| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
10. бубпажан̇годияад̇т̇зраабад̣̇аанаван̣н̣анаа
10. Pupphacaṅkoṭiyattheraapadānavaṇṇanā
абхийд̇аруубам̣ сийхам̣ ваад̇иаад̣̇игам̣ ааяасмад̇о бубпажан̇годияад̇т̇зрасса абад̣̇аанам̣. аяамби буримаб̣уд̣̇д̇хзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о сикисса бхаг̇авад̇о гаалз згасмим̣ гулаг̇зхз ниб̣б̣ад̇д̇о вин̃н̃уд̇ам̣ бад̇д̇о махаавибхавасамбанно сад̇т̇ари басийд̣̇ид̇ваа басаннаагаарам̣ д̣̇ассзнд̇о суван̣н̣аван̣н̣ам̣ анож̇абубпаможинид̇ваа жан̇годагам̣ буурзд̇ваа бхаг̇аванд̇ам̣ бууж̇зд̇ваа ‘‘бхаг̇аваа , имасса ниссанд̣̇зна ниб̣б̣ад̇д̇аниб̣б̣ад̇д̇адтаанз суван̣н̣аван̣н̣о бууж̇анийяо худ̇ваа ниб̣б̣аанам̣ баабун̣зяяа’’нд̇и бад̇т̇анамагааси. со д̇зна бун̃н̃агаммзна д̣̇звамануссзсу ниб̣б̣ад̇д̇о саб̣б̣ад̇т̇а бууж̇ид̇о суван̣н̣аван̣н̣о абхируубо ахоси. со абарабхааг̇з имасмим̣ б̣уд̣̇д̇хуббаад̣̇з вибхавасамбаннз згасмим̣ гулаг̇зхз ниб̣б̣ад̇д̇о вуд̣̇д̇хиббад̇д̇о сад̇т̇ари басийд̣̇ид̇ваа баб̣б̣аж̇ид̇о вибассанам̣ вад̣дхзд̇ваа нажирассзва арахаа ахоси.
Abhītarūpaṃ sīhaṃ vātiādikaṃ āyasmato pupphacaṅkoṭiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto mahāvibhavasampanno satthari pasīditvā pasannākāraṃ dassento suvaṇṇavaṇṇaṃ anojapupphamocinitvā caṅkoṭakaṃ pūretvā bhagavantaṃ pūjetvā ‘‘bhagavā , imassa nissandena nibbattanibbattaṭṭhāne suvaṇṇavaṇṇo pūjanīyo hutvā nibbānaṃ pāpuṇeyya’’nti patthanamakāsi. So tena puññakammena devamanussesu nibbatto sabbattha pūjito suvaṇṇavaṇṇo abhirūpo ahosi. So aparabhāge imasmiṃ buddhuppāde vibhavasampanne ekasmiṃ kulagehe nibbatto vuddhippatto satthari pasīditvā pabbajito vipassanaṃ vaḍḍhetvā nacirasseva arahā ahosi.
68-9. со бад̇д̇аарахад̇д̇апало ад̇д̇ано буб̣б̣агаммам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о абхийд̇аруубам̣ сийхам̣ ваад̇иаад̣̇имааха. д̇ад̇т̇а сийханд̇и д̣̇вибад̣̇ажад̇уббад̣̇аад̣̇аяо сад̇д̇з абхибхавад̇и аж̇жход̇т̇арад̇ийд̇и сийхо, абхийд̇аруубо абхийд̇асабхааво, д̇ам̣ абхийд̇аруубам̣ сийхам̣ ива нисиннам̣ бууж̇зсинд̇и самб̣анд̇хо. багкийнам̣ аг̇г̇ам̣ г̇арул̣арааж̇ам̣ ива баварам̣ уд̇д̇амам̣ б̣яаг̇гхарааж̇ам̣ ива абхи висзсзна ж̇аад̇ам̣ саб̣б̣асийхаанам̣ висзсам̣ гзсарасийхам̣ ива д̇илогасса саран̣ам̣ сиким̣ саммаасамб̣уд̣̇д̇хам̣. гим̣ бхууд̇ам̣? анзж̇ам̣ ниггилзсам̣ канд̇хамаараад̣̇ийхи абарааж̇ид̇ам̣ нисиннам̣ сикинд̇и самб̣анд̇хо. мааран̣аанаг̇г̇анд̇и саб̣б̣агилзсаанам̣ мааран̣з сосанз вид̣̇д̇хам̣санз аг̇г̇ам̣ сздтам̣ гилзсз маарзнд̇аанам̣ бажжзгаб̣уд̣̇д̇хаб̣уд̣̇д̇хасаавагаанам̣ виж̇ж̇амаанаанамби д̇зсам̣ аг̇г̇анд̇и ад̇т̇о. бхигкусан̇гхабурагкад̇ам̣ бариваарид̇ам̣ бариваарзд̇ваа нисиннам̣ сикинд̇и самб̣анд̇хо.
68-9. So pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento abhītarūpaṃ sīhaṃ vātiādimāha. Tattha sīhanti dvipadacatuppadādayo satte abhibhavati ajjhottharatīti sīho, abhītarūpo abhītasabhāvo, taṃ abhītarūpaṃ sīhaṃ iva nisinnaṃ pūjesinti sambandho. Pakkhīnaṃ aggaṃ garuḷarājaṃ iva pavaraṃ uttamaṃ byaggharājaṃ iva abhi visesena jātaṃ sabbasīhānaṃ visesaṃ kesarasīhaṃ iva tilokassa saraṇaṃ sikhiṃ sammāsambuddhaṃ. Kiṃ bhūtaṃ? Anejaṃ nikkilesaṃ khandhamārādīhi aparājitaṃ nisinnaṃ sikhinti sambandho. Māraṇānagganti sabbakilesānaṃ māraṇe sosane viddhaṃsane aggaṃ seṭṭhaṃ kilese mārentānaṃ paccekabuddhabuddhasāvakānaṃ vijjamānānampi tesaṃ agganti attho. Bhikkhusaṅghapurakkhataṃ parivāritaṃ parivāretvā nisinnaṃ sikhinti sambandho.
70. жан̇годагз табзд̇ваанаад̇и уд̇д̇амам̣ анож̇абубпам̣ гаран̣д̣агз буурзд̇ваа сикийсамб̣уд̣̇д̇хам̣ сздтам̣ самогирим̣ бууж̇зсинд̇и ад̇т̇о.
70.Caṅkoṭake ṭhapetvānāti uttamaṃ anojapupphaṃ karaṇḍake pūretvā sikhīsambuddhaṃ seṭṭhaṃ samokiriṃ pūjesinti attho.
бубпажан̇годияад̇т̇зраабад̣̇аанаван̣н̣анаа самад̇д̇аа.
Pupphacaṅkoṭiyattheraapadānavaṇṇanā samattā.
сад̇д̇амаваг̇г̇аван̣н̣анаа самад̇д̇аа.
Sattamavaggavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 10. бубпажан̇годияад̇т̇зраабад̣̇аанам̣ • 10. Pupphacaṅkoṭiyattheraapadānaṃ
