| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. পুপ্ফচঙ্কোটিযত্থেরঅপদানৰণ্ণনা
10. Pupphacaṅkoṭiyattheraapadānavaṇṇanā
অভীতরূপং সীহং ৰাতিআদিকং আযস্মতো পুপ্ফচঙ্কোটিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো মহাৰিভৰসম্পন্নো সত্থরি পসীদিত্ৰা পসন্নাকারং দস্সেন্তো সুৰণ্ণৰণ্ণং অনোজপুপ্ফমোচিনিত্ৰা চঙ্কোটকং পূরেত্ৰা ভগৰন্তং পূজেত্ৰা ‘‘ভগৰা , ইমস্স নিস্সন্দেন নিব্বত্তনিব্বত্তট্ঠানে সুৰণ্ণৰণ্ণো পূজনীযো হুত্ৰা নিব্বানং পাপুণেয্য’’ন্তি পত্থনমকাসি। সো তেন পুঞ্ঞকম্মেন দেৰমনুস্সেসু নিব্বত্তো সব্বত্থ পূজিতো সুৰণ্ণৰণ্ণো অভিরূপো অহোসি। সো অপরভাগে ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো ৰিপস্সনং ৰড্ঢেত্ৰা নচিরস্সেৰ অরহা অহোসি।
Abhītarūpaṃ sīhaṃ vātiādikaṃ āyasmato pupphacaṅkoṭiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto mahāvibhavasampanno satthari pasīditvā pasannākāraṃ dassento suvaṇṇavaṇṇaṃ anojapupphamocinitvā caṅkoṭakaṃ pūretvā bhagavantaṃ pūjetvā ‘‘bhagavā , imassa nissandena nibbattanibbattaṭṭhāne suvaṇṇavaṇṇo pūjanīyo hutvā nibbānaṃ pāpuṇeyya’’nti patthanamakāsi. So tena puññakammena devamanussesu nibbatto sabbattha pūjito suvaṇṇavaṇṇo abhirūpo ahosi. So aparabhāge imasmiṃ buddhuppāde vibhavasampanne ekasmiṃ kulagehe nibbatto vuddhippatto satthari pasīditvā pabbajito vipassanaṃ vaḍḍhetvā nacirasseva arahā ahosi.
৬৮-৯. সো পত্তঅরহত্তফলো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অভীতরূপং সীহং ৰাতিআদিমাহ। তত্থ সীহন্তি দ্ৰিপদচতুপ্পদাদযো সত্তে অভিভৰতি অজ্ঝোত্থরতীতি সীহো, অভীতরূপো অভীতসভাৰো, তং অভীতরূপং সীহং ইৰ নিসিন্নং পূজেসিন্তি সম্বন্ধো। পক্খীনং অগ্গং গরুল়রাজং ইৰ পৰরং উত্তমং ব্যগ্ঘরাজং ইৰ অভি ৰিসেসেন জাতং সব্বসীহানং ৰিসেসং কেসরসীহং ইৰ তিলোকস্স সরণং সিখিং সম্মাসম্বুদ্ধং। কিং ভূতং? অনেজং নিক্কিলেসং খন্ধমারাদীহি অপরাজিতং নিসিন্নং সিখিন্তি সম্বন্ধো। মারণানগ্গন্তি সব্বকিলেসানং মারণে সোসনে ৰিদ্ধংসনে অগ্গং সেট্ঠং কিলেসে মারেন্তানং পচ্চেকবুদ্ধবুদ্ধসাৰকানং ৰিজ্জমানানম্পি তেসং অগ্গন্তি অত্থো। ভিক্খুসঙ্ঘপুরক্খতং পরিৰারিতং পরিৰারেত্ৰা নিসিন্নং সিখিন্তি সম্বন্ধো।
68-9. So pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento abhītarūpaṃ sīhaṃ vātiādimāha. Tattha sīhanti dvipadacatuppadādayo satte abhibhavati ajjhottharatīti sīho, abhītarūpo abhītasabhāvo, taṃ abhītarūpaṃ sīhaṃ iva nisinnaṃ pūjesinti sambandho. Pakkhīnaṃ aggaṃ garuḷarājaṃ iva pavaraṃ uttamaṃ byaggharājaṃ iva abhi visesena jātaṃ sabbasīhānaṃ visesaṃ kesarasīhaṃ iva tilokassa saraṇaṃ sikhiṃ sammāsambuddhaṃ. Kiṃ bhūtaṃ? Anejaṃ nikkilesaṃ khandhamārādīhi aparājitaṃ nisinnaṃ sikhinti sambandho. Māraṇānagganti sabbakilesānaṃ māraṇe sosane viddhaṃsane aggaṃ seṭṭhaṃ kilese mārentānaṃ paccekabuddhabuddhasāvakānaṃ vijjamānānampi tesaṃ agganti attho. Bhikkhusaṅghapurakkhataṃ parivāritaṃ parivāretvā nisinnaṃ sikhinti sambandho.
৭০. চঙ্কোটকে ঠপেত্ৰানাতি উত্তমং অনোজপুপ্ফং করণ্ডকে পূরেত্ৰা সিখীসম্বুদ্ধং সেট্ঠং সমোকিরিং পূজেসিন্তি অত্থো।
70.Caṅkoṭake ṭhapetvānāti uttamaṃ anojapupphaṃ karaṇḍake pūretvā sikhīsambuddhaṃ seṭṭhaṃ samokiriṃ pūjesinti attho.
পুপ্ফচঙ্কোটিযত্থেরঅপদানৰণ্ণনা সমত্তা।
Pupphacaṅkoṭiyattheraapadānavaṇṇanā samattā.
সত্তমৰগ্গৰণ্ণনা সমত্তা।
Sattamavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. পুপ্ফচঙ্কোটিযত্থেরঅপদানং • 10. Pupphacaṅkoṭiyattheraapadānaṃ
