খো আযস্মা পুণ্ণো…পে॰… ৰিহরতী’’তি।
Athassa kammaṭṭhānaṃ manasikarontassa kammaṭṭhānaṃ na upaṭṭhāti. Tato cintesi – ‘‘ayaṃ janapado mayhaṃ asappāyo, yaṃnūnāhaṃ satthu santike kammaṭṭhānaṃ gahetvā sakaṭṭhānameva gaccheyya’’nti. Atha pubbaṇhasamaye piṇḍāya caritvā sāyanhasamaye paṭisallānā vuṭṭhahitvā bhagavantaṃ upasaṅkamitvā kammaṭṭhānaṃ kathāpetvā satta sīhanāde naditvā pakkāmi. Tena vuttaṃ – ‘‘atha kho āyasmā puṇṇo…pe… viharatī’’ti.
কত্থ পনাযং ৰিহাসীতি? চতূসু ঠানেসু ৰিহাসি, সুনাপরন্তরট্ঠং তাৰ পৰিসিত্ৰা অজ্জুহত্থপব্বতে নাম পৰিসিত্ৰা ৰাণিজগামং পিণ্ডায পাৰিসি। অথ নং কনিট্ঠভাতা সঞ্জানিত্ৰা ভিক্খং দত্ৰা, ‘‘ভন্তে, অঞ্ঞত্থ অগন্ত্ৰা ইধেৰ ৰসথা’’তি পটিঞ্ঞং কারেত্ৰা তত্থেৰ ৰসাপেসি।
Kattha panāyaṃ vihāsīti? Catūsu ṭhānesu vihāsi, sunāparantaraṭṭhaṃ tāva pavisitvā ajjuhatthapabbate nāma pavisitvā vāṇijagāmaṃ piṇḍāya pāvisi. Atha naṃ kaniṭṭhabhātā sañjānitvā bhikkhaṃ datvā, ‘‘bhante, aññattha agantvā idheva vasathā’’ti paṭiññaṃ kāretvā tattheva vasāpesi.
ততো সমুদ্দগিরিৰিহারং নাম অগমাসি। তত্থ অযকন্তপাসাণেহি পরিচ্ছিন্দিত্ৰা কতচঙ্কমো অত্থি, তং কোচি চঙ্কমিতুং সমত্থো নাম নত্থি। তত্থ সমুদ্দৰীচিযো আগন্ত্ৰা অযকন্তপাসাণেসু পহরিত্ৰা মহাসদ্দং করোন্তি। থেরোনং – ‘‘কম্মট্ঠানং মনসিকরোন্তানং ফাসুৰিহারো হোতূ’’তি সমুদ্দং নিস্সদ্দং কত্ৰা অধিট্ঠাসি।
Tato samuddagirivihāraṃ nāma agamāsi. Tattha ayakantapāsāṇehi paricchinditvā katacaṅkamo atthi, taṃ koci caṅkamituṃ samattho nāma natthi. Tattha samuddavīciyo āgantvā ayakantapāsāṇesu paharitvā mahāsaddaṃ karonti. Theronaṃ – ‘‘kammaṭṭhānaṃ manasikarontānaṃ phāsuvihāro hotū’’ti samuddaṃ nissaddaṃ katvā adhiṭṭhāsi.
ততো মাতুলগিরিং নাম অগমাসি। তত্থ সকুণসঙ্ঘো উস্সন্নো, রত্তিঞ্চ দিৰা চ সদ্দো একাবদ্ধোৰ হোতি, থেরো ইমং ঠানং অফাসুকন্তি ততো মকুলকারামৰিহারং নাম গতো। সো ৰাণিজগামস্স নাতিদূরো নচ্চাসন্নো গমনাগমনসম্পন্নো ৰিৰিত্তো অপ্পসদ্দো। থেরো ইমং ঠানং ফাসুকন্তি তত্থ রত্তিট্ঠানদিৰাট্ঠানচঙ্কমনাদীনি কারেত্ৰা ৰস্সং উপগচ্ছি। এৰং চতূসু ঠানেসু ৰিহাসি।
Tato mātulagiriṃ nāma agamāsi. Tattha sakuṇasaṅgho ussanno, rattiñca divā ca saddo ekābaddhova hoti, thero imaṃ ṭhānaṃ aphāsukanti tato makulakārāmavihāraṃ nāma gato. So vāṇijagāmassa nātidūro naccāsanno gamanāgamanasampanno vivitto appasaddo. Thero imaṃ ṭhānaṃ phāsukanti tattha rattiṭṭhānadivāṭṭhānacaṅkamanādīni kāretvā vassaṃ upagacchi. Evaṃ catūsu ṭhānesu vihāsi.
অথেকদিৰসং তস্মিংযেৰ অন্তোৰস্সে পঞ্চ ৰাণিজসতানি পরসমুদ্দং গচ্ছামাতি নাৰায ভণ্ডং পক্খিপিংসু। নাৰারোহনদিৰসে থেরস্স কনিট্ঠভাতা থেরং ভোজেত্ৰা থেরস্স সন্তিকে সিক্খাপদানি গহেত্ৰা ৰন্দিত্ৰা গচ্ছন্তো, – ‘‘ভন্তে, মহাসমুদ্দো নাম অপ্পমেয্যো অনেকন্তরাযো, অম্হে আৰজ্জেয্যাথা’’তি ৰত্ৰা নাৰং আরুহি। নাৰা উত্তমজৰেন গচ্ছমানা অঞ্ঞতরং দীপকং পাপুণি। মনুস্সা পাতরাসং করিস্সামাতি দীপকে ওতিণ্ণা। তস্মিং দীপে অঞ্ঞং কিঞ্চি নত্থি, চন্দনৰনমেৰ অহোসি।
Athekadivasaṃ tasmiṃyeva antovasse pañca vāṇijasatāni parasamuddaṃ gacchāmāti nāvāya bhaṇḍaṃ pakkhipiṃsu. Nāvārohanadivase therassa kaniṭṭhabhātā theraṃ bhojetvā therassa santike sikkhāpadāni gahetvā vanditvā gacchanto, – ‘‘bhante, mahāsamuddo nāma appameyyo anekantarāyo, amhe āvajjeyyāthā’’ti vatvā nāvaṃ āruhi. Nāvā uttamajavena gacchamānā aññataraṃ dīpakaṃ pāpuṇi. Manussā pātarāsaṃ karissāmāti dīpake otiṇṇā. Tasmiṃ dīpe aññaṃ kiñci natthi, candanavanameva ahosi.
অথেকো ৰাসিযা রুক্খং আকোটেত্ৰা লোহিতচন্দনভাৰং ঞত্ৰা আহ – ‘‘ভো মযং লাভত্থায পরসমুদ্দং গচ্ছাম, ইতো চ উত্তরি লাভো নাম নত্থি, চতুরঙ্গুলমত্তা ঘটিকা সতসহস্সং অগ্ঘতি, হারেতব্বকযুত্তং ভণ্ডং হারেত্ৰা চন্দনস্স পূরেমা’’তি। তে তথা করিংসু। চন্দনৰনে অধিৰত্থা অমনুস্সা কুজ্ঝিত্ৰা – ‘‘ইমেহি অম্হাকং চন্দনৰনং নাসিতং, ঘাতেস্সাম নে’’তি চিন্তেত্ৰা – ‘‘ইধেৰ ঘাতিতেসু সব্বং ৰনং একং কুণপং ভৰিস্সতি, সমুদ্দমজ্ঝে নেসং নাৰং ওসীদেস্সামা’’তি আহংসু। অথ তেসং নাৰং আরুয্হ মুহুত্তং গতকালেযেৰ উপ্পাদিকং উট্ঠপেত্ৰা সযম্পি তে অমনুস্সা ভযানকানি রূপানি দস্সযিংসু। ভীতা মনুস্সা অত্তনো অত্তনো দেৰতা নমস্সন্তি। থেরস্স কনিট্ঠো চূল়পুণ্ণকুটুম্বিকো – ‘‘ময্হং ভাতা অৰস্সযো হোতূ’’তি থেরস্স নমস্সমানো অট্ঠাসি।
Atheko vāsiyā rukkhaṃ ākoṭetvā lohitacandanabhāvaṃ ñatvā āha – ‘‘bho mayaṃ lābhatthāya parasamuddaṃ gacchāma, ito ca uttari lābho nāma natthi, caturaṅgulamattā ghaṭikā satasahassaṃ agghati, hāretabbakayuttaṃ bhaṇḍaṃ hāretvā candanassa pūremā’’ti. Te tathā kariṃsu. Candanavane adhivatthā amanussā kujjhitvā – ‘‘imehi amhākaṃ candanavanaṃ nāsitaṃ, ghātessāma ne’’ti cintetvā – ‘‘idheva ghātitesu sabbaṃ vanaṃ ekaṃ kuṇapaṃ bhavissati, samuddamajjhe nesaṃ nāvaṃ osīdessāmā’’ti āhaṃsu. Atha tesaṃ nāvaṃ āruyha muhuttaṃ gatakāleyeva uppādikaṃ uṭṭhapetvā sayampi te amanussā bhayānakāni rūpāni dassayiṃsu. Bhītā manussā attano attano devatā namassanti. Therassa kaniṭṭho cūḷapuṇṇakuṭumbiko – ‘‘mayhaṃ bhātā avassayo hotū’’ti therassa namassamāno aṭṭhāsi.
থেরোপি কির তস্মিংযেৰ খণে আৰজ্জিত্ৰা তেসং ব্যসনুপ্পত্তিং ঞত্ৰা ৰেহাসং উপ্পতিত্ৰা সম্মুখে অট্ঠাসি। অমনুস্সা থেরং দিস্ৰা ‘‘অয্যো পুণ্ণত্থেরো এতী’’তি পক্কমিংসু, উপ্পাদিকং সন্নিসীদি। থেরো মা ভাযথাতি তে অস্সাসেত্ৰা ‘‘কহং গন্তুকামত্থা’’তি পুচ্ছি। ভন্তে, অম্হাকং সকট্ঠানমেৰ গচ্ছামাতি। থেরো নাৰং ফলে অক্কমিত্ৰা ‘‘এতেসং ইচ্ছিতট্ঠানং গচ্ছতূ’’তি অধিট্ঠাসি। ৰাণিজা সকট্ঠানং গন্ত্ৰা তং পৰত্তিং পুত্তদারস্স আরোচেত্ৰা ‘‘এথ থেরং সরণং গচ্ছামা’’তি পঞ্চসতা অত্তনো পঞ্চমাতুগামসতেহি সদ্ধিং তীসু সরণেসু পতিট্ঠায উপাসকত্তং পটিৰেদেসুং। ততো নাৰায ভণ্ডং ওতারেত্ৰা থেরস্স একং কোট্ঠাসং কত্ৰা – ‘‘অযং, ভন্তে, তুম্হাকং কোট্ঠাসো’’তি আহংসু। থেরো – ‘‘ময্হং ৰিসুং কোট্ঠাসকিচ্চং নত্থি, সত্থা পন তুম্হেহি দিট্ঠপুব্বো’’তি। ন দিট্ঠপুব্বো, ভন্তেতি। তেন হি ইমিনা সত্থু মণ্ডলমাল়ং করোথ, এৰং সত্থারং পস্সিস্সথাতি। তে সাধু, ভন্তেতি তেন চ কোট্ঠাসেন অত্তনো চ কোট্ঠাসেহি মণ্ডলমাল়ং কাতুং আরভিংসু।
Theropi kira tasmiṃyeva khaṇe āvajjitvā tesaṃ byasanuppattiṃ ñatvā vehāsaṃ uppatitvā sammukhe aṭṭhāsi. Amanussā theraṃ disvā ‘‘ayyo puṇṇatthero etī’’ti pakkamiṃsu, uppādikaṃ sannisīdi. Thero mā bhāyathāti te assāsetvā ‘‘kahaṃ gantukāmatthā’’ti pucchi. Bhante, amhākaṃ sakaṭṭhānameva gacchāmāti. Thero nāvaṃ phale akkamitvā ‘‘etesaṃ icchitaṭṭhānaṃ gacchatū’’ti adhiṭṭhāsi. Vāṇijā sakaṭṭhānaṃ gantvā taṃ pavattiṃ puttadārassa ārocetvā ‘‘etha theraṃ saraṇaṃ gacchāmā’’ti pañcasatā attano pañcamātugāmasatehi saddhiṃ tīsu saraṇesu patiṭṭhāya upāsakattaṃ paṭivedesuṃ. Tato nāvāya bhaṇḍaṃ otāretvā therassa ekaṃ koṭṭhāsaṃ katvā – ‘‘ayaṃ, bhante, tumhākaṃ koṭṭhāso’’ti āhaṃsu. Thero – ‘‘mayhaṃ visuṃ koṭṭhāsakiccaṃ natthi, satthā pana tumhehi diṭṭhapubbo’’ti. Na diṭṭhapubbo, bhanteti. Tena hi iminā satthu maṇḍalamāḷaṃ karotha, evaṃ satthāraṃ passissathāti. Te sādhu, bhanteti tena ca koṭṭhāsena attano ca koṭṭhāsehi maṇḍalamāḷaṃ kātuṃ ārabhiṃsu.
সত্থাপি কির আরদ্ধকালতো পট্ঠায পরিভোগং অকাসি। আরক্খমনুস্সা রত্তিং ওভাসং দিস্ৰা ‘‘মহেসক্খা দেৰতা অত্থী’’তি সঞ্ঞং করিংসু। উপাসকা মণ্ডলমাল়ঞ্চ ভিক্খুসঙ্ঘস্স চ সেনাসনানি নিট্ঠপেত্ৰা দানসম্ভারং সজ্জেত্ৰা – ‘‘কতং, ভন্তে, অম্হেহি অত্তনো কিচ্চং, সত্থারং পক্কোসথা’’তি থেরস্স আরোচেসুং। থেরো সাযন্হসমযে ইদ্ধিযা সাৰত্থিং পত্ৰা, ‘‘ভন্তে, ৰাণিজগামৰাসিনো তুম্হে দট্ঠুকামা, তেসং অনুকম্পং করোথা’’তি ভগৰন্তং যাচি। ভগৰা অধিৰাসেসি। থেরো ভগৰতো অধিৰাসনং ৰিদিত্ৰা সকট্ঠানমেৰ পচ্চাগতো।
Satthāpi kira āraddhakālato paṭṭhāya paribhogaṃ akāsi. Ārakkhamanussā rattiṃ obhāsaṃ disvā ‘‘mahesakkhā devatā atthī’’ti saññaṃ kariṃsu. Upāsakā maṇḍalamāḷañca bhikkhusaṅghassa ca senāsanāni niṭṭhapetvā dānasambhāraṃ sajjetvā – ‘‘kataṃ, bhante, amhehi attano kiccaṃ, satthāraṃ pakkosathā’’ti therassa ārocesuṃ. Thero sāyanhasamaye iddhiyā sāvatthiṃ patvā, ‘‘bhante, vāṇijagāmavāsino tumhe daṭṭhukāmā, tesaṃ anukampaṃ karothā’’ti bhagavantaṃ yāci. Bhagavā adhivāsesi. Thero bhagavato adhivāsanaṃ viditvā sakaṭṭhānameva paccāgato.
ভগৰাপি আনন্দথেরং আমন্তেসি , – ‘‘আনন্দ, স্ৰে সুনাপরন্তে ৰাণিজগামে পিণ্ডায চরিস্সাম, ত্ৰং একূনপঞ্চসতানং ভিক্খূনং সলাকং দেহী’’তি। থেরো সাধু, ভন্তেতি ভিক্খুসঙ্ঘস্স তমত্থং আরোচেত্ৰা নভচারিকা ভিক্খূ সলাকং গণ্হন্তূতি আহ। তংদিৰসং কুণ্ডধানত্থেরো পঠমং সলাকং অগ্গহেসি। ৰাণিজগামৰাসিনোপি ‘‘স্ৰে কির সত্থা আগমিস্সতী’’তি গামমজ্ঝে মণ্ডপং কত্ৰা দানগ্গং সজ্জযিংসু। ভগৰা পাতোৰ সরীরপটিজগ্গনং কত্ৰা গন্ধকুটিং পৰিসিত্ৰা ফলসমাপত্তিং অপ্পেত্ৰা নিসীদি। সক্কস্স পণ্ডুকম্বলসিলাসনং উণ্হং অহোসি। সো কিং ইদন্তি আৰজ্জেত্ৰা সত্থু সুনাপরন্তগমনং দিস্ৰা ৰিস্সকম্মং আমন্তেসি – ‘‘তাত অজ্জ ভগৰা তিমত্তানি যোজনসতানি পিণ্ডাচারং করিস্সতি, পঞ্চ কূটাগারসতানি মাপেত্ৰা জেতৰনদ্ৰারকোট্ঠমত্থকে গমনসজ্জানি কত্ৰা ঠপেহী’’তি। সো তথা অকাসি। ভগৰতো কূটাগারং চতুমুখং অহোসি, দ্ৰিন্নং অগ্গসাৰকানং দ্ৰিমুখানি, সেসানি একমুখানি। সত্থা গন্ধকুটিতো নিক্খম্ম পটিপাটিযা ঠপিতকূটাগারেসু ধুরকূটাগারং পাৰিসি। দ্ৰে অগ্গসাৰকে আদিং কত্ৰা একূনপঞ্চভিক্খুসতানিপি কূটাগারং গন্ত্ৰা নিসিন্না অহেসুং। একং তুচ্ছকূটাগারং অহোসি, পঞ্চপি কূটাগারসতানি আকাসে উপ্পতিংসু।
Bhagavāpi ānandatheraṃ āmantesi , – ‘‘ānanda, sve sunāparante vāṇijagāme piṇḍāya carissāma, tvaṃ ekūnapañcasatānaṃ bhikkhūnaṃ salākaṃ dehī’’ti. Thero sādhu, bhanteti bhikkhusaṅghassa tamatthaṃ ārocetvā nabhacārikā bhikkhū salākaṃ gaṇhantūti āha. Taṃdivasaṃ kuṇḍadhānatthero paṭhamaṃ salākaṃ aggahesi. Vāṇijagāmavāsinopi ‘‘sve kira satthā āgamissatī’’ti gāmamajjhe maṇḍapaṃ katvā dānaggaṃ sajjayiṃsu. Bhagavā pātova sarīrapaṭijagganaṃ katvā gandhakuṭiṃ pavisitvā phalasamāpattiṃ appetvā nisīdi. Sakkassa paṇḍukambalasilāsanaṃ uṇhaṃ ahosi. So kiṃ idanti āvajjetvā satthu sunāparantagamanaṃ disvā vissakammaṃ āmantesi – ‘‘tāta ajja bhagavā timattāni yojanasatāni piṇḍācāraṃ karissati, pañca kūṭāgārasatāni māpetvā jetavanadvārakoṭṭhamatthake gamanasajjāni katvā ṭhapehī’’ti. So tathā akāsi. Bhagavato kūṭāgāraṃ catumukhaṃ ahosi, dvinnaṃ aggasāvakānaṃ dvimukhāni, sesāni ekamukhāni. Satthā gandhakuṭito nikkhamma paṭipāṭiyā ṭhapitakūṭāgāresu dhurakūṭāgāraṃ pāvisi. Dve aggasāvake ādiṃ katvā ekūnapañcabhikkhusatānipi kūṭāgāraṃ gantvā nisinnā ahesuṃ. Ekaṃ tucchakūṭāgāraṃ ahosi, pañcapi kūṭāgārasatāni ākāse uppatiṃsu.
সত্থা সচ্চবন্ধপব্বতং নাম পত্ৰা কূটাগারং আকাসে ঠপেসি। তস্মিং পব্বতে সচ্চবন্ধো নাম মিচ্ছাদিট্ঠিকতাপসো মহাজনং মিচ্ছাদিট্ঠিং উগ্গণ্হাপেন্তো লাভগ্গযসগ্গপ্পত্তো হুত্ৰা ৰসতি। অব্ভন্তরে চস্স অন্তোচাটিযং পদীপো ৰিয অরহত্তস্স উপনিস্সযো জলতি। তং দিস্ৰা ধম্মমস্স কথেস্সামীতি গন্ত্ৰা ধম্মং দেসেসি। তাপসো দেসনাপরিযোসানে অরহত্তং পাপুণি, মগ্গেনেৰাস্স অভিঞ্ঞা আগতা। এহিভিক্খু হুত্ৰা ইদ্ধিমযপত্তচীৰরধরো হুত্ৰা কূটাগারং পাৰিসি।
Satthā saccabandhapabbataṃ nāma patvā kūṭāgāraṃ ākāse ṭhapesi. Tasmiṃ pabbate saccabandho nāma micchādiṭṭhikatāpaso mahājanaṃ micchādiṭṭhiṃ uggaṇhāpento lābhaggayasaggappatto hutvā vasati. Abbhantare cassa antocāṭiyaṃ padīpo viya arahattassa upanissayo jalati. Taṃ disvā dhammamassa kathessāmīti gantvā dhammaṃ desesi. Tāpaso desanāpariyosāne arahattaṃ pāpuṇi, maggenevāssa abhiññā āgatā. Ehibhikkhu hutvā iddhimayapattacīvaradharo hutvā kūṭāgāraṃ pāvisi.
ভগৰা কূটাগারগতেহি পঞ্চহি ভিক্খুসতেহি সদ্ধিং ৰাণিজগামং গন্ত্ৰা কূটাগারানি অদিস্সমানানি কত্ৰা ৰাণিজগামং পাৰিসি। ৰাণিজা বুদ্ধপ্পমুখস্স ভিক্খুসঙ্ঘস্স মহাদানং দত্ৰা সত্থারং মকুলকারামং নযিংসু। সত্থা মণ্ডলমাল়ং পাৰিসি। মহাজনো যাৰ সত্থা ভত্তদরথং পটিপস্সম্ভেতি, তাৰ পাতরাসং কত্ৰা উপোসথঙ্গানি সমাদায বহুং গন্ধঞ্চ পুপ্ফঞ্চ আদায ধম্মস্সৰনত্থায আরামং পচ্চাগমাসি। সত্থা ধম্মং দেসেসি। মহাজনস্স বন্ধনমোক্খো জাতো, মহন্তং বুদ্ধকোলাহলং অহোসি।
Bhagavā kūṭāgāragatehi pañcahi bhikkhusatehi saddhiṃ vāṇijagāmaṃ gantvā kūṭāgārāni adissamānāni katvā vāṇijagāmaṃ pāvisi. Vāṇijā buddhappamukhassa bhikkhusaṅghassa mahādānaṃ datvā satthāraṃ makulakārāmaṃ nayiṃsu. Satthā maṇḍalamāḷaṃ pāvisi. Mahājano yāva satthā bhattadarathaṃ paṭipassambheti, tāva pātarāsaṃ katvā uposathaṅgāni samādāya bahuṃ gandhañca pupphañca ādāya dhammassavanatthāya ārāmaṃ paccāgamāsi. Satthā dhammaṃ desesi. Mahājanassa bandhanamokkho jāto, mahantaṃ buddhakolāhalaṃ ahosi.
সত্থা মহাজনস্স সঙ্গহত্থং কতিপাহং তত্থেৰ ৰসি, অরুণং পন মহাগন্ধকুটিযংযেৰ উট্ঠপেসি। তত্থ কতিপাহং ৰসিত্ৰা ৰাণিজগামে পিণ্ডায চরিত্ৰা ‘‘ত্ৰং ইধেৰ ৰসাহী’’তি পুণ্ণত্থেরং নিৰত্তেত্ৰা অন্তরে নম্মদানদী নাম অত্থি, তস্সা তীরং অগমাসি। নম্মদানাগরাজা সত্থু পচ্চুগ্গমনং কত্ৰা নাগভৰনং পৰেসেত্ৰা তিণ্ণং রতনানং সক্কারং অকাসি। সত্থা তস্স ধম্মং কথেত্ৰা নাগভৰনা নিক্খমি। সো – ‘‘ময্হং, ভন্তে, পরিচরিতব্বং দেথা’’তি যাচি, ভগৰা নম্মদানদীতীরে পদচেতিযং দস্সেসি। তং ৰীচীসু আগতাসু পিধীযতি, গতাসু ৰিৰরীযতি, মহাসক্কারপ্পত্তং অহোসি। সত্থা ততো নিক্খম্ম সচ্চবন্ধপব্বতং গন্ত্ৰা সচ্চবন্ধং আহ – ‘‘তযা মহাজনো অপাযমগ্গে ওতারিতো, ত্ৰং ইধেৰ ৰসিত্ৰা এতেসং লদ্ধিং ৰিস্সজ্জাপেত্ৰা নিব্বানমগ্গে পতিট্ঠাপেহী’’তি। সোপি পরিচরিতব্বং যাচি। সত্থা ঘনপিট্ঠিপাসাণে অল্লমত্তিকপিণ্ডম্হি লঞ্ছনং ৰিয পদচেতিযং দস্সেসি, ততো জেতৰনমেৰ গতো। এতমত্থং সন্ধায তেনেৰন্তরৰস্সেনাতিআদি ৰুত্তং।
Satthā mahājanassa saṅgahatthaṃ katipāhaṃ tattheva vasi, aruṇaṃ pana mahāgandhakuṭiyaṃyeva uṭṭhapesi. Tattha katipāhaṃ vasitvā vāṇijagāme piṇḍāya caritvā ‘‘tvaṃ idheva vasāhī’’ti puṇṇattheraṃ nivattetvā antare nammadānadī nāma atthi, tassā tīraṃ agamāsi. Nammadānāgarājā satthu paccuggamanaṃ katvā nāgabhavanaṃ pavesetvā tiṇṇaṃ ratanānaṃ sakkāraṃ akāsi. Satthā tassa dhammaṃ kathetvā nāgabhavanā nikkhami. So – ‘‘mayhaṃ, bhante, paricaritabbaṃ dethā’’ti yāci, bhagavā nammadānadītīre padacetiyaṃ dassesi. Taṃ vīcīsu āgatāsu pidhīyati, gatāsu vivarīyati, mahāsakkārappattaṃ ahosi. Satthā tato nikkhamma saccabandhapabbataṃ gantvā saccabandhaṃ āha – ‘‘tayā mahājano apāyamagge otārito, tvaṃ idheva vasitvā etesaṃ laddhiṃ vissajjāpetvā nibbānamagge patiṭṭhāpehī’’ti. Sopi paricaritabbaṃ yāci. Satthā ghanapiṭṭhipāsāṇe allamattikapiṇḍamhi lañchanaṃ viya padacetiyaṃ dassesi, tato jetavanameva gato. Etamatthaṃ sandhāya tenevantaravassenātiādi vuttaṃ.
পরিনিব্বাযীতি অনুপাদিসেসায নিব্বানধাতুযা পরিনিব্বাযি। মহাজনো থেরস্স সত্ত দিৰসানি সরীরপূজং কত্ৰা বহূনি গন্ধকট্ঠানি সমোধানেত্ৰা সরীরং ঝাপেত্ৰা ধাতুযো আদায চেতিযং অকাসি। সম্বহুলা ভিক্খূতি থেরস্স আল়াহনে ঠিতভিক্খূ। সেসং সব্বত্থ উত্তানমেৰাতি।
Parinibbāyīti anupādisesāya nibbānadhātuyā parinibbāyi. Mahājano therassa satta divasāni sarīrapūjaṃ katvā bahūni gandhakaṭṭhāni samodhānetvā sarīraṃ jhāpetvā dhātuyo ādāya cetiyaṃ akāsi. Sambahulā bhikkhūti therassa āḷāhane ṭhitabhikkhū. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
পুণ্ণোৰাদসুত্তৰণ্ণনা নিট্ঠিতা।
Puṇṇovādasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. পুণ্ণোৰাদসুত্তং • 3. Puṇṇovādasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৩. পুণ্ণোৰাদসুত্তৰণ্ণনা • 3. Puṇṇovādasuttavaṇṇanā
