| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
10. පුප්‌ඵචඞ්‌කොටියත්‌ථෙරඅපදානවණ්‌ණනා
10. Pupphacaṅkoṭiyattheraapadānavaṇṇanā
අභීතරූපං සීහං වාතිආදිකං ආයස්‌මතො පුප්‌ඵචඞ්‌කොටියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිඛිස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො මහාවිභවසම්‌පන්‌නො සත්‌ථරි පසීදිත්‌වා පසන්‌නාකාරං දස්‌සෙන්‌තො සුවණ්‌ණවණ්‌ණං අනොජපුප්‌ඵමොචිනිත්‌වා චඞ්‌කොටකං පූරෙත්‌වා භගවන්‌තං පූජෙත්‌වා ‘‘භගවා , ඉමස්‌ස නිස්‌සන්‌දෙන නිබ්‌බත්‌තනිබ්‌බත්‌තට්‌ඨානෙ සුවණ්‌ණවණ්‌ණො පූජනීයො හුත්‌වා නිබ්‌බානං පාපුණෙය්‍ය’’න්‌ති පත්‌ථනමකාසි. සො තෙන පුඤ්‌ඤකම්‌මෙන දෙවමනුස්‌සෙසු නිබ්‌බත්‌තො සබ්‌බත්‌ථ පූජිතො සුවණ්‌ණවණ්‌ණො අභිරූපො අහොසි. සො අපරභාගෙ ඉමස්‌මිං බුද්‌ධුප්‌පාදෙ විභවසම්‌පන්‌නෙ එකස්‌මිං කුලගෙහෙ නිබ්‌බත්‌තො වුද්‌ධිප්‌පත්‌තො සත්‌ථරි පසීදිත්‌වා පබ්‌බජිතො විපස්‌සනං වඩ්‌ඪෙත්‌වා නචිරස්‌සෙව අරහා අහොසි.
Abhītarūpaṃ sīhaṃ vātiādikaṃ āyasmato pupphacaṅkoṭiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle ekasmiṃ kulagehe nibbatto viññutaṃ patto mahāvibhavasampanno satthari pasīditvā pasannākāraṃ dassento suvaṇṇavaṇṇaṃ anojapupphamocinitvā caṅkoṭakaṃ pūretvā bhagavantaṃ pūjetvā ‘‘bhagavā , imassa nissandena nibbattanibbattaṭṭhāne suvaṇṇavaṇṇo pūjanīyo hutvā nibbānaṃ pāpuṇeyya’’nti patthanamakāsi. So tena puññakammena devamanussesu nibbatto sabbattha pūjito suvaṇṇavaṇṇo abhirūpo ahosi. So aparabhāge imasmiṃ buddhuppāde vibhavasampanne ekasmiṃ kulagehe nibbatto vuddhippatto satthari pasīditvā pabbajito vipassanaṃ vaḍḍhetvā nacirasseva arahā ahosi.
68-9. සො පත්‌තඅරහත්‌තඵලො අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො අභීතරූපං සීහං වාතිආදිමාහ. තත්‌ථ සීහන්‌ති ද්‌විපදචතුප්‌පදාදයො සත්‌තෙ අභිභවති අජ්‌ඣොත්‌ථරතීති සීහො, අභීතරූපො අභීතසභාවො, තං අභීතරූපං සීහං ඉව නිසින්‌නං පූජෙසින්‌ති සම්‌බන්‌ධො. පක්‌ඛීනං අග්‌ගං ගරුළරාජං ඉව පවරං උත්‌තමං බ්‍යග්‌ඝරාජං ඉව අභි විසෙසෙන ජාතං සබ්‌බසීහානං විසෙසං කෙසරසීහං ඉව තිලොකස්‌ස සරණං සිඛිං සම්‌මාසම්‌බුද්‌ධං. කිං භූතං? අනෙජං නික්‌කිලෙසං ඛන්‌ධමාරාදීහි අපරාජිතං නිසින්‌නං සිඛින්‌ති සම්‌බන්‌ධො. මාරණානග්‌ගන්‌ති සබ්‌බකිලෙසානං මාරණෙ සොසනෙ විද්‌ධංසනෙ අග්‌ගං සෙට්‌ඨං කිලෙසෙ මාරෙන්‌තානං පච්‌චෙකබුද්‌ධබුද්‌ධසාවකානං විජ්‌ජමානානම්‌පි තෙසං අග්‌ගන්‌ති අත්‌ථො. භික්‌ඛුසඞ්‌ඝපුරක්‌ඛතං පරිවාරිතං පරිවාරෙත්‌වා නිසින්‌නං සිඛින්‌ති සම්‌බන්‌ධො.
68-9. So pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento abhītarūpaṃ sīhaṃ vātiādimāha. Tattha sīhanti dvipadacatuppadādayo satte abhibhavati ajjhottharatīti sīho, abhītarūpo abhītasabhāvo, taṃ abhītarūpaṃ sīhaṃ iva nisinnaṃ pūjesinti sambandho. Pakkhīnaṃ aggaṃ garuḷarājaṃ iva pavaraṃ uttamaṃ byaggharājaṃ iva abhi visesena jātaṃ sabbasīhānaṃ visesaṃ kesarasīhaṃ iva tilokassa saraṇaṃ sikhiṃ sammāsambuddhaṃ. Kiṃ bhūtaṃ? Anejaṃ nikkilesaṃ khandhamārādīhi aparājitaṃ nisinnaṃ sikhinti sambandho. Māraṇānagganti sabbakilesānaṃ māraṇe sosane viddhaṃsane aggaṃ seṭṭhaṃ kilese mārentānaṃ paccekabuddhabuddhasāvakānaṃ vijjamānānampi tesaṃ agganti attho. Bhikkhusaṅghapurakkhataṃ parivāritaṃ parivāretvā nisinnaṃ sikhinti sambandho.
70. චඞ්‌කොටකෙ ඨපෙත්‌වානාති උත්‌තමං අනොජපුප්‌ඵං කරණ්‌ඩකෙ පූරෙත්‌වා සිඛීසම්‌බුද්‌ධං සෙට්‌ඨං සමොකිරිං පූජෙසින්‌ති අත්‌ථො.
70.Caṅkoṭake ṭhapetvānāti uttamaṃ anojapupphaṃ karaṇḍake pūretvā sikhīsambuddhaṃ seṭṭhaṃ samokiriṃ pūjesinti attho.
පුප්‌ඵචඞ්‌කොටියත්‌ථෙරඅපදානවණ්‌ණනා සමත්‌තා.
Pupphacaṅkoṭiyattheraapadānavaṇṇanā samattā.
සත්‌තමවග්‌ගවණ්‌ණනා සමත්‌තා.
Sattamavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 10. පුප්‌ඵචඞ්‌කොටියත්‌ථෙරඅපදානං • 10. Pupphacaṅkoṭiyattheraapadānaṃ
